Muhtahl nuh sin Leum Pengana Lwen in Moul
Muhtahl nuh sin Leum oruh moul pengana lwen muhtahl. Pwen kuht in fototoi ac engan nuh sin Leum ac kais sie.
Toeni in sucu se luhn Gong tuhfahna tari ah oasr ahkpwacr orek, ahksahfye ke akuhtuhn ahksruhksruhk luhn pahpah.
Tuhsruhk akuhtuhn se inge siena. Ke sie u ac pa Pahpah Mahtuh (nga) ac luo sin tuhlihk nuhtin nuhtihk, yac 12 ac 11. U se sahyac ah ma na suhmaht se (Al) orek prokracm ah sel Cousin Peter in sruhmuhn ahksruhksruhk luhn pahpah ke atac lal Gerrit W. Gong. Pahpah mahtuh Gerrit Gong laenuhl Al Gerrit Gong.
Nga tuhlihk nuhtin nuhtihk ah som met.
Kom ac pahngon fuhkah dionsaur soko ma kaskiyac stosah ukoacl ah? Tyrannosaurus Wrecks.
AI Gerrit Gong el lutiyuck wo—nuhnak oacna Gerrit W. Gong. Sramsram oacna el.
AI Gerrit Gong: “Ahksruhksruhk in pahpah se pa inge sruhmuhnyuck sel Gerrit W. Gong, tuhkuh wi atac mihs, etuh nuhnak ac ke kain in atac: Efuh sahk etuh suhnak soko ah oruh mwet uh isrwacsr? Ke srihpen el sruhnwack ke luhngse ac fahsrwelihk lah kac ah ke kuhlwacng. Oacna sahk soko ingacn, kuht kuh in sokwack fokoko kuh ke srohpoh ac engan lasr ke kuht akacsruhi kuhlwacng sacn nuh sahyac.”
Na, mac kowos nuhkuh kac? Pa oruh pahngpahng ahksruhksruhk lal pahpah uh.
Ma nuh kwewa raunikuhtlac uh inkacnek in isracsr, pwacr, ac liye ma uh ke engan. Oasr yohrohsr wosasuc in engan ac muhtahl ke lwen nuh kwewa in moul lasr. Muhtahl el srwelah ma uh nuh ke srihpac ohi. Tuhsruhk muhtahl ikacslah pac nuh sesr in nekuhtlac lwen nuh kwewa ke ma ohi—in engankihn pret lwen nuh kwewa, tiac elyah ke mwe ahk fohs fin facluh. In fahsr wi Leum, kuht enenuh in eklac muhtahl, ke srihpen El muhtahl; ac, in kahsre kuht in kuh in muhtahl, Leum El suli kuht in Weluhl fahsr.
Kais sie sesr oasr sramsram la. Ke nga ac Tahmtahel Gong ohsun nuh suwos—mempucr ac kawuck ke acn puhs ac ohiyac puhs—sramsram ke muhtahliyacn moul lowos ke lwen nuh kwewa nuh sin Leum ahkkweye kuht. Kowos moulkihn ma inge: sie nuh sin God, tuhkweni ac pahkomuhta inmahsrlon sie sin sie, insese ac wuhlweacng nuh sin God, sucu, ac kawuck—infulwacn Jisus Kraist.
Mwe ahkuhtweyac inge ahkkweye ma pwacye se inge: mwet luhlahlfongi uh engan, fokoko, ac insewowo ke moul lalos liki na elos suc muhnahs in nguhn in olwelah ac kuhpahsr. Engan ac ma wo ke facl se inge, fokoko in mahno ac nuhnak, kalmac ac srihpen ma uh, ohiyac ac atac, kuhpahsr fototo, moulkihn mani ac ma luhn facluh—kais sie ma inge, ahkyohkye orekmakihnyen luhlahlfongi lasr.
Elos insewowokihn fokoko luhn mahno ac nuhnak ac insewowo ke ma wo nuh kwewa elos sun ke matwac nuh kwewa ac inmahsrlon mwet puhs.
Mwet suk ma uh pahngon “religious structural stability” in ahkuhtweyac kahlwem, srihpac, ac inkacnek tiac elyah ke fohs ac tikuclkucl luhn moul se. Lohm ma sesseslah ke luhlahlfongi ac u in Mwet Luhlahlfongi ke Lwen-sahflah kuhtanglah elos suc muhkwena ac u in mwet ma puhla muhkwena. Muhtahl nuh sin Leum fahk moh nuh ke ma ahksrihkyactwenye ma muhtahl uh, moh nuh ke ahkkoluk nuh sin mwet sahyac, moh nuh ke ohiyac ke social media ma ahkluhkye mwet uh in liye ma se eis mani kac. Muhtahl nuh sin Leum fahk ahok nuh ke ma muhtahl ac suhnak, ahok in eklac nuh ke atac sukohsohk, engan, ac moul suwohs, moul se ma wo emet ke kuht Ukwacl in luhlahlfongi.
Fuhkah atacn moul muhtahl nuh sin Leum pengana lwen in moul uh?
Muhtahl nuh sin Leum pengana lwen in moul oacna mwet fuhsr luo, macruhtlac yac se, akacsruhi ke ma pwacye ac inseselac nuh ke wuhlweacng ke wosasuc, kihsac, ac kuhlwacnsap ke moul lalos.
Muhtwacn sac muhtwacwacack, “Ke high school, nga muhta in lohsr. Nga puhla muh God El tiac wiyuc. Sie fong ah, sihm se tuhkuh sin kawuck se fahk, ‘Hey kuh kom nuh riti Alma 36tari?’
“Ke nga muhtwacwacack riti,” el fahk, “nga sesseslah ke mihs ac luhngse. Nga puhla muh mwet se apihsyucwi arulacna upac. Ke nga riti Alma 36:12, nga etuh Pahpah Inkuhsrao El liyeyuc ac etuh na pwacye lah meac nga puhla uh.”
El tahfwelah, “Meet liki kuht macruhtlac, nga fahk na pacye nuh sin mukul se ngac pahyuckyak se ah lah wacngihn luhlahlfongi pwacye luhk ke sie tahfuh singucul. Efuh God El enenwekuht in sang mani ke mwet sahyac uh tiac kuh in sang uh? Mukul se ngac pahyuck se ah ahkuhtweyac lah tiac mani ac pa yohk srihpac uh tuhsruhk in ukwe masap se ngihsreyuck kuht kac uh. El ngihsre nga in muhtwacwacack moli sie tahfuh singucul luhk.
“Nga liyeack lah luhlahlfongi luhk kapwack,” el fahk. “Kuhtuh pacl uh srihklac mani lasr, tuhsruhk kuht liye mwe insewowo puhs ac pay lasr ah yolyak.”
Oacyacpac, “ke kuhlahs in nurse luhk ah,” el fahk, “nga muhkwena mempucr ke Alu uh ac muhkwena macruht. Puhs pacl ngac tifoklac liki kuhlahs ah tuhng ac puhla fohs ke srihpen nga puhla muh kuhlahsmet luhk ah sriyuclac ac fahk kahs suhfal ke luhlahlfongi luhk uh, ke nga nukum karmacn luhk uh, kuh ke nga fuhsr na macruhtlac.“
Na el tahfwelah, “Semester se tari ah nga lotwelah in ahkwoye puhsrwek ke luhlahlfongi luhk ac in mwe srihkasrak wowo se ke wosasuc. Kahlwem ac luhlahlfongi luhk kapwack ke srihpen srihfeyuck nga ke nga muhkwena ac in fokoko ke ma nga luhlahlfongi.”
Mukul fuhsr pahyuck sac tahfwelah, “Meet liki misin luhk suliyuck nga in wi sritacl yakyu ke college. Oraclah sulaclah na upac se, nga fihliyac nguhsr ingacn nuh sahyac ac som ac kuhlwacnsuhpuh Leum. Nga tiac kuh in ahol yac luo ingacn ke oacna sie ma.
“Fohlohk nuh lohm ah“ el fahk, “nga petsac elah muh ac upac tuhsruhk nga liye lah nga fokoko, muhi, ac kuh in mahno. Nga tol upaclah liki na met ah. Puhs nguhsr sunyuc nga in wi sritwacl, wi pacna lutlut se nga mwemwei ah. Ac, yohk liki nuh kwewa,,”el fahk, “nga fungyang nuh sin Leum yohk liki na met ah.”
El ahksahfye, “Ekihn misinacri se nga luti lah Pahpah Inkuhsrao El olwelah kuh nuh ke pruhe lasr, tuhsruhk kuhtuh pacl nga sifacna muhlkuhnlah.”
Mwe kahsruhp lasr ke misinacri muhtahl-nuh-sin-Leum el kahsruhp ac yohk. Karihngihn mani, pacl, ac ma sahyac tiac na fihsrwacsr. Tuh ke misinacri ke matwac nuh kwewa ac acn nuh kwewa kihsackuhnlah in muhtahl nuh sin Leum, ma nuh kwewa kuh in fahlac wo ke pacl ac inkacnek luhn Leum.
Inge ke liye luhn yac-48 se, misinacri mahtuh se akacsruhi, “Pahpah tuhmuhk ah luhngse nga in som lutlut ke college, in tiac som misin. Tiac paht tohkoh, el sun heart attack ac misac ke el yac 47. Nga puhla suhfal. Nga ac ahkwoyelah fuhkah ma uh nuh sin pahpah tuhmuhk?
“Tok kuhtuh,” el tahfwelah, “tukun nga sulaclah in kuhlwacnsap ke misin se, nga liye pahpah tuhmuhk ah ke mwemwe se. Mihs ac mongi, el engan lah ngac kuhlwacnsap.”
Misinacri mahtuh se inge tahfwelah, “Oacna ke Doctrine and Covenants 138luti, nga luhlahlfongi muh pahpah tuhmuhk ah kuh in kuhlwacnsap ekihn misinacri se ke facl luhn nguhn. Nga petsaclah pahpah tuhmuhk kahsruh pahpah tuhmuhn pahpah mahtuh tuhmuhk, suc som liki acn Germany ke el matwac yac 17 ac som liki sucu lal, tiac sulpac liyeyuck.”
Muhtwacn kiacl ah tahfwelah, “Inmahsrlon tamuhlwel limekohsr ke sucu luhn mukul tuhmuhk uh, ma ahkosr ma kuhlwacnsap misin ah pa oasr degree [pwepuh] yohk ke college.”
Muhtahl nuh sin Leum pengana lwen in moul oacna misinacri fuhsr se ma tuhfahna fohlohk ma lotwelah in lwelah God Elan kuhtanglah moul lal. Pacl fototo tari ah, ke ngihsreyuck in ahkinsewowoyelah mwet se suc arulacna mas, misinacri sac fahk, “Oasr luhlahlfongi yuruk, nga ac ahkinsewowoye elan kwelac. Insac,” misinacri se ma tuhfahna fohlohk ah fahk, “nga lotwelah ke pacl sac na in tiac pruhe ke ma nga luhngse, tuhsruhk ma Leum El etuh mwet sac enenuh. Nga ahkinsewowoye lah tamuhlwel sac ke mihs ac ahkkweye. Tiac paht el eis monglac in mihslac lal.”
Muhtahl nuh sin Leum pengana lwen in moul oacna puhla se ke sie ma sokma liki lihsrlihsr sac in kuhpahsri, ahkkwoye, ac ahkkweye. Mwet orekma ke ohfuhs ke university [lutlut luhlahp] fahk lah el puhla muh el etuh kais sie ke ma el lohng kaclos ke elos pruhe kacl. Kais sie mwet inge kihsackuhnlah pacl lalos nuh ke lutlut luhlahp se ac tahfwelah in karihngihn srihpac ac tuhlihk lutlut we an.
Tahmtahel se sang kuhiyacl ke kais sie lwen, tukun mukul tuhmwacl ah sisuhlah ac tuhlihk nahtuhlos ah. Nga arulacna fwefwelac sel, ac elos sahyac ma oacna el ah. Sie lwen ah ke el lihmlihm nuknuk, pahol an ke u in karmacn se, el mongyak nuh sel sifacna, “Memiyac ma inge?” El puhla puhsra se ahkkweyacl, “Wuhlweacng lom asr yuruk.”
Ke yac 50, sie pacna tahmtahel kena in fototoyang nuh sin pahpah tuhmwacl. “Kapkapwack,” el fahk, “tamuhlwel ac pahpah ma oasr, na muh nga tuhkuh—tuhlihk muhtwacn se fanna. Nga sang nohfohn kuhiyuck in ‘oraclah wo’ nuh sin pahpah tuhmuhk.
“Tiac paht, ninac el monglac! El pa muhta ahkfototoye inmahsrlok ac pahpah.
“Sie lwen ah,,” tuhlihk muhtwacn sac fahk, “nga lohng puhsra se fahk, ‘Suli pahpah tomom ah ac usacl elan wi kom nuh tempuhl.’ Pa ingacn muhtwacwacackiyacn toeni nuh sin pahpah tuhmuhk ke pacl luo-in-mahlwem nuh ke lohm sin Leum. Nga fahk nuh sin pahpah tuhmuhk ah lah nga luhngse el. El fahk lah el luhngse pac nga.
“Sislah pacl in lohm sin Leum onwekuhtlac. Ninac el koflah in kahsrwe kuht fin facl se inge. Oasr ip kunacl ke facl se sahyac ke acn lihsrlihsr in kahsruh onwelah ma muhsahlah. Tempuhl ahkfohnyelah fuhfahsryucsr lasr in ekihn sucu fohnlah se nuh tok ma pahtpaht.”
Pahpah sac fahk, “Kihsaclah luhn tempuhl use puhla wowo ke nguhn nuh sihk ac tuhlihk muhtwacn se fanna nuhtihk. Ingena kuht tuhkweni fahsr nuh we ac puhla lah luhngse lasr uh yohkwelihk.”
Muhtahl nuh sin Leum ke lwen pengana lwen in moul som pac nuh ke pacl pahkomuhta ke mwet lasr som liki kuht. Muhtuhn yac inge, ninac sacohk kiyuck, Jean Gong, el som nuh ke moul kawihl lwen ekahsr met liki puhte ahk 98 lal.
Fin kom siyuck sin ninac kiyuck, “Kom luhngse rocky road, ginger fasrfasr chocolate, kuh strawberry ice cream?” Ninac elac fahk, “Ahok, nga kuh in nuhnak muhnahs ema kais sie?” Suc kuh in fahk moh nuh sin ninac kiyac, yohk na ke el luhngse ema kwewa ma uh?
Nga tuh siyuck sie pacl ah nuh sel ninac lah sulaclah fuhkah se ma ahkwoyelah moul lal.
El fahk, “Pacptaislac ekihn mempucr se ke Alu luhn Jisus Kraist luhn Mwet Luhlahlfongi Lal ke Lwen-sahflah ac tuhkuh liki acn Hawaii nuh Macrike, oruh nga ohsun nuh sin pahpah tomom ah.”
Pacptaislac ke yac-15-matwac, mempucr se fanna ke sucu luhlahp se lal in welah Alu uh, yohk wuhlweacng in luhlahlfongi lal ninac ac fungyang nuh sin Leum oruh moul lal ac fihl nuh kwewa ke sucu lasr uh ahkinsewowoyeyuck. Nga ahsroelah ninac kiyuck, oacna kowos ahsroelah mwet in sucu lowos. Tuhsruhk nga etuh lah ninac el tiac wacngihnlac. El wacngihn inse ingena. Nga ahkfuhlwactyacl ac elos nuh kwewa suc som liki kuht ma oraclah srihkasrak wowo ke lwen nuh kwewa in muhtahl nuh sin Leum.
Pwacye, muhtahl nuh sin Leum ke lwen nuh kwewa som pac nuh ke fahsri na Leum nuh in lohm muhtahl Sel. Ma se inge pwacye, lah kuht mempihr ke Alu uh kuh kawuck.
Kawuck tolu tuhkuh ne ke open house [ikacklah lohm] luhn Bangkok Thailand Tempuhl.
“Acn in onweyuck fokoko se pa inge,” sie fahk.
Ke acn in pacptais ah, sie fahk pac, “Ke nga oasr inge uh, nga luhngse owolac in nwacsnwacslah ac tiac sifil oruh ma koluk.”
Ma se ahktolu ah fahk, “Kom kuh in puhla fokokoiyacn nguhn?”
Ke na kahs muhtahl itkohsr, tempuhl lasr uh suli ac fahkwack:
“Muhtahl nuh sin Leum.
Muhtahl nuh sin Leum oruh moul pengana lwen muhtahl. El ahkfototoye ac ahkenganye kuht nuh sin Leum ac nuh sin sie sin sie ac ahkoekuhtlac in ohsun nuh sin God Pahpah tuhmasr, Jisus Kraist, ac mwet kuht luhngse.
Oacna kawuck se luhk ah, kom ac sahp nuhnkuh lah Pahpah Inkuhsrao el luhngse kom? Top kac an pa ahok, ma na pwacye! Kuht kuh in puhla luhngse Lal ke kuht oruh muhtahl lasr nuh sin Leum ke kais sie lwen, in engan ne tok. Lwelah kuht in oruh ohinge, nga pruhe ke ine muhtahl luhn Jisus Kraist, amen.