Mataupu 19

Tausimea i Luga o Lenei Galuega

A o faataapeina le Tolauapiga a Isaraelu, sa osofaia e se pepesi mai o le kolera faataumaoi ona tagata uma. O le Au Paia sa malolosi i ni nai itula ua mavae, sa solovi ifo, ma sa le mafai ona gaoioi. Sa na o le faasuati ma faasuati ma mafatia i tiga ogaoga o manava. Sa faatumulia le tolauapiga i le fetagisi o e mama’i, ma o le toatele o tamaloloa sa matua vaivai ma sa le mafai ona tiute e leoleo.

O Nancy Holbrook o se tasi o tagata muamua na ma’i. O lona uso faaletulafono o Eunike sa lei umi ae ma’i atu foi ma ia, ma sa lofituina le oso faamalosi o maso.¹ Sa alu le tele o le taimi o Uilifoti Uitilafi i le po ma le isi aso e tausi ai se tamaloa ma’i i lana vaega.² Sa tuuina atu e Iosefa ma toeaina o le tolauapiga ni faamanuiaga i e mama’i, ae e lei pine ae taia foi le toatele o i latou i le faama’i. Sa oo ina ma’i Iosefa ina ua mavae ni nai aso ma sa le mafai ona ia tuua lona faleie, ma sa le mautinoa pe o le a ola o ia.³

Ina ua amata ona maliliu tagata, sa aui e Heber Kimball, Polika Iaga, ma isi ia tino i palanikeke ma tanu i autafa o se vaitafe laitiiti lata ane.⁴

---

Sa faasolo ina mavae atu le kolera ina ua mavae ni aso, ma maea atu ai i le amataga o Iulai. E oo atu i lena taimi, ua silia ma le onosefulu le Au Paia na mama’i. Sa toe malosi mai Iosefa, e faapena foi Nanise, Eunike, ma le toatele o tagata i le tolauapiga. Ae e silia ma le toasefululua le Au Paia na maliliu i le taimi na pipisi mai ai, e aofia ai ma Sini Gilbert ma Peti Parrish, o ni nai fafine i le tolauapiga. Sa faanoanoa Iosefa mo e na aafia ma o latou aiga. O le tagata mulimuli na maliu o Iese Samita, lona tausoga.⁵

O le tulata foi o Iosefa ia i le oti o se faamanatu i le faigofie tele ona aveesea lona ola mai ia te ia. I le luasefulu-valu tausaga o lona matua, sa atili popole o ia e uiga i le faamaeaina o lana misiona paia.⁶ Afai ae oti nei o ia, pe o le a le mea o le a tupu i le ekalesia? Pe ua lava lona malosi e faaauau ai pe a oti o ia?

I le mulimuli ai i le taitaiga a le Alii, sa faia ai lava e Iosefa ia suiga i le au taitai o le ekalesia e fefaasoaai ai avega o le taitaiga. E oo mai i le taimi lea, o latou galulue ma Sini Rikitone ma Feterika Viliamu i le au peresitene o le ekalesia. Sa ia atofaina foi Katelani e avea ma siteki o Siona, po o se ofisa aloaia mo le faapotopotoina o le Au Paia.⁷

E lei leva tele atu, ina ua maea ona maua mai se faaaliga vaaia i le ala na faatulaga ai e Peteru le ekalesia anamua, sa faatulagaina e Iosefa se fono a fautua maualuga o faitaulaga sili e toasefululua i Katelani e fesoasoani ia te ia e pulea le siteki ma taitai pe a leai o ia.⁸

O le taimi lava na maui atu ai le kolera, sa faatulagaina atili ai e Iosefa le ekalesia. O le fono ai ma taitai o le ekalesia i le Itumalo o Kalei ia Iulai 1834, sa ia faatuina ai se fono a fautua maualuga i Misuri ma tofia ai Tavita Uitimera e pulefaamalumalu i le ekalesia iina faatasi ai ma le fesoasoani a ni fesoasoani se toalua, o Viliamu Phelps ma Ioane Uitimera.⁹ Ona ia malaga atu lea i Katelani, ma le naunau e faamaea le malumalu ma maua ai faaeega o le mana lea o le a fesoasoani i le Au Paia e laveai mai Siona.

Sa iloa e Iosefa o loo faamalumalu mai ni faafitauli tetele. Ina ua tuua e ia ia Katelani i lena tautotogo, ua ta’ifa futu le maualuluga o puipui piliki, ma o le taunuu mai o ni nai tagata faigaluega tomai i le taulaga na ia maua ai le faamoemoe faapea o le a iloa ai e le Au Paia le fuafuaga a le Alii mo Lona maota. Peitai o mea na faaleagaina i Initipene---o le ofisa lomitusi, o le faleoloa, ma le tele o laueleele---na mafatia ai le Au Paia i tulaga tautupe. O Iosefa, Sini, ma isi taitai o le ekalesia sa matua tetele foi aitalafu, sa latou faia ni nonogatupe tetele e faatau ai fanua mo le malumalu i Katelani ma faatupe ai le Tolauapiga a Isaraelu.

I le tapunia ai o pisinisi a le ekalesia pe ua faaletonu, ma le leai o se faiga faatuatuaina e ao mai ai ni foai mai le Au Paia, o le a le mafai ai e le ekalesia ona totogi tupe mo le malumalu. Afai e tuai ona totogi tupe totogi a Iosefa ma isi taitai, e mafai foi ona latou le maua le maota paia ae maua e e o nofo aitalafu ai. Afai foi latou te le maua le malumalu, pe mafai faapefea la ona latou maua le faaeega o le mana ma laveai mai Siona?¹⁰

---

I tua i Katelani, sa faamatalatala ai e Sini Rikitone le naunautaiga o Iosefa e faamaea le malumalu. “E tatau ona tatou faaaogaina taumafaiga uma e faamaea ai lenei fale i le taimi ua atofaina,” sa ia ta’u atu ai i le Au Paia. “O luga o lea fale o loo faalagolago i ai le faaolataga o le ekalesia faapea foi le lalolagi.”¹¹

Sa faafoe e Sini le agaigai i luma o le malumalu a o i ai Iosefa i Misuri. O le le lava o taulelea e faia le galuega, sa faatauanau ai e Atemusi Mileta, o le faatonu o le fausaga, ia tamaloloa matutua faapea foi ma fafine ma tamaiti e galulue i le fausaga. O le toatele o fafine sa faia galuega sa masani ona faia e tamaloloa, ma fesoasoani i e tipi maa ma le aveina o taavaletoso i le vilimaa ma toe aumai, e la’u ai maa mo le malumalu. E oo atu i le taimi na toe foi mai ai Iosefa ma le Tolauapiga a Isaraelu i Katelani, ua tulai mai puipui ua tele atu futu le maualuluga i luga ae o le faavae.

O le toe foi mai o le tolauapiga na uunaia ai le fausaga i le taumafanafana ma le tautoulu o le 1834.¹² Na eli e le Au Paia maa, aveina atu i le tulaga o le malumalu, ma fausia i luga puipui o le malumalu mai i lea aso i lea aso. Sa faigaluega ia Iosefa faatasi ma le au faigaluega a o latou tipiina poloka maa mai se alia lata ane. Sa galulue nisi i le ili laupapa a le ekalesia e saunia ai laupapa mo utupoto, taualuga, ma le fola. O isi sa fesoasoani e sii i luga ogalaau ma faaee i luga le fatamanu i mea sa manaomia ai.¹³

O le taimi lea, sa gaosia ai e Ema ma isi fafine ia lavalava mo le au faigaluega ma fafaga i latou. O Vilate Kimball, le faletua o Heber, sa viliina le selau pauna o fulumamoe e fai ai filo, ma lalagaina ai ie, ma suiina ai lavalava mo le aufaigaluega, ma na te lei tuuina sina vaega e pei o se pea totini faaleoleo mo ia lava.

O le naunau o le Au Paia mo le faamaeaina o le malumalu na faamalosiauina ai Sini, ae sa faateleina le aitalafu a le ekalesia i lea aso ma lea aso, ma o le sainia ai o lona igoa i le tele o nonogatupe aupito tetele, sa ia iloa ai o le a faaleagaina lona tulaga tautupe pe afai e le toe totogia e le ekalesia na nonogatupe. Ina ua ia vaaia le matitiva o le Au Paia ma osigataulaga sa latou faia e faamaea ai le malumalu, sa fefe foi Sini nei o latou le maua lava ia punaoa po o le manao e faamaeaina.

I le faatumulia ai i le popole, na te ae ai i nisi taimi i le tumutumu o puipui o le malumalu ma aioi atu i le Atua e auina mai i le Au Paia ia tupe latou te manaomia e faamaea ai le malumalu. A o tatalo o ia, sa toulu mai loimata i ona mata i luga o maa sa i lalo ifo o ona vae.¹⁴

---

E limaselau maila i matusasae o Katelani, sa teu ese ai ma le faaeteete e Karoline Tipeta e luasefulu-tasi-tausaga le matua se vaega tupe tele faatasi ma lavalava ma isi mea sa ia aumaia mai Niu Ioka i Misuri. O ia ma lona tuagane laitiiti o Harrison sa agai atu i sisifo, ma le faamoemoe e faamautu i se mea e lata i le Itumalo o Siakisone. Sa faalogo i la’ua i le sauaga o le Au Paia iina, ae sa la mananao e usitai i le poloaiga a le Alii e faapotopoto i Misuri ma faatau ia laueleele i Siona a o lei faoa e fili o le ekalesia.¹⁵

O le poloaiga sa avea o se vaega o le faaaliga na maua e Iosefa ina ua uma ona ia iloa le tutulieseina o le Au Paia mai Siona. “Faatau uma laueleele,” o le faitauga lea, “ia e mafai ona faatau mai le Itumalo o Siakisone, ma itumalo taulalata ane.” O tupe sa tatau ona maua mai i foai. “Tuu atu i ekalesia uma e faapotopoto faatasi a latou tupe uma,” sa faatonu mai ai le Alii, “ma ia tofia tamalii, o alii popoto, ma auina atu i latou e faatau mai nei laueleele.”¹⁶

Ina ua faalogo ia taitai o le paranesi a Karoline e uiga i le faaaliga, sa latou taloina se vaega toalaiti o le Au Paia e anapopogi ma tatalo mo le fesoasoani a le Alii i le aoina o tupe e faatau ai fanua i Misuri. O nisi tagata o le paranesi sa tuuina atu ni foai tetele o tinoitupe ma meatotino i le teugatupe. O isi na latou foai atu ni nai tala.

Sa i ai ia Karoline pe tusa ma le $250 sa mafai ona ia tuu i le teugatupe. Sa o se tupe tele atu nai lo mea na foai atu e se isi lava o le paranesi, ma atonu foi e sili atu nai lo se mea sa faamoemoe se tasi na te tuuina atu, ae sa ia iloaina o le a fesoasoani i le Au Paia e laveai mai ai le laueleele folafolaina. Ina ua ia faaopoopo atu lana foai i le teugatupe, sa oo le aofai i le tusa ma le $850, o se aofaiga tele naua o tupe.

Ina ua maea le fono, sa filifilia ia Harrison ma lona tausoga o Ioane e malaga i Misuri e faatau mai le laueleele. Sa tonu ia Karoline e alu latou te o, ma puipuia lana sea o le foai. Ina ua uma ona foia e Ioane ni pisinisi ma ua saunia foi e tagata o le aiga se autoso o le taavale toso mo i latou, sa saunia le toatolu e malaga mo Misuri.

Sa ae atu i totonu o le taavale solofanua, ma sa sagisagi atu Karoline i le amataina o se olaga fou i Sisifo. Talu ai sa fuafua e le au Tipeta e malolo i Katelani ao malaga atu, sa avatu e o latou taitai o le paranesi ia i latou se tusi o le faailoaga i le perofeta, e faamalamalama atu ai le mea na maua mai ai le tupe ma le mea sa latou faamoemoe e fai i le tupe.¹⁷

---

I le tautoulu atoa o le 1834, sa faasolosolo atili ai pea i tua ma atili ai ona tuai tupe totogi a Iosefa ma isi taitai o le ekalesia o fanua o le malumalu, ma na faaputuputu pea foi le tului o nonogatupe. Sa ofo atu e nisi o le aufaigaluega o latou taimi e galulue ai i le malumalu, e taufaamama ai le avega tautupe a le ekalesia. A i ai ni tinoitupe faasili po o oloa a aiga, o nisi taimi latou te ofoina atu ai i le ekalesia mo galuega faatino o le malumalu.¹⁸

O isi tagata, i totonu ma fafo o le ekalesia, sa faaopoopo atu aitalafu, ma nono atu tupe e tulei ai i luma le galuega. Ona totogi ai lea e foai ma nonogatupe ia mea manaomia o le galuega ma mafai ai e tagata semanu e le faigaluega ona galulue.¹⁹

O nei taumafaiga na mafai ona maualuluga atili ai ia puipui o le malumalu, ma i masina faaiu o le tausaga, sa lava le maualuluga mo le amataina o galuega i laupapa ma faataatitia ai utupoto mo le fogafale i luga. Ae sa utiuti pea lava tupe, ma sa tatalo e le aunoa ia taitai o le ekalesia mo nisi tupe.²⁰

I le amataga o Tesema, sa taunuu ai le aiga o Tipeta i Katelani, ma sa tuu atu e Harrison ma Ioane le tusi a lo latou paranesi i le fono a fautua maualuga. Faatasi ai ma le taumalulu e le o toe mamao, sa latou fesili i le aufono pe tatau ona latou faaauau pea i Misuri pe nonofo ai i lea vaitau i Katelani. Ina ua maea se talatalanoaga, sa fautuaina e le aufono e nonofo le aiga i Ohaio seia oo i le tautotogo.

I le matua manaomia ai o tupe, sa talosagaina ai e le aufono ia taulelea e nono atu i le ekalesia sina tupe, ma folafola atu e toe totogi a o lei oo i le taimi e tuua ai i le tautotogo. Sa ioe Harrison ma Ioane e faaune atu i le ekalesia se vaega o le $850 mai le latou paranesi. . Talu ai o se vaega tele o lena tupe e a Karoline ia, sa taloina o ia e le aufono i le fonotaga ma sa faamalamalama atu i ai tuutuuga o le nonogatupe, lea sa ia fiafia e taliaina.

O le aso na sosoo ai, sa olioli ia Iosefa ma Oliva a o la faafetai atu i le Alii mo le faamama avega tautupe na aumaia e le aiga o Tipeta.²¹

---

Na faateleina nonogatupe ma foai na oo mai i le ekalesia i lena taumalulu, ae sa iloa e Iosefa o le a le lava pea e taulima ai le tau faatupulaia o le malumalu. Peitai, sa faaalia e Karoline Tipeta ma lona aiga, e toatele le Au Paia i paranesi mamao o le ekalesia sa mananao e faia la latou vaega i le galuega a le Alii. A o lalata mai le tausaga fou, sa iloa e Iosefa ua manaomia ona ia sueina se auala e faamalolosia ai nei paranesi ma sailia la latou fesoasoani i le faamaeaina o le malumalu ina ia mafai ai ona faaeeina le Au Paia i le mana.

Na oo mai le tali i se faaaliga na maua e Iosefa i ni nai tausaga ua mavae, lea na poloaiina ai Oliva Kaotui ma Tavita Uitimera e sailia ni aposetolo e toasefululua e talai le talalelei i le lalolagi. E faapei o aposetolo i le Feagaiga Fou, o nei alii e tatau ona galulue o ni molimau faapitoa a Keriso, e papatiso atu i Lona suafa ma faapotopoto tagata liliu mai i Siona ma ona paranesi.²²

I le avea ai o se korama, sa tatau foi i aposetolo e toasefululua ona galulue o se aufono maualuga femalagaai ma auauna atu i eria e i fafo atu o le vaavaaiga a fautua maualuga i Ohaio ma Misuri.²³ I lea malosiaga, e mafai ona latou faatonutonuina le galuega faifeautalai, vaaia paranesi, ma sue tupe mo Siona ma le malumalu.

I se tasi Aso Sa i le amataga o Fepuari, sa valaaulia ai e Iosefa ia Polika ma Iosefa Iaga i lona fale. “Ou te mana’o e te lua logoina atu i le usoga uma o loo nonofo i paranesi, i se mamao talafeagai mai lenei nofoaga, ina ia faapotopoto i se konafesi aoao i le Aso Toonai a sau,” na ia ta’u atu ai i le au uso. I lena konafesi, sa ia faamalamalama atu ai, o le a tofia alii e toasefululua i le korama fou.

“Ma o oe,” sa fai atu ai Iosefa ia Polika, “o se tasi o i latou na.”²⁴

---

O le vaiaso na sosoo ai, aso 14 Fepuari, 1835, sa faapotopoto ai le Au Paia i Katelani mo le konafesi. I lalo o le taitaiga a Iosefa, sa faasilasila atu ai e Oliva, Tavita, ma o latou uso a molimau o le Tusi a Mamona, o Matini Harisi, ia sui o le Korama a Aposetolo e Toasefululua. O nei alii ua valaauina sa faia ni misiona talai, ma o le toavalu o i latou sa savavali i le Tolaupiga a Isaraelu.²⁵

O Tomasi Marsh ma Tavita Patten, ua taitolusefulu ma ona tupu tausaga, o uso aupito matutua ia o le Toasefululua. O Tomasi o se tasi o uluai tagata liliu mai, na maua se molimau i le Tusi a Mamona, a o lolomiina kopi muamua o le tusi. Na auauna atu Tavita i lea misiona ma lea misiona i le tolu tausaga talu lona liliu mai.²⁶

E pei ona ta’ua i se vaiaso na muamua atu e Iosefa, sa tofia foi Polika i le korama. Sa faapena foi i lana uo sili, o Heber Kimball. O ia alii e toalua sa galulue faamaoni o ni kapeteni i le Tolauapiga a Isaraelu. Ia o le a toe tuua foi e Polika lona nofoa o se kamuta ma Heber i lana uili fai omea, ae o i le feau a le Alii.

E faapei o aposetolo o le Feagaiga Fou, o Peteru ma Aneterea ma Iakopo ma Ioane, e toalua soa o le au uso na tofia i le Toasefululua. O Pale ma Osona Palate sa faasalalauina atu le talalelei i sasae ma sisifo ma ua tuuto atu nei i la’ua lava e galulue i paranesi o le ekalesia i soo se mea. O Luka ma Limani Johnson, sa talai atu i saute ma matu ma o le a toe o atu foi, i le taimi nei ma le pule faaaposetolo.²⁷

Sa filifilia e le Alii i latou sa aotauina ma i latou foi e lei aooga. O Osona Haite ma Viliamu McLellin sa faiaoga i le Aoga a Perofeta ma sa aumaia lo la’ua atamai naunau i le korama. E ui ina sa na o le luasefulu tolu tausaga le matua, ae o Ioane Boynton sa matua faamanuiaina lava o se faifeutalai ma sa na o ia le aposetolo sa alu i se iunivesite. O le uso laitiiti o le perofeta o Viliamu e lei maua le faamanuiaga lea e tasi o le aotauina aloaia, ae o ia o se failauga e susua upu, e le fefe e fetaiai ma tetee, ma e vave foi i le puipuia o e le tagolima.²⁸

Ina ua uma ona tofia ia aposetolo, sa tuu atu ia i latou e Oliva se poloaiga faapitoa. “Ia aua lava nei fiu e taumafai seia iu ina ua outou vaai i le Atua, faafesagai,” na ia ta’u atu ai ia te i latou. “Ia faamalosia o outou faatuatua; ia lafoai ese o outou masalosaloga, a outou agasala, ma o outou le talitonu uma; ma e leai se mea e mafai ona taofia outou mai le o mai i le Atua.”

Sa ia folafola atu ia te i latou o le a latou talai atu le talalelei i malo mamao ma faapotopoto mai le tele o fanau a le Atua i le saogalemu o Siona.

“O le a avea o outou ma tausimea i luga o lenei galuega,” na ia molimau atu ai. “Ua ia i tatou se galuega e fai lea e leai lava nisi tagata e mafai ona faia. E tatau ona outou folafola atu le talalelei i lona faigofie ma le mama a’ia’i, ma e matou te fautuaina atu outou i le Atua ma le upu o Lona alofa tunoa.”²⁹

---

E lua vaiaso talu ona uma ona faatulaga le Toasefululua, sa faatuina ai e Iosefa se isi korama o le perisitua e au faatasi atu ma aposetolo i le faasalalauina o le talalelei, e faamalolosia ia paranesi, ma ao mai foai mo le ekalesia. O uso o lenei korama fou, sa ta’ua o le Korama a Fitugafulu, o tama tuai uma o le Tolauapiga a Isaraelu. Sa tatau ona latou femalagaai i nuu mamao ma le lautele, e mulimuli i le faataitaiga a le Feagaiga Fou o soo fitugafulu sa femalagaai taitoalua i aai uma e folafola atu le afioga a Iesu.³⁰

Sa filifilia e le Alii alii e toafitu e pulefaamalumalu i le korama, e aofia ai Iosefa Iaga ma Sylvester Samita, le kapeteni o le vaega sa tauaimisa ma le perofeta i le taimi o le savaliga a le Tolauapiga a Isaraelu. Faatasi ai ma le fesoasoani a le aufautua maualuga a Katelani, sa foia e nei alii e toalua a la feeseeseaiga i lena taumafanafana ma faia ni faaleleiga.³¹

E lei umi ona valaauina i latou, ae talanoa atu le perofeta i korama fou. “O nisi o outou o loo feitai ia te au ona sa outou le tau i Misuri,” na ia fai atu ai. “Ae faataga mai au ou te ta’u atu ia te outou, e lei finagalo le Atua ia te outou e tau.” Nai lo lena, sa faamalamalama atu e Iosefa, sa valaauina i latou e le Atua i Misuri e tofotofo lo latou naunautai e ositaulaga ma faapaia o latou olaga i Siona, ma ia faateleina le mana o lo latou faatuatua.

“O le a le mafai ona Ia faatulagaina lona malo i ni tamalii e toasefululua e tatalaina faitotoa o le talalelei i atunuu o le lalolagi, ma ni tamalii e toa fitusefulu i lalo o la latou taitaiga ia mulimuli i o latou tulagaaao, seiloga na Ia aveina i latou mai se tino o alii o e na ofoina atu o latou ola, ma o e na faia se osigataulaga maoae e pei ona sa faia e Aperaamo.”³²

Faamatalaga

1. Holbrook, “History of Joseph Holbrook,” 17–18.

2. Woodruff, Journal, [June 1834].

3. Joseph Smith History, 1838–56, volume A-1, 505. Autu: Healing (Faamalologa)

4. Joseph Smith History, 1838–56, volume A-1, 506; faaopoopoga, 16, faamatalaga 18.

5. “Afflicting,” The Evening and the Morning Star, July 1834, [8]; Joseph Smith History, 1838–56, volume A-1, 509.

6. George A. Smith, i le Journal of Discourses, Nov. 15, 1864, 11:8; Joseph Smith, Journal, Jan. 11, 1834i le JSP, J1:25; “A Mormon Battle,” Erie Gazette, July 31, 1834, [3].

7. Faamatalaga, Mar. 8, 1832, i le JSP, D2:201–4; Minutes, Feb. 17, 1834, i le JSP, D3:435–39. Autu: First Presidency [au Peresitene Sili]; Wards and Stakes [Uarota ma Siteki]

8. Minutes, Feb. 17, 1834i le JSP, D3:435–39. Autu: High Council [Fautua Maualuga]

9. Minutes and Discourse, circa July 7, 1834, i le JSP, D4:90–96.

10. Tagai Robison, First Mormon Temple, 45–58; Bushman, Rough Stone Rolling, 306–8; and Staker, Hearken, O Ye People, 401–34.

11. Kimball, “Journal and Record,” 20.

12. Ames, Autobiography and Journal, [10]; tagai foi Probert and Manscill, “Artemus Millet,” 60–62.

13. Joseph Smith History, 1838–56, volume B-1, 553; Johnson, Reminiscences and Journal, 17–18; Staker, Hearken, O Ye People, 421–26, 436. Autu: Kirtland Temple [Malumalu o Katelani]

14. Kimball, “Journal and Record,” 20.

15. Tippets, Autobiography, [9]–[10]; tagai foi Doctrine and Covenants 101:67–73 (Revelation, Dec. 16–17, 1833, i le josephsmithpapers.org).

16. Mataupu Faavae ma Feagaiga 101:70–73 (Revelation, Dec. 16–17, 1833, i le josephsmithpapers.org).

17. Tippets, Autobiography, [8]–[10]; Minutes, Nov. 28, 1834, i le JSP, D4:182–88; Editorial Note and Joseph Smith, Journal, Nov. 29, 1834, i le JSP, J1:46–47.

18. Tagai Staker, Hearken, O Ye People, 412–28, 435–37.

19. Tagai Mataupu Faavae ma Feagaiga 90:28–29 (Revelation, Mar. 8, 1833, i le josephsmithpapers.org); Tullidge, Women of Mormondom, 441; Staker, Hearken, O Ye People, 436, faamatalaga 8–9; Joseph Smith, Journal, Sept. 23, 1835, i le JSP, J1:62; ma Ames, Autobiography and Journal, [12].

20. Ames, Autobiography and Journal, [10]; Corrill, Brief History, 21, i le JSP, H2:151; Joseph Young to Lewis Harvey, Nov. 16, 1880, Church History Library; Robison, First Mormon Temple, 50.

21. Tippets, Autobiography, [11]–[12]; Minute Book 1, Nov. 29–30, 1834; Editorial Note and Joseph Smith, Journal, Nov. 29, 1834, i le JSP, J1:46–47.

22. Mataupu Faavae ma Feagaiga 18 (Revelation, June 1829–B, i le josephsmithpapers.org)

23. Mataupu Faavae ma Feagaiga 102:30 (Revised Minutes, Feb. 18–19, 1834, i le josephsmithpapers.org).

24. Young, History of the Organization of the Seventies, 1.

25. Minutes, Discourse, and Blessings, Feb. 14–15, 1835, i le JSP, D4:219–28. Autu: Quorum of the Twelve (Korama o le Toasefululua)

26. Patten, Journal, [1]–[2], [4]–[14].

27. Tagai biographical entries for Luke Johnson, Lyman Eugene Johnson, Parley Parker Pratt, and Orson Pratt, Joseph Smith Papers website, josephsmithpapers.org.

28. Tagai biographical entries mo Orson Hyde, William Earl McLellin, John Farnham Boynton, ma William B. Smith Smith, Joseph Smith Papers website, josephsmithpapers.org.

29. Joseph Smith History, 1838–56, volume B-1, 574; Minutes and Blessings, Feb. 21, 1835, i le JSP, D4:237–47.

30. Luka 10:1. Autu: Quorum of the Seventy [Korama a Fitugafulu]

31. Minutes and Blessings, Feb. 28–Mar. 1, 1835, i le JSP, D4:255–64; Joseph Smith History, 1838–56, volume B-1, 577–78; Minutes, Aug. 11, 1834, i le JSP, D4:97–101; Minutes, Aug. 23, 1834,i le JSP, D4:108–9; Minutes, Aug. 28–29, 1834, i le JSP, D4:120–35; Sylvester Smith to Oliver Cowdery, Oct. 28, 1834, i le LDS Messenger and Advocate, Oct. 1834, 1:10–11.

32. Young, History of the Organization of the Seventies, 14