Toeni Luhlahp
“Pa inge Wosasuc Luhk”—“Pa inge Alu Luhk”
Toeni luhlahp ke Ohktohpa 2024
13:49

“Pa inge Wosasuc Luhk”—“Pa inge Alu Luhk”

Sel Elder Dale G. Renlund

Ke U luhn Mwet Sap Singucul Luo

Pa inge wosasuc luhn Mwet Lahngo, ac pa inge Alu Lal (liye 3 Nephi 27:21; Mosiah 26:22; 27:13). Oracni luhn ma luo inge nuh sie oraclah eklac na fokoko se.

Ke puhlan pacl loes se, pauta srwoalsrwoal muhkwena pa oasr kuh in fukulyac ma uh. Kuh in ahkosack kacnohn buhl, tuhsruhk tiac kuh in fukulyac luhf ac muhsah inkacnek. Muhnahslac in sang fukulyac yot.

Ke sie alfoko angngaul oalkosr mwet pihsrlac Italy se inel pa Ascanio Sobrero sokwack mwe fukfuk sasuc se, nitroglycerin. Atacn kof se inge sahp pacl tausin fokoko liki na pauta srwoalsrwoal. El kuh in fukulyac yot. Tuhsruhktuh, nitroglycerin el sensen. Fin kom tolyac ke acn fototo se, e fokwelihk. Fin fol laclac, ac fokwelihk. Fin ohyohu laclac, ac fokwelihk. Finne fin fihliyucki an ke rum fucsrfucsr, lohsr se, e fokwelihk pac. Puhs muhtuhnfacl tilokihnyac inkacnek in forfor la, ac puhs pac acn tilokihnyac oreyac uh.

Ke sie alfoko onngoul saintis Sweden se inel pa Alfred Nobel el srihke in ahkwoyelah nitroglycerin. Tukun yac itkohsr el lohacng nuh kac, el kuhtanglah finsrak lal uh ke el sroksrokihnyac nitroglycerin nuh ke ma se pahngpahng diatomaceous earth, kuh kieselguhr. Kieselguhr el atacn yot se ma kuh in fukfukuh nuh ke pauta se. Fin akuhlamihsyucki nuh ke nitrolycerin, kieselguhr elac sroksrokihnyac nitroglycerin, ac ma sikyak kac uh kuh in oraclah atacn “sahk.” Ke ohiyac se inge, nitroglycerin el tiac sensen. Sef in fihliyucki, utuck kahsruhsr, ac orekmakihnyuck ke pauta tena fokwelihk. Nobel el oraclah ine se kuhpahsreni nitroglycerin ac kieselguhr “tacnuhmait.”

Tacnuhmait el ekuhlah facluh. Oacyacpac oruh Nobel el kahsruhpi. Fin wacngihn mwe iwuclyuck, nitroglycerin elac sensen na pwacye in orekmakihnyuck, ke Ascanio Sobrero el konwacack ah. Kacl sifacna, oacna ke nga fahk ahi, kieselguhr, el srihklac orekmakihnyac. Tuhsruhk oracni luhn ma luo inge nuh sie oraclah eklac na yohk ac sacohk se.

Atac se pacna inge, oracni wosasuc luhn Jisus Kraist ac Alu luhn Jisus Kraist luhn Mwet Luhlahlfongi Lal ke Lwen-sahflah use kuh ac eklac yohk nuh sesr. Wosasuc uh suwohs, tuhsruhk alu akwucki muhtahl se enenuh in luti kac, karihngihn nwacsnwacsiyac, ac ahkfahsrye akwuck muhtahl ke kuh ac wal sin Mwet Lahngo.

Nuhnkuh ke toweni luhn wosasuc luhn Mwet Lahngo ac Alu Lal oacna ke akwucki sin mwet pahluh ke Puk luhn Mormon Alma. Ma kunen Alu uh pa in luti “wacngihn sahyacn auliyak ac luhlahlfongi ke Leum, suc [e fah] iwaclah mwet Lal.” Orekmakihn kuh luhn God, Alu uh enenuh in ahkfahsrye akwuck luhn pacptais “ke inen Leum, in sie mwe loh [ke ilyak] nuh ke sie olwelah yohrohl [in] kuhlwacnsuhpwacl ac karihngihn masap Lal.” Mwet ma pacptaislac eis nuh faclos inen Jisus Kraist, welah Alu Lal, ac uliyuck nuh selos kuh luhlahp tuhkuh ke kahklah luhn Nguhn.

Un mwet som nuh ke Kof luhn Mormon in lohnguhl Alma ke el luti wosasuc. Finne elos suhnakihn kof ac sahk ma raunweack insack sac, Alu luhn Leum tiac acn se kuh iwac se, oacpacna nuh misenge. Alu uh el mwet na, mwet tuhma lutlut luhn Jisus Kraist, tuhkweni ac akiyac nuh ke ohiyac sefanna in kahsruh Leum ahkfahsryelah srihpac Lal. Alu uh el ohiyac se ma kuht lotwelah srihpac na pwacye luhn Jisus Kraist nuh ke plwacn lal Pahpah Inkuhsrao. Alu uh use inkacnek akwucki fal nuh sin kais sie in ipeis ke akwuck ac oraclah wuhlweacng ma pahtpaht nuh sin God. Karihngihn wuhlweacng ingacn pen kuht in fototo nuh yurin God, ikacslah nuh sesr in eis kuh Lal, ac ikihlkuhtlac nuh ke suc ma El ke kuht in eklac nuh kac.

Oacna pam uh, fin wacngihn nitroglycerin ac tiac oasr srihpac, Alu luhn Mwet Lahngo el sie ma wolacna muhkwena fin muhsahyak fin wosasuc Lal. Fin wacngihn wosasuc luhn Mwet Lahngo ac kuh in ahkfahsrye akwuck inge, Alu uh ac tiac utuftuf.

Fin wacngihn kahsruh ke mwe iwuclyuck se nuh ke kieselguhr, e srihklac kahsruh ma nitroglycerin elac sang nuh ke pam sac. Oacna ke ma mahtuh ahkuhtweyac, fin wacngihn Alu luhn Leum, etuh luhn mwet uh ke wosasuc ac tikuclkucl—acsrlah wi na eklac luhn mwe luti ac sremlah ke kain in luhlahlfongi, facsin, ac suhmaht luhn mwet. Sikyak luhn ma inge ahkahlwemyeyuck ke we nuh kwewa ne ke pacna we sahflah se inge. Finne wosasuc uh tuhkuh fohnlah ke nwacsnwacsiyac, lwenglah ac orekmakihnyacn wosasuc sac ma tuhkuh ke ohiyac se ma srihklac kuh kac ke srihpen mwe tahpuhk akwucki muhtahl sac wacngihn.

Alu luhn Jisus Kraist luhn Mwet Luhlahlfongi Lal ke Lwen-sahflah ikacslah inkacnek nuh ke kuh luhn God ke srihpen akwucki Sel in kwewana luti ke mwe luti luhn Kraist ac in sang wosasuc mokleyuck ac akwuck ne tok. Mwet Lahngo el kena pwacye in nuhnak muhnahs ke ma koluk lasr uh, kahsrwe kuht in eis kuh Lal, ac ikihlkuhtlac. El kweok ke ma koluk lasr ac kena nuhnak muhnahs nuh sesr ke kaiyuck ma pwacyeiyac fal kuht in eis uh. El kena kuht in eklac muhtahl ac in ahksuwohsyeyucklac Kacl.

Oasr kuh sel Jisus Kraist in oruh ma inge. El tiac pahkomuhta muhkwena sesuwohs lasr ac ahsor ke kaclpous ma pahtpaht tuhkuh ke ma koluk lasr. Moh, El som ahluhkwelah ma ingan, yohk liki nuhkwea ingan, ac fohlohkohnwack Alu Lal in ikacslah inkacnek nuhke kuh Lal.

Ip yohk ke wosasuc ma Alu uh luti kac pa Jisus Kraist El “eislah suhpwac lasr, ac us ahsor lasr.” El “filiyac nuh facl ma koluk lasr nukewa.” El “misa fin sakseng,” tuhlahlah “mwe kapihr luhn misac,” sowack nuh inkuhsrao, ac … muhta ke lacpo lacyot luhn God, in eis sin Pahpah kuh Lal nuhke pahkotwen.” Mwet Lahngo El oraclah ma inge nuhkwewa mweyen El luhngse Pahpah Tuhmwacl ac El luhngse kuht nuh kwewa. El moli tari ke molo ma pahtpaht tuh Elan kuh in “[eisaclos] ma luhlahlfongi Kacl [ac kahsruh]” nuh selos— nuh sesr. Wacngihn ma Jisus Kraist el enenuh sahyacn kuht in auliyak ac fahsr nuh Yohrohl Elan muh kuh in ahkwoye ac ahkmuhtahlye kuht. Ke kena se inge, El ma ne tok ac tiac tahfuh luo.

Asr luhn kuh ke wuhlweacng luhn God ac wuhlweacng ke luhngse Lal tuhkuh ke Alu Lal. Oasr luhn ma luo inge wosasuc luhn Mwet Lahngo ac Alu Lal ekuhlah moul lasr. El ekuhlah pahpah mahtuh tuhmuhk ac ninac mahtuh kiyuck ah. Pahpah mahtuh tuhmuhk Oskar Andersson, el orekma ke acn in orek ak fin acn Högmarsö, fin tuhka se fin acn Stockholm. Muhtwacn kiacl, Albertina, ac tuhlihk nahtuhlos muhta ke acn luhlahp Swedish ah. Pacl se tukun wik luo, ke Sactte, Oskar elac kal ke oak ukacl ah nuh lohm ah wiken met liki el fohlohk nuh Högmarsö ke ekuh in Sacnri. Sie lweh ah, fin acn Högmarsö, el lihpsre misinacri Macrike luo luti ke wosasuc fohlohkyak luhn Jisus Kraist. Oskar el puhla lah ma el lihpsre inge kahs pwacye, ac el sesseslah ke engan.

Pacl se tok ma el fohlohk nuh lohm ah, Oskar el engan in sruhmuhn nuh sel Albertina ke misinacri ah. El fahk lah el luhlahlfongi ke ma elos luti ac. El siyuck sel elan riti pwepuh srihsrihk elos tuh sang nuh sel ah; ac el fahk nuh sel lah el tiacna nuhnkuh muh tuhlihk nahtuhlos ma e isuslac tok uh enenuh in pacptaislac ke elos ahwowo. Albertina el fohswack ac tohllah pwepuh srihsrik ah nuh ke u in kutkut se. Srihklac ma elos sruhmuhn inmahsrlolos met liki Oskar el fohlohk ke ekuh in Sacnri.

Ke el tuhfahna som ah, Albertina el sulpac sruhkwack pwepuh srihsrihk ac. El eislah pacl lal in kapsra mwe luti kac ah nuh ke mwe luti ke Pwacpuhl ololwac se nahtuhl ah. El lut in nuhnkuh lah ma el riti inge pwacye. Pacl se tok ma Oskar el fohlohk nuh lohm ah, el eis paing wowo, wi pacna Puk luhn Mormon se el us tuhkuh weluhl ah. Albertina el sifwilpac pacna eislah pacl lal in riti, kapsra pac nuh ke Pwacpuhl se nahtuhl ah. Oacna Oskar, el akihlen kahs pwacye kac ac sesseslah ke engan suc koflah in ahkuhtweyucki.

Oskar, Albertina, ac tuhlihk nahtuhlos som nuh Högmarsö in muhta fototo nuh sin mempucr ke Alu uh ma oasr we. Wik se tukun Oskar ac Albertina pacptaislac ke 1916, Oskar el pahng in mwet kol se luhn acn Högmarsö. Oacna mwet pacptaislac puhkantwen, ahkkoluk sonol Oskar ac Albertina ke srihpen luhlahlfongi sasuc se lalos inge. Mwet imac fin acn sac sruhnga kihtaclos milk, pwacnwacng Oskar el kal ke lwen nuhkwewa in moul milk yurin mwet imac wowo se sahyac.

Tukun yac puhs, puhseni mempucr fin acn Högmarsö, ke srihpen Albertina el akacsruhi ke luhlahlfongi kuh lal ac orekma upac luhn misinacri. Ke u se inge oraclah pracns se, Oskar el pahng in pa pracns prestuhn.

Mempucr ke pracns se Högmarsö ahkfuhlwactye fin tuhka se ingacn. Pa inge Kof luhn Mormon lalos. Pa inge acn se elos etwaclah Mwet Lahngo lalos.

Tukun yac puhs, ke elos sruokyac karihngihn wuhlweacng ke pacptais lalos, Oskar ac Albertina elos eklac ke srihpen kuh luhn Jisus Kraist. Elos kena in puhs wuhlweacng elos oraclah ac eis mwe insewowo lalos ke tempuhl. In eis mwe insewowo inge, elos som liki lohm selos Sweden nuh Salt Lake City ke 1949. Oskar el kuhlwacnsap ekihn mwet kol se luhn mempucr fin acn Högmarsö ke yac tolngoul tolu.

Toeni luhn ma luo inge nitroglycerin ac kieselguhr oruh yohk srihpen dynamite [pam]; toeni luhn wosasuc luhn Jisus Kraist ac Alu Lal ahluhkwelah yohk srihpac. Oskar ac Albertina lohng ke wosasuc fohlohkyak se inge ke srihpen mwet pahluh se luhn God pahngon, srihsrngiyac, ac suhpwaclah misineri nuh fin acn Sweden. Ke orekma wolacna, misineri inge tuh luti ke mwe luti luhn Kraist ac ke wal luhn pristut pacptaiswelah Oskar ac Albertina. Mempucr lac, Oskar ac Albertina fasrweacng in eis etwacack, ahkyohkye, ac kuhlwacnsuhpuh mwet sahyac. Elos eklac Mwet Luhlahlfongi in Lwen sahflah ke srihpen elos sruokyac wuhlweacng elos oraclah.

Mwet Lahngo el luhmuh nuh ke Alu luhn Jisus Kraist luhn Mwet Luhlahlfongi Lal ke Lwen-sahflah muh “Alu luhk” ke srihpen el sang kuh nuhkac in ahkfahsryelah srihpac Lal—in luti wosasuc Lal, sang akwuck ac wuhlweacng Lal, oruh pwacnwacng fihsrwacsr kuh Lal in ahkwoye ac ahkmuhtahlye kuht. Fin wacngihn Alu Lal, wacngihn wal uh, wacngihn fahkwack ma pwacye ke Inel, wacngihn akwuck kuh ke muhtahl luhn God, wacngihn elkac nuhke mwet God el kwena kuht in muh oacna, ac placn luhn God nuh sin tuhlihk nahtuhl fah wacngihn srihpac. Alu uh ke fihl sahflah se inge pa yohk srihpac emet ke plwacn Lal.

Nga suli kowos in eiskowosyang nohfohn nuh sin Mwet Lahngo, wosasuc Lal, ac Alu Lal. Ke kowos oruh, kowos e sokwack lah toeni luhn wosasuc lal Mwet Lahngo ac Alu Lal use kuh nuh ke moul lowos. Kuh se inge fokoko liki na pam uh. El fukulyac yot ke inkacnek lom an, ikihlkomlac in usrui tohkohsrahi luhn God. Ac kowos ac “sesseslah ke engan ma tiacna kuh in sruhmuhnyuck ac sesseslah ke wolacna.” Ke inen Jisus Kraist, amen.

Mwe Kahsruh

  1. Black powder el oreklac ke akuhluhmihs luhn potassium nitrate (saltpeter), sulfur, ac charcoal. Etweyuck muh srihklac puhlahl kac kuh srihklac ma el fukul ke srihpen suhmuhi fahsr la ah, fihrihr srihsrihk kac. Ma puhlahl yohklac kuh yohk ma fukul som ahluhkwelah in fihrihr muhkena, oraclah in kuh in oasr lut na yohk se.

  2. Pam uh lwelah nuh sin “orekma puhspuhs ke orekmakihn sang oraclah inkacnek ke sohs, acn in pam, ac inkacnek ye fohk fin facluh nohfohn—orekma luhlahp upac koflah in ahksahfyeyucklac fin wacngihn lwelah in orekmakihnyen pam in sang fukulyac. Apkuhran in nohfohnna ma muhsahlah kuhtanglah ke 19th ac 20th century pacl meet ah—London Underground, Sohs soko Brooklyn Transcontinental Railroad, ac Panama Canal—orekmakihn yohk mwe fukfuk sasuc inge.” (Steven Johnson, The Infernal Machine: A True Story of Dynamite, Terror, and the Rise of the Modern Detective2024], 24).

  3. Ke srihpen nitroglycerin tiac kuh in moliyuck, Ascanio Sobrero tiac eis yohk mani ke srihpen el sokwack fuhkah in oraclah. Tuhsruhktuh, ke Alfred Nobel el muhsahelah lohm in orekma pam se fin acn Avigliana, Italy, ke 1873, srihsrngiyucki ac moliyuck nuh sel Sobrero elan akihlwenyuck lah el pa sokwack nitroglycerin. Sobrero el orekma ke acn se ingacn ne ke misac lal in 1888. (Liye G. I. Brown, The Big Bang: A History of Explosives [1998], 106.)

  4. In etuh yohk ke oreklac luhn black powder, nitroglycerin, ac dynamite, liye Brown, The Big Bang, 1–121.

  5. Wosasuc luhn Jisus Kraist el oacpacna mwe luti luhn Kraist.

  6. Liye Mosiah 18:7, 20; 25:15, 22.

  7. Mosiah 18:10.

  8. Liye 2 Nephi 31:13.

  9. Liye Mosiah 18:17; 25:18, 23; Alma 4:4–5; Helaman 3:24–26; 3 Nephi 28:18, 23.

  10. Liye 2 Nephi 31:12–14; Mosiah 18:10.

  11. Alu uh el ki se in oruh wuhlweacng muhtahl nuh sin tuhlihk nuhtin Pahpah Inkuhsrao. Pa srihpac se oruh pacl eis akwuck muhtahl tempuhl uh, mempucr elos olwelah in karihngihn masap luhn ahkmuhtahlyeyuck. Kalmac pa elos “kihsackuhnlah pacl, taluhn, ac ma nuhkewa ma Leum El ahkinsewowoyaclos kac in muhsahi Alu luhn Jisus Kraist fin facluh” (General Handbook: Serving in The Church of Jesus Christ of Latter-day Saints, 27.2, Gospel Library).

  12. Liye Russell M. Nelson, “Spiritual Treasures,” Liahona, Nohfohmpuh 2019, 77.

  13. Liye Mosiah 18:22; Moses 6:68; Guide to the Scriptures, “Sons and Daughters of God,” Gospel Library.

  14. Liye 3 Nephi 27:13–21.

  15. Liye Ip Yohk ke Luhlahlfongi 1:5.

  16. Liye Russell M. Nelson, “Engankihn Mwe Sang ke Ki luhn Pristut,” Liahona, Mei 2024, 121; 3 Nephi 27:9–11.

  17. Mwet Lahngo El “sang nu sin kutu tu elos in mwet sap, ac kutu in mwet palu, ac kutu in mwet sulkakinelik Pweng Wo, ac kutu in mwet sropo ac mwet luti” in oruh “kuht in [kuh] in ma sefannala in lulalfongi ac in etauk lasr ke Wen nutin God, … na kut fah tia sifil moul in tulik, ikwot ikme ke noa ac eng uh, oana elos su srifeyuk ke mwe luti lun mwet kutasrik su kiapwelos ac kolosla nu ke moul tafonglac” (Ephesians 4:11, 13–14).

  18. Syncretism el kahs se nuh ke kuhpahsr luhn kain in luhlahlfongi, facsin, kuh etuh luhn kais sie.

  19. Liye Joseph Smith—History 1:19.

  20. Liye “Fohlohkihnyuckyak ke Fohnlah luhn Wosasuc luhn Jisus Kraist: Sie Mwe Fahkwack in Ahkfuhlwactye Yac Ahk Lofoko nuh fin Facluh,” Gospel Library. Mwe fahkwack se inge ritiyuck sel Prestuhn Russell M. Nelson in sie ip ke pweng lal ke Toeni Luhlahp Ahk 190, Eprel 5, 2020, fin acn Salt Lake City, Utah (liye “Hear Him,” Liahona, Mei 2020, 91–92).

  21. Kuht kuh in eis kuh luhn God ke kuht ahsrosrye luhlahlfongi lasr kacl Jisus Kraist, auliyak ke ma koluk lasr, ac karihngihn wuhlweacng kuht oraclah weluhl Pahpah Inkuhsrao ac Jisus Kraist ke akwuck ke pacptais, akwuck muhtahl, ac sacracmacnt.

  22. Liye Guide to the Scriptures, “Justification, Justify,” Gospel Library.

  23. Liye Guide to the Scriptures, “Wuhlweacng,” Gospel Library.

  24. Liye Moroni 10:32–33

  25. Liye Hebrews 4:15; liye pac footnote a.

  26. Liye Doctrine and Covenants 19:15–18.

  27. Liye Isaiah 53:4–12.

  28. Hebrew 12:2.

  29. Mosiah 15:23.

  30. Moroni 7:27–28; oacyacpac liye Doctrine and Covenants 45:3–5.

  31. Liye Mosiah 18:30.

  32. Liye Inger Höglund and Caj-Aage Johansson, Steg i Tro: Jesu Kristi Kyrka av Sista Dagars Heliga i Sverige 1850–2000 (2000), 66–67.

  33. Liye Doctrine and Covenants 115:4.

  34. Liye Doctrine and Covenants 84:19–21.

  35. Kom fin eis ma Alu luhn Leum kuh in sang, kom ac sun ohiyac suwohswohs met liki Alu Lal, fin Alu uh kuh in sun. Finsrak Lal pa in ahksuwohsye kom, tiac Alu Lal. Finsrak Lal tiac ke kuhtwena pacl in, ke kahs sahyac, eklac kieselguhr nuh ke diamond; finsrak Lal pa in eklac kom kais kuhtuh nuh ke gold suwohs, in molwelah kom ac ahkfuhlwactye kom in eis Yohrohl tohkohsrahi luhn Pahpah Lucng. Tuhsruhktuh, ma inge enenuh in finsrak lom pac. Pa sulaclah lom uh!

  36. Helaman 5:44.