De Boa Awoɔ Ntoatoasoɔ a Ɛrekɔ So no
Ɛyɛ abusuabɔ a ɛwɔ mmabunu asetena mu na ɛnya nsunsuansoɔ kɛseɛ wɔ deɛ wɔfa so.
Wɔ ahosiesie a merebɛkasa akyerɛ mo mu no, wɔatwe me akɔ Helaman ne Amon nkurɔfoɔ mma a wɔaduru wɔn mfeɛ soɔ ho asɛm no so. Mate Mormon Nwoma mu nkɔnhyɛfoɔ no tumi a wɔde kyerɛkyerɛ awofoɔ, bishopnom, ɛna ward mufoɔ nam adesua yi a wosuaeɛ no so.
Na Helaman yɛ ɔbarima a Ammonfoɔ mmeranteɛ bɛtumi de wɔn ho ato no soɔ. Ɔboaa wɔn ma wɔnyaa nkɔsoɔ na wɔn ho akokwa wɔ teneneeyɛ mu. Na wɔnim no na wɔdɔ no na “wɔbɛpɛ sɛ [ɔyɛ] wɔn kandifoɔ.”
Helaman dɔɔ saa mmeranteɛ yi te sɛ mmabarima na ɔhunuu wɔn tumi. Elder Dale G. Renlund kyerɛkyerɛɛ sɛ “sɛ yɛbɛsom afoforɔ yie a ɛsɛ sɛ yɛhunu wɔn Ɔsoro Agya n’ani so. Ɛno ansa na yɛbɛtumi afiri aseɛ ate ɔkra bi boɔ ankasa ase. Ɛno ansa na yɛbɛtumi ate ɔdɔ a Ɔsoro Agya wɔ ma Ne mma nyinaa no nka.” Wɔde nhunumu ahyira asɔfopɔn a wɔwɔ hɔ nnɛ sɛ wɔbɛhunu mmabunu a wɔhwɛ wɔn so no ɔsoro nipa su.
Helaman “kann wɔn dodoɔ” . mmeranteɛ a ɔhwɛ wɔn so no. Ɔde abusuabɔ a emu yɛ den a ɔne wɔn bɛnya no dii kan.
Wɔ berɛ a emu yɛ den a nkwa ne owuo sɛn nsɛnia mu no, Helaman ne n’akofoɔ nkumaa no hweree asraafoɔ a na wɔredi wɔn akyi no. Helaman ne mmabunu no tuu fo sɛ:
“Hwɛ, yɛnnim na mmom wɔagyina esiane sɛ yɛbɛsɔre atia wɔn nti,
“Enti me mma, ɛdeɛn na mo wɔ ka?”
Saa mmeranteɛ anokwafoɔ yi buaeɛ sɛ, “Agya, hwɛ yɛn Nyankopɔn ka yɛn ho, na ɔremma yɛnhwe ase afei momma yɛnkɔ.” Nkonimdie baa da no, berɛ a Helaman boaa saa mmeranteɛ no sɛ wɔnyɛ.
Na Amonfoɔ mmeranteɛ no wɔ asɛm kɛseɛ bi na na wɔyɛ akokoɔdurofoɔ wɔ “ɔman no mmoa” mu. “Tumi ketewa yi,” a Helaman di wɔn anim no trɛ “anidasoɔ kɛseɛ ne anigyeɛ pii” mu. wɔ Nifae asraafoɔ a wɔn ho akokwa no akoma mu. Bishop bi a ɔwɔ hɔ nnɛ no bɛtumi adi wɔn mmabunu a wɔwɔ akyɛdeɛ sononko no kwan ma wɔhyira ward no na wɔaboaboa Israel ano. Titenani Nelson akyerɛkyerɛ sɛ yei ne “asɛmpatrɛ adwuma a wɔsomaa [wɔn] baa asase so.”
Te sɛ Ammonfoɔ nkumaa yi a na “wɔdi nokorɛ daa wɔ biribiara a wɔde hyɛɛ wɔn nsa” no mu. Helaman de nokorɛdie dii n’akandifoɔ akyi. Ɛmfa ho asɛmdenden anaa akwansideɛ biara no, Helaman kɔɔ so “de boasetɔ” si hɔ berɛ nyinaa . de ama wɔn atirimpɔ anya nkɔsoɔ. Berɛ wɔhyɛɛ no “sɛ wɔntu anamon nkɔ [ne] mma nkumaa,” ɔyɛɛ saa.
Mmabunu a wɔwɔ hɔ nnɛ no wɔ nhyira berɛ a bishɔp foɔ di wɔn akandifoɔ no akwankyerɛ so sɛ wɔne ward Mmaa Bunu titenani[foɔ] ntu fo.” Stake titenani, nam stake Mmabunu titenafoɔ so, kyerɛkyerɛ bishɔp foɔ ne Mmabunu atitenafoɔ wɔ wɔn asɛdeɛ a wɔdi ho dwuma wɔ mmabunu no ho.
Helaman hyɛɛ apam ahodoɔ animuonyam. Berɛ a Amon kyerɛkyerɛɛ asɛmpa no kyerɛɛ mmeranteɛ a wɔyɛ nkumaa no awofoɔ no, wɔde akoma pa gye too mu. Na wɔde wɔn ho ama wɔn tenenee asuafoyɛ asetena foforɔ no ara ma wɔyɛɛ apam sɛ “wɔde wɔn atuateɛ akodeɛ bɛto hɔ.” Adeɛ baako pɛ a ɛmaa wɔsusuu sɛ wɔbɛbu saa apam yi so, asan akɔ wɔn akodeɛ a atwam a wɔnim no mu, ne sɛ wɔbɛhunu Nifaefoɔ no wɔ asiane mu.
Na Ammonfoɔ no pɛ sɛ wɔboa saa nkurɔfoɔ a wɔama wɔn fie a ahobammɔ wom yi. Helaman, ne afoforɔ, daadaa wɔn ma wɔdi wɔn apam no so sɛ wɔrenko da. Ɔde ne ho too ahoɔden a Onyankopɔn de bɛma no so kɛse sen ahoɔden a anka Ammonfoɔ yi bɛtumi de wɔn nkrante ne agyan de ama no.
Berɛ a Helaman ne n’akofoɔ nkumaa hyiaa asɛm a ɛyɛ hu no, na Helaman asi ne bo. “Hwɛ, ɛho nhia—yɛwɔ ahotosoɔ sɛ Onyankopɔn bɛgye yɛn.” Wɔ asɛm bi mu no, berɛ a ɛkɔm rekum wɔn no, na wɔn mmuaeɛ ne sɛ “wɔhwie [wɔn] akra guui wɔ mpaebɔ mu brɛɛ Onyankopɔn, na ɔbɛhyɛ [wɔn] den na wagye [wɔn] [ne] Awurade kɔsraa [wɔn] de awerɛhyɛmu sɛ ɔbɛgye [wɔn” ”ɛsiane wɔn gyedie a ɛtra so wɔ nea wɔkyerɛkyerɛɛ wɔn sɛ wɔnnye nni nti.”
Yɛte firii Helaman hɔ sɛ saa mmeranteɛ yi, wɔn awofoɔ na wɔboaa wɔn. Na awofoɔ anokwafoɔ yi nim sɛ wɔn mma nkyerɛkyerɛ yɛ wɔn asodie titiriw. Wɔkyerɛɛ wɔn mma sɛ wɔnni mmaransɛm no so na “wɔn nante tenenee” Onyankopɔn anim. Wɔn nanom kyerɛɛ wɔn “sɛ sɛ wɔannye akyinnyeɛ a, Onyankopɔn bɛgye wɔn.” Wɔn agyanom yɛɛ apam a wɔyɛ ho nhwɛsoɔ a tumi wom. Na saa kanee akofoɔ yi nim akoo mu ahudeɛ. Wɔde wɔn mma a wɔnni suahunu hyɛɛ Helaman nsa na wɔboaa wɔn ɛnam “aduane bebree” a wɔde kɔmaa wɔn no so.
Ɛnyɛ Helaman nko ara na na ɔresom n’asraafoɔ nkumaa no. Na ɔwɔ nnipa a wɔatwa ne ho ahyia a ɔkɔɔ wɔn nkyɛn kɔhwehwɛɛ mmoa ne akwankyerɛ. Ɔkɔɔ Ɔsraapanin Moroni hɔ kɔpɛɛ mmoa, na ɔnyaeɛ.
Obiara nni hɔ a ɔsom wɔ Awurade ahenie mu a ɔno nkutoo som. Awurade ahyira yɛn wɔ wards ne stakes. Ɛnam Nhyehyɛdeɛ a wɔasan de aba no so no, yɛwɔ nneɛma, nyansa, ne nhyɛsoɔ a yɛde bɛdi nsɛmdenden biara ho dwuma.
Bishop bi nam agyinatukuo ahodoɔ so hwɛ ward no so. Ɔhyɛ bosome mmiɛnsa biara som mu nsɛmmisa ho nkuran na afei ɔhyɛ mpaninfoɔ quorum ne Relief Society nkuran sɛ wɔnni wɔn asɛdeɛ sɛ wɔsom mmusua. Saa titenani yi di anim wɔ ahiadeɛ a wɔsusu ho na wɔhwehwɛ ano aduro a wɔde honhom kaa wɔn. Stake atitenafoɔ de mmoa ma ɛnam akwankyerɛ a wɔde ma mpaninfoɔ quorum ne Relief Society atitenafoɔ wɔ saa asɛdeɛ yi ho.
Akwankyerɛ a ɛhia ma akandifoɔ ne awofoɔ wɔ Asɛmpa Nwoma Korabea ne Asɛmpa a Ɛte ase apps no mu. Wɔ saa nneɛma a ɛfiri honhom mu yi mu no, yɛbɛtumi ahu twerɛsɛm, nnɛ yi adiyifoɔ nkyerɛkyerɛ, ne General Handbook. Mmabunu tab a ɛwɔ Asɛmpa Nwoma korabea no wɔ nneɛma pii ma quorum ne adesuakuo titenani ne Ma Mmabunu Ahoɔden: Akwankyerɛ a Wɔde Fa Nneɛma. Berɛ a ward no mufoɔ nyinaa sua saa nnoɔma a ɛfiri nkanyan na wɔhwehwɛ akwankyerɛ firi Honhom no hɔ no, Awurade bɛtumi akyerɛ obiara kwan wɔ mmabunu a wɔbɛhyɛ wɔn den mu.
Wɔbɛhyira ward no nyinaa na wɔahyɛ mu den berɛ a asɔremma de wɔn adwene si awoɔ ntoatoasoɔ a wɔreforo no so. Ɛmfa ho ne yɛn sintɔ ne sintɔ ahodoɔ no, Ɔsoro Agya to nsa frɛ yɛn mu biara, ɛnam Ne Honhom ayɔnkofa so, sɛ yɛnkɔ afoforɔ nkyɛn. Ɔnim sɛ yɛnyini na yɛyɛ kronkron berɛ a yɛdi Honhom Kronkron nkanyan akyi. Ɛmfa ho sɛ yɛn mmɔdenmmɔ nyɛ pɛ. Sɛ yɛne Awurade yɛ adwuma a, yɛbɛtumi anya ahotosoɔ sɛ yɛn mmɔdenmmɔ ne deɛ anka ɔbɛyɛ ama mmabunu no bɛhyia.
Sɛ yɛredi Honhom Kronkron no akwankyerɛ akyi wɔ mmabunu a yɛbɛduru wɔn nkyɛn no so no, yɛbɛyɛ Ɔsoro Agya no dɔ ho adansefoɔ wɔ wɔn abrabɔ mu. Sɛ yɛyɛ adwuma wɔ nkanyan a ɛfiri Awurade hɔ so no kyekyere abusuabɔ a ɔdɔ ne ahotɔsoɔ wom. Ɛyɛ abusuabɔ a ɛwɔ mmabunu asetena mu na ɛnya nkɛntɛnsoɔ kɛseɛ wɔ deɛ wɔfa so.
Mmabunu no bɛsua adiyisɛm nhwɛsoɔ berɛ a wɔne yɛn nya kyɛfa wɔ nhyehyɛeɛ a yɛrehwehwɛ na yɛayɛ adwuma wɔ nkanyan a wɔde som afoforɔ no ho. Berɛ a mmabunu dane kɔ Awurade nkyɛn kɔhwehwɛ nkanyan akwankyerɛ no , wɔne No ntam abusuabɔ ne ne mu ahotosoɔ bɛkɔ akyiri.
Yɛda yɛn ahotɔsoɔ adi wɔ mmabunu no mu ɛnam mmoa ne akwankyerɛ a yɛde ma so, a yɛmfa yɛn ho nhyɛ mu. Berɛ a yɛsan yɛn akyi na yɛma mmabunu kwan na wɔsua adeɛ ɛnam afutuo a wɔbom de ma, wɔrefa nkanyan kwan so, na ɔde honhom no di dwuma no, wɔbɛnya nokorɛ anigyeɛ.
Titenani Henry B. Eyring kyerɛkyerɛɛ sɛ “nea ɛbɛyɛ adeɛ a ɛho hia paa ne deɛ wɔsua firi [wo hɔ] fa nnipa ko a wɔyɛ ankasa ne deɛ wɔbɛtumi abɛyɛ ankasa. Me de m’adwene bu a wɔrensua no pii mfiri nkasaeɛ mu. Wobɛnya bi afiri atinka ahodoɔ a ɛfa nnipa korɔ a wɔyɛ, nnipa korɔ a wususu sɛ wɔyɛ, ne nea wɔsusu sɛ ebia wɔbɛyɛ ho.”
Yɛn mmabunu de wɔn akokoɔduro, wɔn gyedie, ne wɔn tumi ma yɛn ho dwiri yɛn. Berɛ a wɔyii sɛ wɔbɛyɛ Yesu Kristo asuafoɔ a wɔde wɔn ho ahyɛ mu koraa no, wɔbɛtwerɛ N’asɛmpa no wɔ wɔn akoma mu. N’akyi a wobɛdie no bɛyɛ onipa korɔ a wɔyɛ no fa, na ɛnyɛ nea wɔyɛ ara kwa.
Helaman boaa Ammonfoɔ nkumaa no ma wɔhunuu sɛnea Yesu Kristo osuani kokoɔdurofoɔ bi tenaa ase. Yɛbɛtumi ayɛ nhwɛsoɔ a tumi wom ama mmabunu wɔ sɛnea Kristo asuafoɔ bɔ wɔn bra nnɛ no ho. Awofoɔ anokwafoɔ rebɔ mpaeɛ ama nhwɛsoɔ ahodoɔ yi wɔ wɔn mma asetena mu. Dwumadie biara nni hɔ a ɛbɛtumi asi mpanimfoɔ a wɔwɔ ɔdɔ na wɔdi apam so nkɛntɛnsoɔ ananmu.
Sɛ asɔfoɔ kuo no titenani no, bishop no bɛtumi ayɛ nhwɛsoɔ ama mmabunu wɔ sɛnea wɔbɛyɛ okunu nokwafoɔ ne agya a ɔwɔ ɔdɔ ɛnam ahobanbɔ, nneɛma a wɔde ma, ne ahwɛsofoɔ a wɔbɛdi so wɔ tenenee kwan so. Bishops, a wɔde wɔn adwene si mmabunu so te sɛ laser, bɛnya nkɛntɛnsoɔ a ɛbɛtena hɔ awoɔ ntoatoasoɔ pii.
Mmabunu a wɔwɔ hɔ nnɛ no ka Ɔsoro Agya no ahonhom animuonyamfoɔ no. Na wɔka nokorɛ ne ahofadie ho banbɔfoɔ a wɔyɛ den wɔ wiase a na ɔdii owuo anim no ho. Wɔwoo wɔn wɔ saa nna yi mu sɛ wɔnam Awurade Yesu Kristo ho adanseɛ tumi so mmoaboa Israel ano. Onim wɔn mu biara na onim wɔn tumi kɛseɛ. Ɔwɔ abotrɛ berɛ a wɔrenyini no. Ɔbɛgye wɔn na wabɔ wɔn ho ban. Ɔbɛsa wɔn yareɛ na wakyerɛ wɔn kwan. Ɔbɛhyɛ wɔn nkuran. Yɛn, wɔn awofoɔ ne wɔn akandifoɔ, asiesie yɛn ho sɛ yɛbɛboa wɔn. Yɛwɔ Agyenkwa Asɔre no sɛ ɛbɛboa yɛn berɛ a yɛtete awoɔ ntoatoasoɔ a ɛdi hɔ no.
Medi adanseɛ sɛ wɔahyehyɛ Kristo Asɔre, a wɔnam Nkɔmhyɛni Joseph Smith so asan aba na Titenani Russell M. Nelson di n’anim nnɛ no, de aboa mmabunu no ma wɔama wɔn atirimpɔ kɛseɛ no aba mu wɔ nna a ɛdi akyiri yi mu. Wɔ Yesu Kristo din mu, amen.