Tin nibe Thogthog Nag e Thothup
Fare Kan ni Thothup nima par rodad ni gubin e rran e ir reb fare tawa’ath ni th’abi ga’ nibay ko Gidii’en Got ko Tin Tomur e Rran ni gadad ma falfalaen’ ngay.
Tabolngin I Morngaʼagen
De n’ew napan ngay, ma bo’or e gidii’ nikar sapgad ko fare 2023 FIFA ko Women’s World Cup, nike buch u Australia nge New Zealand. Gidii’ nib cheag ko gosgos ni yib nib e pag 200 e national team u daken e fayleng ni ga’angin nikar daged ngodad gelnginrad, tin ni yad ba salap riy, nge athleticism napan ni kar gosgos ko bin th’abi ga’ fan e liyor ko soccer u feyleng.
Kad guyed e gidii’ nib cheag ko pi sport ney nge boch nikar mada’ niged e tin ni th’abi tplang e level nibay. Gadad ma weliy murunga’agen fapi tawa’ath nike pii’ Got ngoraed. Tiney e mu’un fapi tawa’ath ngay ko churu’, gymnastics, music, art, drama, mathematics, science, nge ku boch. Gubin bee’ ma dag e tawa’ath Got ke pii’ ngak ni kar ga’ nag ufithik’ e muruwel’, fil, nge guy rogon. Tawa’ath Got nike pii ra fal’eg e gidii’ nib cheag.
Ga’ Nag e pi Tawa’ath nib Thothup
Me sap ko pi’nen nifan ko gospel, Got ma pii’ e bitir rok’ e pi tawa’ath nib thothup, ni ngar manged e gidi’ nibay e tawa’ath nib thothup. Pi chongin ko Galasia ni kar fal’eg e m’ag be thapeg e pi tawa’ath ko fare Ya’el, me tay e bu’un e mich ko Yesus Kristus ni’ir e Tathapeg, tawa’ath ko fare Kan ni Thothup, tawa’ath ko mich ni nge golnag e bee’ nge thapeg e golnag, tawa’ath ni nge nang e pi’nen nib baen, Tawa’ath ni nge thapeg e ma’ang’ang, nge fare tawa’ath ko ganop nge nangfan.1 Fare Somoel me pinningdad ni ngad guyed e tawa’ath nib th’abi ga’, e pi tawa’ath nib thothup. Ni ra pii’ fapi tawa’ath nib thothup ni nge tawa’ath nag dad nge tawa’ath nag reb e bee’.2
Gu sul ko e gidii’ nib cheag ko pi’nen, reb mangil ni ngad nanged fan kemus e tawa’ath de fal’eg e cha’ nib salip. Ya aram rogon ko salip nib th’abi mangil, ma ufithik’ e muruwel’ nge guy rogon ni ra gelnag e salip rorad ni ngar mang nib th’abi mangil ko salipy rorad. Ya pi tawa’ath nem nike yib ni dani upnguy e ma yib ko e pi thin ney ni “thingari rrin’ bochi e muruwel’.”
Boed, kug sap e magawon ko fil murunga’agen e pi tawa’ath nib thothup. Rrin’ e pi tawa’ath nib thothup bat’uf ni ngam gel nag e pi’nen ko Ya’el. “Bay e fonow ko fare Kan ni Thothup ulan e yafos bat’uf e muruwel’ ko ya’el. Ya biney ma tay e bu’un e meybil nib gel nge fil ko fapi scripture. Ma kub un me tay e bu’un ni ra fol e pi micheg nge motochiyl rok’ Got. … Me tay e bu’un ko thapeg e sacrament gubin e wiik.”3
Mang e pi wa’amgin e muruwel nag fare tawa’ath nib thothup? Mu’un fapi thogthog ngay nibe yib ko Thothup nima ayuwegdad ko tin nib tu’uf rodaed me dag ngodaed e tin ni ngad rrin’ed min nog nge fapi tawa’ath ko gapas. Napan ni ngad motoyilgad nge rrin’ed e pi’ney nibe thogthog nag e thothup, fare Kan ni Thothup ma ga’ nag dad ni ngad rrin’ed pi’nen nib th’abi ga’. Fapi tawa’ath nib thothup nib mangil nira ayuwegdad ulan e yafos rodad.4
Fare Kan ni Thothup nima par rodad ni gubin e rran e ir reb fare tawa’ath ni th’abi ga’ nibay ko Gidii’en Got ko Tin Tomur e Rran ni gadad ma falfalaen’ ngay.
Uw fani gaa’fan e tawa’ath ney? President Russell M. Nelson ke fulweg e duwer ney napan ni keyog ”u fapi rran ni bay yib, dabiyoeg ningan fas e ya’el ko bee’ fa’an dariy’ e powiy’, fanow, golnag, fa ayuw ko fare Kan Thothup.”5
Urogon ni Ngam Pinning nge Nanged fan e Yi’iy ko Ya’el
Uthilin e muruwel’ rog, kug sap gubin e gidii’ ni ba’adag urogon ni ngar pinning nge nanged e yi’iy rok’ e Ya’el. Pi yi’iy rok’ Ya’el me rib fel’ nge yib u boch e rogon. Gadaed e, kan, tawa’ath nag dad ni bay fapi thin ko profet rodaed, tin ni kakrom nge tin ni chiney, ni ma pii’ e gonopp ko murunga’agen e rogon ni ngad thapeged fare Thothup.
Gube pii’ aningeg e kenggin e yalen ni ra ayuwegmed ni ngam pinning nge nanged fan e yi’iy rok’ Ya’el.
Sak’iy u Lane Gin Nib Thothup
Bin somm’on ni ngam sak’iy u lane gin nib thothup.6 Kug un ko far open house ko fare Temple u Tokyo Japan. Fare fulweg nifan e pinning ngak e gidii’ nu media nge VIP e rib bo’or mab fel’ ko tin nikan tafney nag. Pi miri’ay e gidii’ kar un’ed e powi’iy ko temple nem. Gidii’ kar ba’adag e fel’ ya’an ko fare temple, me tay bu’un e ya’an nge sasing ni bay e yalen ko Japan. Ma rib ga’ e thamey nge liyor rok’ e gidii’ napan ni kar rungan’ e gam’ing nifan e gidii’ ni kakrom ulan e seenggil ni ra buch. Machane ni rib ga’ e thamey e be yib ko fare Kan ni Thothup.
Ta’areb e ngiyal’ ney ke buch ko e tiyugang’ ko am ni dabgu pagtalin. Tomuren e ngiyal’ ko lemnag ulan fare seenggil nib celestial, ni bay nib ga’ e thamey ni key kathkath ngog, “Be thil e nifeng gube pogofan ura’.” Kug nang ni ke guy rogon ni nge weliy e thamey ko fare Kan ni Thothup, ni, be, paer ulan e tafen nib thothup. Fa’anra gabe’adag ni ngam thamey fare Ya’el, mu pared ulan e tafen e rayog ni nge paer fare Ya’el.
Pi temple nge na’un e rib thothup e tafen ulangin nem. U langgin ma rib mom ni ngan pinning min poy fare Tothup. Reb e pi tafen nib thothup e mu’un tigil’ e mo’olung ngay, na’un ko seminary nge institute, nge pi nam ko chepin ko Galasia nge pi visitor center. Sak’iy u lane gin nib thothup.
Sak’iy nga Gidii’ Nib Thothup
Bin l’agruw, mu un u fithik’ e gidii’ nib thothup. Bay gu weliy e bin l’agruw i yalen e biney ko reb e tafney nike buch.
Dabgu pagtalin ni kug ayuweg e mo’olung nike buch ulane tafen ko sport. Bo’or, yay fare tafen ney be sug ko gidii’ nibe tolul ngak e sport team rorad nge tugthin ngak e sport team ni dabun. Machane u neap’ ney, rib thil e thamey ney. Fare tafen ney nike sug ko biyu’ e gidii’ nib yangren ni kar kunuy uta’abong nifan e liyor ko e yafos rok fare Profet Joseph Smith. Gapas rorad, bachigchig lam’rad; ba’adag nge gum’ircha’rad; nib meybil kar sug nag e tafen ney ko fare Ya’el nib Thothup. Rayog ni kug sap biney u oewchraed. Ireray e tawa’ath ko fare Kan ni Thothup ni be muruwel, nibe gelnag e mich nifan Joseph Smith nge fare gospel nikan Sulweg yarmen.
Ya dakiyog ni nge tileg fare Ya’el ni nge yib nga kunuy ko gidii’ nib thothup. Fa’anra gaba’adag ni ngam thamiy fare Thothup, par u fithik’ e gidii’ nib mom nira yib fare Thothup ngoraed. Ke weliy fare Tathapeg biney e rogon: “Gin nike mukun la’agruw fa dalip nga ta’abang u dakean fithngag, gubay u rom u fithik raed.”7 Nifan e gidii’ nib yangren, mu lemniged morunga’agen e gidii’ romed nib thothup, pi quorum nge class, FSY nge seminary, gosgos ko ward nge stake—nge ward choir. Mel’eg ni ngam pared ngak e gidii’ nge yaen nga e pi tafen e rayog ni ngam pir’eged e tin nib mangil. Mu gay gelngim ko fapi matha’ag. Mu gay e tafagaer nib fel’. Mang reb e tafagaer nib fel’. Ayuwegmed ndemuturug ko gin ni gamed bay riy. Sak’iy nga gidii’ nib thothup.
Pii’ e Mich nifan e Pi’nen Riyul nib Thothup
Bin dalip, pii’ e mich morunga’agen e pi’nen riyul nib thothup ni rayog rom. Fare Tamocho’ e gubin ngiyal’ nima pii’ e lam napan ni ngad noned e mich. Fare Thothup e ma micheg ko gidii’ nibe non nge gidii’ nibe motoyil nib chuchugur rogon.
Gube puguran e ngiyal’ kug fek e taxi ko 45 minute ulan New York City. Sabathin gow facha’ nibe kol e yap ni gamow be weliy mornga’agen e gospel nibe pii’ e ride ngog nga airport, ku pii’ pilwon mugu waen nga wuru’ fare taxi. Fini yib nga’nug ni dawrug weliy e mich rog ko tin ni ku mu’ i weliy. Kug soen, kug pii’, e mich rog nib moem, ni pinning fare Thothup ni fek e luu’ nga owchmow.
Napan ni ngam sap nge fek’ e ngiyal’ ni ngam pii’ e mich romed ngak e gidii’, gara fal’eged e ngiyal’ ni ngam pir’eged e Ya’el nifan ngomed.
Mmotoyil ko fare Kan ni Thothup
Fare bin tomur e yalen ire motoyil gad ngak fare Kan ni Thothup Rayog ni nge paer rodad ni gubin ngiyal’, machane nira non nib achigchig, ni math lam. Fare profet Elijah nike fil fare lam Somoel de moy ulan e nifeng, fare durru’ fa yib ba nifiy machane “me yib ba lam ni be kathkath.”8 Gathi “e lam ni boed ga’angin lingan e dirra’” ma ir e “balam nib sumunguy mab achig, ni gowa ba kathkath, ma be rich nga laniyaen’ raed.”9
President Boyd K. Packer keyog: “Fare Ya’el dabi fek e mmotoyil rodad napan ni nge tolul nge rurug ngodad. Ara ni ma kathkath. Kan rrin’ nib sumunguy ni fa’an dabda mmotoyil gad ma dabda thameyed.”10 Kug nang ni bochi yay e Lam ni rib sumunguy, fa kug rrin’ bo’or e pi’nen, e bee’ nib t’uf rog me fek biney nifan ngog. Bo’or yay ni fapi thogthog nibe yib ko Kan ni Thothup e ma yib rok le’engig, Lesa. Galibthir nib mat’aw fa tiyugang’ e rayog ni ngar thapeged e fonow ko yi’iy ni fan ngom.
Fare lingan, tolul, nge togopluw ni bay ulangin e feyleng ra gelnag e yi’iy nib sumuguy nib kathkath rok’ fare Kan ni Thothup. Mu pir’eg e tafen nib math lam, nib thothup e rayog ni ngam thapeg e fonow ko Thothup.
Boech e Thin ni ngan Tin’uy Ngay
Napan ni ngam lemniged morunga’age e pi yalen ney ni ngam pinning mag poy fare Thothup, mu lemnag morunga’agen e pi thin ney ni ma ayuwegmed.11
Sikeng e pi yi’iy ni ra thapeg. Wod, tin nima yib ko Thothup era ta’areb ko fapi chep nib thothup nge thin ko pi profet nib fos.
Mu lemnag e pi’nen nira thameyed ma fol nib mangil ko e muruwel’ rom. Fa’an ni dabi thapeg e matawon, yi’iy rok’ e Ya’el dabi yib ngom nifan reb e bee’.
Dabiyog ni ngam gagyeg nag e pi’nen ko ya’el. Rangam fal’eg e thamtham nge tafen nib fel’ nira pinning fare Ya’el, nge rangam t’aer midlen ngomed, machane dabiyog ni ngam gagyeg nag urogon fa ngiyal’ nira yib e yi’iy. Mu soen nge pagan’um nira thapeg e pi’nen ni bat’uf napan ra yib e ngiyal’ nib mat’aw.
Fanay e pufthin rom nib mat’aw. Bochiyay gadad ba’adag ni ngad thapeged e powi’iy rok Ya’el nifan gubin ban’en. Machane, bo’or yay fare Somoel ba’adag ni ngad fanay e ganop nge ngongol nib fel’ ufithik e ganop rodad. President Dallin H. Oaks e fil ni ga’ar:
“Ba’adag rodad ni ngad fol e Somoel ire mangil, machane thingari rrin’ ufithik’ e nangfan ni Chitamangiy nu Tharmiy ma pii’ ngodad bo’or e rogon ni ngad mel’eged nifan ngodad. … Pi’in nima guyed rogon ni ngar pii’ gubin e mel’eg ngak fare Somoel nge wenig nag ngak nifan e yi’iy ko gubin e mel’eg ni ra pir’eged e ngiyal’ nira meybil nifan e powi’iy nge dabi thapeg. …
“Gadad bat’uf ni ngad lemniged morunga’agen e pi’nen ulan e tafney rodad. … Me tomuren thingarda meybil nifan e powi’iy nge rrin’ed e rogon. … Fa’an dabda thapeged e fonow, thingarda rrin’ed e rogon udakaen e pufthin rodad nib mat’aw.”12
Ning udakaen e Pinning
Gu ning, Gidii’en Got ko Tin Tomur e Rran e susun nibay e tawa’ath roraed, ni fapi gidii’ nima thapeged e micheg. Machane, thingarda pir’eged nge fanay e tawa’ath nib thothup nge pinning nge fil’ed urogon ni ngad nanged e yi’iy rok’ fare Thothup. Aningeg e yalen nima ayuweg ngodad ulan e milekag ko ya’el ni:
-
Sak’iy u lane gin nib thothup.
-
Sak’iy nga gidii’ nib thothup.
-
Pii’ e mich nifan e pi’nen riyul nib thothup.
-
Mmotoyil ko fare Kan ni Thothup.
Rogon romed ni ngam pinning nge nanged fan e yi’iy ko ya’el ra gelnag buchuw ngo buchuw. “Rogon ni ngam nang e thin rok’ Ya’el e boed rogon ni ngam fil’ reb e thin ko nam. Nira buch buchuw ngo buchuw me t’uf e ngongol nib l’agaen’ nge gum’aen’.”13
Gu sul ko bin somm’on e non rodad, wenig ni ngam pugurangad ni gimed e Gidii’en Got ko Tin Tomur e Rran ni bay e tawa’ath. Lemnag morunga’agen e ya’an ney ko fast Sunday, e bee’ nike weliy ngog. Bay e pagal, nike sakiy nga lang e chiya’, dabiyog ni ngam guy e cha’ney u pulpit. Chitimangen ke sakiy’ chuchugur ngak ,ni ke pii’ athamgil ngak nge ayuwegen udakaen e kathkath u teel ngak napan ni ke yoeg, “I gag e bitir ku Got.”
Bin magid e mich ni ke yib rok’ e cha’ nib yangren nike tabab ko: “Gube athap bay e biney nima kathkath u liig woed biney.” Me yib ngak e yi’iy nge ke pii’ e mich ni, “Bay e cha’ nima kathkath ngog woed biney—fare Kan ni Thothup!”
Nggu mu’nag e numon rog ni pong rog e rib ga’fan ko fal’yangren! Bo’or gamed ni ngam tabab e rran romed ni ma sakiy ngadakaen e theerek. Gabul, biney e wiik, biney e duw, gubin, mu soen napan ni ngam sap ngomed ulan e therrek. Mu lemnag, fa yoeged fa’an ni gamed ba’adag: “Riyul’, sap ngog! I gag e gub cheag! I gag e bitir ku Got! Irma nang marunga’ageg! Gub t’uf Rok! Bay e tawa’ath rog—ko fare Kan ni Thothup nima ayuwegeg gubin fen!”
Gube pii’ e mich rog ngomed, pi Gidii’en Got ko Tin Tomur e Rran ni bay e tawa’ath, murunga’agen Got fare Chitamangiy, Yesus Kristus, nge fare Kan ni Thothup, nima yog nra micheged ni’ir. U dakean fithngan Yesus Kristus, amen.