Wɔasiesie Wo sɛ Bɛsom
Yɛn Soro Agya no pɛ sɛ ɔda mo ankasa mo nyisihɔ adi kyerɛ mo, na Ɔbɛyɛ saa berɛ a mohwehwɛ sɛ mobɛsua na moadi N’apɛdeɛ akyi.
Anwummerɛ yi, mekasa kyerɛ Asɔre no mmabunu, mmeranteɛ ne mmabaa a wɔrenyini a wɔyɛ frankaa kurafoɔ ma awoɔ ntoatoasoɔ a ɛdi hɔ no.
Wɔ Ahineme 2013 mu no, yɛn nkɔnhyɛnyi dɔfoɔ, Titenani Russell M. Nelson, paee mu kaa sɛ: “Wo Soro Agya nim wo akyɛ paa. Wo, sɛ Ne babarima anaa babaa no, Ɔno na wayi wo sɛ mommra asase so wɔ saa berɛ pɔtee yi mu, sɛ wobɛyɛ ɔkannifoɔ wɔ N’adwuma kɛseɛ a ɔbɛyɛ wɔ asase so no mu.”
Mfeɛ mmienu a atwam no, Titenani Nelson toaa so sɛ:
“Ɛnnɛ mesan si so dua denneennen sɛ Awurade aka akyerɛ aberanteɛ a ɔfata na ɔbɛtumi biara sɛ ɔnsiesie ne ho mma asɛmpatrɛ adwuma na ɔnsom. Wɔ Nna a Ɛdi Akyire Ahotefoɔ mmeranteɛ fam no, asɛmpatrɛ adwuma yɛ asɔfodie asɛdeɛ. Wɔde mo mmerante asie ama saa berɛ yi a Israel anoboaboa a wɔahyɛ ho bɔ no rekɔ so no.
“Wɔ mo anuanom mmaa nkumaa a mobɛtumi no, asɛmpatrɛ adwuma nso yɛ tumi, nanso ɛnyɛ ɔhyɛ, akwanya. Bɔ mpaeɛ hunu sɛ Awurade bɛpɛ sɛ wosom asɛmpatrɛ adwuma a, na Honhom Kronkron no bɛma w’akoma ne w’adwene mmuaeɛ.”
Yɛn nkɔnhyɛni no nsɛm a ɔka faa Awurade a ɔde yɛn berɛ yi mu mmabunu no sie maa saa berɛ yi wɔ Israel anoboaboa no mu ne ne nsatofrɛ sɛ yɛmɔ mpaeɛ mfa nhunu deɛ Awurade bɛpɛ sɛ moyɛ no yɛ, ɔfa bi, ntotoho wɔ abrabɔ bi wabɔ ne nhyira bi a wonyaaɛ firii Onyankopɔn hɔ ansa na wɔrewo wo aba asase yei so. Yɛn a wɔwoo yɛn wɔ asase yi so nyinaa dii kan ne yɛn Soro Agya tenaa sɛ Ne honhom mu mma. Awurade kakyerɛɛ Mose, “Me, Awurade Nyankopɔn, bɔɔ nneɛma nyina honhom mu, ansa na ɔreyɛ wo awosuo mu wɔ asase no ani.”
Berɛ a Ɔbɔɔ mo honhom mu no, Ɔdɔɔ mo sɛ Ne honhom mu mmammarima ne ne mmammaa na ɔde ɔsoro su ne daapem hyɛberɛ hyɛɛ mo mu biara mu.
Wɔ w’asetena ansa na wɔrewo wo no mu no, “wonyaa wo nipasu na womaa wo honhom mu tumi yɛɛ kɛse.” Wɔhyiraa wo wɔ akyɛdeɛ a ɛma wotumi yi nneɛma ma wo ho, na wosii gyinaeɛ a ɛho hia ampa, te sɛ gyinaeɛsie sɛ wobɛdi Ɔsoro Agya no anigyeɛ nhyehyɛeɛ akyi, a ɛne sɛ “wobɛnya honam nipadua na woanya asase so suahunu de akɔ anim na awieeɛ no, woahunu [wo] ɔsoro hyɛberɛ sɛ daapem adedifoɔ.” Saa agyinasie yi nyaa nsunsuansoɔ wɔ w’asetena so saa berɛ no, wɔ w’asetena ansa na wɔrewo wo no mu, na ɛkɔ so ka w’asetena seesei. Sɛ Onyankopɔn ba a wote ase wɔ w’asetena ansa na woawu no mu no, “wonyinii wɔ nyansa mu, na wusuaa nokorɛ no dɔ.”
Ansa na wɔrewo mo no, Onyankopɔn yii mo mu biara sɛ ɔnyɛ asɛmpatrɛ adwuma pɔtee bi wɔ mo honam mu asetena mu wɔ asase so. Sɛ wokɔ so fata a, nhyira a ɛwɔ saa mmara a wɔhyɛeɛ ansa na wɔrewo wo no mu no bɛma woanya hokwan ahodoɔ nyinaa wɔ saa asetena yi mu, a hokwan a wode bɛsom wɔ Asɔre no mu na wode wo ho ahyɛ adwuma a ɛho hia pa ara a ɛrekɔ so wɔ asase so ɛnnɛ no mu: Israel anoboaboa. Wɔfrɛ saa bɔhyɛ ne nhyira a ɛwɔ hɔ ansa na wɔrewo wo no nyisihɔ. “Nkyerɛkyerɛ a ɛfa nneɛma a wɔdi kan hyehyɛ ho no fa Asɔre no mufoɔ nyina ara ho.” Nyisihɔ nkyerɛ sɛ wobɛnya ɔfrɛ anaa asɛdeɛ pɔtee bi. Saa nhyira ne ɛho kwan ahodoɔ yi ba asetena yi mu esiane tenenee a wode yi deɛ wopɛ nti, sɛdeɛ wo nyisihɔ wɔ ansa na wɔrewo wo mu no baeɛ esiane tenenee nti. Berɛ a wokyerɛ sɛ wofata na wonya nkɔsoɔ wɔ apam kwan no so no, wobɛnya hokwan asom wɔ wo Mmaa Nkumaa anaa asɔfodie kuo mu. Wɔbɛhyira wo sɛ wobɛsom wɔ tɛmpol, abɛyɛ onuabarima anaa onuabaa a ɔsom, na woasom asɛmpatrɛ adwuma mu sɛ Yesu Kristo suani.
Deɛn nti na ɛho hia sɛ wobɛhwehwɛ ahunu wo nyisihɔ na woate aseɛ? Wɔ da a nsɛmmisa dɔɔso, berɛ a nnipa pii hwehwɛ sɛ wɔbɛhunu wɔn nipasu ankasa, nokwasɛm a ɛne sɛ Onyankopɔn nim na wahyira yɛn mu biara ankoranankoro ansa na wɔde “su a ɛho hia a ɛfa ansa na wɔrewo wo, honam mu asetena, ne daapem nipasu ne atirimpɔ” de asomdwoeɛ ne awerɛhyem a ɛyɛ dɛ ba yɛn adwene ne akoma mu. Worehunu onipa korɔ a woyɛ no firi aseɛ wɔ worete Onyankopɔn nyisihɔ nhyira a wɔde ama wo ansa na wɔrewo wo wɔ asase yi so no ase. Yɛn Soro Agya no pɛ sɛ ɔda mo ankasa mo nyisihɔ adi kyerɛ mo, na Ɔbɛyɛ saa berɛ a mohwehwɛ sɛ mobɛsua na moadi N’apɛdeɛ akyi.
M’ani gye ho sɛ mɛkenkan Titenani Nelson Instagram nsɛm. Deɛ m’anigye ho pa ara no mu baako ne Kitawonsa 20, 2022. Ɔtwerɛɛ sɛ:
“Megye di sɛ sɛ Awurade ne wo rekasa tee a, adeɛ a ɛdi kan a anka ɔbɛhwɛ sɛ wobɛte aseɛ ne wo nipasu ankasa. Me nnamfonom adɔfoɔ, moyɛ Onyankopɔn honhom mu mma ankasa.
“ Mfomsoɔ biara nni ho: Wo tumi yɛ ɔsoro. Onyankopɔn nam nsiyɛ a wode hwehwɛ no so bɛma woahunu onipa korɔ a wobɛyɛ.”
Me ne mo nkyɛ sɛdeɛ m’asase so agya kyerɛkyerɛɛ me sɛ mɛhunu me nipasu ne Onyankopɔn nhyehyɛeɛ wɔ m’abrabɔ mu?
Kwasiada anɔpa bi berɛ a na madi mfe 13 no, na meredɔ ɛsrɛ no sɛ me nnawɔtwe nnawɔtwe adwuma no fa bi. Berɛ a mewieeɛ no, metee sɛ wɔato pono no mu wɔ yɛn fie no akyi na mehwɛeɛ sɛ me papa refrɛ me sɛ memmɛka ne ho. Mekɔɔ akyire hɔ abrannaa no so, na ɔkaa sɛ me ne no ntena bama no so. Na ɛyɛ anɔpa a ɛyɛ fɛ. Meda so ara kae sɛ na ɔte bɛn me pa ara ma na yɛn mmatiri keka yɛn ho. Ɔde hyɛɛ aseɛ sɛ ɔdɔ me. Ɔbisaa me deɛ ɛsi m’ani so wɔ asetena mu. Mesusu sɛ, “Wiɛ, ɛno yɛ mmerɛ.” Na menim nneɛma mmienu ampa: Na mepɛ sɛ meyɛ tenten, na na mepɛ sɛ metaa kɔ nsraban mu. Na meyɛ ɔkra a meyɛ mmrɛ. Ɔsereeɛ, na ɔgyinaa kakra, na ɔkaa sɛ: “Steve, mɛpɛ sɛ me ne wo ka biribi a ɛho hia me pa ara. Mabɔ mpaeɛ sɛ yɛn Soro Agya bɛma deɛ mereka seesei no atɔ w’adwene ne wo kra so a wɔrentumi mpopa sɛdeɛ wo werɛ remfiri da.”
Me papa nyaa m’adwene nyinaa wɔ saa berɛ no mu. Ɔdanee ne ho hwɛɛ m’anim na ɔkaa sɛ, “Ɔba, bɔ w’asetena mu kokoam mmerɛ ho ban.” Ɛhɔ yɛɛ komm kyɛree na ɔmaa nteaseɛ no wuraa m’akoma mu tɔnn.
Afei ɔtoaa so sɛ: “Wonim, saa mmerɛ a wo nko ara na wowɔ hɔ na obi foforɔ nnim nea woreyɛ no? Saa mmerɛ no a wosusu nneɛma ho, ‘Biribiara a meyɛ mprempren no nka obi foforɔ, me nkutoo’?”
Afei ɔkaa sɛ, “Ɛkyɛn berɛ biara wɔ w’abrabɔ mu no, deɛ woyɛ wɔ w’abrabɔ mu kokoam mmerɛ mu no bɛnya nkɛntɛnsoɔ kɛseɛ wɔ sɛdeɛ wobɛsɔ ɔhaw ne akomayea a wobɛhyia ano; na deɛ woyɛ wɔ kokoam mmerɛ mu no nso bɛnya sɛdeɛ wobɛgyina nkonimdie ne anigyeɛ a wobɛnya no so nkɛntɛnsoɔ kɛse asene berɛ foforɔ biara wɔ w’asetena mu.”
Me papa nyaa n’koma mu apɛdeɛ. Ne nne ne sɛdeɛ ɛyɛ dɛ, ne ɔdɔ a metee nka wɔ ne nsɛm mu no, kaa m’adwene ne me kra so saa da no a wontumi mpopa.
Masua wɔ mfeɛ no mu sɛ anwanwadeɛ kɛseɛ a ɛwɔ saa da no mu wɔ me mmɔfraberɛ mu fie bamma so ne sɛ, wɔ m’abrabɔ mu kokoam mmerɛ mu no, mɛtumi akɔ Onyankopɔn nkyɛn wɔ mpaebɔ mu akɔgye adiyisɛm. Na me papa rekyerɛ me sɛdeɛ mɛtumi asua Onyankopɔn nyisihɔ nhyira. Wɔ saa kokoam mmerɛ no mu no, mesuaa sɛ Mormon Nwoma no yɛ Onyankopɔn asɛm. Mebɛhunuu sɛ Onyankopɔn ayi me asi hɔ sɛ mensom asɛmpatrɛ adwuma. Mebɛhunuu sɛ Onyankopɔn nim me na Ɔtie me mpaebɔ na Ɔbua me. Mesuaa sɛ Yesu ne Kristo, yɛn Agyenkwa ne yɛn Gyefoɔ.
Ɛwom sɛ mayɛ mfomsoɔ pii firi saa me ne m’agya nkaeɛ da no, nanso mmɔden a mebɔeɛ sɛ mɛbɔ m’abrabɔ mu kokoam mmerɛ ho ban no akɔ so ayɛ sɛkyɛ wɔ asetena mu ahum no mu na ama matumi ahwehwɛ baabi a ahobammɔ wɔ ne yɛn Agyenkwa no dɔ nhyira a ɛsa yareɛ,na ɛhyɛ den .
Me nuanom mmarima ne mmaa nkumaa, berɛ a mode anigyeɛ a ɛfata bɔ mo abrabɔ mu kokoam mmerɛ ho ban, tie nnwom a ɛma denhyɛ, kenkan twerɛsɛm, mobɔ mpaeɛ daa, a nteaseɛ wom, na mobɔ mmɔden sɛ mobɛgye mo agyanom mpanimfoɔ nhyira na modwennwene ho no, mobɛnya adiyisɛm. Wɔ Titenani Nelson nsɛm mu no, w’ani bɛbue “atrɛ akɔ nokorɛ a ɛkyerɛ sɛ saa asetena yi ampa yɛ berɛ a wonya kwan si gyinaeɛ wɔ asetena korɔ a wo pɛ sɛ wotena ase afebɔɔ ho.”
Yɛn Agya a ɔwɔ Soro bɛbua wo mpaebɔ, titire wo mpaebɔ a wobɔ wɔ w’abrabɔ mu kokoam mmerɛ mu. Ɔbɛda wo nyisihɔ ne w’adom akyɛdeɛ adi akyerɛ wo, na wobɛte nka sɛ Ne dɔ akata wo so, sɛ wobɛfiri akomam abisa na woapɛ sɛ wohunu ampa ara a. Berɛ a wobɔ w’abrabɔ mu kokoam mmerɛ ho ban no, wo ho a wode bɛhyɛ asɛmpa no ayɛyɛdeɛ ne apam mu no bɛnya nteaseɛ kɛseɛ. Wode wo ho bɛfam Onyankopɔn ho yie wɔ apam a wo ne No ayɛ no mu, na wɔama wo so ama woanya anidasoɔ, gyedie, ne ahotosoɔ kɛseɛ wɔ bɔhyɛ a Wahyɛ wo no mu. Wopɛ sɛ wohunu Onyankopɔn nhyehyɛeɛ ma wo? Medi adanseɛ sɛ Ɔpɛ sɛ wohunu, na Ɔhyɛɛ Ne nkɔnhyɛni no nkuran kɔɔ wiase sɛ ɔnto nsa nfrɛ yɛn mu biara sɛ yɛmmɔ mpaeɛ na yɛn nsa nka saa suahunu a ɛbue aniwa yi mma yɛn ho. Medi adanseɛ wɔ nokwasɛm ne tumi a ɛwɔ yɛn Agyenkwa no mpata afɔrebɔ a ɛma ɛyɛ yie sɛ yɛbɛtena ase na yɛanya Onyankopɔn nyisihɔ nhyira nyinaa mu anigyeɛ, wɔ Yesu Kristo din mu, amen.