Fare Gelngin e Sealing
Fare gelngin ko sealing ke bing wo’en e thap ngak e gidii’ nge n’uf ngalang ko falfalaen’ ni fan e tabinaew ni bay nifan ngak pi fak Got.
Kan profesy nag ko napan e ngiyal’ rok Isaiah1 napan nra taw ko tomur riy, ma gidii’en Somoel ni kakrom, fapi gidii’ rok Isreal, e susun ni “yira kunuy raed nga ta’abang, u daken fapi donguuch ko day, ko aningeg yag e tobthung ko fayleng”2 mon mu’ulung nag raed “ni ngar sulod nga taferad.”3 President Russell M. Nelson e gathi ta’ab biyay nike non ni mornga’agen e biney e mukun, ke pining fithingan e ran’ey ni fare “bin th’abi ga’fan e n’en nibe buch u fayleng e dabay.”4
Mang fan e biney e mukun?
Reb e yi’iy nthogthog nag ngak Profet Joseph Smith, Somoel e guy ni ta’areb fan e biney ni ngeyag ni yiroriy fapi gidii’ nibay u tan fare m’ag rok’. Ga’ar, “Fare mukun u daken e but’ u Zion, nge daken fapi stake ni bay, e [bay] nifan e nge yiroriy ir, nge tigil’ e gif ko ngiyal’ e yikoq, nge damomuw ni bay ni po’og nge daken e fayleng ni ga’angin ni dabi mathuk ko tiney.”5 “Damomuw” rogon ni kan nang fan ko biney e tin nira buch ko fayleng ni bachan e gidii’ ni da kir fol ko fapi motochiyel ku Got.
Bin th’abi ga’fan, fare mukun e fan ni ngayag ni fek fapi tawa’ath ko thapeg nag nge n’uf ngalang ko falfalaen’ ngak e pi’in nira fanay. Arram rogon ni nang fan fapi tawa’ath ko m’ag ni pii’ ngak Abraham. Somoel e yog ngak Abraham ni u daken pifak nge priesthood rok’ ni “gubin e tabinaw ko fayleng e [susu] ni yira tawa’ath nag, nib mu’un ko tawa’ath ko Gospel ngay, ni irerram fapi twa’ath ko thap ngay, ko yafos ni manimus.”6 President Nelson e weliy e biney ni: “Napan ni gadadra fanay fare gospel min tawfe nag daed, ma arram nikad feked nga dakaen daed fithingan Yesus Kristus nib thothup. Tawfe e ir fare yiror nima ayuwegney ngan thapeg fapi tawa’ath ni kakrom ni pii’ Somoel ngak Abraham, Isaak, Jakob, nge pifakraed.”7
Napan e 1836, yib i m’ug Moses ngak fare Prophet Joseph Smith ulan fare Temple u Kirtland me “pii’ ngak … fapi kiy ko mukun nag pi u Isreal u aningeg yang u barba’ e fayleng.”8 Ko ngiyal’ nem, me yib i mug Elias me, “pii’ fare mfen ko gospel ku Abraham, ni be yoeg ni u langimaed nge pifakdaed, ma gubin ea mfen ni ra yib ea rani towa’ath nag.”9 Bachan e biney e mat’won, arram fan ni bay e gospel ku Yesus Kristus rodaed—wo’en e bayul rok’—nifan e gidii’ ni gubin nge gubin yang u daken e fayleng nira kunuy ko fare m’ag ko gospel. Mi yad mang “pi fak ni pifak pifak e bitir rok Abraham, nge fare galasia nge gil’iungun, nge fare Got ni kan mel’eg.”10
Ko ngiyal’ nem ulan fare Temple u Kirtland, ma ku bay reb ni bin dalip e awfeg e thin nu tharmiy ni yib i m’ug ngak Joseph Smith nge Oliver Cowdery. Gube non ni mornga’agen fare profet Elijah, ni fapi mat’woy nge fapi kiy ni fulweg ni’ir e gu ba’adag ni ngu weliy mornga’agen e daba’.11 Fare gelngin ni ngan fanay fapi gam’ing ko gubin mit e priesthood min m’ag u fayleng nge tharmiy—fare gelngin e sealing—e rib ga’fan ko fare mukun nge fal’ag rogon ko fapi gidii’ ko m’ag nibay u l’agruw raba’ fare veil.
Boch e duw nga m’on riy, tomilang nag i weliy Moroni ngak Joseph Smith ni Elijah era fek fare mat’won e priesthood i yib: “Gura dag ngom fare Priesthood, ni ra yib rok Elijah ni’ir fare profet.”12 Joseph Smith e weliy e biney: “Mang fan ni Elijah e ngak pi’ ni nge yib? Ni bachan e ir e bay fapi kiy rok’ ko mat’won e rrin’ gubin mit fapi gam’ing ko Priesthood; ya [fa’anra] dabin pi’ mat’won, ma dabiyag ni ngan rrin’ fapi gam’ing nifan e gidii’ nib yul’yul,”13—ma arram, ni fapi gam’ing e dabiyag ni nge m’ag e gidii’ e chiney nge ngiyal’ ni manemus.14
Ko machib chiney u lane pi scripture ko Doctrine and Covenants, fare Profet ko yeog: “Bay i lemnag e gidii’ e biney e yalen ni rib gel ni gadad ma weliy mornga’agen—ba gelingin ni bay babyoren fa ma m’ag e tin nu fayleng nge tin nu tharmiy ban’en. Ya gathi kemus rogon array, ya kukakorom i yib nge mada’ ko chiney, demuturug e ngiyal’ nira pi’ Somoel e priesthood ngak reb e mfen ni be yib ko tin ni kan thogthog nag, fa tin ni ke me’eleg e gidii’, ya gelngin e biney e gubin ngiyal’ ni un pii’. Arram fan, demuturug ko mang e ke rrin’ e pi pumo’on n’en nifan fare gelngin, u daken fithingan Somoel, ma kar rrin’ed u fithik’ e yul’yul’ nge mat’aw, ma kar ayuweg e chep ni mornga’agen, ma arram nira mang e motochiyel u fayleg nge tharmiy, ma dabiyag ni ngan thilyeg, ya aram rogon ni turguy fare Jehovah.”15
Baga’ ni gadad ma lemnang ni mat’won e sealing e kemus ni be weliy mornga’agen fapi gam’ing u temple, machane biney e mat’won e rib ga’ fan ko urngin mit e gam’ing ni ngan m’ag u fayleng nge tharmiy.16 Fare gelngin ea sealing ea be yibliy ea tawfew rom ni mataw rogon, ni tareb rogon , ni fan ni ngan pii’ matawon uroy u fayleng nge ku lan ea tharmiy. Arrogon, ma gubine ea gam’ing ko preisthood ea ni ngongoliy udakean ea kiys ko fare President ko fare Galasia, ma boedrogon ni weliy President Joseph Fielding Smith, “Ir [fare President ko fare Galasia] ea ke pii’ ngodaed matawon, ma ke tay fare gelngin ko sealing nga lan ea priesthood rodaed, bachan ea bay rok’ ea pi kiy nem.”17
Ku bay reb i fan ni rib ga’ fan ni yibe mukun nag pi yu Isreal napan ni gadaed be weliy mornga’agen e sealing u fayleng nge tharmiy—ni irerram fan ni yibe toy fapi temple. Fare Propeh Joseph Smith ke weliy: “Mang fan ni ngad mukun uta’abang … e gidii rok Got u demtrug e ngiyal’ ko fayleng? … Bin th’abi ga’ fa ni ngad toyed e na’un ngak Somoel ni ngeyag ni nge dag ngak e gidii’ Rok fapi gam’ing ko na’un Rok nge fel’ngin e gil’ilungun Rok me fil ngak e gidii’ e wo’en e thap; bachane bay boch e gam’ing nge kenggin e yalen,ni fa’anra ngan fil min fanow nag, ma thingari buch ulan e na’un nifan e tiney e ban’en.”18
Matawon ea gelngin e sealing nibe pii’ ko fapi gam’ing ko priesthood, nib mu’un, fapi gam’ing ngay ni yima rrin’ nifan e gidii’ nif fos nge tin ni ke yim’ ulan biyang ni ke duugliy Somoel—ulan e temple rok’. U roy ma kad guyed gelngin nge tin nib thothup ni fan gelngin fare sealing—ni ke bing wo’en e thap ngak e gidii’ nge n’uf ngalang ko falfalaen’ ni fan e tabinaew ni bay nifan ngak pi fak Got ni demuturug ko ngiyal’ ni ur moyed u fayleng. Dariy reb e gelngin fa mornga’agen e biney ni ba ta’areb rogon ko biney ni kan pii’ nifan ngodaed. Fare gelngin e sealing e ir e be yib i m’ug nib polo’ fare justice, murnguy, nge t’ufeg rok Got.
Biney e gelngin e sealing ni bay, gum’ircha’endaed e yira fulweg ngak e pi’in nike yib nib m’on rodaed. Fare mukun ko tin tomur e rran nga tanggin e biney e m’ag e be buch u barba’ fare veil. Got ni gubin ban’en rok mab yaram, gidii’ nib fos e dabiyag e yafos ni manechubog ngoraed ni ga’angin ni fa’anra dabin athamgil ngan chagliyraed ko fare tha’ “ko chitamangraed,” fapi gidii’ rodaed ni kakrom. Ku wod, e gidii’ ni ke mu’ u thap nga barba’ fare veil, fa bayi yean nga barba’ fare veil ko yam’ ni dawrin thapeg e tawa’ath ko fapi sealing, e wod ni dani mu’ nag ga’angin makemus nrib muturug e gam’ing e rayag nira m’ag raed ngodaed, nge pi gidii’ roraed, nge gadaed ngoraed nibay rogon nib thothup.19 Fare micheg ni ngan ayuweged gadaed u l’agruw raba’ fare veil e rayag ni ngan nog ni irerram fare mich ko m’ag, ni’r e ka bang ko fare bin nib be’ech nge m’ag ni manemus. Thin rok’ Joseph Smith, gadaed ba adag ni ngaed “seal niged fapi yam’ rodaed ni nge un [ngodaed] ko fare bin somm’on e foskoyam’.”20
Bin th’abi tolang mab polo’ ni kab i m’ug ko gelngin fare sealing e fare tha’ u thilin e pumo’on nge bpin ni nge mabgol ni dariy bi’id manemus nge tha’ ko gidii’ ni gubin e mfen. Ya rib thothup fare matawon ni ngan ngongoliy pi gam’ing, ma fare President ko fare Galasia ea be powiy ni yigo’ ir rogon ni ngan pii’ ko kuboech ea gidii’. Ke yog President Gordon B. Hinckley ko bangyal’,“Ku gog ni gathi ta’abiyay ni fa’anra dariy ban’en ni ra yib ko gubin e kirbaen’ nge amith ni bachan fare sulyarmen ko fare gelngin fare sealing ko fare priesthood nib thothup ni nge m’ag e tabinaew nga ta’abang ni manemus, ma rib fel’.”21
Fa’anra dariy fare sealing ni’ir e ma sunmiy e tabinaew ni manemus ni ma peth nag e mfen e chiney nge tin nga tomuren, ma wod ni gadaedra par nib manechubog ni dariy pa’angin fa lek’ngindaed—ni irreram, e gidii’en daed ni kakrom fa pifak pifak daed nga mm’on. Bay e gidii’, ni yigo yaed roraed, ko ta’areb e barba’, fa bay e gidii nike mabgol ma bay e tha’ ko tabinaew nike pii’ Got ngoraed,22 fa reb e barba’ riy, ni ra gathay fan fare fayleng nikan suniy nge fan daed u roy u fayleng. Fa’anra yo’or e biney nira buch, ma kab ta’ab rogon ga’angin ko fayleng ma wod ni yira gechig nag fa ni “gathay ni ga’angin” ko ngiyal’ nira yib Somoel.23
Aram fan ni “mabgol e thilin be’ nib pumo’on nge bpin e ke yibliy Got ni tabinaew e ir e bay u lukungun tonom nin sunmiy ko somm’on nifan e milekag nib manechubog nifan pifak.”24 Machane, ka gadaed be guy ni biney e dani polo’ ni ga’ang e chiney, fa wod ni dani mom ngak boch e gidii’. Machane bay e athap rodaed ngak Kristus. Napan ni gadaed be son nag Somoel, President M. Russell Ballard e ke pugorran ngodaed ni “fapi thin nib thothup nge fapi profet e dabay e kar michegned ni gubin fapi gidii’ nib yul’yul’ ma be fol ko fapi motochiyel ko gospel e ran thapegraed.”25
Boch e ke thamiy e kirbaen’ ko tabinaew roraed fa tabinaew roraed e dani fel’ ma yaed ba’adag ni ngar thapegned e tabinaew nib manechubog. Elder David A. Bednar ke yoeg: “I gur ni kam thamiy e amith u gum’ircha’em ni bachan e mabgol rom ni ke dar fa kam fa amith ni bachan e dab ki pagaen’um ngak bee’, wenig ngom pu tay u wun’um [ni yalen wo’en Got nifan e tabinaew] era tabab biyay rom! Ta’areb e tha’ ko fare mfen rom e ke kireb, machane tin ni kabay e tha’ nib yul’yul’ nge tin ni ke magay ko fare chain e ri kub ga’fan ni rib manechubog. Krayag ni ngam gel nag fare chain rom ma krayag ni ngam ayliy fare tha’ ni ke kireb. Biney e muruwel e rayag ni ngan rrin’ ta’reb nge ta’areb.”26
Napan fare magawon rok Sister Pat Holland, figirngin Elder Jeffrey R. Holland, fare July ni ke thumur, President Russell M. Nelson e machib nag: “Napan ni bay i taw ko ngiyal’ riy, ma Patricia nge Jeffrey e ku bay ra sulew biyay nga ta’abang. Ta’aboch riy ma yaedra gak nga ta’abang nib mu’un pi fak row ngay nge pifak pifak row ni tin ni be ayuweg e m’ag rok’ mi yow ra thamiy fare gelngin e falfalaen’ ni ga’angin ku Got nifan pifakrow ni ke par nib yul’yul’. Nang e biney, ma wod ni kad nangfaned ni fare bin th’abi ga’fan e rran ulan e yafos ku Patricia e gathi roffen nin gargeleg fa roffen ni yim’. Ya ngiyal’ th’abi ga’fan e fare roffen ni June 7, 1963, napan ni’ir nge Jeff e ni seal nag row u St. George Temple . … Mangfan ni rib ga’fan e biney? Ni bachan e fare fan nin sunmiy e fayleng ni bachan e ngeyag ni sum e tabinaew min seal nag nga ta’abang. Thap e baga’ fan ngak e gidii’, ma falfalen’ e baga’ fan ko tabinaew. Dariy bea’ ni rayog ni nge thapeg e bin th’abi n’uf ngalang ko falfalen’ nikemus ni yigo ir.”
Dawri n’uw napan karfram, I gag nge figirngig e gu unew ko reb e sealing nifan reb e tafagar romow ulan fare Temple u Bountiful. Somm’on e gu mada’ nag ere fagar ney napan e kab bitir ni’i moy u Córdoba, Argentina. En ni gamow ko mission e gu kol nigew e gidii’ ulan buchi binaew ni dani palog ko gin ni bay e mission office riy, me ir e bing e mab ko napan ni gu bow ko tabinaew rok. Napan e taw ko ngiyal’ riy, ir nge chitinngin nge pi walagen era uned ko Galasia, ma kar pired ni yaed ba yul’yul’ ke mada’ ko chiney. Chiney e reb e bpin ni rib fel’, ma rofen ney e gamaed bay u temple ni ngan seal nag e galibthir rok’ nga ta’abang ma kun seal nag ngorow.
La’agruw i mabgol ni kar manged tafagar ni ke n’uw napan e kar ron’ew lon e galibthir rok’ ko altar. Rib gel e falfalaen’ nge yor ni bachan e gelngin e falfalaen’ romaed ni rib ga’ napan nin seal nag e fagar romow nib Argentine ngak e galibthir rok’. Karimus ni nel’ i gamad ko re mithig yaal’ nem ni gamad palog ko fayleng, machane ba ngiyal’ ni n’en ni gamad be rrin’ e rib ga’fan nibe buch u fayleng. Kari falfalaen’ug ni muruwel rog e ke sul ke polo’ ga’angin ko ngiyal’ ni gu warow nga tabinaew rok’ napan e gag reb e missionary ni fel’yangreg nge mada’ ko chiney, bo’or e duw nga tomuren, mug ngongliy fare gam’ing ko sealing ni nge peth nag ir ngak e galbithir rok’ nge tin nike thumur e mfen.
Biney e be buch ni gubin ngiyal’ u daken e fayleng ulan fapi temple. Irerray kanawo’en i kunuy fapi gidii’ ni bay u tan fare m’ag. Ireray bin th’abi ga’ e tawa’ath nifan fare membership rom ko Galasia rok Yesus Kristus. Gube micheg nag ngom ni fa’an gara gay u fithik’ e yul’yul’ e biney e tawa’ath, ma ran pi’ ngom ko biney e yafos fa bin migid.
Gube micheg ni fare gelngin e sealing nge mat’won nikan sulweg yarmen nga fayleng u daeken Joseph Smith e bay nib riyul’, e tin nikan m’ag u fayleng e kan m’ag u tharmiy. Gube micheg ni President Russel M. Nelson, ni’ir e President ko Galasia, e karimus ni’ir e fare mo’on nibay e dabay u fayleng ni’ir e ma gagiyeg nag ma bay e biney e gelngin rok’ ni ke yib u tharmiy. Gube micheg ni fare Bayul ku Yesus Kristus e ka fal’ag kanawo’en e yafos nib manechubog nge tha’ ko tabinaew ni ngan n’uf ngalang ko falfalaen’ ni rayag ni nge buch. U dakean fithngan Yesus Kristus, amen.