“Fapi Yalen e Gospel Rog”
(Doctrine nge Covenants 42:12)
Fapi yalen e gospel e bugi machib nge rogon i fanow nag e tin nib mat’aw ni ngan mel’eg u fayleng.
Ulan farke babyor ko general conference ko Fare Galasia ku Yesus Kristus ni fan ko gidii’en Got ko Tin Tomur e Rran ko October 1849, Elder John Taylor ko fare Ulungi Ragag nge L’agruwi Apostle e ni pining ni nge bing fare nam nu France ni ngan machib nag fare gospel rok Yesus Kristus riy. Pigpig ni tay ab mu’un e bin somm’on e yarmiy ko fare Galasia riy ulan e re nam nem. Elder Taylor e ngongliy me pii’ bangi babyor ko 1851 ni bay e thin riy ko fulweg rok’ ko duwer ni kan fith ngak ni mornga’agen e Galasia. Chugur nga tanggin e ringi babyor nem, me yoloy Elder Taylor e biney:
“Boch e duw kafram, u Nauvoo, bay ba mo’on ni gamow ma murwel u cort, bee’ ni gidii’en e Legislature, ni fith ngak Joseph Smith ko uw rogon ni ke yag ngak ni nge gagiyeg nag e gidii’ nib yo’or, ni rib yaram rogon; ke gin owchen ngay ya biney e ngiyal’ e rib momaw’ ni ngan rrin’ e biney u biyang. Mr. Smith e yoeg ni rib mom i rrin’ e biney. ‘Uw rogon?’ ni fulweg fare mo’on; ‘ya rib momaw’ romaed.’ Me fulweg Mr. Smith, ‘Kug fil ngoraed e yalen nib mat’aw, ma yaed e yaed be gagiyeg nagraed.’”1
Gube meybil nra yib fare Kan ni Thothup nge powi’iydaed me machib nagdaed ko ngiyal’ ni nggu weliy fan nib gaa’fan fapi yalen e gospel rok’ Yesus Kristus.
Pi Yalen
Somoel e dag ngak fare Profet i Joseph Smith ni “fapi elders, prist nge sensey ko galasia e yaedra machib nag fapi yalen e gospel rog, ni bay ulan e Bible nge fare Babyor ku Mormon, ni gubin urngin e gospel rog e bay riy.”2 Ma ki yog ngak Gidii’en Got ko tin Tomur e Rran ni thingar “ni fanow nigey u fithik’ e nanggan’, yalen, machib, wo’en e motochiyel ko gospel, nge gubin banan ni bay ko gul’ilungun rok Got, nib tu’uf ngom ni ngam nangfan.”3
Ya, fapi yalen e gospel e bugi machib nge rogon i fanow nag e tin nib mat’aw ni ngan mel’eg u fayleng. Pi yalen ney e ke yib ko fare gospel nib riyul’ ma be powi’iyay ko fare pi’ i kanawo’ nib sor i yaen nga m’on u dakean fare kanawo’en e motochiyel.
Woed, fare bin somm’on nge dalip ko fapi Kenggin Lik’ngin e Mich ni be dag fapi machib ko fare gospel rok’ Yesus Kristus ni ke sulyarmen: ni bay mornga’agen e Chitamangiy, fare Fak, nge fare Kan ni Tothup ni yaed ta’areb bin somm’on e kenggin lik’ngin e mich, n’en ni buch u napan ni Muul Adam nge Eva ulan fare bin l’agrow kenggin lik’ngin e mich, nge fare tawa’ath ni yag ni bachan fare Bayul rok’ Yesus Kristus ulan fare bin dalip kenggin lik’ngin e mich.4 Nge fare bin aningeg kenggin lik’ngin e mich ni ngongliy wo’en e bin somm’on e yalen—rogon i gay wo’en e mich ngak Yesus Kristus nge rogon e kalngan’uy—nge fare bin somm’on e m’ag ko priesthood ni fal’ag rogon fare Bayul rok’ Yesus Kristus ni nge yib fan ko yafos rodaed.5
Fare Thin ko Gonop e ku reb fare wo’en e yalen ni ngan fanow nag. Wenig mu motochiyel ko tiney e guruy 89 ko fare Doctrine nge Covenants:
“Nra reb e yalen ma bay e tawa’ath riy ni kan micheg, ni fan ngak e gidii’en e galasia nib mo’owar fa rib gel e mo’owar roraed, ni ku rayag ni ngan piningraed ni pi gidii’en Got.
“Musap gaed, nriyul’, ba’aray rogon ni ke yoeg Somoel ngom: Ni bachan e pi ngongol ku mo’oniyan’ nge kireb ni bay u gum’ircha’en e gidii’ ko tin e tomur e rran, ku tay ta’amagaran ngom, nge ku biyay, ya ku pii’ ngom fare thin ko gonop ni be yib ko yi’iy.”6
Ya wo’en ni kan thogthog nag ni ngan yan u rogon e pi n’ey ni kan dag rogon i rrin’ e fan ko dogur nge tin nib thothup e be micheg bugi tawa’ath ni be yan u rogon e yul’yul’ rodaed ko fapi yalen.
Fil rogon, nangfan rogon, min par ni yibe fol ko fapi yalen e motochiyel era gel nag e mich rodaed ngak fare Tathapeg, me yuluynag daed Ngak’, ma ra pining boech e tawa’ath nib bo’or nge tawa’ath nib thothup ngalan e yafos rodaed. Yalen e mat’aw e krayag ni nge ayuweg daed ni ngaed sap gaed ko boech banan ni gathi kemus nifan ngodaed machane ra ayuweg daed ngaed sap gaed ko tin nib riyul’ nib manechubog ko ngiyal’ ni gadaed be yan u fithik e gagfow, momaw’, tin ni kan dugliy ni ngan rrin’, nge tin ni be buch u roy u fayleng.
Woed e tin nibe Buch e Chiney ko Rogon i Fill e Yalen nib Mat’aw
Bugithin ni yoeg fare Profet Joseph Smith ni mornga’agen i fill e yalen nib mat’aw e reb e machib ni yima weliy ni bo’or yay. Ma kad pire’egned e biney nib thothup rogon ko fapi thin rok’ fapi ta pigpig rok Got ko daba’ ney e rran.
Fare Yalen ko Tin-Ndani Wagagay Rogon
President Dallin H. Oaks e non ko general conference ko 1998 ni weliy mornga’agen e muruwel ko Aronic Priesthood ni bay rogon ko pii’ e sacrament. Ni weliy fare yalen ko tin-ndani wagagay rogon me yog ni cha’en ni bay fare Aronic Priesthood rok e dabun ni nge fek banan fa rrin’ banan nra wagagay nag e gidii’ u Galasia ko ngiyal’ nra bee’ ma be be’ech nag fare m’ag rok. President Oaks e ki weliy fan ni rib gaa’fan fapi yalen ni bay rogon ko tin nib yaram, mab be’ech, mab liyor, ma ngan tayfan.
Aram rogon ni dani pii’, President Oaks urungin e tin nib tu’uf ni fan e pagal ni fal’yangren ni ngar rrin’ed. Machane, ke weliy fapi yalen ni be taga’ ngak reb fapi pagal ni fal’yangren nge galibithir roraed nge pi sensey ko tin nrayag nge tin susun ni ngar rinn’ed e tin ni bayni thogthog nag ngoraed ni ngar laked wo’en.
Me weliy: “Dabgu weliy rogon e motochiyel riy, ya gubin fapi ward nge branches ulan e Galasia rodaed u dakean gaa’ngin yang u fayleng ab thilthil ma bay ni boech e motochiyel ab fel’ ko reb e nam fa bay nib kireb u reb e nam. Machane, bay gog reb e yalen ni bay rogon ko fapi machib. Fa’anra gubin e gidii’ nra nangfan e biney e machib me rrin’ ni woed rogon, ma dariy fan ni ngan pii’ e motochiyel. Fa’anra motochiyel fa fanow ab tu’uf ku bee’, ma fapi tiyugang’ nib local e rayag ni ngar pii’ed e ayuw, ni be yaen u rogon fapi machib nge fapi yalen riy.”7
Fare Yalen e Madnom ni’ir e Pow riy
Ulan e general conference ko April 2015, President Russell M. Nelson e fil ngodaed ni “fare Madnom e ba rran ko falfalaen’.”8 Ma ki weliy rogon ni yib nge nangfan fare yalen ni fan e Madnom ni yibe tayfan:
“Uw rogon ni gadaedra tayfan fare rran ko Madnom? Napan ni ku gub bitir, kug fil rok e gidii’ ko mang e tin ni ngan rrin’ nge tin ndabin rrin’ ko fare rran ko Madnom? De n’uw napan ngay mug fil ko fapi thin nib thothup ni ngongol rog nge pingig ko fare rran ko Madnom e ke par ni pow u thilig nge Chitamangig ni bay u Tharmiy. Napan nigu nangfan e biney, ma dan ki tu’uf ni nggu fil rok e gidii’ ko mang e rayag nge dabiyag ni nggu rrin’. Napan ni gura dugliy e tafney rog ko fel’ e n’en ni nggu rrin’ ko fare rran ko Madnom, kemus ni nggu fitheg, ‘Mang pow ab tu’uf ni nggu pii’ ngak Got?’ Biney e duwer e ke ayuweg ke dugliy ko mang ab tu’uf nib tamilang ko fare rran ko Madnom.”9
Duwer rok President Nelson e ba achig machane be weliy rogon fare yalen ni fa’anra be maruwar e tafiney ko mornga’agen e n’en ni ngan rrin’ ni ngan tayfan e Madnom. Duwer rok e ke weliy gubin kanawo’en e yalen nrayag ni nge tawa’ath nag daed ni gubin nde muturug ko tin ni be buch rodaed.
Fare Yalen Ni Gadaed Ba’adag ni ngan Pag Got ni nge Gagiyeg Nigey
Nel’ e pul kafram ko general conference, President Nelson e weliy rogon ni nangfan fare bugithin ni kanog e Israel. Ke yog ngodaed ni gum’ircha’en e thil napan ni fil “fare fithingan pi u Israel ni be yip’fan ku bee’ ni ba’adag ni nge mil fan ngak Got e yafos rok.”10 President Nelson e weliy in ni banan nib gaa’fan ni yib ko ran’ey.
Mulwol rok ni ngan pag ni nge mil fan ngak Got e yafos rom e reb e wo’en e machib nib mangil mab mat’aw nrayag ni gaed rrin’ed. Ni woed rogon ko mulwol rok’ ko marnga’agen e rran ko Madnom ni nge falfalaen’uy ngay, President Nelson e de’eriy ba duwer ko yalen nrayag ni nge ayuweg daed ni nge powi’iy daed ni gubin.
“I gur ga ba’adag ni nge mil fan ngak Got e yafos rom? I gur ga ba’adag ni nge mil fan ngak Got ni’ir e bagel gelingin ni nge gagiyeg nag e yafos rom?”
Ke uluuliy:
“Mu tafney ni gur rom ni ga’abadag ni ngam rrin’ e pin’ey e ran tawa’ath nigem nib gel. Fa’anra dawrum mabgol ma ga be sapnag bee’ ni ngam le’ngiy, ma adag rom ni ngam mang bee’ ‘nu Israel’ era ayuweg nem ngam dugliy ko mini’ e rayag ni ngam guy nge rogon.
“Fa’anra kam mabgol gow bee’ make gathay fare m’ag romow, ga ba’adag ni nge mil fan ngak Got e yafos rom e rayag ni nge ayuweg fare m’ag rom ngak Got ere par ni dabi chuw. Fare Tathapeg era fosag e tin nike kirbaen’um ngay. Ma ra mob e tharmiy ngom ko rogon ni ngam ul’ul’ ngam man nga mm’on. Ma dani tu’uf ni ngam leam nge pag rogon.
“Fa’anra bay e duwer rom ko fare gospel fa fare Galasia, napan ni garam mel’eg ni ngam pag ni nge mil fan ngak Got, ma ran powi’iyem ni ngam nangfan, e tin nib riyul ni manemus nra powi’iy e yafos rom me ayuwegnem ngam par ulan fare pi’i kanawo’en e motochiyel.
“Napan nra yib e lumel ngom—ndemuturug ko lemul nike yib ni bachan e kam magaf fa gabe thamiy ni yigo gur rom fa dariy bee’ nibe nangfan—mu tafney nag e athamgil nrayag nra yib ko napan ni garam mel’eg ni nge mil fan ngak Got e yafos rom mag wenig nag Ngak ni nge pii’ gelngim.
“Napan garam tay ni tin ni rig ba’adag e ngam pag nge mil fan ngak Got, ni ngam mang bee’ nu Isreal, ma gubin banan ni garam lemnag ni ngam rrin’ era mom. Ma tin ni um magagawon riy e ran chuweg ni dabki magagawon nigem! Ma gara nang rogon ni ngam ayuweg nem. Ma gara nang ko mang kachido e ngam yaliy ya’an fa bin ngan e babyor ni ngam be’eg, fa gin ni ngam pii’ e tym rom ngay, nge cha’en ni ngam ayuweg. Ma gara nang ko mang e ga ba’adag ni ngam rrin’. Ma gara nang ko mit i mang gidii’ e ga ba’adag ni ngam mang.”11
Mu tafiney nag uringin e n’en ni be buch ulan e yafos rom nge tin nib tu’uf ni ngam dugliy nrayag ni ngan fanay ko biney e yalen ni nge mil fan ngak Got e yafos rom: mabgol nge tafagar, duwer ko galasia nge tin ndamur nangfan, rogon i ayuweg nem, nang ko mang kachido e ngam yaliy ya’an, nang ko mang babyor ni ngam be’eg, fa gin ni ngam pii’ e tym rom ngay, nge cha’en ni ngam ayuweg, nge ku boch banan, nib bo’or. Duwer rok President Nelson ni yib ni thogthog nag ngak e weliy mornga’agen fare yalen ni be powi’iyey ko ga’angin yang ulan e yafos rodaed.
Ba Yap ni rib Achig
Napan ni bay Joseph Smith u Kalbus u Liberty, ma i yoloey e babyor ngak gidii’en e Galasia nge pi tiyugang’ riy me pug oran ngoraed ni bay “barkow nib gaa’ nribe fal’ rogon ni bachan e en ni be fek e yap riy ko ngiyal’ nib gel e yoko’, ni bay u langgin fare pii’ i kanawo’ ni bay e nifeng nge n’ew riy.”12
Fare “yap” e ir fare n’en ni ma fek e m’uw ni kabang ko barkow fa bowoch. Ma “bay u langgin fare pii’ i kanawo’ ni bay e nifeng nge n’ew riy” e be yupfan fare barkow nibe chal ni be par ni dabi thig ko ngiyal’ ko yoko’.
Yalen e gospel e fan ngog nge gur ni’ir fare yap ko fare barkow. Yalen nib mat’aw e ma ayuweg daed ngaed pire’egned kanawo’en daed min par ni yib gel, mab chichi’iy pa’ay, ma dabin gachgach ni dabiyag ni ngan mul nga but’ ko ngiyal’ ni bay e yoko’ ko lumor nge balyangaen’ ko tin tomur e rran.
Kan tawa’ath nag daed nib gel ko biney e general conference ni kad filed mornga’agen e yalen nib manechubog ni be yib rok e ta pigpig rok Somoel. Chiney, muruwel rodaed ni gubin e ngaed gagiyeg niged daed ko tin nib riyul’ ni kan micheg.13
Michuwaen’uy
President Ezra Taft Benson e fil “Nel’ i pul ni ba’aray, fare babyor ko conference ko [Liahona] e susun ni nge par ni bang ko muruwel’ rom ma ngan sul ngan fil ni urngin yay nrayag.”14
U polo’ i gum’ircha’ag, gube pining daed ni gubin ni ngaed filed, min par, min tu’ufeg fapi yalen nib mat’aw. Kemus ni fare gospel nib riyul’ e rayag ni nge “rrin’ gubin banan ni bay u gelingin daed” ni ngan ul’ul’ u dakean fare pi’ i kanawo’ ko motochiyel min “guy e yi’iy rok Got, nge rogon e muruwel rok.”15
Gu manang ni fapi yalen nge machib ko gospel rok Yesus Kristus e ga’fan e talen ko muruwel’ nifan e kanawo’en e yafos rodaed nge falfalaen’ ko biney e yafos nge yafos ni manechubog. Ma udakaen e Madnam ko Easter nib thabi’ fel, rib falfalaen’ug ngay ni fare Tathapeg rodaed nib fos e ir ni bay u mit e re luul’ ney nibe yib e raen riy ko tin nib riyul’ banan. Gube micheg u dakean fithngan fare Somoel nib Thothup Yesus Kristus, amen.