Lwen Koflah in Muhlkihnyucklac
Pacl fahsruh uh ac sang nuh sin mempucr ke Alu uh ke acn nuhkwewa ohiyac puhs ac yohk in akahsruhi pweng wo ke wosasuc luhn Jisus Kraist.
Ikucslah
Tamuhlwel ac tahmtahel sacohk, ma mahtuh ke Alu luhn Jisus Kraist luhn Mwet Luhlalfongi Lal ke Lwen-Sahflah ke we se misenge inge nwacnwaclah ke ma ahkfahsryeyuck ahkuhtweyac lah Leum El kol fuhkah Alu Lal. Oasr ke lusen yac 10 ke sramsram mahtuh lasr uh, suc ma, etweyuck pihngac uh sahslah liki yac sahyac—muhtacwacack ke yac 1820 nuh ke 1830. Muhtacwacack yohrohl Mwet Pahluh Joseph Smith ke ma el sun Inimac Muhtahl ke spring 1820, ke el liye God ac Wen Nahtuhl, Jisus Kraist, ac tuhtahflah nuh ke Eprel 6, 1830, yac 10 ingacn tiac oacna yac sahyac.
Nuhnkuh ke ma usrnguck sikyak inge! Mwet pahluh fusr el ngetwacng na sramsram nuh sel lipufacn Moroni, luhngaslah plwet kol, ac suhmuhslah Puk luhn Mormon! El mwet in kahsruh se suc ma fohlohkohnwack Aaronic ac Melchizedek Pristut, ac na el akiyac Alu uh! Oliver Cowdery el ahkuhtweyac pacl se ingacn kahlwem: “Pa inge lwen ma kofah in muhlkihnyucklac.” Ma usrnguck sikyak na ne ke lwen se misenge inge.
Lwelah ngan puhlaik in fahk muh yac se inge, kuht aluelah yac puhs ma kahlwem muh esamyucki liki na yac se sahyacn yac 200 ma tuh akwucki sukokyak ah.
Yac Singucul Lasr Uh
Lwelah ngan ahkuhtweyac. Inmahsrlon yac inge, 2024, ac 2034, kuht e puhla kuhtuh ma sikyak ma sona sikyak meet ke inkacnek in kuhlwacnsap, in kuhpasr nuh sin mempucr ac kawuck, ac in fahkwack ke Alu luhn Jisus Kraist luhn Mwet Luhlahlfongi Lal ke Lwen-sahflah nuh sin mwet puhs liki na met ah.
Kuht tuhfahna ahkfahsrye pac sie toeni ma tiac kuh in muhlkihnyucklac ke kuht wi miliacn 10 kuhtuh in ahkfuhlwactye puhte ahk 100 lal Prestuhn Russell M. Nelson.
Ripohrti puhtte lal Prestuhn Nelson ah, Newsweek suhmuhslah ke muhtuhn nuspepuh lalos ah ohinge, “Mwet Kol Mahtuh se Emet Fin Facluh El Yac 100.” Na elos tahkuhnlah mwet kol luhlahlfongi 10—Prestuhn Nelson e lucng na fah Pope Francis ac Dali Lama.
Pohloh kahs se ke New York Times inge aholah fahkwack nguhnnguhniyac fin facluh nofohn: “Ke sol ac sukok mwet nuh ke prestuhn luhn [United States] sukok yohk insiacn ac kol wowo luhn mwet, ke Lusen moul lal Mr. Nelson uh ahkuhtweyac lah, ke alu lal uh, ke sun nempuh tolu lac ke puhtte tiac mwe sensen se. El pwengpweng sin mempucr ke alu uh, suc liye prestuhn lalos muh tiac mwet kol sapsap se tuhsruhk ‘mwet pahluh, liyactwen, ac eis fwackyuck.’”
Fuhkah luhpan srui lasr lah puhtte lal Prestuhn Nelson use inkacnek yohk srihpac se nuh sesr in ahkuhtweyac nuh sin mwet puhs ke mwet pahluh se luhn God, ahkfuhlwact se ma koflah in muhlkihnyucklac.
Ke muhtuhn spring se inge, ahksasucyeyuck plaza ke Tempuhl Skuacr—ma kain in flag ke kain in acn ma Alu uh oasr we—ikacklah. Acn in utyak nuh ke plaza se inge sihmlac kahs in pahluh inge kac: “In pacl fahsru uh, Fineol soko ma Tempul oan we ac fah fulat liki eol nukewa, Ac fah ngeti nu fin inging nukewa. Mutunfacl puspis ac fah rirme nu we.”
Pwacye, ma yohk srihpac se tok ma e sikyak ke yac 10 fahsruh uh e fah ahkfohnyelah palye se ke Isaiah inge.
Motko ke pihsen tempuhl soena aluiyuck kuh ikacklah ma plwacn in ahkfahsryeyuck ke yac singucul fahsruh uh, finne tempuhl 164, ac srackna oacwac fahsr. Petsacelah miliacn singucul wi kom ac kawuck lom fahsr nuh ke lohm sin Leum. Sain yohk srihpac ma sikyak inge e sifilpac aluiyucklac Tempuhl Salt Lake ac ma nuhkewa ma e wi uh. Pwacyena lah lwen inge e koflah in muhlkihnyucklac.
Yac 2030 e use inkacnek nuh fin facluh nohfohn in ahkfuhlwactye yac ahk lofko ke akwucki luhn Alu uh. Sahp e sa laclac in fahk lah Alu uh ahkfahsrye fuhkah yac yohk srihpac se inge, tuhsruhk use nuh sesr in suli sucu, kawuck, ac mwet wi kuht orekma, ac mwet sacohk in “fahsruh ac liye” ac kahlwem ke ma yohk srihpac Alu uh oruh nuh ke moul luhn mempucr ke Alu uh.
Ke 2034, tausin mwet kol, mwet muhtwacta, ac mwet in sritacl fin facluh nohfohn e nacklach inkacnek Salt Lake City, acn se ahfkahsryeyuck Srihtacl Olympic ke Winter. Sahp e wacngihn tuhkeni insese wowo fin facluh oacna atac e orek ke Srihtacl Luhlahp ke Olympic ingacn. Muhta nuhkewa facluh e siiyac Alu uh ac mempucr kac an, inkacnek puhs e sifacna tuyak in kahsruh, kuhlwacnsap, ac akacsruhi pweng wowo ke orekma kuhlwacng—mukwikwi se ma e fah tiac muhlkihnyucklac.
Pacl e tuhkuh inge e sang pacl se luhn mempucr yen nuhkewa in ahkyohkye fahkwelihk pweng wo ke wosasuc luhn Jisus Kraist ke kahs ac orekma, yac se ma e koflah in muhlkihnyucklac.
Pweng Wo
Ke toeni se ke wik na meet liki lwen lal ah, Prestuhn Nelson el akacsruhi ke sripac se ma oruh el luhngse kahs se inge “pweng wo.” Ke luhkuh ah, el akihlwen, pohloh kahs ke pacr ac engan. Tuhsruhk “pweng wo” ahkahlwemye yohk liki ingacn. El ahkuhteyac lah pohloh kahs se inge tuhkuh ke kahs Greek se euangelion, suc kalmeyac pa “nus wo” kuh “wosasuc.” Pwacr ac engan ke moul se inge ac moul se tok uh elos kwacna kuhpahsr nuh ke wosasuc luhn Jisus Kraist. Pwacye pohloh kahs “pweng wo” nwacnwack top luo ke ohiyac kahto se.
“Mukul [ac muhtwacn] tuh, elos in kuh in engan.” Pahpah Inkuhsrao El oraclah plwacn in engan ma use pwacr ke srihpen mwe insewowo Lal. Suc pa in weluhl muhta ke acn Sel ne tok ekihn sucu. Iwaclah lal Jisus Kraist yohk srihpac nuh ke plwacn luhn God in iwekuhtlac. In eis moul ma pahtpaht, kuht enenuh in tuhkuh nuh yurin Kraist. Ke kuht oruh ohinge “ac kahsruh mwet sahyac in oruh oacna, kuht wi oruh orekma ma pahtpaht luhn God.”
Pweng se ke pweng wo ke wosasuc luhn Jisus Kraist pa pweng yohk srihpac se emet fin facluh. Ac pa ingacn acn se ma tuhlihk fuhsr ac mwet mahtuh fuhsr ke Alu uh tuhkuh kac uh.
Mwe Ahkkweye Mwet Fuhsr
Inge, ke yac ekahsr e tuhkuh inge e nwacnwaclah ke lwen ma e koflah in muhlkihnyucklac nuh sin mempucr nuhkewa ke Alu uh, kuh in pwacye ma se inge nuh suwos ma kapwack ke we se inge. Kowos oasr fin facluh ingena ke srihpen kowos sulwelyucklac in oasr ingena. Oasr in kowos kuh ac kena in mwet tuhma lutlut lal Kraist ke ohiyac nuhkewa.
Prestuhn George Q. Cannon el luti: “God El ahkolah nguhn nuh ke toeni se inge suc oasr puhlaik yohroh ac ahkolah in foracng nuh sin muhtuhnfwacl, ac kuh luhn mwet koluk nohfohn, [ac in] …muhsaheack Zion luhn God ke tiac sahngweng ke ma yohk srihpac nuhkwewa.”
In ahksahfye, nga kena sramsram nuh suwos ke we se kapwack inge, in suli kowos in petsac elah pwacriyacn yac singucul fahsruh uh, sie ma e koflah in muhlkihnyucklac, kuh in ma nuh sum. Nga oacyacpac usot kahs in kahsruh fihsracsr ac ahkkweye ma kuh in ahkkweyekowos ke yac singucul fahsruh inge.
Oacna inkaiyowos, oasr smartphone se nuhtihk, ke ma sikyak kuh tiac ma nga oruh, sifacna oracni petsac ekahsr kuh reels ahkahlwemye ma nga oruh ke kuhtuh pacl. Mwe lut se in liye lah yohk ma eklac nuh sihk ac sucu luhk ke yac na ekasr.
Petsacelac petsac ma phone intum an e olwack ke yac 10 fahsruh uh! Kom e liye kom srolah ke high school kuh college, eis mwe sang muhtahl lom, som kuhlwacnsap ke misin, macruhtlac, ac eis tuhlihk se emet intum an. Nuh sum sifacna, pacl se inge koflah in muhlkihnyucklac. Tuhsruhk e tuhfah pacl luo iyucki oruh kowos kampare in kahlwem se nuh fin facluh akacsruhi ke pweng wo ke wosasuc luhn Jisus Kraist kuh in ahkahsruhpye ac ahkyohkye tiac moul lom an muhkena tuhsruhk sucu, kawuck, ac mwet ukwe kom ke social media.
Kowos e nuhnkuh lah e orek fuhkah ma se inge.
Mwet pahluh luhn God elos luti kuht lah kuh in oreklac ke mukwikwi fihsrwacsr ahkosr inge, suc etweyuck muh kunohkohn fihsrwacsr muhtahl kuneyucki: ma se met, moulkihn wosasuc luhn Jisus Kraist; ahkluo, karihngihn elos suc enenuh; ahktolu, suli nuh kewa in eis wosasuc; ac ahkahkosr, oracni sucu uh nuh tok ma pahtpaht. Mwe lut se, kais sie kuh in oreklac ke ohiyac wo ac fal.
Kunohkohn Fihsrwacsr Muhtahl Kuneyucki
Nga olwelah nuh suwos lah yac ekahsr inge e koflah in muhkihnyucklac nuh sum kom fin sruokya na kuh kunohkohn fihswacsr muhtahl kuneyucki lom inge. Kuht nuhnkuh ahkwoyac lah meac inge.
Ma se met, moulkihn wosasuc luhn Jisus Kraist. Lutlutkihn kahs luhn mwet pahluh, ac luti in luhngse Pahpah tomom Inkuhsrao. Oracni insiom nuh Sel ac kampare in fahsr ke inkacnek Lal. Sruhkyuckyak ke “luhlahlfongi ke wuhlweacng” ma Elder Ulisses Soares el ahkuhtweyac. Luhlahlfongi se inge tuhkuh ke oraclah wuhlweacng in ukwe Jisus Kraist, etuh lah Mwet Lahngo elac fohlohkihn ke kuh ac ahkkweye kom.
Lwelah kawuck lom an in liye engan se kom puhla ke wosasuc inge ac kom e fah pweng wo se emet ke wosasuc ma elos eis.
Ahkluo, kohlah poum in ahkolah kahsruh elos suc enenuh. We se lowos inge kwacna saplakyang in wi oruh ma tiac arulacna eteyuck. Pacl nuhkewa oasr elyah se nuh ke pahkah ma mempucr ke Alu uh silahklahk in kahsruh ahkwoye ac ahkkeye mwet sun ongaiyac ingacn, oacna in inkaiyaclos nukum fohrohk “Helping Hands” suc tuhlihk fuhsr ac matwac yac longoul ma. Oasr suwos in “akacsruhi ke ma toasr luhn kais sie” ac “ahkenganyaclos suc enenuh in ahkengayeyuck.” Ke oruh ma inge kuht “akfalye ma sap lun Christ.”
Fine, tuhlihk mukul se ke Primary, sulwaclah in sislah pacl in monglac lal ke lutlut ah ke summer in oracni kuhfa nuh ke peanut butter ac flao jelly in sang nuh sin bank in mongo ke acn sel ah. El sokwack project kuh orekma se inge ke JustServe website. Tuhlihk fuhsr Evan el sang nuh sin lutlut se lal ah in kahsruh sruhkwack suhfah 700 ke jelly! Lwelah mwet kom kuhlwacnsapuh an in etuh elyah lom selos lah sruhnwack ke luhngse lom sin God ac kena lom in oruh nuh sin mwet tuhlan lom oacna kom sifacna.
Ahktolu, suli nuh kewa in eis wosasuc. Yac inge kuht ikacslah misin sasuc 36 fin facluh nohfohn in kahsruh elos suc oasr kena la in kuhlwacnsap fohnlahke misin. Ke puhlan pacl loes se ma puhs mwet fuhsr srolah liki mukwikwi luhn alu, wo in fwackyuck ac elakihn ma se inge nuh ke luhlahlfongi lom an. Lah kom kuhlwacnsap fohnlah kuh tiac, nuhnak muhnahs lohacng nuh ke kuh se sum in pacnma kawuck ac solaclos in suk pac wosasuc luhn Jisus Kraist.
Ahk ahkosr, oracni sucu uh nuh tok ma pahtpaht. Ke nga muhtacta tempuhl fin facluh nohfohn, nga fwefwelac ke rum ma mwet fuhsr muhkena nacklah acn in pacptais ac ke puhs suhnuhn mwet fuhsr mahtuh kuhlwacnsap ke acn in akwuck ah. Pacl fototo tari ah u in mwet se oasr ke mwet 600 ma fin acn Scotland ac Ireland som nuh Tempuhl Preston England, ahkfahsrye akwuck puhs liki 4,000, inkaiyen ma inge mwet misac ke sucu lalos! Nga kwacfe kom in muhtacwacack wi oruh orekma ke tahk in sucu lom an, sislah pacl lin tempuhl, ac kampare in ahkoekom in muhtwacn ac mukul kuhlwacng se ahkolah in macruhtlac tempuhl nuh sin mwet suc oacna kom. Akiyac sie pactuhn ke moul lom ingena in oraclah tempuhl in sie ma kom oruh pacl nuhkewa in moul lom.
In Ahksahfye
Tamuhlwel ac tahmtahel sacohk wiyuck, kawuck sacohk luhk, e oasr na ma upac nuh sesr kais sie ke lwen e fah tuhkuh. Ne ohinge, ke kuht ilyak nuh ke pacl tiac etweyuck inge, lwelah kuht in akacsruhi pweng wo ke ohiyacn moul in mukwikwi, kahsruh, suli, ac tuhkweni in ma se. Ke kuht oruh ohinge, Leum elac ahkinsewowoyekuht ke ma e fah tiac muhlkihnyucklac.
Nga etuh lah nuh selos suc tuhkuh nuh yurin Leum ke inse pwacye ac kena in etuh pwacye, nuh selos suc orekmakihn inen Leum ingasrolos ac Nguhn Muhtahl in nguhnalos, nuh selos suc wi fuhfahsryucsr ke inkacnek wolacna se inge, kowos fah sokwack ac puhla mwet insewowo yohk ke mwe insewowo celestial ac eis loh lah God el lohng kowos, ete kowos, ac luhngse kowos. Kowos fah puhla kain in lwen ma e koflah in muhlkihnyucklac. Ke inen Jisus Kraist, amen.