19:15

Mu Tafney Nag e Celestial!

Keb rok President Russell M. Nelson

President ko Fare Galasia Ku Yesus Kristus ni Fan ko Gidiiʼen Got ko Tin Tomur e Rran

Tin ni gara mel’eg e era duugliy ggin ni gara par riy ni manechubog, mit i mang dogur e ran fosagnem riy, nge pi’in ni gamedra par u ta’abang nib manemus.

Pi walageg, ri gub falfalaen’ ngay ni nggu non ngomed e daba’. Yangar rog e chiney, e gubin e rran ma bay ban’en nib fel’ riy fa reb e ban’en nib momaw’. Dalip e wik kafram, kug mad’ad ko reb e ufin u kiru’ug. Ere, gubin ngiyal’ ni guma non ko general conference nike pag e 100 yay ni gube sak’iy, ere daba’ e nggu non ni gube par u but’. Gube meybil ni fare Kan ni Thothup era fek e thin rog ngalan gum’ircha’med.

Fa nug madnom nag e rofen nin gargeleg nike gaman e 99 e duw rog ma arame gube ul’ul’ ko 100 i yan. Baga’ ni yima fitheg ko mang e secret rog ko par nib fos nib n’uw napan. Reb e duwer ni rib fel’ ngay e “Mang e kug fil ko re ra’ay i duw ney ni kug gu par ni gub fos?”

Ngiyal’ e daba’ e dabiyag ni nggu fulweg e biney e duwer, machane nggu weliy reb e ban’en ni karug fil ni rib ga’fan.

Kug fil ni fare wo’en e Chitamangdaed nibay u Tharmiy e rib felel’, ni tin ni gadaedra rrin’ ko biney e yafos e rib ga’fan, ma fare Bayul rok’ fare Tathapeg e irerram e ran’en nike bing wo’en e tonom rok’ e Chitamangiy ke fel’.¹

Napan ni gamow be cham e amith ko re mad’ad rog ney, make sug gum’ircha’eg ko og nag e magar ngak Yesus Kristus nge fare Bayul rok’ ni danur nangfan ni ga’angin. Mu lemniged e binem! Fare Tathapeg ke gafgow ko “amith nge kirbaenʼ nge pi lumel ni gubin mit”² ni nge yog ni nang ko dagur u rogon ni nge ayuweg ngodad, golnagdad, thap ngodad u rogon e pi moʼowaer roraed.³ Yesus Kristus e weliy e n’en ni buch rok’ u Gethsemane nge Kalvary: “Fare gafgow ni yib nga dakaneg, ni kumus ku Got me thamiy, ni’ir e th’abi ga’ ko gafgow, ni dada’ ni bachan e amith, ni karang e racha’ ni yib u dow nga but’.⁴ Mad’ad rog e ke ayuwegneg kug tafney nag nge biyay “fare falʼngin Fachaʼ nib Thothup nu Israel.”⁵ Napan e ngiyal’ ni gube gol, Somoel e ka bi dag fare gelngin nib gel u fithik’ e gapas nge kanawo’en nib momaw’ ni dabin nang.

Bachan fare Bayul rok Yesus Kristus nib manemus, fare wo’en e Chitamangdaed nibay u Tharmiy e reb e wo’en ni rib polo’! Nangfan e biney e wo’en ni ke ngongliy Got ni rib fel’ e ke luuf e tin nib miith ko mornga’agen e yafos ni dan nang ko tin nga mm’on ban’en. Ra bagdaed me mel’eg ko rogon ni nge par u fayleng nge gin nira par riy ni dariy bi’id manemus. Wod ni kemus ni “ngan abich, min garbad, min falfalaenʼ, ya bayi gabul ma kad mʼaed; ma gaed bay ko dodow nib mangil”⁶ e reb e ban nibay u fayleng.

Ba’aray e thin nib fel’ ko wo’en Got: fapi n’en nira fal’ag e yafos rom u fayleng ni ngari fel’ e ku ta’ab rogon ko n’en ni ku ta’ab rogon ko fapi n’en nira fal’ag e yafos rom e chiney i yean ko yafos ni manemus ko gelngin ni ni rayag riy! Daba’, ra nggu ayuwegnem ngam thapeg fapi tawa’ath ni rib felel’ nifan ngom nibe yib rok’ e Chitamangdaed nibay u Tharmiy, ma gube pinningem ni ngam gary rogon e leam nib celestial!”⁷ Tafney nag e celestial bayipfan ni ngam tafney nag ni thothup. Kad filed rok fare profet Jacob ulan fare Babyor ku Mormon ni :ra ngan yinʼuy e tin u tharmiy, ma yafos ni manechubog.”⁸

Yafos u fayleng e irreram e gin ni ngan fil e tin ni ngan mel’eg ni th’abi ga’fan ko yafos ndariy bi’id manemus. Bo’or e gidii’ nibe par ni gowa wod ni biney e yafos e kumus rogon array. Machane, tin ni gara mel’eg e daba’ era duugliy dalip ban’en: ggin ni gara par riy ufithik gubinmanechubog, mit i mang dogur e ran fosagnem riy, nge pi’in ni gamedra par u ta’abang nib manemus. Ere mu tafney nag e celestial.

Bin somm’on e thin rog ni gag e President ko Galasia, ku gu pii’ e athamgil ni ngad tabab gaed ni bay e laem rodaed nga tomur. Biney e be yipfan ni ngan tay ni fare celestial kingdom e nge par ni’ir e bay ko tafney rodaed ndariy bi’id manemus maga tafney nag rogon fapi n’en ni gabe duugliy ni ngan rrin’ u fayleng era tem riy ko bin migid e fayleng nira yib.⁹

Somoel e ke machib nag ni rib tomilang rogon ni kemus ni pumo’on nge bpin nike seal ni yow e figirngin nge le’engin ulan e temple, ma yow be ayuweg fapi m’ag rorow, e yowra par u ta’abang ni manechubog. Ke ga’ar, “Gubin e m’ag, babyoren, tin nikan m’ag, tin ni ngan rrin’, fapi oath, nge fapi thin ko micheg, nge tin ni ngan rrin’, gubin e tha’, ni dani ngongliy ma dani seal nag u dakean fare Kan ni Thothup ni’ir era micheg … e rani mus rogon u rom ko napan nira yim’ e gidii’.”¹⁰

Ere, fa’an gadaedra mel’eg ni ngad pired ko rogon e motochil ney ko telestial e chiney, ma arram ni gadaed be mel’eg ni gadaedra foskoyam’ ko dewef nib telestial. Ma aram ni gadaed be mel’eg ni dabda pired e tabinaew rodaed u ta’abang nib manemus.

Ere, pi walageg, uw rogon nge gin ngan nge mini’ e gabe mel’eg ni ngam par rok ni manemus? I gur e gram mel’eg.¹¹

Napan ni gara mel’eg ban’en, gube pinningem ni ngam sap nga mm’on—ko tin nib manechubog ban’en. Mu tay Yesus Kristus ni’ir e mm’on ko gubin, ya yafos rom ni manechubog e be yan u rogon e mich rom ngak nge fare Bayul rok.¹² Ni ku be yan u rogon e liyor rom ko fapi motochiyel rok. Ta liyor era fal’ag fare pi’i kanawo’en e yafos rom e daba’ ko falfalaen’, ni’ir era tawa’ath nigem ko tin ngan mm’on ban’en nib manechubog.

Napan nira yib reb e mo’owar ngom, mu tafney nag e celestial! Napan nira yib reb e lumel ngom, mu tafney nag e celestial! Napan nira kirbaen’ nigem bee’ nib t’uf rom, mu tafney nag e celestial! Napan nira yim’ bee’ ko chingiyal’ ney, mu tafney nag e celestial. Napan nira gafgow bee’ ni bachan reb e m’ar ni rib kireb, mu tafney nag e celestial. Napan nira tomal nigem e yafos, mu tafney nag e celestial! Gabe gol ko reb e mad’ad ni ke buch rom, ni wod e n’en ni gube rrin’ e chiney, ma tafney nag e celestial!

Napan ni gara ul’ul’ ni gabe tafney nag e celestial, mu nang nira yib e lumel ngom.¹³ Ra’ay e duw kafram, bay bee’ ko muruwel rog ni kireb nag e thin ni yog ngog ni “kay gi yo’or e temple” ko ngongol rog, ma bo’or e supervisor nike gechig nigeg ni bachan e mich rog. Kari much u wun’ug, ni biney, ni tafney nag e celestial e ke mon’og nag e muruwel rog.

Napan ni gabe tafney nag e celestial, mara thil gum’ircha’em. Gara adag ni ngam meybil ni gubin ngiyal’ u fithik’ e yul’yul’. Wenig damu pag ni fapi meybil romed e wod langan e thin ko tin ni cham chuway’ ban’en. Tin ni manang Somoel e baga’ ko tin ni gamanang u fayleng. Fulweg rok ko rogon fapi meybil rom e rayag nira gin owchem ngay mara ayuwegnem ngam tafney nag e celestial.

Mu tafney nag fare fulweg rok Somoel ngak Joseph Smith nap’an ni i wenig nag ni ngan pag ko ngiyal’ ni bay u Kalbus u Liberty. Somoel e fil ngak fare Profet ni biney e ngongol ni dani fel’ nikan rrin’ ko gidii’ era ayuweg nifan ngak.¹⁴ “Fa’an gara thamgil ngam gel nigem ko biney,” me micheg Somoel, “Got era thap nigem ko bin th’abi tolang ngalang.”¹⁵ Somoel e be fil rogon ngak Joseph ni nge tafney nag e celestial me tafney nag fare tawa’ath ni manechubog ko bin ba’aray nikemus ni yibe sap ko tin nib momaw’ ban’en e chiney. Meybil rodaed e rayag ni—ma susun ni wod—e sabathin ni gubin ngiyal’ ngak e Chitamangdaed nibay u Tharmiy.

Napan ni gara tafney nag e celestial, ma gara pire’egnem ni gabe palog nigem ko gubin ban’en nira irring mat’om. Gubin mit e addiction—wod e gaming, gambling, malfith, drug, alkahol, dumomow, pornagraphy, galong, nib mu’un e ggan ngay—nib kireb u powchan Got. Mang fan? Ni bachan e tin ni gabe ‘ar ‘ar nag era mang got rom. Gabe sap ngay ma damur sap Ngak ko tin nib tu’uf rom. Fa’anra gabe mo’owar ko reb e addiction, mu gay e ayuw nib thothup nge professional ni nge ayuwegnem. Wenig damu pag e ‘ar ‘ar rom nge irring mat’won ko fare wo’en got ni rib felel’.

Tafney nag e celestial era ayuwegnem ngam fol ko fare motochiyel ko falan e dowef. Ri’in e ban’en e bay ni rayag nira gathay e yafos rom ni rib papay ko biney e motochiyel ni rib thothup ni gara gathay. Gidii’ nike mu’ i ngongliy e m’ag ngak Got, ngongol ko galong e kanawo’en ni rib pay nira mul e mich rom.

Oran e lumel rok mo’oniyan’ e mu’un e biney ngan ni ngan gathay nag e dogur rom nib thothup. Fare gelngin ni ngan sunmiy e yafos e karimus ni’ir fare tawa’ath ni yib rok e Chitamangiy nu Tharmiy nike pii’ ngak pifak u fayleng ni ngar muruwel gaed ngay. Aram fan, e ke tay Got kanawo’en ni ngan fanay e biney e gelngin be riyul’ ni rib thothup. Par u thilin e pumo’on nge bpin e karimus nifan ngak e pi’in nike mabgol.

Ga’angin yang u fayleng e dani michuwan’ e biney, machane tafney ko gidii’ ni yo’or e dar thilyeg e biney nibay nib riyul’. Somoel e ke motochiyel nag ni dariy bee’ ni dani be’ech nirayag ni nge yib ngalan e celestial kingdom. Ere napan ni gara duugliy ni ngam rrin’ ban’en nira kireb nag e dogur rom, wenig ngom mu tafney nag e celestial. Ma fa’anra dan um yul’yul’ ni bachan e ngongolen e galong, gube wenig nag ngom mu kalngaen’um. Mub ngak Kristus nga thapeg fare tawa’ath ko kalgaen’ ni ga’angin napan ni gara kalngaen’ ko fapi denen rom.¹⁶

Napan ni bay mu tafney nag e celestial, mara thil rogon e changar rom ko tin nib momaw’ nibe yib ngalan e yafos rom. Nap’an nira yog bee’ nib t’uf rom e thin ngom nib kireb, mu tafney nag e celestial, ma dam mu de’eriy e mich rom. Fare Apostle Paul e profecy nag ni “boch e girdi’ e bay ra n’iged e michan’ rorad ngak Kristus ko tin tomuren e rran; miyad fol ko pi kan ni yad ma lifith l’ugunrad, ni aram e kar folgad ko machib rok e pi mo’onyan’.”¹⁷

Dariy bi’id nira tal e lifith l’ugun ku mo’oniyan’. Wenig ngom mu fal’eg rogom ngam par. Dariy bi’id ni ngam motoyil ngak bee’ ni dakir michiwaen’. Motoyil ko fapi laam nib pagaen’um ngay—nibe yib rok’ fapi profet, yi’iy, nge tin ni yibe thogthog nag nibe yib ko fare Kan ni Thothup, ni “ma ra dag ngomed gubin ni ngam rinʼed.”¹⁸ Wenig mu rrin’ e muruwel nib thothup ni nge ga’ nigem ni ngeyag ni ngam thapeg e yi’iy nifan ngom.¹⁹

Nap’an ni gara tafney nag e celestial, mara gel e mich rom. Napan ni gag reb e intern, ma pilwog e kemus ni $15 reb e puul. Reb e nap ngay, me fitheg le’engig Dantzel ko gube pii’ pilwon e tithing rog. Dagur rrin’ e biney. Papay nigeg nggu kalngaen’ mugu tabab i pii’ piwlon e tithing rog ni gubin e puul ni $1.50.

Ke thil make mon’og e Galasia ni bachan e tithing romow ni kug pi’ew? Danga’. Machanem, pii’ piwlon e tithing nib polo’ e ke thilyeg neg. Arram e ngiyal’ ni kug nang ni pii’ pilwon e tithing e rogon mornga’agen e mich rodaed, gathi bachan e salpiy. Nap’an ni kug mang ni ul’ul’ nggu pii’ pilwon e tithing nib polo’, ma arram ni tabab nge mab fapi winda u tharmiy nifan ngog. Yog ngog boech e muruwel ni rib fel’ ni bachan e yul’yul’ romow ko pii’ pilwon e tithing.²⁰

Pii’ pilwon e tithing e mu’un fare mich ngay, nib mu’un fare mich rom ngay ngak Got nge Fak.

Mel’eg ni ngam par ni gab yul’yul’ ulan e fayleng nib sug ko ngongolen e galong, nib sug ko mornga’agen am e arram rogon ni rayag ni nge gel e mich rom.

Yan nga temple ni gubin ngiyalʼ era gel nag e mich rom. Ma pigpig rom nge liyor rom u temple era ayuwegnem ngam tafney nag e celestial. Temple e irreram tigil’ e gin nrayag ni ngan thapeg e tin nibe thogthog nag e thothup. U rrom e gin nrayag ni ngan dag ngom rogon ni ngam mon’og ko yafos nib celestial. U rrom e gin nrayag ni ngam chuchugur nigem riy ngak fare Tathapeg mrayag ni nge pii’ gelngin ngom nib gel. U rrom e gin nrayag ni ngam pire’eg e duweg ko tin nib momaw’ ulan e yafos rom, nib mu’un e tin ni rib momaw’ ngay.

Fapi gam’ing nge fapi m’ag ko temple e rib ga’fan nib manechubog. Gamaed be ul’ul’ ni gamaed be dumow tempol ni ngeyag ni mom i thapeg e pi tawa’ath ney ngalan e yafos rom. Gamaed falfalaen’ ngay ni nggu weliyed e tin ba’aray e temple ni ngan toey ko yungin ni ba’aray:

Savai’i, Samoa
Cancún, Mexico
Piura, Peru
Huancayo, Peru
Viña del Mar, Chile
Natal, Brazil
João Pessoa, Brazil
Calabar, Nigeria
Cape Coast, Ghana
Luanda, Angola
Mbuji-Mayi, Democratic Republic of the Congo
Laoag, Philippines
Osaka, Japan
Kahului, Maui, Hawaii
Fairbanks, Alaska
Vancouver, Washington
Colorado Springs, Colorado
Tulsa, Oklahoma
Roanoke, Virginia
Ulaanbaatar, Mongolia

Somoel e be powi’iymad ni ngan toey e pi tempol ney ni ngeyag ni ayuwegdaed ni ngan tafneyed e celestial. Got e bay nib fos. Yesus i ir Kristus. Ke sulyarmen e Galasia rok’ ni ngeyag ni tawa’ath nag gubin e bitir ku Got. Gube micheg u dakean fithngan Yesus Kristus nib thothup, amen.