Toeni Luhlahp
Ahkmongoye Okah, ac Lah kac an Fah Kapwack
Toeni luhlahp ke Ohktohpa 2024
14:31

Ahkmongoye Okah, ac Lah kac an Fah Kapwack

Sel Elder Dieter F. Uchtdorf

Ke U luhn Mwet Sap Singucul Luo

Lah ke luhlahlfongi lom an e usot fokoko ma tuhkuh ke luhlahlfongi lom kacl Pahpah Inkuhsrao ac Wen Kuloh Nahtuhl.

Acn in Alu Mah se Zwickau

Yac 2024 el sie yac esamyac nuh sihk. Mahkiyac yac ahk 75 ma nga pacptaislac ac ahkkweyeyucklac in mempucr ke Alu luhn Jisus Kraist luhn Mwet Luhlahlfongi Lal ke Lwen-sahflah fin acn Zwickau, Germany.

Ekihn mempucr se ke Alu luhn Jisus Kraist yohk srihpac nuh sihk. In oacwaclah inmahsrlon tuhlihk wuhlweacng luhn God, wi kom, tamuhlwel ac tahmtahel, sie ma sacohk in moul luhk.

Ke nga nuhnkuh fuhfahsryucsr in mwet tuhma lutlut luhk uh, nuhnak luhk uh kwacna fohlohk esamack acn mahtuh se fin acn Zwickau, suc nga esam nga fahsr wi sackracmacn miting ke Alu luhn Jisus Kraist ke nga tuhlihk ah. Pa inge acn ma fihtac ke luhlahlfongi luhk uh sruhnwack ac ahkmongoiyuck.

Lohm alu se inge oasr organ mahtuh se, kano ah eng. Sacnri nuhkewa mukul fuhsr se kuneyucki in som pahtok nuh lucng ac nuh ten ma se sang ahksuwohsye pack in eng se loac in oruh organ se inge in orekma. Kuhtuh pacl uh nga wi kuneyucki in oruh kunohkohn yohk srihpac se inge.

Ke u in mwet alu ah onkihn on kahto lasr inge, nga pami ke kuhiyuck nohfohn in oasr na eng lin organ se inge. Ke siyah in pam kuh ahksuwohs se inge, kahto na pwacye petsac se nga muhta liye ke window lohm alu sac, sie sruhlwaclah Mwet Lahngo Jisus Kraist ac sie sruhlwaclah Joseph Smith ke Inimac Muhtahl.

Nga srackna esam puhla muhtahl oan sihk ke nga ngwetlah liye window kahlwem sac ac lihpsre kaksak etuh pwacye luhn Mwet Luhlahlfongi ac onkihn on ke Zion.

Ke acn muhtahl sacn, Nguhn luhn God ahkahlwemye loh nuh ke nuhnak ac insiyuck lah pwacye: Jisus Kraist El pa Mwet Lahngo luhn facluh. Pa inge Alu Lal. Mwet pahluh Joseph Smith el liye God Pahpah ac Jisus Kraist ac lohng Puhsraclos.

Muhtuhn yac inge, ke kunohkohn se nuh fin acn Europe, oasr pacl se luhk in fohlohk nuh Zwickau. Mwe ahsor, lohm alu mah sac wacngihnlac. Kuhnanuclac yac puhs somlah ah in oraclah iwac luhlahp se.

Meac Ma Pahtpaht, ac Meac Tiac Na?

Nga fahk na pwacye lah ahsor in etuh lah iwac sacohk se nga srihkyak kac ah el mwe esam se na. Iwac na muhtahl se nuh sihk. Ahok iwac kuh lohm se na.

Ma tiac oacna sie kac uh, mwe loh ke nguhn ma nga eis sin Nguhn Muhtahl yac puhs somlah ah tiac na wacngihnlac. Pwacyena, kapwack fokokoi. Ma nga lotwelah ke fuhsr luhk ah ke ip yohk ke wosasuc luhn Jisus Kraist pwelucng fokoko luhk ke moul luhk nohfohn. Kuhpahsr wuhlweacng se nga oakiyac inmahsrlok ac Pahpah Inkuhsrao ac Wen Kuloh Nahtuhl wiyuc na—muhta paht liki na lohm alu Zwickau kuhnanuclac ac kuhlahs window loac ah tuhlac.

“Kusrao ac faclu ac fah wanginla,” Jesus El fahk, “a kas luk ac fah tiana wanginla.”

“Eol uh ac inging uh ku in mokukla, A lungse luk nu sum fah tiacna safla; Nga fah liyaung wuleang in misla luk nwe tok, LEUM GOD El fahk.”

Sie ma yohk srihpac kuht kuh in lotwelah ke moul se inge pa ma tiac oacna sie ke ma pahtpaht ac ma tiac pahtpaht. Pacl se kuht kahlwem ke ma ingacn uh, ma nuhkewa eklac—kuhpasr lasr, sulwaclah kuht oraclah, ohiyacn oruh lasr nuh sin mwet uh.

Etuh inmahsrlon ma pahtpaht ac ma tiac el ki se nuhke muhsahi luhlahlfongi kacl Jisus Kraist ac Alu Lal.

Nimet Tahfonglac ke Lah kac ingacn nuh ke Srohpoh

Wosasuc fohlohkihnyuckyak Lal Jisus Kraist, oacna Mwet Pahluh Joseph Smith el luti, oracni kewa, ac ma pwacye nuhkewa. Tuhsruhk tiac kalmac pa ma pwacye nuhkewa oacna sie. Kuhtuh ma pwacye uh oasr infulwac, yohk srihpac, nuh ke srohpoh in luhlahlfongi lasr uh. Ma sahyac an lah—yohk srihpac, elos fin kuhpahsr muhkena nuh ke ma se infulwac an.

Mwet pahluh Joseph Smith el luti, “Mwe luti yohk srihpac ke luhlahlfongi lasr pa fahkwack luhlahlfongi luhn Mwet Sap ac Mwet Pahluh, kacl Jisus Kraist, muh El misac, pihkihnyucki, ac sifilpac moulyak ke lwen se ahktolu, ac sowack nuh lucng; ac ma nuh kwewa sahyac suc ma ke luhlahlfongi lasr uh ma na weacng.”

Nuh ke kahs sahyac, Jisus Kraist ac iwaclah muhtahl Lal pa srohpoh nuh ke luhlahlfongi lasr uh. Ma nuhkewa sahyac uh lah.

Tiac kalmac pa lah uh tiac yohk srihpac. Sahk soko enenuh lah. Tuh oacna Mwet Lahngo el fahk nuh sin Mwet tuhma lutlut Lal, “Sie lah koflana in sifacna isus fahko. El fah isus fahko el fin kupasryang na nu ke inkain fain uh.” Fin wacngihn kuhpahsr nuh sin Mwet Lahngo, nuh ke ahkmongo ma oasr ke srohpoh an, lah uh e maslah ac misac.

Ke e tuhkuh nuh ke ahkmongoyeyacn luhlahlfongi lasr kacl Jisus Kraist, nga nuhnkuh lah sahp kuhtuh pacl uh kuht tahfonglac ekuhlah lah ingacn nuh ke srohpoh. Pa inge tahfonglac ma Jesus el liye sin Mwet Pharisee ke El muhta inge ah. Elos lohacng yohk nuh ke ma tiacna yohk srihpac ke masap uh pwacnacng elos pihlesruh ma ma Leum el pahngon “ma yohk srihpac”—mwe luti koanong nuh ke “nununku suwos ac pakoten ac luhlahlfongi.”

Kom fin luhngse ahkmongoi sahk soko, kom tiac tekofi na lah ah. Kom tekofi srohpoh ah. Oacpacna, kom fin luhngse lah ke luhlahlfongi lom an in kapwack ac orek fahko, ahkmongoye srohpoh an. Kom fin tiac kahlwem ke oacna sie mwe luti kuh moulkihnyac kuh sramsram mahtuh ke Alu uh, suk kahlwem lom ke luhlahlfongi kacl Jisus Kraist. Suk in etuh ke kihsackuhnlah Lal keim, luhngse Lal nuh sum, kena Lal ke srihpom. Ukwacl ke inse puhsisacl. Lah ke luhlahlfongi lom an e usot fokoko ma tuhkuh ke luhlahlfongi lom kacl Pahpah Inkuhsrao ac Wen Kuloh Nahtuhl.

Sie srihkasrak kac an, kom fin luhngse eis luhlahlfongi fokoko ke Puk luhn Mormon, siiyac na ma fahkwacak kacl Jisus Kraist. Akihlwen lah Puk luhn Mormon fahkwack loh fuhkah Kacl, meac el luti Kacl, ac el suli fuhkah ac moklwe kom fuhkah in fahsr nuh Yohrohl.

Kom fin suk ma kuh in lutiyucklac yohk ke toeni ke Alu uh kuh ke tempuhl, srihke in suk Mwet Lahngo ke akwuck muhtahl kuht eis we uh. Suk Leum in lohm muhtahl Sel.

Fin oasr pacl se kom follah kuh ulac ke kunohkohn lom ke Alu uh, srihke in siyac na kuhlwacnsap lom an kacl Jisus Kraist. Oruh kunohkohn lom ingacn in atacn luhngse lom nuh Sel.

Ahkmongoye srohpoh an, na lah an e kapwack. Na pacl sac, elos e isus fahko.

Okahlah ac Kapkapwack in El

Luhlahlfongi kuh kacl Jisus Kraist tiacna sikyak pacl se fana. Tiac, ke facl suhkawihl se inge, mah wacngihn srihpac ac mah oasr otoh kac kap wel. Sahk fokoko, isus fahko ke luhlahlfongi enenuh kampare nuh kac. Ac ma yohk srihpac se ke kampare se ingacn pa in ahklohyacna lah kuht sruhnwack fokoko kacl Kraist.

Sie srihkasrak nuh kac an pa: Ke muhtwacwacackiyac ah kuht tuhkuh fototo nuh ke wosasuc luhn Mwet Lahngo ac Alu uh ke srihpen kuht fwefwelac ke kuhlwacng luhn mempucr kuh pisrap kuh nwacsnwacsiyacn lohm alu ah. Ohiyac inge pwacye yohk srihpac in ahkkapye Alu uh.

Ne ohinge, fin okah ke luhlahlfongi lasr uh tiac kapwack loal liki ingacn, meac e sikyak kuht fin som nuh ke sie pacna ward ma toeni ke lohm in alu tiacna kahto se, mempucr ma tiacna kuhlwacng, ac pisrap el fahk ma se ahktonongye kuhtlac?

Sie pac srihkasrak an: Kuh oacna pwacye in finsrakkihnyuck muh fin kuht karihngihn na masap ac sil ke tempuhl, kuht e fah ahkinsewowoyeyuck ke sucu luhlahp, engan, wi tuhlihk ahkostwen, wo elah, nohfohn fahsr na wi Alu, kuhlwacnsap ke misin, wi on ke ward choir, ac sifacna fahk in wi kahsruh ahknwacsnwacsye nien toeni ke litutuacng in Sacte nuhkewa?

Nga finsrak na tuh kuht nohfohn in liye ma se inge ke moul lasr uh. Tuhsruhktuh ac fin tiacna sikyak? Kuh kuht e tu na sisken Mwet Lahngo tiac elyah ke elyah inge—luhlahlfongi Kacl ac pacl Lal?

Kuht enenuh in siyuck sesr sifacna: Kuh luhlahlfongi luhk uh tuhkuh ke ma nga finsrakkihn in sikyak nuh ke moul luhk uh? Kuh el wiwina oraclah kuh elah luhn mwet sahyac? Kuh oakiyucki fokoko kacl Jisus Kraist, “okala ac kapkapak in el,” tiac elyah ke ma eklac ke moul se inge?

Facsin, Ma Luhngse Orek, ac Luhlahlfongi

Puk luhn Mormon sruhmuhn ke mwet ma suc arulacna “lihksreni karuhnguhnwacng akwuck luhn God.” Tuh oasr mukul srihklac luhlahlfongi se la inel pa Korihor tuhkuh, isruhn wosasuc luhn Mwet Lahngo, pahngon “lahlfon” ac “ohiyac lahlfon luhn pahpah tuhmwaclos.” Korihor el kohllah “insiacn mwet pucspucs, oruh elos in orek insucf ke ma koluk lalos.” Tuhsruhk oasr mwet sahyac el koflah in kiacpelah, ke srihpen selos, wosasuc luhn Jisus Kraist el yohk liki na ohiyac kuh facsin.

Luhlahlfongiel fokoko fin loal srohpoh ma elos lotwelah kac an, in oasr ma elos lotwelah sifacna nuh sel Jisus Kraist, tiac fungyak elyah ke facsin kuh meac mwet e fahk kuh oruh.

Luhlahlfongi lasr uh e fah srihfweyuck ac liyeyuck. Luhlahlfongi tiac kuh in luhlahlfongi fin tiac srihfweyuck. Luhlahlfongi tiac kuh in fokoko fin wacngihn lainyac. Pwacnacng nikmet suhpwacrlac fin oasr elyah lom ke luhlahlfongi kuh sona toplac siyuck lom an.

Kuht tiac enenuh in srihke in etuh ma nuhkewa meet liki kuht oruh kuh srihke uh. Tiac pa ingacn luhlahlfongi. Oacna Alma el luti, “Luhlahlfongi pa in tiac oasr etuh suwohs ke ma uh.” Fin kuht tuhpan in mukwilac e ke pacl se kihsensiyuck lasr uh kewa toplac uh, kuht sifacna kosraclah ma wo ma kuht kuh in eis, ac kuht kosraclah kuh ke luhlahlfongi lasr uh.

Luhlahlfongi el kahto ke srihpen el fahlac na finne mwe insewowo uh tiacna tuhkuh oacna ke kuht finsrakkihn uh. Kuht tiac kuh in liye pacl fahsruh uh, kuht tiac etuh kewa top uh, tuhsruhk kuht kuh in luhlahlfongel Jisus Kraist ke kuht kampare in fahsr nuh met ac nu lucng ke srihpen El pa Mwet Lahngo ac Mwet in Molwelah lasr uh.

Luhlahlfongi el kuhtanglah ma upac ac ma nihkihnyuck ke moul se inge ke srihpen yukiyuci srohpoh an fokoko kacl Kraist ac mwe luti Lal. Jisus Kraist, ac Pahpah tuhmasr Inkuhsrao suc suhpwaclma, elos tuhkweni na orwaclah sie, luhlahlfongi na kuh se lasr.

Luhlahlfongi el tiac ma se muhsaheack sie pacl ah na tu ne tok ma pahtpaht. El oacna sahk soko ma kom ahkmongoi pacl nuhkewa. Yukiyac kahs luhn God nuh insiom el pa step se emet. Pacl se luhlahlfongi lom an muhtacwacack in kapwack, na orekma na pwacye ah muhtacwacack! Pa ingacn pacl se kom “ahkmongoi ke karihngihnyuck wo, tuh in okahlac, tuh in kuh in kapwack, ac foklac nuh sesr.” Enenuh “insacnweacng yohk” ac “mongfihsrwacsr ke kahs.” Tuh olwelah luhn Leum pwacye: “Kowos fah kosrwacni ma lwacne wo ke luhlahlfongi lowos, ac oaru lowos, ac muhtweng, ac mongfihsrwacsr, sano na sahk uh in foklac nuh suwos.”

Tamuhlwel ac tahmtahel sacohk wiyuck, kawuhk sacohk luhk, oasr ip se keik ma ahsrwelah lohm alu mah se fin acn Zwickau ac window kuhlahs kac ah. Tuh ke yac 75 somlah ah, Jisus Kraist El penyuc ke fuhfahsryucsr ke moul se inge ma upaclac engan nga koflah in ahkuhtweyac. El ahkwoyeyuc pacl upac nuh sihk, kahsreyuc in akihlwen muhnahs luhk, onwelah kihnet in nguhnihk, ac ahkmongoye in kapwack luhlahlfongi luhk uh.

Pa inge pruhe ac mwe insewowo luhk kuht in inswacneacng na in ahkmongoye okah ke luhlahlfongi lasr kacl Mwet Lahngo, mwe luti Lal, ac Alu Lal. Ke ma inge nga fahkwack ke ine muhtahl luhn Mwet in Molwelah lasr ac Mwet Lahngo lasr—ke inen Jisus Kraist, amen.

Mwe Kahsruh

  1. Yac 2024, mahkiyac pac, yac ahk 30 ma pahng nga in sie General Authority ac yac 25, ma sucu luhk uh tuhkuh liki acn Germany nuh Macrike ke srihpen pahng se ingacn. Ac apkuhran in yac 20 somlah ah—ke Ohktohpa 2, 2004—kuneyucki nga in mempucr ke U luhn Mwet Sap Singucul Luo ac mwet in loh se ke inen Jisus Kraist nuh fin facluh nohfohn (Liye Doctrine and Covenants 107:23).

  2. Ke inkacnek sahyac, nuhnak luhk ke iwac sac oacna ma mwet lal Alma ah puhla ke Kof luhn Mormon—acn kahto se nuh selos ke srihpen “inge [elos] tuhkuh nuh ke kahlwem luhn Mwet in Iwaclah lalos” (Mosiah 18:30).

  3. Matthew 24:35; liye pac Joseph Smith—Matthew 1:35.

  4. Isaiah 54:10; liye pac 3 Nephi 22:10.

  5. Prestuhn Thomas S. Monson el luti ma pwacye se pacna inge ke kahs inge: “Nga luhlahlfongi lah inmahsrlon mwe luti yohk ma kuht e luti ke fuhfahsryucsr se facluh inge pa mwe luti ma kahsre kuht in akihlen ma siena inmahsrlon ma yohk srihpac ac ma tiac. Nga ngihsre suwos in tiac lwelah ma yohk srihpac ingacn in ahlikiwososlac” (“Finding Joy in the Journey,” Liahona, Nohfohmpuh. 2008, 85). Oacpacna, ke Prestuh Prestuhn Russell M. Nelson el tuhfahna in ahkkweye kuht in “motko ke celestial,” el fahk, “Moul suhkawihl uh pa sie kuhlahs fuhlwact in sulaclah ke ma yohk srihpac ne tok ma pahtpaht” (“Motko ke Celestial!,” Liahona, Nohfohmpuh. 2023, 118).

  6. Teachings of Presidents of the Church: Joseph Smith (2007), 264; liye pac Teachings of Presidents of the Church: Brigham Young (1997), 16–18.

  7. Teachings: Joseph Smith, 49.

  8. John 15:4.

  9. Matthew 23:23, Ahksasucyeyuck.

  10. Kuh oasr pwacr se ke luti ke ma mahtuh kuhlawi inmahsrlon facsin ohiyac luhn mwet Macrike met ah nuh ke mwet ke Puk luhn Mormon? Kuh pac. Kuh e kahsruh in luti ke ma sihmlac sin mwet sihm met ah ac mwet sahyac ke in ip srihsrihkiyac lah Joseph Smith el luhngaslah fuhkah Puk luhn Mormon? Kuh nuh sin kuhtuh. Tuhsruhk ma inge tiac kuh in kahsruh in oasr luhlahlfongi lah Puk luhn Mormon el kahs luhn God. Ohingacn, kowos enenuh in sokwack Mwet Lahngo ke Puk luhn Mormon, in lohng Puhsracl sramsram nuh sum. Pacl se sikyak ma inge, e tiac elyah nuh sum lah acn mahtuh Zarahemla oasr oyac kuh fuhkah atacn Urim ac Thummim. Lah ingacn kuh in sihpsihplac fin enenweyuck, tuhsruhk sahk soko an e oan na.

  11. Liye Doctrine and Covenants 84:19–20.

  12. Liye Joy D. Jones, “Nuh Sel,” Liahona, Nohfohmpuh. 2018, 50–52.

  13. Liye Genesis 3:18

  14. Prestuhn Nelson el suli kuht nuhkewa “sifacna kol luhlahlfongi [lasr] kacl Jisus Kraist ac wosasuc Lal. Orekma kac. Liyacacng in muh kapwack” (“Kuhtanglah Facluh ac Sokwack Monglac,” Liahona, Nohfohmpuh. 2022, 97).

  15. Colossae 2:7.

  16. Alma 30:3.

  17. Liye Alma 30:12–16, 31.

  18. Alma 30:18.

  19. Mwe nuhnak se, akuhkuhin lal Korihor ah tiacna puhrakwack mwet Laman ma tuhfahna in eklac ah, mwet lal Ammon ah (liye Alma 30:19–20),suc ma tiac ukwe Kraist ke srihpen ohiyac facsin luhn pahpah tuhmwaclos.

    Nuh ke acn se sahyac ah, Puk luhn Mormon oacyacpac sruhmuhn ke we se luhn mwet fuhsr suc ma srweltahlah liki Alu luhn Leum ke srihpen “elos tiac luhlahlfongi ke ma mahtuh luhn pahpah tuhmwaclos” (liye Mosiah 26:1–4). Wo nuh sin sucu in oakiyac facsin suwohs. Tuhsruhk yohk srihpac nuh sin sucu in lihksreni kahlwem ke efuh tukun facsin ingacn. Efuh kuht pruhe ke litutacng ac ekuh nuhkewa? Efuh kuht suculac in lutlutkihn ma suhmuhslah? Efuh kuht ahkfahsrye ekuh in sucu ke wik nuhkewa, toeni sritacl in sucu ac kuhlwacnsap orek project, ac ma sahyac? Fin tuhlihk nahtuhsr uh kahlwem lah ohiyac facsin inge ahkfototoye kuht fuhkah nuh sin Pahpah Inkuhsrao ac Jisus Kraist, elos e kampare in tahfwelah na—ac pahtok pac—nuh sin sucu lalos sifacna.

  20. Alma 33:21 Luhlahlfongi el fokoko ke srihpen tiac ma el etuh tuhsruhk ke srihpen ma el oruh.

  21. Liye Hebrew 10:23.

  22. Alma 32:37, 41–43.