![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F5e%2F6b%2F5e6b24ccede3eae9b03789629af15c51057b0c44%2F5e6b24ccede3eae9b03789629af15c51057b0c44.jpeg/full/!250,/0/default)
Medewe Wehin Koht!
Amwail pilipil kan pahn kasalehda iawasa kumwail pahn mihmi ie nan mour soutik, soangen paliwar dah kumwail pahn ahniki ni amwail pahn iasadahu, oh irail kan kumwail pahn mihmi ieng kohkohlahte.
Riei souleng ko, I udahn kapingki ahi kak padahk ong kumwail rahnwet. Nan sounpar me I mihloale, ehu ehu rahn kin kiheng ie mehkot me kaperen oh pil kahpwal. Wihk siluh samwalahro, I kawehla mwoasel kan en tinseweiet. Eri, ni ahi kin kesihnen oh padahkehr ni tiepene lap me tohto sang meh 100 , rahnwet I medewe me I pahn mwohdete. I kapakapki me Ngehno pahn sairiki ahi padahket nan amwail mongiong kan.
I apwtehn kasarawih ahi lel sounpar 99 [duweisek duwau] oh met tapiadahr ahi momourikier sounpar100 [epwiki]. I kin kalapw alehdi kalelapak me pid duwen momour werei. Peidek ehu me mwahusang iei “Dahme I esehlahr nan ahi momourikier sounpar epwiki?”
Sohte itar ansou rahnet ien kak sapeng peidek wet ni unsek, ahpw I kak euhkieng kumwail mehn kasukuhl me inenen kesemwpwal me I esehlahr.
I esehlahr me an Samatail Nanleng plahn ong kitail udahn kaselel, me dahme kitail wia nan mourwet udahn kesempwal, oh me en Sounkomouro tompwen dihp iei me kahrehda an Samatail Nanleng plahn kak pweida.1
Ni ahi kin peieng medek me kohsang ni olahn ahi pwupwudio, I pehmadahr kalahngan laud ong Sises Krais oh kisakis kopwuriamwei me sang Sapwellime Tomwpen dihpo. Medewe ire wet! Sounkomouro lokolongki “medek oh kahpwal oh soangen kasongosong kei”2 pwe En kak koaloalamwahwih kitail, kamwahuih kitailla, sewesei kitailda nan ansou en anahn akan.3 Sises Krais ketin kawehwehdahr Sapwellime lokolok nan Kedsemeni oh pohn Kalpweri: “Medek laud me I ahniki, Koht mwonok, me lapalap sang koaros, Eh ketin rerikihda pwehki weirek laud, oh inta ah kusiei nan pwoahr koaros.”4 Ahi ohlau kahredahr ahi kin kalapw medewe “uwen lapalap en me Keioun Sarawi nan Israel.”5 Erein ahi wie mwamwahula, Kauno ketin kasaledahr Sapwellime manaman ni meleilei oh mwohmw sansal kei.
Pwehki Sapwellimen Sises Krais Tomwpen Dihpo, sapwelimen Samatail Nanleng plahn en komour o udahn unsek! Ma kitail wehwehki duwen sapwellimen Koht plahn kaselelo soangen sawehwe koaros pahn kohsang nan mour met oh me kohkohdoh. E kin mweidehng emen emen kitail en pilada ia mwomwen atail pahn mour pohn sampah oh iawasa kitail pahn mihmi ie kohkohlahte. Soangen madamadau sapwung ehu me kitail pahn “kamadipw, sakau, oh pereperen, pwe lakapw pali kitail pahn mehla; oh e pahn mwahu ong kitail”6 iei ehu likamw me mie nan sampah wet.
Iet ih rongamwahu en Sapwellimen Koht plahn kaselel o: soahng kan me pahn kak wiahieng amwail mour en wia mour mwahu ehu e kak udahn duepenehte mehkot kei me pahn sewese kiheng kumwail mour soutik me pahn keioun mwahu e kak wiahla! Rahnwet, pwehn sewesei kumwail en kak alehdi kapai laud kan me Samatail Nanleng kolokol ong kumwail, I lukei kumwail en alehda kaiahn en “medemedewe wehin Koht!”7 Medemedewe wehin Koht wehwehki amwail madamadau en kin men alehdi oh idawehn kaweid en Ngehno. Kitail pil kasukuhl sang Soukohp Seikop en nan Pwuken Mormon me “momourki palingehn iei mour soutik.”8
Mourwet wia wasahn kasukuhl kaselel en kak esehla pilada soahng kan me keiou kesempwal ong mour soutik. Me nohn tohto aramas me kin medewe me ihte mouren met. Ahpw, amwail pilipil kan rahnwet pahn kasalehda soahng siluh: iawasa kumwail pahn mihmi ie nan mour soutik, soangen paliwar dah me kumwail pahn ahniki ni amwail pahn iasadahu, oh irail kan me keumwail pahn mihmi ieng erein. Eri medewe wehin Koht.
Ahi tepin kosoi ni ahi wia Preseden en Mwomwohdiso wet, I kangoangehkin kumwail en tepida medewe imwin rahno nan amwail madamadau kan. Met wehwehki kiheng wehin Koht en wia mehkot me kumwail en koadoahke kohkohlahte oh kumwail en medewe mwahu iawasa amwail koasoandi kan pahn kiheng kumwail nan mour en mwuhr.9
Kauno ketin padahngkieng kitail me ihte ohl oh lih me katengtengdi nan tehnpas sarawi, oh kolokol arail inou kan, me pahn mihmi pene nan mour soutik. E ketin mahsaniher: “Koaros inou sarawi, kontirak, ehupene, kepwukoa, kahula, kehkehlik, kemwekid, minimin, de kesikpeh kan, me sohte wiawihda oh katengtengdi sang Ngehn Sarawi en inouo … pahn imwsekila ni ansou me aramas pahn mehla.”10
Eri, ma kitail ni sohte ahneki marain pilada kitail en momouriki kosonned akan en delesdiel kan met, kitail pil piladahr kitail en iasada ahniki paliwar soutik en delesdiel de dake kesiluh en wehin Koht. Kitail piladahr en sohte mihmi rehn atail peneinei kan kohkohlahte.
Eri, riei souleng kan, ia mwomwe oh iawasa oh ihs me kumwail men mihmieng kohkohlahte? Kumwail me pahn pilada.11
Ni ansou me kumwail pahn kin wia amwail pilipil, I lukei kumwail en medewe amwail mouren ehu rahn—kilkilenglahng mour soutik. Kiheng Sises Krais mwohn mehkoaros, pwe amwail mour soutik pahn sang ni amwail pwoson Ih oh Sapwellime Tomwpen dihp o.12 E pil pahn sang amwail peik ong Sapwellime kosonned akan. Peik kin kaunop eng kumwail ahl en peren nan amwail mour kan rahn wet oh kisakis laud, soutik ong kumwail lakapw.
Ni ansou me kumwail kin sohpai kahpwal, kumwail kin medewe wehin Koht! Ni amwail kin lelohng kasongosong kan, medewe wehin Koht! Ni ansou me mour oh kempokepahmwail kan kin kaluwetei kumwailla, medewe wehin Koht! Ni ansou me emen aramas kin mwadang mehla, medewe wehin Koht! Ni ansou me emen aramas kin ahniki soumwahu laud, medewe wehin Koht! Ni ansou me amwail mour kin toutoula, medewe wehin Koht! Ni amwail mwamwahula sang aksiden de ohla, duehte me I wia met, medewe wehin Koht!
Ni amwail pahn nantiheng kin medemedewe wehin Koht, kasik kaupehkan me kumwail pahn lelehng.13 Sounpar tohto samwalahro, iengei men kauwehkin ie me dene “tehnpas sarawi nohn laudla” rehi, oh ai kaun tohto me kaloke ie pwehki dahme I kamehlele. I kamehlele, mendahte dahme irail indahkoa, me medemedewe wehin Koht kalaudehla ahi pelien doadoahk o.
Ni amwail pahn kin medewe wehin Koht, amwail mongiong pahn ekis ekis wekila. Kumwail pahn kin men kapakap pak tohto oh mehleleki soahng kan kumwail kapakapki. Menlau dehr wiahda amwail kapakap en duwehte keirekdien soahng kan ke pahn pwainda nan sidohwa. Sapwellimen Kauno kairohir deisang amwail loalokong. Sapwellime pasepeng ong amwail kapakap kan kak kapwuriamweih kumwail oh pahn sewesei kumwail medewe wehin Koht.
Medewe sapwellimen Kauno pasapeng ong Sosep Smith ansou me e peki sawas nan Kalapwuhs en Liberty. Kauno padahkiong Soukohp o me kahpwal me wiewiawi ong ih pahn kiong ih koahiek oh mwahu ong pein ih.14 “Ma ke pahn nantiehngete momourki mwahu,” Kauno inoukiong, “Koht pahn ketin kasapwil kumwailda.”15 Kauno padapadahkiong Sosep en medewe selesdiel oh en medewe kisakis soutik o sang medewehte kalokolok en nan rahno. Atail kapakap kan kak—oh anahne wia —wehwepene kei ong Samatail Nanleng.
Ni amwail medewe wehin Koht, kumwail pahn kin soikala soahng koaros me kin kihsang amwail mehn pilipil. Soangen mehkot me kumwail sohte kakasang—me kakete mwadong, mwadongki mwohni, pweipwand, mehn kasahliel kan, mehn koalitopw, lingeringer, kilel suwed, nenek, de pil mwenge—kin uhwong Koht. Pwehda? Pwehki amwail inoang kin wiahla amwail koht. Kumwail kilengwohng dahme kumwail tengediengehr osang ong Ihong koalolamwahu. Ma mie mehkiot me kumwail solahr kakasang, rapahki sawas en pali ngehn oh sawas en semen kan. Menlau ieremen mweidohng mehkot me kumwail sohte kakasang en kauhdihsang kumwail amwail saledek en idawehn sapwellimen Koht pilahn kaselel o.
Medmedewe wehin Koht pahn pil sewese kumwail en kapwaiada kosonned en mwakelekel. Me malaulau me pahn kauwehla amwail mour mwadangasang kawehla kosonned sarawi wet. Ong koaros me wiadahr inou sarawi kan ong Koht, mour suwed iei ehu ahl mwadang en soikala amwail kadehde.
Me tohto en tepelo ah mehn kasongsong laud kan iangahki kawehla kosonned en mwakelekel. Manaman en wiahda mour iei ehu pwukoah sarawi me Samatail Nanleng mweidohng Sapwellime seri kan en kin doadoahngki. Kahrehda, Koht ketin kilelehdi mehn kaweid sansal kei ong doadoahngki duwen manaman sarawi wet. Tuhpene en paliwar iei ohngete ohl oh lih me kopwopwoud ong emen emen.
Pali laud en sampah sohte kamehlele met, ahpw madamadau en wehi pokon sohte wia soun kapwungala me mehlel. Kauno masaniher me sohte aramas samin pahn iang pidelong nan wein selesdiel. Eri ansou me kumwail pahn wiahda pilipil kan me pid mwakelekel, menlau medewe selesdiel. Oh ma kumwail saminlahr, I peki rehmwail en koluhla. Kohdo rehn Krais oh alehda Sapwellime inou en mahk unsek ni amwail pahn koluhkihla unsek dipamwail kan.16
Ni amwail medewe wehin Koht, kumwail pahn kilang kahpwal oh lokolok kan nan ehu marain kapw. Ansou me emen kumwail poakohng pahn uhwong mehlel o, medewe wehin Koht, oh dehr kapeidak amwail kadehde. Wahnpoaron Paul kohpada me “ekei aramas pahn kesehla arail pwoson ni imwin ahnsou kan; irail pahn peikiong ngehn likamw akan oh idawehn padahk en ngehn suwed akan.”17
Sohte imwin en me kin uhwong o ah likamw akan. Menlau kounopada. Ieremen ale kaweid sang irail akan me sohte kamehlele. Rapahki kaweid sang irail kan me ke koapwoaroapwoarki—sang soukohp akan, soun kairoir kan, oh soun kaudiahl kan oh sang ni mwenginingin kan en Ngehn Sarawi, me “pahn kasalehiong kumwail koaros me kumwail anahne wia.”18 Menlau wia doadoahk en ngehno pwe en kalaudehla amwail koahiek en alehdi pein amwail kaudiahl.19
Ni amwail pahn medewe wehin Koht, amwail pwoson pahn laudla. Ansou me I wia tohn doadoahk pwulopwl men, pweinei kin mihmi tala 15 [eisek limau] sounpwong ehu. Ehu pwohngo, ai pwoud Dantzel idek rehi ma I kin pwainki ai meiroang sang ni kisin pweinei o. I sohte kin wia. I mwadangete koluhla oh tapihada pwain ai meiroang en tala 1.50 [ehu elep] nan sounpwong kan.
Mwomwohdiso wekila pwehki sang ni aht kalaudehla atail meiroang kan? Ni mehlelo soh. Ahpw, ahi wiahla emen me kin pwain-meiroang ansou koaros wekid iehla. Ih ansou me I esehla me pwain meiroang pidada pwoson, kaidehn mwohni. Ni ei wiahla soun pwain-meiroang unsek men, wenihmwtok kan en nanleng tepida ritida ong ie. I kamehlele I alehdi soangen pwukoah doadohk tohto pwehki aht nantiheng mehlel ong pwain meiroang.20
Pwain meiroang anahne pwoson, oh e pil kin kalaudehla pwoson Koht oh Sapwellime Iehroso.
Pilada kumwail en momouriki mour me mwakelekel nan sampah me mour suwed oh widing laud kin kairada pwoson.
Kohla oh mihmi nan tehnpas sarawi pak tohto pil kin kairada pwoson. Oh amwail papah oh kaudek nan tehnpas sarawi pahn sewesei kumwail en medewe wehin Koht. Tehnpas sarawi iei wasahn kaudiahl. Wasahu kumwail kasukuhlki ia mwomwen amwail pahn doadoahk lahng mour en selesdiel. Wasahu kumwail pahn karanihla Sounkomour o oh alehdi sapwellime kehlail ong Sapwellime manaman. Wasahu kumwail pahn alehdi kaweid en kapwungala kahpwal akan nan amwail mour, pil iangahki amwail kahpwal me inenen laud akan.
Tiahk sarawi kan oh inou kan en tehnpas sarawi wia mwekid kesempwal ong mour soutik. Se pahn doulahte kauwada tehnpas sarawi kan pwe en wiahda pwukoah sarawi kan nan mour en emen emen. Se kapingki aht pakairki aht koasoandi kan en kauwada ehu tehnpas sarawi nan wasa 20 [rieisek] pwukat:
-
Savai’i, Samoa
-
Cancún, Mexico
-
Piura, Peru
-
Huancayo, Peru
-
Viña del Mar, Chile
-
Goiânia, Brazil
-
João Pessoa, Brazil
-
Calabar, Nigeria
-
Cape Coast, Ghana
-
Luanda, Angola
-
Mbuji-Mayi, Democratic Republic of the Congo
-
Laoag, Philippines
-
Osaka, Japan
-
Kahului, Maui, Hawaii
-
Fairbanks, Alaska
-
Vancouver, Washington
-
Colorado Springs, Colorado
-
Tulsa, Oklahoma
-
Roanoke, Virginia
-
Ulaanbaatar, Mongolia
Kauno ketin kawkaweid kin kitail en kauwada tehnpas sarawi pwukat pwe en sewese kitail en medewe wehin Koht. Koht ketin ieias. Sises iei ihme Krais. Sapwellime Mwomwohdiso kopwurupwurdohr pwe en kapaiada koaros sapwellimen Koht seri kan. I kadehde mepwukat ni mwahr sarawi en Sises Krais, ahmen.