Ma Suhmuhslah Muhtahl—Pwelucng luhn Luhlahlfongi
Kuht tiac kuh in srihkkihn yohk sripaciyacn ma suhmuhslah muhtahl kwewana nuh ke eklac ac in tu na kuh ke luhlahlfongi ke wosasuc uh.
Nga ac muhtwacn kiyuck, Mary tuh liyacack sie fohrohk ma petsac in puk ac ac sihm an meet kac rit ohinge, “Books: The Original Handheld Device.”
Nga nuhnkuh ke mwe fahkwack se inge ac fuhkah yohk sripaciyacn device nuhkwewa uh. Ke nga sifilpac motko kac uh, nga akihlacnwack lah device nuhkwewa kuh finne sie ma oasr lahlmwetmwet kac e fah tiacna yohk sripac oacna mwe kolyuck luhn nguhn ma tuhkuh ke mwe fwackyuck wolacna.
Lah ma oan ke pwepuh kuh oan ke skrin, Pwacpuhl Muhtahl ac Puk luhn Mormon: Sie pac Wuhlweacng ke Jisus Kraist el use mwe kolyuck luhn nguhn ac mwe lutlut sel Jisus Kraist, Mwet Lahngo luhn facluh. Kuht sacohkkihn puk inge ke orekma kac uh in suhmuhslah kohkoh luhn God nuhsin mwet pahluh somlah ac mwet ac kolyuck utuckuh nuh sesr nuhke moul lasr sifacna.
Ke orwekweni ma suhmuhslah uh nuhke mwe lutlut luhn mwet pahluh misenge uh, ma suhmuhslah muhtahl inge use kolyuck nuh sesr in pacl lasr misenge. Ma suhmuhslah inge yohk kuh kac ke elos use mwe luti, ahkpwacye, ahkkweyeyuck, ac ahkengan nuhsin kais sie mwet ac sucu suc suk kolyuck sin Leum.
Ma suhmuhslah uh, fin orwekweni nuhke kolyuck luhn Nguhn Muhtahl, tahfwelah na in pa ma se emet ma kahsrwelos ma eklac ke “inse pwacye ac auilyak pwacye ” ac kena in fahsr tohkohl Jisus Kraist. Ma suhmuhslah uh kahsruh muhsahelah sie pwelucng ma kuh in lain orekma lal setuhn in ahkmuhnahsyelah luhlahlfongi uh.
Mwet sasuc ma eklac ac forlah liki ma koluk lalos elos ahkinsewowoye alu uh ac elos pa ahkmoulye alu uh ke lusen pacl e met me nuh misenge. Sie mwe srihkahsrak ma arulacna sacohk sihk. Ke nga tuh ekihn pisap fuhsr se, sistihr misrinacri luo tuh luti sucu lal William Edward ah. Pahpah sac, suc pa sie lohyihr na suhmaht, pa kaunsucl luhn sie u na luhlahp. Muhtwacn kiacl, Janet, el kahsruh sucu lalos in kampare moulkihn yohk ohiyac luhn Kraist.
Wen kuloh ac tuhlihk muhtwacn sacohk nahtuhltahl, tuhkweni na oasr ke muhtuhn yac 20 lalos, tuh lutiyuck pac. Elos nohfohn na mwet ahkosr ah eis mwe lutlut ac fahsr wi alu. Muhtwacn misrinacri ah elakihn yohk elos in riti Puk luhn Mormon ac in pruhe in eis luhlahlfongi ke ma suhmuhslah muhtahl se inge. Sucu se inge elos ritwelah nohfohn Puk luhn Mormon ke puhluhn pacl na fototo se.
Misineri ma muhta ke ward sac, suc kwewana ekihn prestuhn ke Rilif Sosaiti met, weluhlos nuhke alu ah.
Ke sucu se inge fototoyang nuhke pacl in pacptais lalos, elos eis sramsram in ahkkoluk yohk ma ahkkolukye Alu uh. Ma se inge ma met liki Intihrnet uh, tuhsruhk koano ah nwacklah sie pohk na luhlahp.
Misinacri muhtwacn luo inge suliyuc ke nga sasuc nuhke kunohkohn in pisap luhk in kahsrwelos tohpohklah kihsensiyuhk ma tohuyak ah. Ke kuht toweni nuh ke nien muhta lalos ah, pohk luhlahp se ma nwacnwaclah pwepuh ma ahkkolukye Alu uh oan infulwen infuckihl sac. Nga pruhelac met liki nga tuhkuh in oruh ma ngihsrweyuhk nga in oruh. Ke pacl se ma kuht ikacslah ke pruhe ah, Nguhn mahmah nuh sihk, “El etuh tari lah pwacye.” Ma se inge yohk srihpac. Misineri muhtwacn ah elos etuh lah sucu sac nohfohn oasr luhlahlfongi yohrohlos tari. Eltahl tahfuh luo ke pahpah sac.
Nga silahklahk na fahk nuh sel lah Nguhn kolyuc in etuh lah oasr luhlahlfongi yohrohl tari. “Kuh pwacye?” El ngwetma liyeyuc ac fahk lah Nguhn ahkpwacyei nuh sel lah pwacye Puk luhn Mormon ac Alu uh nuh sel.
Tohkoh na nga siyuhk lah enenuh kuht in liye ma sihmlac ma ahkkolukye alu uh, fin elos eis tari ahkkweyeyuck luhn nguhn?
Pahpah sac fahk muh tiacna enenuh. Elos nohfohn insese nuhke top lal.
El fahk lah oasr kihsensiyuck na yohk srihpac se lal: Sie srihpac pwacnwacng elos eis arlac yohk puk srihsrihk inge ma ahkkolukye Alu uh pa elos wi sienna alu. In weacng pac, el orwaclah sie olwelah na yohk in sang luhpan mani se in kahsruh alu se elos wi ngwe in muhsahelah sie lohm alu sasuc. El fahk nuhsihk lah misineri muhtwacn luo inge lotwelwacng yohk sripaciyacn sie tahfuh singucul uh, suc el eis ke inse engan, tuhsruhk el nuhnkuh lah e koluk fin el ahkfuhlwactye na olwelah se ma el tuh orwaclah met ah. Nga ahkkweyacl in fahk nuhsel lah ke el ac ahkfalyelah luhpan mani se el owelah ah e kwewana fal ac ahkfuhlwactyeyuck.
Sucu Mussman wi tuhlihk mukul se nahtuhltahl, muhtwacn kiacl, ac tuhlihk muhtwacn se nahtuhltahl.
Nohfohn na sucu sac elos pacptaislac. Yac se na tok ah elos sil ekihn sucu ke Tempuhl fin acn Oakland California. Wo ohiyac nga kuh in wi oasr ke pacl sac. Tuhlihk mukul sac ahksahfyelah lutlut nuhke masap, pahswelah California Bar Exam, ac oruh kuhlwacnsap nuhke misin lal fin acn Japan. Nga muhta tuni ke fihl fuhsr inge elos tu na kuh ke luhlahlfongi lalos ke wosasuc uh. Oasr pacl wo luhk tuh utuckuh nuh sihk nga in karihngihn sil luhn sie tuhlihk muhtwacn nuhtin tuhlihk nahtuhl.
Eklac luhn mwet ma sikyak ke pacl lasr ingena wolacna oacna. Ke mahlwem Jun tari ac Coach Andy Ried, sifen Coach ke futpohl fin acn Kansas, ac nga, weacng pac kuhtuh mwet sahyac ahollah alu lasr ac alu pac sahyac, tuh sramsram ke toeni se ke Riverside Church e New York City. Coach Reid el ahkuhtweyac sifilpac auliyak ac top nuhke ke suliyuck ac pacl wowo suc pa inge srihpen wosasuc luhn Jisus Kraist. Litutwacng se tok ah, kuht ac muhtwacn kiacsr ah, Tammy Reid ac Mary, som wi sackruhmacn ke ward ahkluo Manhattan ah. Toeni na muhtahl se. Puhkantwen mwet sasuc welah alu uh ke toeni sac. Limekohsr sin mwet ma tuhfahna pacptaislac, mukul mahtuh ahkosr ac sie mukul fuhsr, elos wi Aaronic Pristut ma forfor kihte kuhfa luhn Leum ah. Nga engan in sulkackihn lah ke Alu uh fin acn nuhkwewa oasr pac ilyak luhn mempucr sasuc.
Kuht kuloh ke kapwack ma akihlenyuck kaclos ma lohng suliyuck muhtahl, ekuhllah moul lalos, ac eis pacl wowo lalos in fahsr tohkohl Jisus Kraist. Elos ilyak nuhke inkacnek in olwelah lalos ke luhlahlfongi, auliyak, pacptais, ac ahkkweyeyuck oacna ke lutiyuck ke Pwacpuhl Muhtahl ac Puk luhn Mormon.
Kuht tiac kuh in srihkkihn yohk sripaciyacn ma suhmuhslah muhtahl kwewana nuh ke eklac ac in tu na kuh ke luhlahlfongi ke wosasuc uh. Mwet pahluh ma sruhmuhnyuck ke Puk luhn Mormon elos etuh ke orekma in luti luhn Jisus Kraist ac luti wosasuc Lal. Puk luhn Mormon kahsrwe kuht in fototoeni nuh sin God ke kuht luti, kahlwem kac ac orekmakihn mwe luti kac inge. Mwet Pahluh Joseph Smith el luti “sie mukul [kuh muhtwacn] ac fah fototoyang nuh yurin God ke el muhta na ke mwe luti [ke puk] se inge, liki na kuhtwena puk sahyac”
In etuh lah Puk luhn Mormron pa kahs luhn God, kuht enenuh in rit, nuhnkuh, ac pruhe kac ac oruh fal nuhke akwuck la. Mwet pahluh Moroni el palyei lah God elac ahkkahlwemye ma pwacye lal ke puk se inge nuh sesr ke kuht pruhe ke inse pwacye, kena in etuh na pwacye, ac luhlahlfongi Kraist. Lutlut ke Puk luhn Mormon yohk srihpac nuhke eklac ne tok.
Ke kuht nuhnkuh ke kuhpahsr inmahsrlon Pwacpuhl ac Puk luhn Mormon in oacna sie device kuh ma kuht sruok in pahosr ac orekmakihn, sie mwet kuh in siyuck ke sie kihsensiyuck. Kom nuhnkuh tuh fuhkah yohk srihpac ac kaksak ke puk luo inge fin pa Leum el sap tuh in “orekweni nuh sie” ac “eklac ma sefanna in poum”? Pa inge ma Leum el tuh fahk ke “sahk lal Judah,” ke Pwacpuhl, ac ke “sahk lal Joseph,” Puk luhn Mormon.
Ke puhs ma yohk srihpac motkwoeyuck, Puk luhn Mormon use mwe lutlut ma ahkyohkye ac muhsahyak fin Pwacpuhl. Mwe luti ke Iwaclah luhn Jisus Kraist pa srihkasrak wowo se emet uh.
Pwacpuhl sramsramkihn luti lal Jisus Kraist fin facluh, weacng pac misac ac sifilpac moulyak Lal. Puk luhn Mormon el sruhmuhn yohk ke Iwaclah luhn Jisus Kraist, sie ma mwet pahluh uh ahkuhtweyac kahlwem met liki misac Lal.
Sifac se ke Alma sapta 42 ahkkahlwemye yohk srihpaciyacn Iwaclah luhn Jisus Kraist.
Rit ohinge: “Moul suhkawihl uh pa sie pacl in ahkkweye mwet uh in auliyak ac kuhlwacnsapuh God—Puhtatlac sac use misac luhn mahno ac nguhn nuh sin mwet nuhkwewa—Molwelah uh tuhkuh ke auliyak—God Sifacna El iwaclah ma koluk luhn facluh—Pahkotwen ma nuh selos suc auliyak—Mwet nuhkwewa sahyac muhta ye nuhnuhnkuh suwohs luhn God—Pahkotwen tuhkuh ke srihpen Iwaclah—Mwet ma auliyak na pwacye uh muhkwena pa ac moliyucklac uh. ”
Prestuhn Russell M. Nelson el tuh fahk: “ Nga olwelah nuh suwos lah ke kowos e lutlut ke Puk luhn Mormon lwen nuhkwewa, kowos ac oruh sulaclah wo likina—lwen nuhkwewa..” El oacyacpac olwelah lah fin “kom riti Puk luhn Mormon ke lwen nuhkwewa kom kuh in fokokoi in lain ma koluk in pacl inge.”
Oacna ke nga fahk tari ah, nga fwefwelac yohk ke nuhnak se nuhke device se oemet ma oreklac kuht in sruok orekmakihn—pa puk se. Tuhsruhktuh, nga akihlen yohk srihpaciyacn intihrnet fin facluh misenge. Sie device in pacl inge uh kuh in use mwe etwacack ma met uh nwacklah sie laipracri luhlahp. Kuht tarilacna in moul ke pacl inge. Nga kaksakihn lah kuh in lwelah puk muhtahl ac ma luhn Alu uh in oasr ke skrin uh. Intihrnet uh el kuhfa na kuh se nuhke lutiyen wosasuc uh. Misenge, puhkantwen mwet ahkacsruhi ma suhmuhslah uh nuh sin kawuck orekmakihn technology. App nuhke Puk luhn Mormon, sie mwe srihkasrak, pa sie innek na wowo in sang etwacack ke pacl se met nuhsin kawuck ke Puk luhn Mormon ac kuh in akacsruhi kac ke inkacnek fal ke oacna sie acn kom oasr we.
Ke intihrnet uh use mwe insewowo puhkantwen uh, koluk ohiyac, oacna ke mwe sihm ma ahkkolukye Alu uh suc nga ahkuhtweyac met kuhtuh ah, kuh pac in orekmakihnyuck in orwaclah tahfuh luo ac ahkmuhnahsyelah luhlahlfongi ke mwe lutlut yohk sacohk ke wosasuc uh. Kuh in wi ipin “ma koluk in pacl inge” suc Prestuhn Nelson el tuh sramsram kac.
Setuhn ac elos suc weluhl kahsrwel, elos oruh in oacyac kuh tiacna ruh in oacyac, orwaclah ke intihrnet luhpan pacna pohk se ma nwacnwaclah ke sihm ma ahkkolukye Alu uh suc nga ahkuhtweyac met kuhtuhsrihk, in oruh na in pwen komlac liki ma pwacye luhn God.
Elyah ma tohuyak in orwaclah tahfuh luo ke lusen yac nuhke yac arulacna oacna sie. Ma se inge pwacye na pwacye ke kom e kapsruh pacl lasr misenge uh nuhke yac 1960 ah, ke nga oasr ke yac longoul kuhtuh luhk.
Ma suhmuhslah an luti kuht in orwekmakihn nuhnuhnkuh ac oruh in lahlmwetmwet ke ma nuhkwewa. Intihrnet uh kuh in orwemakihnyuck ke innek wo kuh innek in kuhnahoslah.
Kwewana mempucr mah ac elos suc sasuc in lutlut ke wosasuc uh enenuh in karihgnihn ma elos liye ke intihrnet uh. Nikmet liye ma suhfal, kikiacp, kuh ma tiacna wo. Fin kom oruh, ma ingacn kuh in pwen kom nuhke innek soko ma e kuhnahoslah luhlahlfongi lom ac ahkmuhnahsyelah kapkapwack lom. Kom kuh in mukwikwi in wo kuh koluk. Suk suwohswohs ac kahingkihn lohsr luhn intihrnet uh. Nwacklah moul lom ke nuhnak wo, suwohs, oruh in engan, pwacr tuhsruhk kahingkihn lahlfon. Oasr eklac se. Ip Yohk ke Luhlahlfongi ahk singucul tolu el mwe kol na wowo se. Yohk liki ma nuhkwewa, riti Puk luhn Mormon lwen nuhkwewa, suc e fah use Nguhn nuhke moul lom an ac kahsrwe kom akihlen ma pwacye liki ma suhtuh.
Mwe kahsruh luhk nuh suwos suc fahsr liki innek in wuhlweacng pa in fohlohkoh nuhke ma suhmuhslah muhtahl, kolyuck luhn mwet pahluh, ahkfuhlwactye ma luhn alu e lohm ah, ac lohng ke on luhn luhlahlfongi. Moul nuhkwewa sacohk sin Leum. Kuht enenwe kowos! Leum el enenwe kom, ac kom enenwacl! Kom sukohsohk in tuhkuh pacl nuhkwewa. Ke lusen yac puhs nga kuhlwacnsap ke Alu uh nga yuckihn mwet na wowo suc fohlohkoh nuhke innek in Wuhlweacng ac kuhlwacnsap ac ahkinsewowoye mwet nuhkwewa elos luhngse kuh elos suc elos etwaclah ke pacl tok.
Ma suhmuhslah muhtahl ac mwet pahluh moul lasr misenge pa sie inkacnek yohk Pahpah tuhmasr Inkusrao el orwaclah plwacn in engan Lal in oasr nuhsin tuhlihk nahtuhl nohfohn.
Nga fahkwack luhlahlfongi ke wolacna luhn Jisus Kraist ac ke ma pwacye ke Iwaclah Lal, ke inen Jisus Kraist, amen.