« Mai te mea e fa’aora mai ’oe iā’u, e tāvini au ia ’oe »

I te matahiti 1962 ra, e tuati ma’i ’o Claire Teri’itehau i ni’a i te motu nō Maupiti, i te tō’o’a o te rā ia Bora Bora, ’e ’ua ’ite ’oia e piti taure’are’a tamāroa ma te ’ahu ’uo’uo. ’A tahi fa’ahou rā ā te mau misiōnare feiā mo’a i ni’a i terā motu mai te matahiti 1899 mai ā. Noa atu ā e porotetani ’oia, ’ua tae mai te mana’o o Claire e fārerei ia rāua. ’Ua tono atu ’oia i tōna hoa tamāroa, ’o André Manea, e ani i nā misiōnare ’ia haere mai i tō rāua fare. ’Ua māere rahi ’o Claire rāua André i te marū o teie nā misiōnare i te fa’a’itera’a i tō rāua fa’aro’o.

I reira noa, ’ua haere ’o Claire i te mau pupu ha’api’ira’a a teie nā misiōnare. Nō te mea ho’i ’aita ’o Claire ’e ’o André i fa’aipoipohia, ’aita i ti’a ia rāua ’ia bāpetizohia i te ha’amaura’ahia te ’āma’a mātāmua. ’Ua ’āmui rā ’oia i te mau melo tei fano i Huahine nō te fa’aro’o i te peresideni Gordon B. Hinckley, ’ei melo i roto i te pupu nō te Tino ’Ahuru Ma Piti ’āpōsetolo i terā tau, ’ia paraparau i te ha’amaita’ira’a nō te hō’ē fare purera’a i te matahiti 1963. I ni’a i te tere ho’ira’a, ’ua pūai te miti. Nā mua noa a’e i te ’ā’ahiata, tē nā roto ra te pahī i te ava nō Maupiti, tā’ue a’e nei te hō’ē ’are pūai i te pahī i ni’a i te a’au, pe’e a’era Claire ’e te tahi mau horopātete i roto i te miti. I roto i terā miti fāfati, ’ua ti’aoro Claire i te Atua. « Mai te mea e fa’aora mai ’oe iā’u », ’ua fafau ’oia, « e tāvini au ia ’oe ». Tē tāpe’a ra ’oia i ni’a i te hō’ē tao’a pāinu, taorahia mai nei te tahi pōito. Ē, tae mai nei hō’ē poti e ti’i iāna, ’ua topa tōna hau i te ’itera’a ia André, tē huti ra iāna i roto i te poti.

Noa atu ’ua pēpē maita’i ’o Claire, ’ua ora mai rā ’oia. ’Ahuru ma pae ta’ata, ’e e iva vahine nō te Sōtaiete Tauturu o te ’āma’a nō Maupiti tei fa’aru’e roa mai.

I muri ri’i mai i terā po’ipo’i, ’ua tae te parau nō teie ’ati ia Elder Hinckley ra i Papeete, Tahiti. I terā iho pō, ’ua fano atu ’oia i Maupiti nā ni’a i te hō’ē pahī tahito ma te mā’a, te ’ahu ta’oto ’e te rā’au hāmani fare. E hi’ora’a ’oto mau tei ’itehia i Maupiti. « Tē heva noa ra te ta’ata », tē ha’amana’o ra ’o Hinckley. « Tei ni’a noa mātou i te purūmu, te tauahira’a i te mau tamari’i ’o tō rātou metua vahine tei fa’aru’e mai, te tāmatara’a i te tāmarū i te mau metua tāne ». I roto i tāna ha’amaita’ira’a autahu’ara’a, ’ua parau Hinckley ia Claire ē, e ora mai ’oia ’e e ’āmui mai ’oia i te ’Ēkālesia i te hō’ē mahana. I te ’āva’e Tiurai, ’ua fa’aipoipo rāua André ’e-—i te mahana nō muri iho—’ua bāpetizohia ’oia. ’Ua tāvini noa Claire ma te ha’apa’o maita’i i roto i te ’Ēkālesia e rave rahi matahiti.

Piti ’ahuru matahiti i muri mai, ’ua ’oa’oa roa Claire i te fārerei-fa’ahou-ra’a ia Gordon B. Hinckley i tōna haerera’a mai nō te ha’amo’ara’a i te hiero nō Papeete Tahiti. I roto i te ’ōro’a ha’amo’ara’a, ’ua fa’aha’amana’o Hinckley i te ’āmuira’a i te parau nō te mau vārua i’ō mai i te pāruru tei ta’iruru ato’a mai i te ’ōro’a, mai te mau melo mātāmua, te mau misiōnare ’e penei a’e te mau vahine nō Maupiti tei fa’aru’e roa mai i roto i te ’ati pahī. « Te tīa’i rahi o tō’u ’ā’au, ’oia ho’i, e mea ti’amā te mau tāne fa’aipoipo (o te mau tuahine i pohe) nō te haere mai i teie fare ’ia tā’atihia rātou i tā rātou vahine iti », tāna i parau. I te matahiti 1991, e rave rahi matahiti tō rātou fa’aherehere-noa-ra’a i te moni, ’e ’ua tere ’āmui mai te mau fēti’i o nā ta’ata i pohe i roto i te ’ati, i te hiero.