Gura Tay Fan Fithingan
E fan ni gadaed gubin ba thapeged e priesthood ni nge yoeg ni ngaed tawa’ath niged e gidii’ rok Somoel, u dakean e Fithingan.
Pi walageg nib tu’uf rog, pi pigpig ko priesthood rok Got, gub falfalaen’ ngay ni nggu non ngomed ko re nep ney. Bay e magaer nge liyor rog ngomed. Nap’an guma non ngomed mug rung’ag mornga’agen e mich nib gaa’ romed, ya michuwaen’ug ni ba gaa’nag e gelngin e priesthood u fayleng, nibe gel nog pi quorum ma gidii’ nib fanay fare priesthood.
Nap’an e welthin rog ngomed re nep ney, gura non ngomed ni ba’adag ni ngam gelnog e muruwel rom ko pigpig ko priesthood. Gamed ma nang mornga’agen e muruwel kam thapeged ni ngam gaa’nag e pigpig romed.1 Sana gamed ba lemnag mang e bay yip fan re mulwol nem ni fanmed.
Guba tabab ko bin be’ech e deacon bachan yaed dawor nanged fan e gaa’nag e pigpig ko priesthood roread. Pi elder nib be’ech nikan yibliy raed e thingari motoyil gaed ko re mulwol ney. Reb e bishop ke fini tabab ko bin som’on e wik e pigpig rog ra motoyil.
Gura fil’ bayay nga dakean fapi rran rog nap’an kug deacon. Kug athapeg ni bay bee’ ke weliy fatin ni gube weliy chiney. Rayog ni nge ayuwegeg u fapi pigpig rog ko priesthood—arragon e pigpig rog u tiney erran.
Kan yibliy ngog ko deacon ulan e branch nib chigchig ni kemus ni gag e deacon riy nge walageg Ted ni yigo’ ir e sensey. Gamow ni go’ e tabinaew ko re branch nem. Urngin e branch ba mu’ulung nag u tabinaew romow. E tiygang’ ko priesthood ko walageg nge gag ke fini un fare galasia ma ke fini thapeg e priesthood. Kug lemnag ni muruwel rog e kemus ni nggu pii’ fare sacrament u tabinaew romaed.
Nap’an e tabinaew rog ke milekaeg nga Utah, kug pire’eg e ward nib gaa’ ni bay bo’or e deacon riy. Nap’an e bin somm’on e mu’ulung ko sacrament aram, kug guy urngin e deacon ba muruweliy nib fel’ rogon ni ngar pii’ed fare sacrament nib salap.
Bin magid e Madnom kug taw nga na’un u somm’on nigo’ gag ni dariy bee’ ni nge sap ngog. Ku gu manang ni fare Ward u Yalecrest u Salt Lake City, ni bay e liyoos. Gu waen nga wuru’ farengi liyoos mug meybil nag e ayuw ni dabgu mo’owaer nap’an gura pii’ fare sacrament. Ma fare duwer ko meybil rog e kan fulweg tabon.
Machane guma nang bay reb e rogon nib fel’ ni ngaed meybil gaed ngaed lemniged nap’an ngaed gayed rogon ni ngaed gaa’nag e pigpig ko priesthood rodaed. Kug nangfan ko mang fan e gidii’ ma thapeg e priesthood. E fan ni gadaed gubin ba thapeged priesthood ni nge yoeg ni ngaed tawa’ath niged e gidii’ rok Somoel, u dakean Fithingan.2
Bo’or tomruen kug deacon Kug fil e yip fan riy’. Woed e, nap’an gag e high priest, kan pinningeg ni nggu waen nga mu’ulung ko sacrament ko care center. “Kan fith ngog ni nggu pii’ fare sacrament. Dabkug lemnag mornga’agen e yalen ni nggu pii’ fare sacrament, machane kug sap nga owchen e gidii’ nib glabthir. Kug guy ni bo’or ba maep lu’waenraed. Reb e ppin ke koel nga kenginn rog, ke sap nga lang, ma yoeg, “Oh, kamagaer, magaer.”
En Somoel ke yibliy nag e pigpig rog, pigpig ni kug pii’ u Fithingan. Nap’an fare rran nem kug meybil ni nge yib e ma’ang’ang ngog dabkug meybil ni nggu mugu’uliy e muruwel rog. Kug meybil ni fapi gidii’ ra thamiy e tu’ufeg rok Somoel u dakean e pigpig nib tu’uf rog. Kug pire’eg i’ir e key ko pigpig ma tawa’ath nag e gidii’ u Fithingan.
Kug fini motoyil ko yaer ni ke fil ngog mornga’agen re tu’ufeg nem. Nap’an urngin e mu’ulung ko Galasia kar talgaed ni fan e m’ar ko COVID-19, reb e walagen nib pigpig ke thapeg e murwel ko elder quorum president rok ni nge yibliy nag ma pii’ fare sacrament ngak reb e ppin nib chongin. Nap’an ke kol nag me fith ni nge pii’ fare sacrament ngak, ke yoeg arragon, machane dabun ni nge chuw ko tabinaew rok nap’an e ngiyal’ ko maer ma lemnog ra fel’ rogon urngin.
Nap’an ke taw nga na’un rok fare kakadabul ko Madnom nem, bay e duwer rok. Rayog ni nge yaen ngak yoror rok ma pii’ fare sacrament ngak 87-e-duw rok e yoror rok? Ke thapeg e ayuw ko bishof, ke yoeg rayog.
Bo’or, ni bo’or e wik, ma ngongoliy e social distancing ma reb e ban’en, chi ulungi Gidii’en Got kar mu’ulung gaed urngin e Madnom ni ngar thapeged fare sacrament. Chi yungi flowa nge raen—kar maep luwaenraed ni fan fatin fel’ rok Got nib tu’uf.
Me yibi buch, re walagen nibe pigpig, tabinaew rok, me walagen nib ppin kar suloed nga mu’ulung u galasia. Machane fare ppin ni 87-e-duw rok, fare bugiliyiror, e ke tu’uf ni nge, ke soen u tabinaew rok. Re walagen nib pigpig ney—ba pugurran e muruwel rok ngak fare yoror—ma yaen urngin e madnom nga tabinaew rok, pi babyor nib thothup ma chiyungi flowa u paa’, ni nge pii’ fare sacrament ko Abich rok Somoel.
Pigpig rok ko priesthood, woed rogon e pigpig rog u care center, ma pii’ u dakean e tu’ufeg. Arragon, re walagen nibe pigpig ney ke fith e bishof rok fa’an bay reb e gidii’ ko ward ni nge ayuweg. Laniyaen’ ni nge gaa’nag e pigpig ko priesthood rok nap’an ke pigpig u fithingan Somoel. Dagu nang fa’an re walagen nib pigpig ke meybil, ni woed kug rrin’, ni fan e gidii’ nira pigpig ngak ningar nanged e tu’ufeg rok Somoel, machane bachan e pigpig rok kan pii’ u fithingan Somoel, ni yoeg ni ta’ab rogon.
Ta’abrogon e ban’en ra yib nap’an gura meybil ni fan u m’on ni nggu pii’ e tawa’ath ko priesthood ngak e bee’ nib maer fa tu’uf e ayuw. Ke buch biyay ulan e aspital napan ni ke gur nigeg fare togta—kari gur nigeg nib gel—ke yog ngog—ni nggu chuw riy ya ngeyag ni nge rrin’ e murwel rok, u m’on ni nggu pi’ fare tawa’ath ko priesthood. Ku par, ma kug pii’ fare tawa’ath. Ma chi buliyol nem ni kug yibliy e rofen nem, ni fare togta e lemnag ni ra yim’, e par nib fos. Falfalaen’ug ko rofen nem, dani kirbaen’ug ngay ma kug thamiy ni Somoel e ba’adag ni nggu yibliy e chi buliyol nem. Ma gu manang e re tawa’ath nem: Ya kug yibliy ni nge gol. Me buch ni arram rogon.
Ke buch bo’or e yay nap’an kug pii’ e tawa’ath ngak e bee’ ni fini yim’, ni bay chongin e tabinaew rok u tagil e bet rok, yaed ba athapeg e tawa’ath ko golnag. Arragon bay e chingyal’, guma meybil ni nggu nang e tawa’ath ko Somoel ni ba’adag ni nggu pii’ u Fithingan. Mug fith ni nggu nang urrogon Ir ba’adag ni nggu tawa’ath nag bee’ ma gathi gag fa gidii’ u to’obeg ba’adag ni nggu yoeg. Guma nang ni nap’an e tawa’ath dani ta’ab rogon e laniyaen’ e gidii’ fa bee’ nib tu’uf, fare Ya’el ba ying gum’ircha’raed ni ngar thapeged mar loeged ayuw ngoraed.
E yi’iy ma yib nap’an pi patriarch ma balay nag abich roraed mar meybil gaed ko ayuw ni ngar pii’ed e tawa’ath rok Somoel ngak bee’. Bayay, kug thapeg e tawa’ath ni ke pii’ balyangaen’ ma ngak fare bee’ nibe thapeg fare tawa’ath. Arragon, keyib fare tawa’ath ko Somoel—arragon pi koel chiya’ ma micheg ba yib u dakean Fithingan. Fapi meybil nge balay nag abich rok fare Patriarch kan thapeged Somoel.
Nap’an kug Bishof, kug fil nap’an guma ngongoliy e mu’ulung ko mat’aw ni nggu ning e ayuw ngak Somoel ni nge nang fatin Ir ba’adag ko re bee’, ni nggu machaelboeg nag e yi’iy rok ko lem u laniyaen’ug. Aram ba moem’aw fa’an Somoel, u fithik e tu’ufeg, ba’adag ni nge ayuweg bee’ ninge chelchel. Ir e ba tu’uf e muruwel nib gel ni ngaed nanged fan fatin ba’adag Somoel ko fatin ni ngam ba’adag ni fan ko bee’.
Gube lemnag rayog ni ngaed gelniged e pigpig ko priesthood nap’an e yafos rodaed ma tomuren. Ir e ba tu’uf e athamgil rodaed ni ngaed nang e laniyaen Somoel ma rayog rodaed ni ngaed motoyilgaed ngak Laem rok ninge yoeg ni ngaed nanged nib fel’ rogon fatin Ir e ba’adag ni fan bee’ yaedba pigpignoged ngak ni Fan. Re gaa’nag ney re yib ni buch’uw ni buch’uw’. Rayog ni nge yib nib sag’al, machane ra yib. En Somoel ba micheg ngodaed:
“Ma cha’en nibe par nib yul’yul’ ko gali tawa’ath ney ko priesthood ni ku weliy mornga’agen, ma ke rrin’ ni wod rogon e pi murwel rok, ma ke yibliy fare Thothup ke be’ech nge downgin.
“Mi yad mang pi fak Moses nge pifak Aaron ni pifak pifak e bitir rok Abraham, nge fare galasia nge gil’iungun, nge fare Got ni kan mel’eg.
“Ma enra thapeg e priesthood e ka am rogon ni ke thapeg neg, ni ke yog Somol.”3
Gube pii’ e m’ag rog ni fapi key ko priesthood kan sulweg u dakean fare Profet Joseph Smith. Pi tapigpig rok Somoel kar m’uged ngak ko tharmiy ni ngar fulweged fare priesthood ni fan fapi ban’en nib gaa’ ni bay yib ngodaed. Ran mukun Israel u ta’abang. Gidii’ rok Somoel e bay ra fal’eged rograed ko Bin La’agruw e Wub nib ma’ang’ang. E Sulyarmen ran athamgiliy. En Somoel e ra dag laniyaen’ ngak fapi profet nge fapi tapigpig Rok.
Sana gaba lemnog ni gur ni dariy fan ko pin’ey nib gaa’ ni ke fith Somoel ningam rrin’. Fa’an gaba thamiy, gube pinningem ni ngam meybil ni ngam guy rogom u rogon Somoel ba sap ngom. Ir e ma nang mornga’agmed, ke pii’ e priesthood ngom, murwel rok ni ngam gaa’nag e priesthood ba gaa’fan Ngak bachan Ir e ba’adagmed ma Ir e ba pagaen’med ni ngam tawa’ath nag e gidii’ u Fithingan.
Gube meybil nag med e chiney ni ngam thamiyed e tu’ufeg rok me pagaen’med ngak, u dakean fithingan Somoel Yesus Kristus, amen.