Ɛyɛ Onyankopɔn Nyansa mu Sɛ Yɛnya Mormon Nwoma no

Ɔkasafoɔ yɛ Titenani Mark L. Pace

Kwasiada Sukuu Amansan Titenani

Ɛyɛ me mpaebɔ sɛ afe yi Mormon Nwoma no kenkan bɛyɛ anigyeɛ ne nhyira ama yɛn mu biara.

Anuanom mmarima ne mmaa adɔfoɔ, ɛyɛ yɛn anisɔ wɔ mo mmɔdemmɔ a mode kenkan twerɛnsɛm Bra, Di M’akyi. Yɛda mo ase wɔ deɛ moreyɛ nyinaa ho. Mo daadaa twaka a mone Onyankopɔn ne N’adwuma wɔ no wɔ akatua sononko. “Moreto adwuma kɛseɛ fapem. Na nneɛma nketewa mu na akɛseɛ firi ba.”

Yɛrekenkan Agyenkwa no nkyerɛkyerɛ wɔ twerɛnsɛm mu boa ma yɛsesa yɛn afie de kɔ gyedie dwankɔbea mu ne asɛmpa adesua mmeaeɛ. Ɛtwe honhom no ba yɛn afie mu. Sunsum Kronkron no de anigyeɛ hyɛ yɛn akoma na ɛsesa yɛn kɔ Yesu Kristo akyidifoɔ wɔ nkwa tenten mu.

Mfeɛ bebree mu nie, berɛ a yɛrekenkan twerɛnsɛm nwoma kronkron ahodoɔ no, yɛahunu Onyankopɔn nkyerɛkyerɛ a ɔde ma Ne mma nyinaa wɔ asɛmpa awoɔntoatoasoɔ akɛseɛ no mfonini.

Wɔ awoɔntoatoasoɔ biara mu, yɛahunu nhyehyɛeɛ a yɛnim no. Onyankopɔn sane de Yesu Kristo asɛmpa no ba anaasɛ ɔnam Ne nkɔmhyɛfoɔ so yikyerɛ. Nnipa no di nkɔmhyɛfoɔ no akyi na wɔhyira wɔn kɛse. Mmom, mmerɛ bi akyi, nnipa no bi gyaee nkɔmhyɛfoɔ no nsɛm tie na wɔtwee wɔn ho firii Awurade ne N’asɛmpa no ho. Yei na yɛfrɛ no ɔwaeɛ no. Wɔdii kan yii asɛmpa no kyerɛɛ Adam, nanso Adam ne Hawa mma no mu bi twee wɔn ho firii Awurade ho wɔ ɔwaeɛ mu. Yɛhunu mmaeɛ bio ne ɔwaeɛ nhyehyɛeɛ sɛ ɛsi ne ho so wɔ Enoch, Noah, Abraham, Moses, ne afoforɔ awoɔntoatoasoɔ mu.

Seesei, ɛnnɛ, yɛte awoɔntoatoasoɔ mahyɛ mmerɛ mu. Yei ne awoɔntoatoasoɔ a ɛnsi wɔ ɔwaeɛ mu. Ɛyɛ awoɔntoatoasoɔ a Agyenkwa Yesu Kristo Mmaeɛ a ɛtɔ so Mmienu ne Ne mfeɛ apem sodie no bɛba mu.

Enti, deɛn na ɛda nso wɔ saa awoɔntoatoasoɔ yi ho? Deɛn na Awurade de ama yɛn ɛnnɛ, titire yɛn mmerɛ yi mu, a ɛbɛboa yɛn ama yɛatwe abɛn Agyenkwa no a yɛnnyae no?

Mmuaeɛ baako a ɛba madwene mu yɛ twerɛnsɛm no—na titire Mormon Nwoma no: Yesu Kristo ho Adanseɛ Foforɔ.

Berɛ a Onyankopɔn ahyɛ bɔ no foforɔ biara nsi bio amansan ɔwaeɛ, ɛwɔ sɛ yɛyɛ ahwɛyie na yɛkwati ankasa waeɛ—kae, sɛdeɛ Titenani Russell M. Nelson kyerɛeɛ no , “Yɛn mu biara dwene yɛn akorankoro honhom mu yiedie ho.” Yɛresua Mormon Nwoma no, sɛdeɛ yɛreyɛ no afe yi no taa de yɛn bɛn Agyenkwa no—na ɛboa ma yɛtena bɛn No.

Yɛfrɛ no “adesua,” na saa yɛ ɛfiri sɛ ɛhia mmɔdemmɔ. Nanso yɛnhia sɛ daadaa yɛsua nokorɛ foforɔ. Ɛtɔ da a Mormon Nwoma no kenkan te sɛ deɛ yɛne Onyankopɔn aka abom ɛnnɛ—rema okra no aduannnuro, rehyɛ den wɔ honhom mu ansa na yɛapue akɔhyi ewiase, anaasɛ rehwehwɛ ayaresa wɔ ɛda bi a emu yɛ den wɔ wiase akyi.

Yɛsua twerɛnsɛm no sɛdeɛ Sunsum Kronkron, tikyani kɛseɛ no, bɛtumi ama yɛn adwensakyera ma Ɔsoro Agya ne Yesu Kristo mu adɔ na aboa yɛn ama yɛayɛ te sɛ Wɔm.

Sɛ saa adwennwene yi wɔ yɛn tiri mu a, yɛbɛtumi adwene sɛ, “Deɛn na Sunsum Kronkron no akyerɛ yɛn nnawɔtwe yi mu berɛ a yɛkenken Mormon Nwoma no?” na “Sɛn na yei de yɛn bɛn Agyenkwa no?”

Yei yɛ nsɛmmisa papa de ma yɛn twerɛnsɛm sua wɔ efie. Ɛsane nso yɛ nsɛmmisa papaapa a asɛnka nni ho a yɛbɛtumi de ahyɛ Kwasiada adesua ase wɔ asɔre. Yɛtu yɛn adekyerɛ mu mpɔn Kwasiada berɛ a nnawɔtwe no mu yɛtu efie adesua mu mpɔn. Enti, wɔ yɛn Kwasiada adesua mu, “deɛ ɔka asɛmpa ne deɛ ɔtie no te wɔn ho ase, na wɔn nyinaa hyɛden wɔn anigye bom.”

Nkyekyɛmu kakra bi a Honhom no de hyɛɛ madwene mu firi nnawɔtwe yi Mormon Nwoma no sua mu:

• Nephi hyɛɛ YaKob sɛ “kora saa mprɛte yi na fama firi awoɔntoatoasoɔ mu kɔsi awoɔntoatoasoɔ mu. Na sɛ nsɛnka bi wɔ hɔ a ɛyɛ kronkron, anaasɛ adiyisɛm, anaasɛ nkɔmhyɛ a,” ɛwɔ sɛ Yakob “krukyire wɔ saa mprɛte yi so de ma wɔn nkorɔfoɔ nti”

• Akyire no Yakob dii adanseɛ, “Yɛhwehwɛ [twerɛnsɛm] no mu, na yɛanya saa adanseɛ yi nyinaa no, yɛnya anidasoɔ, na yɛn gyedie renhinhim .”

Afei, saa nyiyimu yi maa mekaee deɛ Nephi kaa no dada fa kɔbere mprɛte no ho:

“Na yɛn nsa kaa twerɛtohɔsɛm no na yɛhwehwɛɛ mu hunuu sɛ ɛsom bo kɛseɛ ma yɛn, ɛno nti yɛbɛkora Awurade mmaransɛm no ato hɔ ama yɛn mma.

“Ɛno nti, na ɛyɛ nyansasɛm wɔ Awurade mu sɛ yɛde bɛka yɛn ho akɔ, berɛ a yɛretu kwan akɔ ɛserɛ no so abɛn bɔhyɛ asase no.”

Afei, sɛ na ɛyɛ nyansa mu ma Lehi ne n’abusua sɛ wɔnya twerɛnsɛm a, sa ara na ɛyɛ nyansa ma yɛn. Twerɛnsɛm no boɔ kɛseɛ a ɛsom ne tumi kɔ so wɔ yɛn abrabɔ mu ɛnnɛ a ano mmrɛɛ aseɛ.

Nnipa biara nni abakɔsɛm mu a wɔanya Mormon Nwoma no ne twerɛnsɛm afoforɔ ho akwanya sɛdeɛ yɛanya no ɛnnɛ yi . Aane. Wɔhyiraa Lehi ne n’abusua maa wɔde kɔbere mprɛte no kaa wɔn ho, nanso wɔanya ntomadan nyinaa ho nhwɛsoɔ! Mormon Nwoma no ho nhwɛsoɔ a ɛhia pa ara yɛ yɛn ankasa nhwɛsoɔ. Ɛyɛ nhwɛsoɔ a yɛkenkan no.

Wɔ Lehi nkwa dua yikyerɛ no mu, Lehi kyerɛɛ yɛn ankasa suahunu a yɛwɔ wɔ Onyankopɔn dɔ ho. Ɔdii aduaba no bi akyire yi no, Lehi hunuu ne yere Sariah, ne ne mmammarima Nephi ne Sam wɔ akirikyiri kakra.

“Wɔgyinaa hɔ sɛdeɛ wɔnnnim baabi a wɔnkɔ.

“Memaa me nsa so kyerɛɛ wɔn,” Lehi na ɔseɛ, “na mesane nso kasa kyerɛɛ wɔn de nne kɛseɛ sɛ wɔmmra me hɔ, na wɔmmɛdi aduaba no a na ɛyɛ akɔnnɔ sene aduaba biara.

“Na wɔbaa me hɔ na wɔdii aduaba no.”

Medɔ Lehi awofoɔyɛ nhwɛsoɔ a ɔhyɛɛda yɛeɛ no. Na Sariah, Nephi, ne Sam rebɔ tenenee abrabɔ. Nanso na Awurade no wɔ biribi papa, biribi a ɛyɛ dɛ de ma wɔn. Na wɔnnim baabi a wɔbɛhunu no, nanso na Lehi nim. Enti, “ɔde nne kɛseɛ,” frɛɛ wɔn, sɛ wɔmmra nkwa dua no ho mmɛdi dua no aba no bi. Na ne kwankyerɛ yɛ pefee. Na deɛ wɔnteaseɛ ntumni mma hɔ.

Meyɛ saa awofoɔyɛ aba nhwɛsoɔ. Berɛ a na meyɛ aberanteɛ no, bɛyɛ mfeɛ 11 anaasɛ 12 no, me maame bisaa me “Mark, wonam Sunsum Kronkron no so ahunu ama wo ho sɛ asɛmpa no yɛ nokorɛ?”

N’asɛmmisa no yɛɛ me nwanwa. Mabɔ mmɔden sɛ ɛyɛ “aberante pa,” na medwenee yɛ ɛno ara ne no. Nanso me maame, te sɛ Lehi hunuu sɛ biribi nkɔ yie. Na mehia sɛ meyɛ adwuma na me ara mehunu.

Mebuaa sɛ mennyaa saa suahunu no. Na me mmuaeɛ no anyɛ no nwanwa koraa.

Afei ɔkaa asɛm bi a me werɛ remfiri da. Mekae ne nsɛm no de bɛsi ɛnnɛ: “Ɔsoro Agya no pɛ sɛ wohunu ma wo ho. Mmom ɛwɔ sɛ wobɔ ho mmɔden. Wohia sɛ wokenkan Mormon Nwoma no na wobɔ mpaeɛ na Sunsum Kronkron no kyerɛ woɔ. Ɔsoro Agya bɛma wo mpaebɔ no ho mmuaeɛ.”

Ɛyɛ, menkenkan Mormon Nwoma no da. Mannwene sɛ manyini sɛ meyɛ saa. Nanso me maame nim de.

N’asɛmmisa no de ɔpɛ brɛɛ me sɛ me ara mehunu.

Ent, anadwo biara, wɔ medan mu mene menuammarima mmienu kyɛeɛ, mesɔ kanea a ɛwɔ me mpa atifi na mekenkann tire bi wɔ Mormon Nwoma no. Afei, meredum kanea no, mesi firi me mpa so kɔ me nkotodwe anim bɔ mpaeɛ. Mebɔɔ mpaeɛ no nokorɛ mu de ɔpɛ kɛseɛ sene deɛ mayɛ pɛn. Mebisaa Ɔsoro Agya sɛ mesrɛ ɔma me nhunu Mormon Nwoma no nokorɛ a ɛyɛ.

Firi berɛ a mehyɛɛ aseɛ rekenkan Mormon Nwoma no, metee nka sɛ Ɔsoro Agya no nim me mmɔdemmɔ. Na metee nka sɛ me ho hia No. Berɛ a mekan na mebɔɔ mpae no, ahotɔ, asomdwoeɛ atenka baa me so. Tire ne tire, gyedie kanea kɔɔ so hyerɛn wɔ me kra mu. Ankyɛ, mehunuu sɛ saa atenka no yɛ nkokorɛ a Sunsum Kronkron no resi so dua. Me ara mebɛhunuu sɛ Mormon Nwoma no yɛ nokorɛ, na Yesu Kristo yɛ wiase Agyenkwa. Sɛdeɛ m’ani sɔ me maame nkanyan frɛ no.

Saa Mormon Nwoma no kenkan suahunu sɛ aberanteɛ no hyɛɛ twerɛsɛm sua nhyehyɛeɛ bi ase a atoaso ahyira me ɛnnɛ. Mekɔso ara kenkan Mormon Nwoma no na mebɔ mpaeɛ. Na Sunsum Kronkron si nokorɛ a ɛwɔ mu no so dua mpɛn pii.

Nephi kaa no nokorɛ mu. Ɛyɛ nyansa wɔ Awurade mu sɛ ɛwɔ sɛ yɛde twerɛnsɛm no ka yɛn ho wɔ yɛn nkwa nna nyinaa mu. Mormon Nwoma no yɛ “boɔ titire” a ɛma saa awoɔ ntoatoasoɔ yi da nso firi kane awoɔntoatoasoɔ no ho. Berɛ a ɛysua Mormon Nwoma no na yɛdi nkɔmhyɛni a ɔte aseɛ no akyi, ankasa ɔwaeɛ rema yɛn abrabɔ mu.

Ɔfrɛ sɛ yɛmmra nkwa dua no ho, nsɔ Onyankopɔn asɛm no mu den nyɛ ɔfrɛ a ɛfiri Lehi hɔ de ma n’abusua kɛkɛ, na ɛnyɛ ɔfrɛ kɛkɛ a ɛfiri me maame hɔ sɛ menkan na memmɔ Mormon Nwoma no ho mpaeɛ. Ɛsane nso yɛ ɔfrɛ a ɛfiri yɛn nkɔmhyɛni, Titenani Russell M. Nelson hɔ, ma yɛn mu biara.

“Mehyɔbɔ mpaeɛ sɛ sɛ wode mpaebɔ sua Mormon Nwoma no da biara a, wobɛsi gynaeɛ a ɛyɛ papa—da biara. Mehyɛ bɔ sɛ berɛ a wobɛdwene deɛ wosua ho no, ɔsoro mfɛnsere bɛbie, na wobɛnya wo nsɛmmisa ho mmuaeɛ ne w’abrabɔ mu akwankyerɛ.”

Me mpaebɔ ne sɛ afe yi mu Mormon Nwoma no kenkan bɛyɛ anigyeɛ ne nhyira ama yɛn mu biara na atwe yɛn abɛn Agyenkwa no pɛɛ.

Ɔsoro Agya te ase. Yesu Kristo, yɛ yɛn Agyenkwa ne Odimafoɔ. Mormon Nwoma no kuta Ne nsɛm na ɛde Ne dɔ ma. Titenani Russell M. Nelson yɛ Awurade no nkɔmhyɛni a ɔte aseɛ ɛnnɛ. Menim sɛ saa nneɛma yi yɛ nokorɛ ɛnam Sunsum Kronkron no adanseɛ a medii kan nyaeɛ berɛ a na merekenkan Mormon Nwoma no sɛ aberanteɛ. Wɔ Yesu Kristo din mu, amen.

Atwerɛ.

1. Nkyerɛkyerɛ ne Apam 64:33.

2. “Efie-mfimfini foforɔ, a Asɔre-boa adesua a wɔaka abom wɔ tumi a ɛbɛtumi ayi mmusua tumi akyerɛ, berɛ a abusua biara de ahwɛyie ne ahonim so resesa wɔn fie de akɔ dwankɔbea a gyedie wɔm. Mehyɛ bɔ sɛ berɛ a mobɔ mmɔden yɛ adwuma de ayɛ mo fie asɛmpa adesua beaeɛ no, berɛ bi mu mo Sabbath nna bɛyɛ anika nokorɛ mu. Mo mma ani bɛgye sɛ wɔbɛsua adeɛ na wɔdi Agyenkwa nonkyerɛkyerɛ so, na ɔsɛefoɔ no nkɛntɛnsoɔ a ɛwɔ mo abrabɔ ne mo fie mu so bɛte. Mo fie mu nsakraeɛ bɛyɛ nwanwa ne akyitaeɛ deɛ” (Russell M. Nelson, “Rebɛyɛ Nna a Ɛdi Akyire Ahotefoɔ Sononko,” Liahona, Obubuo 2018, 113).

3. “Nokorɛ, nokorɛ, Mese mo sɛ, Mede me Honhom bɛma mo a ɛbɛbue moadwene mu, a ɛde anigyeɛ bɛhyɛ mo kra ma” (Nkyerɛkyerɛ ne Apam 11:13).

4. Awoɔntoatoasoɔ yɛ berɛ ano, berɛ ano a ɛmu Awurade wɔ ɔsomfoɔ baako a wɔama no tumi wɔ asase so a ɔkuta asɔfodie kronkron ne nsafoa no, na ɔwɔ ɔsoro tumi sɛ ɔde asɛmpa no ma asase so sotefoɔ no” (Tinsɛm ne Nsɛmmisa, “Awoɔntoatoasoɔ,” Asɛmpa Akoraeɛ).

5. Hwɛ Moses 5:12–16.

6. Nkɔmhyɛni Daniel hunuu yɛn da yi, yɛn awoɔ ntoatoasoɔ yi, berɛ a ɔkyerɛɛ Nebuchadnezzar daeɛ no ase. Yesu Kristo Asɔre a ɛwɔ hɔ ma Nna a Ɛdi Akyire Ahotefoɔ yɛ ɛboɔ wɔ saa daeɛ no mu, ɛboɔ bi a nsa nkura mu, rebobɔ kɔ anim akɔhyɛ asase so nyinaa ma (hwɛ Daniel 2:34–35, 44–45; Nkyerɛkyerɛ ne Apam 65:2).

7. “Onyankopɔn Agya ne Yesu Kristo frɛɛ Nkɔmhyɛni Joseph Smith sɛ ɔmmɛyɛ saa awoɔntoatoasoɔ yi mu nkɔmhyɛni. Tete awoɔntoatoasoɔ soro tumi no nyinaa na ɛwɔ sɛ wɔfa ne so sane de ba. Saa awoɔ ntoatoasoɔ mahyɛ mmerɛ yi mu ntɔ sini wɔ mmerɛ anaasɛ beaeɛ mu. Ɛrensi wɔ ɔwaeɛ mu, na ɛbɛhyɛ asase so ma” (Russell M. Nelson, “Yesrae a Ahwete no Anoboaboa,” Liahona, Obubuo 2006, 79–80).

8. Russell M. Nelson, “Mmueano Kasa,” Liahona, Obubuo 2018, 8.

9. Hwɛ “Adwensakyera Ne Yɛn Botaeɛ,” Bra Di M’akyi—De ma Efie ne Asɔre: Mormon Nwoma 2024, v.

10. Nkyerɛkyerɛne Apam 50:22; san hwɛ nyiyimu 17–21.

11. Yakob 1:3–4.

12. Yakob 4:6.

13. 1 Nephi 5:21–22.

14. Ɛnkyeree wɔaka sɛ Mormon Nwoma no mmaako, mmaako ɔpepe 200 na wɔakyɛ wɔ saa awoɔ ntoatoasoɔyi mu. Nokorɛ yei yɛ nwanwa. Mormon Nwoma no wɔakyerɛ aseɛ kɔ kasahodɔ 113 mu, a wɔguso rekyerɛ ase wɔ kasahodoɔ 17 mu. Hwɛ nhyira a ɛyɛ sɛ yɛwɔ Mormon Nwoma no wɔ deɛ wɔatintim, digyital, ɛnne, sini, ne akwan afoforɔ so. (Hwɛ Ryan Jensen, “Church Distributes 200 Millionth Copy of the Book of Mormon,” Church News, Ɔpɛnima 29, 2023, thechurchnews.com.)

15. 1 Nephi 8:14–16; nsisoɔ ka ho.

16. Honhom nkɛntɛnsoɔ a tumi wɔ mu wɔ akwadaa abrabɔ mu yɛ awofoɔ ne nananom a wɔdi nokorɛ wɔn apam kronkron mu tenenee wɔ nhwɛsoɔ so. Awofoɔ a wɔhyɛ da kyerɛkyerɛ wɔn mma gyedie wɔ Yesu Kristo mu, sɛdeɛ ‘wɔbɛhunu baabi korɔ a ɛwɔ sɛ wɔkɔhwehwɛ bɔnefakyɛ.’[2 Nephi 25:26]. Biarabiara ne botrobodwo apam sodie de yɛkɔ honhom wuo mu. Honhom mu ɔsɛeɛ taa yɛ kɛse wɔ yɛn mma ne yɛn nananom so” (Kevin W. Pearson, “Wokɔso Ara Wɔ Ɔpɛ, “Wokɔso wɔ Ɔpɛ?,” Liahona, Obubuo 2022, 69).

17. Hwɛ Nkyerɛkyerɛ ne Apam 6:22–24.

18. Nkɔmhyɛni Joseph Smith kaa sɛ: “Meka kyerɛɛ anuanom sɛ, Mormon Nwoma no, yɛ nwoma a ɛtene paa ara kyɛn nwoma biara wɔ asase yi so, na ɛyɛ yɛn som no boɔ titire, na obi bɛbɛn Onyankopɔn berɛ a ɔbɛdi ne nkyerɛkyerɛ so.” (wɔ introduction to the Book of Mormon).

19. Russell M. Nelson, “Mormon Nwoma no: Sɛn na Anka W’abrabɔ Bɛyɛ sɛ Ɛnka ho a?,” Liahona, Obubuo 2017, 62–63.