Pagan’ ngak Kristus
Gadad ba’adag ni ngad ayuweg pi’in be thamiy e kirbaen’ fa dariy’ e pi fagar roraed. Gube non marunga’agen, nib ga’, pi’in ni daworiy mabgol.
Brothers nge sisters, ko ngiyal’ ney ko Easter e ngiyal’ ni nge falfalaen’uy ko fare Foskoyam’ ni tay Somoel ni’ir e fare Tathapeg rodaed, i Yesus Kristus. Ka gadaed manang fare mulwol rok ni “mired ngog, ni gimed gubin e pi’in ke aw parowmed i fek e n’en nib tomal ni gimed be fek, mu gu’ pi’ e toffan ngomed.
“Mfeked e mat’ rog ngam teg nga pomed, mi gimed folwok rog, ya gub munguy ma gub sobut’aen’; mi gimed pir’eg e toffan.
“Ya re mat’ ni gura pi’ ngomed e bmom, ma tomalngin e ren’en ni gu ra tay nga pomed e bba’ud.”1
Fare mulwol rok fare Tathapag ni ngan nib Ngak e fan ngak gubin e gidii’ ni gathi kemus ni ngan nib Ngak machane ngan mang ko fare Galasia Rok.
Ko biney e guruy ni be weliy mornga’agen e biney e mulwol, Yesus e fil rogon i rrin’ e biney ko rogon ni ngan gay ni ngan Leak. Ke ga’ar, “Dariy be’ [nib bpin fa pumo’on] ni manang e en ni Fak, ya kemus ni en ni Chitamangiy e manang; ma dariy be’ [nib bpin fa pumo’on] ni manang e en ni Chitamangiy, ya kemus ni en ni Fak e manang, nge pi’in ba’adag [nib bpin fa pumo’on] e en ni Fak nem ni ngar nanged e Chitamngin.”2
Yesus e ba’adag ni ngan nang ni Got ni Chitamangiy nu Tharmiy e bgel e tu’ufeg rok.
Ran nang ni gadaed btu’uf rok e Chitamangdaed nibay u Tharmiy e ra ayuweg daed ngad nanged daed min nang ni gadaed gidii’en gathon fare tabinaew rok ni manemus.
Mayo Clinic e yog e bin ba’aray e thin: “Nang tigil’iy nge gin ni gadaed btu’uf ngay e rib gaa’fan. … Chuchugur ko gubin yang ko yafos rodaed e kan yarmiy nib gaa’fan ko banan ni gadaed btu’uf ngay.” Ma ki uneg e chan’ey ngay ni yog, “Dabiyag ni ngaed lufed tigil’ e gin ni gadaed btu’uf ngay ko tin ko dowef nge tin ko man’aey.”3—nge gube uneg biney, fel’ rogon e ya’el rodad.
Ko fare blayal’ riy u m’on nin gafgow nag u Gethsemane min lii’ u dakean fare kuruth, me yib fare Tathapeg ngar rab ra abich gaed pi gachalpen. Me ga’ar ngoraed, “Bayi gafgow nagmed e fayleng:machane dab mu rusgad; Ya kug gel ko fayleng.”4 U m’on ni aw e yal’ nga but’ ko bin migid e rran ngay, ma aram ni Yesus Kristus e “yim’ [u dakean fare kuruth] ni bochan e denen rodad.”5
Kug lemnag e n’en ni’i thamiy fapi bpin nge pumo’on nib yul’yul ni ur laked Yesus u Jerusalem ko napan ni aw fare yal’ nga but’ make lumor kar tamdag gaed.6
Wod pi gachalpen ni’i moy 2,000 e duw kafram, bo’or i gimed e bay i thamiy e kirbaen’ ko boch e ngiyal’. Kug thamiy e biney u napan ni yim’ le’ngig i, Barbara, ni ke gaman l’agruw e duw ngay kafram. Guma nang ni e thamey napan bay e chon ko tabinaw, pi fagar nge reb e gidii’ ulanggab em machane gabe thamiy ni yigo’ gur—bachane e bee’ ni gub t’ufeg dabi nib kii’eg.
Fare m’ar ko COVID-19 e ke dag e biney ni ke buch rok e gidii’ nib bo’or. Dariy’fan, ni demuturug gelngin e gafgow ni be yib ngodaed, ni wod ere kadbul nem ko Easter, rayag ni ngaed od gaed ko reb e rran ngay nib be’ech ngak Kristus nib rran nib sug ko tin nib fal’el’ banan napan ni gadaed ra pagan’ daed ngak Somoel nge gin ni gadaed btu’uf ngay.
Gu manang rogon ni be thamiy e gidii’ ndariy biyang ni yaed btu’uf ngay. Napan ni gura saliy ya’en e n’en ni be buch u fayleng, gube guy ni bo’or e gidii’ ni be thamiy e biney. Ma gube lemnag ni bachan e darn nanged ni yaed btu’uf rok’ e Chitamangiy nibay u Tharmiy ma gadaed gathon fare tabinaew rok ni manechubog. Michuwun’uy ngay ni gadad btu’uf rok Got ma gadaed pi fak e ra pii’ e pagan’ ngodaed.
Bachan e gadaed bugi ya’al ni fak Got, nra bee’ ma bay e gin ni yib riy, nge rogon, nge fal’ngin. Gadaed gubin “ma gadaed ni bugi ya’al ni fak e gadaed btu’uf rok e galibthir nibay u tharmiy.”7 Ireray e mornga’agen daed! Ireray e n’en ni be dugliy daed ko gadaed mini’!
Mornga’agen daed nib thothup e ran gaa’ nag u napan ni gadaed ra nang mornga’agen daed ko bin somm’on e yafos, nib mu’un e gin ndabad riy, yalen, nge gin ni yib e gidii’ rodaed riy ni kakrom.
Biney e yalen nge tin nib thothup ni fadaed, tu’ufeg, nge biyang ni gaed btu’uf ngay e rayag ni nge pii’ ngodaed e pagan’ nge tu’ufeg ngak Yesus Kristus.
Gu be weliy mornga’agen e pagan’ ngak Kristus ni gathi kemus ni ngan athapeg. Machane, gu be weliy mornga’agen e pagan’ ni yibe athapeg nra buch. Mit ney e pagan’ e ra gel ngak mo’oniyan’, nra pii’ gelingiy nge thothup, ma ran nang ni gadaed btu’uf rok e Chitamangdaed nibay u Tharmiy nib manechubog ma gadaed e fapi bitir ni fak ni gadaed mang ko fare tabinaew Rok.
Napan gadaed ra pagan’ ngak Kristus, ma gadaed ra nang nib tu’uf ni ngaed fol gaed ko fapi m’ag nib thothup, ya tin ni gadaed ra athapeg ma gadaed ba’adag e ra pii’ ni fadaed.
Fare Ulung ko fare Ragag nge L’agruwi Apostles e kar puruy’ gaed u fithik e meybil nib thothup ko rogon nrayag ni ngar nangfed rogon nrayag ni ngar pii’ed e ayuw ngak e gidii’ ni be thamiy ni yigo’ giyaed. Gadad ba’adag ni nggu ayuweg med. Gube non marunga’agen, nib ga’, pi’in ni daworiy mabgol.
Brothers nge sisters, bo’or e pileluwol ulan e Galasia e dabay ni dariy figirngin, fa ke pag e mabgol rok, fa dawri mabgol. Bo’or i yaed ni be tafney nag ko mang e ra buch roraed nge mang tigil’ raed ulan fare tonom rok Got nge lan e Galasia. Thingar da nangfaned ni yafos nib manechubog e gathi be yaen u rogon ni fa’anra kan mabgol machane be yan u rogon fanow nge par ni “yib gel ko fare mich rodaed ngak Kristus.”8 Fare pagan’ ni fan ngak e gidii’ ni yigo ir rok e kab ta’ab rogon ngak gidii’en e Galasia rok Somoel nike sulyarmen—ni bay fare murunguy rok Kristus riy nra yib u dakean e “fol ko fapi motochiyel nge gam’ing ko Gospel.”9
Gu be yog nibay boch e yalen nib tu’uf ni ngaed nanged fan.
Bin somm’on, fapi thin nib thothup nge fapi profet e dabay e kar michegned ni gubin fapi gidii’ nib yul’yul’ ma be fol ko fapi motochiyel ko gospel e ran thapegraed. President Russell M. Nelson e fil: “Ni Somoel e bayi dugliy rogon nge ngiyal’ riy, ya dabi siyeg fapi tawa’ath ngak fapi gidii’ Rok nib yul’yul’. Ya Somoel e bayi pufthin nag me pii’ wa’athan e gidii’ ni be yaen u rogon gum’ircha’enraed nge pi ngongol roraed.”10
Bin la’agurw, dabda nanged e ngiyal’ nge rogon nra thapeged fapi to’owath ko manechubog, machane ke micheg ngodad ra buch.11 President Dallin H. Oaks e weliy ni boch “banan u fayleng e ra yib ko ngiyal’ ko Millennium, ni ireray e ngiyal’ nra buch e tin ni dawri buch ko fare tonom ni th’abi gaa’ nifan ko falfalaen’ nifan ngak pi fak e Chitamangiy nibay ni yaed byul’yul’.”12
Biney e dar yip’fan ni fapi tawa’ath ab thilthil nge mada’ ko ngiyal’ ko Millennium; ya boch e kan mu’ i thapeg ma bay boch ni bay ki yib nge mada’ ko ngiyal’ ney.13
Bin dalip, son nag Somoel e be yipfan ni ngan ul’ul’ ni ngan fol rok min gay rogon ni ngan chuchugur ngak ko tin nib thothup banan. Son nag nifan ko Somoel e dar yipfan, ni ngan par u luway. Susun ndam mu thamiy ni gabay ulan ba singgil ni gabe son.
Son nag nifan ko Somoel ire ngongol. Kug fil’ ufithik e duw rog ni athap rodad ulan Kristus ma ga’ nag napan ni ngad pigpig reb e bee’ Pigpig ni woed rogon Yesus ke pigpig, gadad ma ga’ nag athap rodad Ngak.
Ya tin nrayag ni ngam mon’og riy ko ngiyal’ ni gabe son nag Somoel nge fapi micheg rok e rib gaa’fan, mab thothup ni kabang ko fare tonom Rok ni fan ngodaed ni gubin. Ayuw nrayag ni ngam pii’ ni fan e Galasia u roy u fayleng nge kunuy e gidii’ nu Israel e kari tu’uf. Fa’an ni kam mabgol fa danga’ dabi kireb nag e rogon ni ngam pigpig nag. Somol e ma tayfan e pi’in ni ma pigpig ma kar pired ni be l’agan’rad ngak nibay e mich roraed.14
Bin aningeg, Got e ke pii’ e yafos ni manechubog ngak gubin pi fak. Pi gidii’ nra fanay fare tawa’ath ko kalngaen’ nge fol ko fapi motochiyel Rok e ra thapeg e yafos manechubog, demuturug rogon ko ke yag ngoraed mama’ngan u fayleng fa dawor. Pi cha’en ni kar kalngaen’ gaed e ra thamiy ni bayi n’ag Somoel fan e pi denen roraed, ni wod rogon ni micheg, “Arragon, ma oren yay ni gidiiʼ rog e yaed be kalngaenʼ ma gura nʼaegfan roraed e pi ngongol roraed nib togopluw ngog.”15
Ma tomur riy, rogon ni rrin’ facha’, nge tin ni athapeg, nge rogon ni mel’eg fa dugliy, nib mu’un ko rayag ni ngan thapeg fapi tawa’ath nib manechubog, e ke milfan ngak Somoel ya kemus ni’ir e rayag ni nge pufthin nigey.
Bin laal, rogon ni be pagan’ daed ko biney e be yaen u rogon fare mich rodaed ngak Yesus Kristus ni murnguy rok e bay nib gel ni fan ngak e gidii’ nu fayleng.16 Gubin e to’owath ni ke micheg ngodad ra buch bachane Ir, ni, udakaen e Bayul’ Rok, “ke awe nga tangan gubin e pi’nen”17 nge ke “gelnag e fayleng.”18 Ya “ke paer nga baʼani matʼaw i paʼ Got, nge fek rokʼ e en Chitamangiy matʼawon ko murnguy ni ke tay ngakʼ e gidiiʼ … ; ere be non ni paʼ e gidiiʼ.”19 Tomur riy ma “pi gidii’en e ran suguy raed ko fla’ab’, mar thapegned e chaw roraed”20 ni wod ni yaed “ra un ngak Kristus.”21
Gamaed be athapeg ni pi yalen ney e ra ayuweg gubin e gidii’ ni nge pagan’ raed ngak Kristus mi yaed thamiy e gin ni yaed btu’uf ngay.
Ri dam pagtilin ni gur e bitir rok Got, ni’ir e Chitamangdaed nib Manechubog, ko chiney nge manemus. Gab tu’uf rok, ma gab tu’uf ko fare Galasia. Arogon, gab tu’uf romaed! Btu’uf lungun romaed, tin ni gab salap riy, tin ni gab chag riy, tin mangil, nge tin ni gabe rrin’ nib mat’aw.
Ke yo’or e duw ngay, ni kug weliyed mornga’agen e “gidii’ nib fal’yangren,” “gidii’ ndawri mabgol,” nge “gidii’ nib ilal.” Rogon e biney e bay ni rayag ni ngan pii’ e ayuw riy machane boch i ngiyal’ ma rayag ni nge sap e gidii’ ngay nib thil rogon.
Bay rogon nrayag ni ngan pag e biney ni be palog nag daed ko gidii?
President Nelson e ke fith ni ngaed doged ni gadaed pi gidii’en Fare Galasia ku Yesus Kristus ni fan ko gidii’en Got ko Tin Tomur e Rran Biney e be yipfan daed ni gubin, fa danga’?
Fare gospel rok Yesus Kristus e bay gelngin nrayag ni nge ta’areb nag daed. Bo’or banan rodaed nib ta’ab rogon ko tin ba’aray banan nib thil. Gadaed pi gidii’en e tabinaew rok Got, e gadaed ba ulungi walag ni bpin nge pumo’on. Ni yog Paul, “me sum rok [Got] e re mo’on nem girdi’en urngin e nam me tayrad ni ngar pired u daken e re fayleng ney.”22
Ngak fapi stake president, bishof, quorum nge tiyugang’ ko sisters, gube fith ngom ni ngan tafneyed fapi gidii’ ni gubin ko fare stake, ward, quorum, fa gidii’en e galasia romed nrayag ni nge pigpig me pii’ e ayuw ndemutug rogon.
Fapi gidii’ ni gubin ni bay ko fare quorum, ulung, fapi ward, nge stakes e bay fare tawa’ath roraed nike pii’ Got-nge tin ni yaed be chag riy nrayag ni ngar pii’ed e ayuw ngar toyed gulil’ungun Got.
Pinninged fapi gidii’en e galasia ndawri mabgol ni ngar pigpigaed, mi yaed ayuweg, mi yaed machib nag. Ma dabkun lemnag e biney ni boch i ngiyal’ ma be ligan raed ni yaed be thamiy ni yigo’ giyaed roraed ma dariy biyang ni yaed btu’uf ngay ni rayag ni ngar pigpig gaed riy.
Gu be micheg ko re Easter ney ko fare Tathapeg ni’ir Yesus Kristus nge fare athap Rok nibe pii’ ngog nib manechubog nge ngak e gidii’ ni ra michuwaen’ raed Ngak. Ko pin’ey ni gube meybil nag u dakean fithingan Yesus Kristus nib thothup, amen.