31 O Le a Iu Faapefea Lenei Mea?

“O Le a Iu Faapefea Lenei Mea?,” mataupu 31 o le Au Paia: O Le Tala o le Ekalesia a Iesu Keriso i Aso e Gata Ai, Voluma 1, O Le Tagavai o le Upumoni, 1815–1846 (2018)

Mataupu 31: “O Le a Iu Faapefea Lenei Mea?”

Mataupu 31

O Le a Iu Faapefea Lenei Mea?

Sa fefe Litia Knight na i ai se mea ua sese ina ua ia faalogo i feei leoleoa ma tauvalaauga mai le tolauapiga a Misuri. Sa ia iloa na alu iai le perofeta e tausia le filemu. Ae o le leo na ia faalogoina sa pei o se taulaga luko, ua fiaai i se meaai.

I le vaai atu ma le popole i fafo o le faamalama, sa iloa atu ai e Litia lona toalua o tamoe mai agai i le fale. “Tatalo e pei e te lei tatalo muamua,” o le fai atu lea o Neueli ia te ia. Ua pueina e le militeri le perofeta.

Sa lagona e Litia le vaivai. I le po ua tuanai, sa tuitui mai ai ni tamaloloa se toalua mai le vevesi i le Vaitafe Piopio i lona faitotoa, e sue se nofoaga e lalafi ai. Sa folafola mai e le militeri a Misuri le faasalaina o Au Paia e auai i le vevesi, o le faalafiina la o ia alii o le a lamatia ai lona aiga. Ae sa le mafai ona ia fulitua ia i laua ma sa ia faalafiina i laua i lona fale.

O lea sa ia manatunatu ai po o sefe lelei ia alii. O le a toe alu foi Neueli i lena po e tiute i leoleoga. Afai e taunuu atu le militeri ao toesea o ia ma maua ai alii o loo lalafi i lona fale, e ono fasiotia ai i latou. Ma o le a le latou mea o le a fai ia te ia ma tamaiti?

Ao ia tuumuli ese atu mo le po, sa lapatai mai Neueli ia te ia ia faaeteete. “Aua ete alu i fafo,” o lana tala lea. “O loo feoai le au fao mea.”

O le taimi lava na tuumuli ese atu ai Neueli, sa amata ai ona tatalo Litia. I le taimi na la o mai ai ma Neueli i sisifo ina ua uma ona faapaia le malumalu, na faia se la fale ma ua maua nei se fanau e toalua. Sa lelei lo latou olaga ao lei amata osofaiga a le au faatupu faalavelave. Sa ia le manao e malepe mea uma.

Sa mafai pea ona ia faalogo mamao atu i le feei o le au Misuri. Sa maniti lona tino i leo, ae sa faafilemuina o ia e le tatalo. Sa ia iloa e pulea e le Atua le lagi. Po o le a lava le mea e tupu e le suia ai lena mea.¹

O le taeao na sosoo ai, Novema 1, 1838, sa foi faatopetope atu ai Neueli i le fale. Sa faatonuina mai e Siaosi Hinkle ia autau a le Au Paia ia potopoto i le faatafafa a le taulaga. Sa laina le militeri a Misuri i fafo atu o la latou tolauapiga ma ua ia i le tulaga e savali i Fa Uesi.

“O le a Iu Faapefea Lenei Mea?” O le fesili lea a Litia. “Ua momomo lou fatu i le fefevale, ae peitai o lo o tau mai e le Agaga ia te au o le a iu ina lelei mea uma.”

“Ia faia e le Atua,” o le tala lea a Neueli, ma sii ae i luga lana fana. “Tofa, ma ia puipuia oe e le Atua.”²

Ao faapotopoto autau a le Au Paia i le faatafafa, sa faasavali e Taitai Luka ana au i le laugatasi i sautesasae o Fa Uesi ma faatonu i latou e tutu sauni e faatoilalo soo se faatautee mai le Au Paia. I le ta o le sefulu i lena taeao, sa taitai ai e Siaosi ana au mai le faatafafa ma faatulaga i latou e latalata i le laina a Misuri. Ona ia tieite atu lea agai ia Taitai Luka, aveese le pelu ma tamai fana mai lona fusipau, ma tuu atu i le taitai.³

Na aumai i fafo e le au Misuri se kesi tusitusi ma faatu i luma o la latou laina. Sa toe tietie atu Siaosi i lana au ma faatonu le Au Paia ia agai mai i le kesi, taitoatasi, ma tuuina atu a latou auupega i se paga o failautusi a le militeri o Misuri.⁴

I le siomia ai ma le laiitiiti tele o la latou fuainumera, sa itiiti ai se filifiliga a Neueli ma le Au Paia ae usitai. Ina ua oo i lona taimi e tuuina atu ai lana fana, sa laa faamalo atu Neueli i le kesi ma pupula toa atu ia Taitai Luka. “Lau susuga, o la’u fana o la’u lava mea totino,” o lana tala lea. “E leai se aia a sesi e aveese ai mai ia te au.”

“Tuu i lalo lau fana,” o le tala lea a le taitai, “pe o le a ou fanaina oe.”

Ma le ita tele, sa tuuina atu ai e Neueli lana fana ma toe foi atu i lona tulaga.⁵

Ina ua uma ona aveeseina uma fana a le Au Paia, sa tu le aai e aunoa ma se puipuiga. Sa toe faasavali e Taitai Luka au a le Au Paia i totonu o Fa Uesi ma taofi faapagota i latou i le faatafafa o le taulaga.

Ona ia faatonuina lea o ana au e pulea le aai.⁶

Sa lei faamaumauina e le militeri a Misuri sina tamai taimi i le talepeina o fale ma faleie, lagaina o pusa ma paelo, ma le sueina o auupega ma mea taua. Sa latou ave moega, lavalava, meaai ma tupe. Sa faia e nisi ta’igafi mai laau o fale, pa puipui, ma fale teu meafaigaluega. O isi na tafanaina povi, mamoe, ma puaa ma tuua i latou ia pepe i auala.⁷

I le fale a le au Knight, sa nofo sauni Litia ao agai atu ni alii militeri se toatolu i le faitotoa. “O iai ni au tamaloloa i totonu o le fale?” o le fesili lea a le tasi.

“O loo i lalo o la outou leoleoga o matou tamaloloa,” o le tala lea a Litia, ma poloka le ala i lona fale. Afai na te faatagaina i latou i totonu, o le a latou mauaina tamaloloa sa ia faalafiina.

“O iai ni fana i totonu o le fale?” o lana fesili lea.

“Sa alu lo’u toalua ma ave lana fana,” o le tala lea a Litia. I ona tua, sa amata ona fetagisi tamaiti, i le fefe i le vaai atu i le tagata ese. I le faateleina o lona lototele, sa toe faasaga atu Litia i le tamaloa. “Alu ese!” o lana ee lea. “Tou te le iloa atu ea le fefefe o au fanau iti?”

“Ia,” o le tala lea a le tamaloa, “e leai ea ni tamaloloa po o ni fana i le fale?”

“Ou te toe fai atu ia te oe,” o le tala lea a Litia, “o lou toalua o se pagota i le faatafafa, ma sa ia alu ma ave lana fana.”

Sa tomumu le tamaloa ma o ese atu loa ma isi.

Sa toe foi atu Litia i totonu o lona fale. Sa ia tetemu, ae ua o ese tamaloloa o le militeri ma ua saogalemu tagata uma i totonu o lona fale.⁸

I le faatafafa o le taulaga, i lalo o le leoleoga malosi ma e na totoe o au a le Au Paia, sa faalogo Heber Kimball i se leo masani o valaauina lona igoa. I le ea ae i luga, sa ia iloa ai Viliamu McLellin, le aposetolo tuai, o savali agai mai ia te ia. Sa laei Viliamu i se pulou ma se ofutino e teuteuina i ni fasi ie mumu sesena.⁹

“Uso Heber,” o le tala lea a Viliamu, “o lea nei sou manatu i le perofeta pau o Iosefa Samita?” Sa iai se vaega o fitafita faatasi ma Viliamu. Sa latou faasolo mai i lea fale ma lea fale, ma gaoia le taulaga i o latou manao.

“Vaai ma iloa oe lava,” o le faaauau atu lea a Viliamu. “Mativa, o lou aiga ua aveeseina ma gaoia, ma lau usoga ua iai i le tulaga lava e tasi. Ua e malie ea ia Iosefa?”¹⁰

Sa le mafai ona faafitia e Heber le le lelei o le tulaga o iai le Au Paia. O Iosefa ua pueina, ua leai ni auupega a le Au Paia ma ua osofaia.

Ae na iloa e Heber sa le mafai ona ia tuulafoaiina Iosefa ma le Au Paia, e pei ona faia e Viliamu, Tomasi Marsh, ma Osone Hyde. Sa tumau le faamaoni o Heber ia Iosefa i faigata uma na la feagai ai, ma sa ia naunau ia tumau pea lona faamaoni e tusa pe toesea ai mea uma na ia umia.¹¹

“O fea oe?” O le fesili atu lea o Heber, ma toe faasaga atu le fesili ia Viliamu. “O le a le mea o loo e faia?” O le molimau a Heber i le talalelei toefuataiina a Iesu Keriso ma lona musu e tuulafoai le Au Paia na talia lelei lava ai le fesili a Viliamu.

“Ua sili atu le faamalieina o au ia te ia e faaselau atu nai le mea na iai muamua,” o le faaauau atu lea a Heber. “Ou te fai atu ia te oe e moni le FaaMamona, ma o Iosefa o se perofeta moni a le Atua soifua.”¹²

Ao faaoosala le militeri i le taulaga, sa leai se mea a Taitai Luka e faia e taofi ai ana au mai le faamatauina o le Au Paia ma aveina a latou mea totino. E faasolo i le nuu, sa tutuliese ai e tamaloloa militeri a Misuri le Au Paia mai o latou fale, ma faamalaia ia i latou ao latou sosola atu i auala. Na sasa ma fasi e au e na faatautee ia i latou.¹³ O nisi fitafita na fasia ma fai aiga faamalosi fafine na latou maua atu o lalafi i totonu o fale.¹⁴ Sa talitonu Taitai Luka na agasala le Au Paia i le faatuiese ma sa ia manao ia taui a latou gaoioiga ma lagona le malosi o lana ami.¹⁵

I le aso atoa, sa tapue mai e au ofisa a Luka isi taitai o le ekalesia. Faatasi ai ma le fesoasoani a Siaosi Hinkle, sa ulu faamalosi atu ai au i totonu o le fale o Maria ma Ailama Samita. Sa mai Ailama, ae na tuli o ia i fafo e le au i le mata o se naifi ma tuu o ia faatasi ma Iosefa ma isi pagota.¹⁶

I lena afiafi, ao sauni Taitai Luka e faamasino pagota i se potu faamasino a le militeri, sa ave e se ofisa a le militeri e igoa ia Mose Uilisone ia Laimani Wight i autafa, ma le faamoemoe e faatosina o ia ia molimau e faasaga ia Iosefa i le faamasinoga.

“Matou te le mananao e faamanualia pe fasiotia oe,” na fai atu ai Mose ia Laimani. “Afai e te faapea atu ma tauto e faasaga ia te ia, o le a matou faasaoina lou ola ma avatu ia te oe soo se tulaga e te manao ai.”

“O Iosefa Samita e le o se fili i tagata ola,” o le tali malosi lea a Laimani. “Ana faapea ou te lei usitai i ana upu, semanu ua leva ona ou tuuina oe i seoli.”

“O oe o se tagata ese,” sa fai atu ai Mose. “O le a faia le faamsinoga faamiliteri i le po a nanei, ma e te auai ai?”

“O le a ou le auai, sei vagana ai ua faamalosia.”¹⁷

Sa toe togi e Mose Laimani i totonu faatasi ma isi pagota, ma sa lei umi ae taitaia e Taitai Luka le faamasinoga. Sa auai ni nai au ofisa a le militeri, e aofia ai ma Siaosi Hinkle. O Taitai Doniphan, pau lea o le loia na iai, sa tetee i le faamasinoga, fai mai e leai se pule a le militeri e faamasino ai tagatanuu e pei o Iosefa.

Ma le le ano ia te ia, sa faaauau pea e Taitai Luka le faamasinoga ma topetope le lauina o le iuga e aunoa ma se pagota na auai. Sa manao Siaosi ia faaali atu e Luka le alofa mutimutivale i pagota, ae peitai sa faasalaina e le taitai i latou ia tafanaina ona o le tetee. O le toatele o au ofisa na iai sa lagolagoina le faaiuga.¹⁸

Ina ua maea le faamasinoga, sa tau atu e Mose ia Laimani le iuga. “Ua filifilia lou iuga,” o lana tala lea.

Sa autilo faasiasia atu Laimani ia te ia. “Fana ma talia taunuuga,” o lana tala lea.¹⁹

Mulimuli ane i lena afiafi, sa faatonu ai e Taitai Luka Taitai Doniphan ia faasavali Iosefa ma isi pagota i le faatafafa o le taulaga i le ta o le iva i le taeao e sosoo ai ma fasiotia i latou i luma o le Au Paia. Sa matuai ilitata lava Doniphan.²⁰

“O le a faasalaina au pe afai ou te mauaina ai le mamalu, po o le luma o lena mea,” sa ia fai atu ai i pagota ina ua nao i latou. Sa ia fai atu ua ia fuafua e aveese mai ana au ao le i oso le la.²¹

Ona ia auina atu lea o se feau ia Taitai Luka. “O le fasioti tagata faamoemoeina. O le a ou le usitai i lau faatonuga,” o lana tala lea. “Afai e te fasiotia nei alii, o le a ou tuuina atu oe i luma o se au faamasino i lalo nei, ia fesoasoani mai le Atua!”²²

E pei ona folafolaina, sa tuumuli autau a Taitai Doniphan i le taeao na sosoo ai. Nai lo le fasiotia o Iosefa ma isi pagota, sa faatonu e Taitai Luka ana tamaloloa e taitai i latou i lana nofoaga autu i le Itumalo o Siakisone.²³

I le siomia ai e leoleo faaauupegaina, sa taitai atu Iosefa i auala malepe o Fa Uesi e tapena mai ni ana mea totino mai lona fale. Sa fetagisi Ema ma tamaiti ina ua ia taunuu atu, ae sa latou faafetai o loo ia ola pea. Sa faatoga atu Iosefa i leoleo ia faataga o ia e faatasi nao ia ma lona aiga, ae sa latou le taliaina.

Sa tautau atu Ema ma tamaiti ia te ia, e le mananao ia valavala. Sa sei pelu a leoleo ma toso ese i latou. Sa fusi mau e Iosefa e lima-tausaga lona tama. “Aisea e le mafai ai ona e nofo ma i matou?” o lana tagi masusu lea.²⁴

Sa faalala atu le pelu a se leoleo i le tamaitiiti. “Alu ese, lou mea ola, pe o le a ou tuiina oe!”²⁵

I le toe foi atu ai i fafo, sa faasavali e au ia pagota i le va o se potopotoga o le Au Paia ma faatonu i latou e feosofi i totonu o se taavale solofanua na puipuia. Ona siosio lea e le militeri le taavale solofanua, ma fausiaina ai se pa puipui o tamaloloa faaauupegaina i le va o le Au Paia ma o latou taitai.²⁶

Ao faatali Iosefa mo le taavale solofanua e taavale ese atu, sa ia faalogoina se leo masani o maona ae mai le potopotoga. “O au o le tina o le perofeta,” na valaau atu ai Lusi Samita. “E leai ea se tamaalii iinei e fesoasoani mai ia te au e savali atu i totonu o lenei potopotoga!”

Sa punitia e le taupoleni mafiafia o le taavale solofanua pagota mai le vaai atu i fafo, ae i luma o le taavale solofanua, sa momono atu e Ailama lona lima i lalo o le ufiufi ma uu le lima o lona tina. Sa vave ona faatonuina ese o ia e leoleo, ma folafola atu o le a fana o ia. Sa lagona e Ailama le see ese atu o le lima o lona tina, ma na foliga mai o le a taavale ese atu le taavale solofanua i soo se taimi.

I lena taimi, o Iosefa, o le sa i tua o le taavale solofanua, sa faalogo i se leo mai i le isi itu o le taupoleni. “Lau Susuga Samita, o lo o iinei lou tina ma lou tuafafine.”

Sa momono atu le lima o Iosefa i lalo o le ufiufi ma lagonaina le lima o lona tina. “Iosefa,” na ia faalogo atu ia te ia o fai mai, “e le mafai ona ou alu ese sei iloga ou te faalogo i lou leo.”

“Ia faamanuia oe e le Atua, Tina,” o le tala lea a Iosefa, ae minoi loa le taavale solofanua ma alu ese atu.²⁷

I ni nai po mulimuli ane, sa taooto ai pagota i le fola o se fale laau i Ritimoni, Misuri. Ina ua ave i latou i le Itumalo o Siakisone, sa faaalia i latou e Taitai Luka e pei o ni meaola ao lei faatonuina o ia e toe ave i latou i Ritimoni mo se faamasinoga aloaia.

O lea ua taumafai alii taitasi e momoe ma se filifili i lona tapuvae ma se filifili mamafa o loo faamauina ai o ia i isi pagota. Sa malo ma malulu le fola, ma sa leai se afi e faamafanafanaina ai i latou.²⁸

I le taoto ai ao ala, sa lagona e Pale Palate le inoino ao faamatala e o latou leoleo tala e matautia le leaga e uiga i le faamalosi teine ma le fasiotiaina o le Au Paia. Sa ia manao e tu i luga ma aoai atu i tamaloloa—ia faia se tala ia le toe tautatala ai i latou—ae sa ia filemu pea.

Na faafuasei lava, ae ia faalogo atu i pao o filifili i ona tafatafa ao tu ae i luga Iosefa. “Filemu, outou o tiapolo o le lua o seoli!” o le leotele atu lea a le perofeta. “I le suafa o Iesu Keriso, ou te aoai ai outou ma faatonu outou ia fifilemu! Ou te le toe ola i se isi minute ma faalogo atu i na ituaiga gagana!”

Na uumau e leoleo na faateia a latou auupega ma autilo ae i luga. Sa pupula totoa atu foi Iosefa ia i latou, ma na susulu atu le mamana. “Tuu loa nei na ituaiga tala,” o lana faatonuga lea, “pe tou te feoti po o au i le taimi nei lava!”

Sa filemu le potu, ma sa tuu i lalo fana a leoleo. O nisi o i latou sa solomuli atu i tulimanu. O isi na faapupuu ma le matatau i vae o Iosefa. Sa tu filemu le perofeta, ma foliga toafimalie ma mamalu. Sa augani mai leoleo mo lana faamagaloga, ma tumau ai i le fifilemu seia oo ina sui mai leoleo.²⁹

Ia Novema 12,1838, sa ave ai Iosefa ma le sili atu ma le onosefulu le Au Paia i le fale faamasino i Ritimoni e iloa ai pe lava mau e faamasinoina ai i latou i moliaga o le tetee i le malo, fasioti tagata, susunu fale, talepe fale, ma le gaoi. O le faamasino, o Ausitini King, o le a faia le faaiuga pe o le a o pagota i le faamasinoga.³⁰

Sa oo atu i le lua vaiaso le umi o le faamasinoga. O le molimau autu e faasaga ia Iosefa o Samapasoni Avard, lea sa avea ma se taitai o Sa Tanu.³¹ Ao osofaia Fa Uesi, sa taumafai Samapasoni e sola ese mai Misuri, ae sa pueina e le militeri ma faafefe e ave o ia i le faamasinoga pe afai e musu e molimau e faasaga i pagota.³²

I le naunau ai e sefe o ia lava, sa faapea atu ai Samapasoni o mea uma na ia faia o se Sa Tanu na faia i lalo o faatonuga mai ia Iosefa. Sa ia tautino atu faapea sa talitonu Iosefa o le finagalo o le Atua mo le Au Paia ia tau mo a latou aia tatau e faasaga i malo o Misuri ma le atunuu.

Sa faapea mai foi Samapasoni sa talitonu Iosefa o le ekalesia sa pei o le maa sa taua e Tanielu i le Feagaiga Tuai, lea o le a faatumuina ai le lalolagi ma faaumatia ai ona malo.³³

I le faateia tele, sa fesiligia ai e Faamasino King Iosefa e uiga i le valoaga a Tanielu, ma na tautino atu Iosefa na te talitonu i ai.

“Tusi i lalo le mea lena,” na fai atu ai le faamasino i lana failautusi. “O se mau malosi mo le faatuiese.”

Sa tetee atu le loia a Iosefa. “Faamasino,” o lana tala lea, “e sili ai ona e avea le Tusi Paia o se faatuiese.”³⁴

Sa valaau e le faamasinoga molimau e sili atu ma le fa sefulu e tautino e faasaga i pagota, e aofia ai ma ni nai taitai tuai o le ekalesia. I le fefe ai nei faasalaina i latou lava, o Ioane Corrill, Viliamu Phelps, Ioane Uitimera, ma isi na faia se maliega ma le setete o Misuri e molimau e faasaga ia Iosefa ia faafesuiai mo lo latou lava saolotoga. I lalo o le tautoga, na latou faamatalaina le ita na latou molimauina i le taimi o le vevesi, ma o i latou uma lava sa tuuaia Iosefa.

O mau e puipuia ai le Au Paia, i lena taimi, sa i ai ni nai molimau na itiiti so latou aoga e suia ai le manatu o le faamasino. O isi molimau sa mafai lava ona molimau e lagolagoina Iosefa, ae sa osofaia pe faafefeina ese mai le potu faamasino.³⁵

E oo atu i le taimi ua uma ai le faamasinoga, e toalima le Au Paia, e aofia ai Pale Palate, sa falepuipui i Ritimoni e faatali ai le faamasinoga i moliaga o le fasioti tagata e faatatau i le misa i le Vaitafe Piopio.

O i latou na totoe—o Iosefa ma Ailama Samita, Sini Rikitone, Laimani Wight, Kalepo Baldwin, ma Alesana McRae—sa siitia i se falepuipui i se taulaga e taua o Liperate e faatali ai faamasinoga i moliaga o le faatuiese. Afai e faamaonia, e iu ina fasiotia i latou.³⁶

Na faamauina i se filifili alii e toaono e se gaosi uamea ma taitai atu i latou i se taavale solofanua tele. Sa feosofi i totonu pagota ma nonofo i luga o laupapa maamaai, o o latou ulu toeitiiti oo i luga o pito maualuluga o le pusa o le taavale.

O le faigamalaga na alu ai le aso atoa. Ina ua latou taunuu i Liperate, na taavale atu le taavale solofanua i le ogatotonu o le taulaga, pasi atu i le fale faamasino, ma agai atu i matu i se falepuipui maa, laitiiti. Sa matala le faitotoa, e faatali mai ai alii i le malulu o le aso o Tesema.

Sa taitoatasi, ona agai i lalo pagota mai le taavale solofanua ma o atu i luga o sitepu i le faitotoa o le falepuipui. Sa faaofiofi atu ni tagata faitatala e siomia i latou, e fiavaai i pagota.³⁷

O Iosefa na mulimuli lava alu ese mai le taavale solofanua. Ao ia taunuu atu i le faitotoa, sa ia tilotilo atu i le potopotoga ma sii i luga lona pulou e faatalofa faaaloalo atu ai. Ona ia liliu lea ma alu ifo i totonu o le falepuipui pogisa.³⁸