Thin ni nge Bing fare Mu’ulung
Kammagar nikam mub ko mu’ulung nge fare tawa’ath ni ngad motoyil gad ko lam rok Somoel.
Pi walageg, nge pi tafagar u langab e feylang, gube pinningmed ko biney e mu’ulung ko general conference. Kad mukungad ni woed e tabinaw ko feylang ni ngad liyor gad ngak Somoel nge fare Tathapeg rodad, ni Yesus Kristus. Kamagar ni kam uned ngomad.
Biney e duw ni ke thumur e reb e duw ni ngan yoloy marunga’agen nga but’. Gumanang ni gadad gubin kad fil’ed boech e banen ni danda nanged. Boech banen ni gu manang kafram ni kan yoloy u gum’ircha’eg u reb rogon nib be’ech.
Woed rogon, gu manang ni fare Somoel be gagyeg nag e Galasia Rok. Keyoeg, “Gura dag [ngomed] ni Gag e rayog ni nggu rinʼ e muruwel rog.”1
Bo’or yay, pi counselor nge gag kug sapgad u fithik e lu’ romed napan ni ke ayuweg nifan ko magawon ni rib mo’omaw’ tomuren kug guyrogon e rayog rogmed nge dabgu rrin’ reb e ngongol. Gadad gubin ma sakiy u fithik e ginaen’med.
Kug nangfan e chiney ko fan napan ke ga’ar, “Musap gad, Gura papay nag e muruwel rog ko nap’an ni ke taw ko ngiyal riy.”2 Bayay nge bayay kug falfalaen’ napan ni Ke powi’iy nge papay nag e muruwel Rok—nike rrin’ ufithik ko m’ar ni yib nga feylang.
Walgeg nib t’uf rog, fare gelingin ko Galasia ma paer ulan e ngongol nge mich nima tugul roraed ko chongin rok. Rib ga’ ni ngad gelnag e mich rodad ulan e tabinaew rodaed. Ufithik bin tomur e duw faram, bo’or e gidii’ kar gelnag e fil ko fare gospel ulan e nu’un roraed. Gube pining e magar ngom, nge pi bitir ra pinning e magar ngomad.
Be ‘ul’ul e muruwel nib ga’ ni yibe fal’ag bayay fare Salt Lake Tempel. Ulan e singgil ko muruwel rog rayog ni nggu sap ko muruwel ba buch ko fare tempel plaza.
Napan ni kug sap pi tamuruwel kar fofu’og ta’aben e pi lik’ngin, pi payp, pi seeng ko gaamiig, nge gin ni be map’ e raen riy, kug lemnag mornga’agen e fan gadad gubin thingarda chuweged, ufithik e ayuw rok Somoel, pi’nen nib kireb u yafos rodad.
Fare gospel ku Yesus Kristus e ireram e gospel ko kalngan’uy.3 Bachan e Bayul Rok Somoel, gospel Rok ma pinningdad ni ngad ‘ul’ul ko thilyeg, ilal’, nge mang boch reb e machalbog. I ir fare gospel ko athap, golnag nge mon’og. Ere, fare gospel ireray e mulwol ko falfalaen’! Be falfalaen’ e pi ya’el rodad nifan ko gubin e waen nga buut’ nib achigchig ningad feked.
Yang ko fare mukun ni ra tay piyu Israel, nge rib ga’ fan i yang, ir e fanow nifan e gidii’ nima mang nib mat’aw nge ba’adag ni ngar t’aer midliy e feylang ko bin L’agruw e Wub rok Somoel.
Napan ni ngad motoyill gad ngak pi milwol fapi tiyugang’ ni kar fal’ig udakaen e powi’iy fare Kan Thothup, gube pinningmed ni ngad meybil rangad nanged e tin kireb thingardi chuw ko yafos romed nge manged boch reb e mat’aw.
Gube t’uf ngomed, pi walageg nib t’uf rog, nge pii’ mich rog ni Chitimangdad nibay u Tharimy nge Fakag nib T’uf rok yow manang med nge ba’adagmed. Yow ma fel’ rogrow ni ngar ayuwegmed nifan gubin e waen nga buut’ nib achigchig ningad feked. Kammagar nikam mub ko mu’ulung nge fare tawa’ath ni ngad motoyil gad ko lam rok Somoel. U dakean fithngan Yesus Kristus, amen.