Mataupu 35

O Se Nofoaga Matagofie

Ao faaauau le faamai pipisi o le malaria i Komese i le 1840, sa asiasi atu Emili Paterika ma lona uso o Harieta i faleie, taavale solofanua, ma fale e lei uma o le au mamai. O lea ua sefuluono ona tausaga, ma ua masani Emili i le nofo i tulaga faigata. Toeitiiti lava atoa le sefulu tausaga, sa fetulinai lona aiga mai i lea fale faatauvaa i lea fale faatauvaa, ma le le mauaina o se avanoa e olioli ai i se fale mautu e pei ona latou i ai i Ohaio.

Na tausia e nei uso e na mamai seia oo ina maua foi i laua i fiva ma le tetete. I le iloa ai ua lamatia ola o le la fanau teine, sa aveina atu e Eteuati ma Litia Paterika i laua mai se faleie i se potu mautotogi laiitiiti i se fale-e-teu-ai-mea tuufua i tafatafa o le vaitafe. Ona galue lea o Eteuati e fausia se fale mo lona aiga i se fanua e tasi le maila le mamao ese.

Ae o tofotofoga i Misuri na aafia ai le soifua maloloina o le epikopo, ma na oo ai i se tulaga na le mafai ai ona galue. E lei umi ae maua foi o ia i se fiva, lea na ia togafitiina i vailaau seia oo ina lava lona malosi e fai ai se galuega i se vaiaso se tasi pe lua i le fale. Ina ua toe foi mai le mai, na ia toe inuina nisi vailaau ma toe foi e galue.

I lena taimi, o le potu pumoomoo, ma vevela i le fale-e-teu-ai-mea sa laiitiiti sona aoga e fesoasoani ia Emili, Harieta, po o nai o la tei, o e na mamai foi. Na tumau pea le fiva a Emili i le tautotogo atoa o le 1840, ae o le fiva o Harieta na faasolosolo ina tuga tele. Sa maliu o ia i le ogatotonu o Me i le sefuluvalu o ona tausaga.¹

Sa faanoanoa tele le Au Paterika i le maliu o Harieta. Ina ua uma le falelauasiga, sa taumafai Eteuati e sii atu lona aiga i se fale povi e lei uma i le latou fanua, ma le faamoemoe o le a maua ai se faamalumalu e sili atu. Ae o le mamafa o le galuega na faavaivaiina ai o ia ma sa ia matapogia. Ina ia fesoasoani i le aiga, o uso a Au Paia o Viliamu ma Jane Law sa aveina Emili ma nai ona tei i le latou fale ma tausia i latou ia toe malolosi.

Sa taoto Eteuati i le moega mo ni nai aso ao lei maliu, i le na o se vaiaso ma le afa talu le maliu o Harieta. O le toesea i le maliu na faavauvau tele ai Emili. Sa vavalalata lana mafutaga ia Harieta, ma sa ia iloa na ositaulaga e lona tama mea uma ina ia tausia ai lona aiga ma le ekalesia—e ui ina tiga lona agaga i Au Paia tomumumu, tagata e o ese i le le faatuatua, ma tuaoi saua.²

Ina ua mavae se taimi, na manuia Emili mai le pouliuli o le mai ma le faavauvau, ae ua ese nei lona olaga. Ina ia tausia lona aiga le tagolima, ua tatau ona sue ni a la galuega ma lona uso e sefuluiva-tausaga, o Ilaisa. Sa i ai le tomai ia Ilaisa e faafaigaluegaina ai o se suisui, ae o Emili sa leai sona tomai. Sa mafai ona ia fufuluina ipu, salu ma faamama fola o fale, ma faia isi galuega tau fale, ioe, ae faapena foi le tele o tagata uma i le pitonuu.³

O le mea e lelei ai, sa lei galo i le Au Paia le tele o osigataulaga a lona tama na fai mo le ekalesia. “E leai se isi tamaloa na sili atu lona talitonuina o le ekalesia nai lo o ia,” o le faitauina lea o le molimau mo Epikopo Paterika i le Times and Seasons, le nusipepa a le Au Paia. “O lana lotu o le mea lea sa sili ona taua i lona olaga; aua na ia faaaoga i ai lona ola, ma mo lena lotu na ia tuuina ai lona ola.”⁴

Ina ia faamamaluina o ia ma tausia lona aiga, na faauma e le Au Paia le fale na amata e le epikopo, ma tuuina atu ai i lona aiga se nofoaga e mafai ona latou taua o lo latou lava fale.⁵

---

E oo atu i le tautotogo o le 1840, ua amata ona faamanuiaina le aai fou i luga o le Misisipi. Sa eliina e le Au Paia autu ma alavai e faatafe atu i ai le vai mai faataufusi i autafa o le vaitafe ma faaleleia atili ai le fanua mo le nonofo ai. Na latou fuafuaina auala, faataoto faavae, fale faaiviivi, totoina togalaau, ma atinaeina faatoaga. E oo atu ia Iuni, ua lata i le lua selau ma le lima sefulu fale fou ua tutu o se faamaoniga o lo latou galulue malosi.⁶

I le le faamalieina i le igoa Komese, na toe faaigoaina e Iosefa le nofoaga o Navu i le taimi na ia taunuu ai. “O le igoa o lo tatou aai,” na ia faamatalaina atu i se folafolaga a le Au Peresitene Sili, “e maua mai i le faaEperu ma e faatatau i se tulaga po o se nofoaga matagofie, e tauaveina ai foi ma le agaga o le malolo.”⁷ Sa faamoemoe Iosefa o Navu o le a matagofie ma o se malologa e pei o lona igoa ma tuuina atu i le Au Paia sina malologa mai faafitauli o tausaga ua mavae.

Ae peitai na ia silafia o le filemu ma le malologa o le a le faigofie ona oo mai. Ina ia alo ese mai le feitagai ma sauaga na latou aafia ai i Ohaio ma Misuri, na manaomia e le Au Paia ona faia ni sootaga malolosi atu ma i latou lava ma faia ni faauoga tumau ma o latou tuaoi.⁸

I le vaitaimi lava lea, sa maua ai e Iosefa se tusi mai ia Viliamu Phelps, lea na siitia atu i Ohaio ina ua ia tuua le ekalesia ma molimau e faasagatau ia Iosefa i se fale faamasino i Misuri. “Ua ou iloa le tulaga ua ou i ai, ua e iloaina, ma ua silafia e le Atua,” na tusi atu ai Viliamu, “ma ou te manao ia laveaiina au pe afai e fesoasoani mai a’u uo ia te a’u.”⁹

I le iloa ai o Viliamu o se tagata lelei e ui lava i ona vaivaiga, sa toe tusi atu i ai Iosefa i se taimi puupuu mulimuli ane. “E moni ua matou mafatia tele ona o le taunuuga o au amioga,” na ia ta’u atu ai. “Ae ui i lea, ua uma ona inuina le ipu, ua faia le finagalo o lo tatou Tama Faalelagi, ma o loo matou ola pea.” I le fiafia e faagalo mea leaga na faia ia i latou i Misuri, sa faamagalo e Iosefa Viliamu ma toe tuu o ia e galue i le ekalesia.

“Sau ia, le uso pele, aua o lea ua uma le taua,” na tusi atu ai Iosefa, “aua o uo sa i ai muamua e toe uo foi i le faaiuga.”¹⁰

Sa lagonaina foi e Iosefa le tatau ai ona tuuina atu i le Au Paia ni isi taitaiga faaleagaga. I totonu o le falepuipui o Liperate, sa tauina atu e le Alii ia te ia ua iloa ona aso, ma sa tau atu e Iosefa i ana uo na te le manatu o le a ia ola e oo atu i le fasefulu. Ua tatau ia te ia ona aoao atili atu le Au Paia i mea na faaalia mai e le Atua ia te ia ae lei tuai.¹¹

E ui i lea, o le fausiaina o se aai ma le puleaina o manaoga faaletino o le ekalesia, na alu ai le tele o le taimi o Iosefa. Sa ia galue malosi i taimi uma i pisinisi faalelotu, ma ua leva ona ia faalagolago i alii e pei o Epikopo Paterika e fesoasoani e amo le avega. O lea la ua leai Eteuati, sa amata ona faalagolago atili atu Iosefa ia Epikopo Neueli Uitini ma isi epikopo na valaaulia i Navu. Ae peitai na ia iloa na ia manaomia lava le fesoasoani sili atu i le taitaia o le itu faaletino o le taitaiga o le ekalesia ina ia mafai ona ia taulai atu i lana galuega faaleagaga.¹²

E lei leva lava, ae maua e Iosefa se isi tusi, o le taimi la lea e mai se tagata e le masani ai e igoa ia Ioane Cook Bennett. Sa fai mai Ioane ua ia fuafua e siitia mai i Navu, auai i le ekalesia, ma ofo atu ana auaunaga i le Au Paia. O ia o se fomai ma o se ofisa maualuga i le militeri a le setete o Ilinoi sa avea foi o se faifeau ma se polofesa. “Ou te talitonu o le a sili atu lou fiafia faatasi ma oe,” na ia fai mai ai. “Tusi vave mai ia te au.”¹³

I ni aso mulimuli ane, na maua ai e Iosefa nisi tusi se lua mai ia Ioane. “E mafai ona e faalagolago mai ia te au,” na folafola mai ai Ioane. “Ou te faamoemoe o le a vave oo mai lena taimi e avea ai ou tagata ma o’u tagata, ma lou Atua ma o’u Atua.” Na ia ta’u atu ia Iosefa o lona tomai e tautala i le va ma tagata ma se malosi e le mavae o le a taua tele mo le Au Paia.¹⁴

“O lo’u naunau e faatasi ma oe ua faatupuina i lea aso ma lea aso,” na ia faapea mai ai, “ma o le a ou faamutaina nei lava lau pisinisi faapolofesa ma faaauau atu i lo outou aiga fiafia, pe afai e te manatu ua sili lena!”¹⁵

Sa toe vaavaai Iosefa i tusi, ua faamalosiauina o lo o i ai se isi e agavaa e pei o Ioane o fia manao e faatasi ma le Au Paia. O se tagata e i ai ona tomai o le a mafai ona fesoasoani moni lava i le ekalesia e faatuina o ia lava i Ilinoi.

“Afai e mafai ona e sau iinei i lenei tau e sauaina faatasi ma tagata o le Atua,” na tusi atu ai Iosefa ia Ioane, “e leai se isi e sili atu sona fiafia pe faafeiloaiina lelei oe nai lo o a’u.”¹⁶

---

Ao amata ona tino mai Navu, na toe mafaufau Iosefa i le faapotopotoina. I Egelani, na auina mai ai talu ai nei e aposetolo se vaega e toa fasefulu-tasi o le Au Paia e kolosi le vasa, mo Navu. Sa fuafua Iosefa e faafeiloai atu nisi foi vaega e sili atu i isi masina ma tausaga a sau.

“O le nofoaga autu lenei o le faapotopotoina,” na ia faasilasilaina i se lauga i lena Iulai. “Po o ai lava o le a faia, faataga o ia e sau ma tofo fua i le mativa o Navu!”

Na ia iloa o le tutulieseina mai Misuri ma le tusi talosaga le manuia i le malo ua tuua ai le tele o tagata i le le mautonu e uiga i le lumanai o Siona ma le faapotopotoina. Sa manao Iosefa ia i latou ia malamalama o Siona e sili atu nai lo o se vaega o fanua i le Itumalo o Siakisone. “O le mea e faapotopoto ai le Au Paia o Siona lea,” na ia faapea atu ai.

Ua poloaiina nei i latou e le Alii ia faatuina ni siteki i Navu ma eria lata ane. Pe a oo i le taimi, ao faapotopoto mai isi Au Paia i Siona, o le a faatuina e le ekalesia ni siteki faaopoopo ma o le a faamanuia e le Alii le laueleele.

Ao lei faaiuina lana lauga, na faasilasila atu e Iosefa, “Ou te tuuina atu au lava e fausia se malumalu sili e pei ona faia e Solomona, pe afai e lagolagoina au e le ekalesia.” Na ia faaloaloa atu lona lima ma faasino atu i se nofoaga maualuga i luga o le matie i le mea o le a fausiaina ai e le Au Paia le maota paia. “Afai o le finagalo o le Atua ia ou ola ina ia ou vaai ua maea le malumalu,” na ia fai atu ai ma le naunautai, “O le a ou fai atu, ‘Oi, le Alii e, ua lava lea. Le Alii e, tuu mai i lau auauna ia alu ma le filemu.’”¹⁷

I ni nai vaiaso mulimuli ane, ao faaauau ai pea ona maualuga le vevela i Navu ma na maumau ai pea nisi ola ona o mai, sa maliu ai le uo a Iosefa o Seymore Brunson.¹⁸ I le falelauasiga, na tuuina atu ai e Iosefa upu faamafanafana i le faletua o Seymore, o Harieta, ma le afe o Au Paia i le faapotopotoga. Ao ia saunoa, na ia tilotilo atu ia Jane Neyman, o le na maliu lana tama tama talavou o Sirusi ae lei papatisoina.

I le iloaina o lo o popole Jane e uiga i le tulaga manuia o le agaga o lana tama, sa filifili loa Iosefa e faasoa atu le mea na aoao atu e le Alii ia te ia e uiga i le faaolataga o e, e pei o lona ia lava uso o Alavini, lea na oti e lei papatisoina.¹⁹

Na tatalaina le Tusi Paia, ma faitau atu e Iosefa upu a le aposetolo o Paulo ia Korinito: “A faapea, pe faapefea e ua papatisoina ma sui o e ua oti, afai e moni e le toetutu e ua oti? Ona o le a ea ua papatisoina ai i latou ma sui o e ua oti?”²⁰ Na ia matauina o upu a Paulo o ni faamaoniga e mafai ona papatisoina se tagata ola e sui mo se tagata ua maliu, ma faalautele atu ai le aoga o le papatisoga ia i latou o e ua oti i le tino ae ola pea o latou agaga.

Sa fai atu Iosefa o le fuafuaga o le faaolataga a le Atua na fuafuaina e faaolaina ai i latou uma o e ua naunau e usitai i le tulafono a le Atua, e aofia ai ma le anoanoai o tagata na maliliu e aunoa ma se iloa e uiga ia Iesu Keriso po o Ana aoaoga.²¹

E lei leva ona uma le lauga, ae alu ane Jane i le vaitafe ma se toeaina o le ekalesia ma papatisoina mo Sirusi. Ina ua faalogo Iosefa e uiga i le papatisoga mulimuli ane i lena afiafi, na ia fesili po o a upu a le toeaina na faaaoga i le sauniga. Ina ua toe laulauina atu ia te ia, na faamautu atu e Iosefa na sao le faatinoga o le papatisoga e le toeaina.²²

---

Na taunuu Ioane Bennett i Navu ia Setema 1840, ma sa naunau Iosefa e saili lana fautuaga i le puleaina o mataupu faaletulafono ma faalemalo a Navu ma le ekalesia. O Ioane sa tupulaga ma le perofeta ae sa sili atu lona aoaoina. O ia o se tamaloa puupuu ma le lauulu uliuli ua amata ona sina, mata paauli, ma ni foliga paee, aulelei. Na ia taliaina fiafia le papatisoga.²³

Sa ova le popole o Lusi Samita e uiga i lona toalua mai ua le ano tele i le tagata fou tautaua. E pei o Epikopo Paterika, o Iosefa le Matua sa tuua Misuri ma le ma’i, ma o le taumafanafana faamai tagata a Navu na atili ai ona vaivai o ia. Sa faamoemoe Lusi o le a i’u ina manuia o ia, ae ina ua uma ona ia faasuati mai le toto i se tasi aso, sa fefe o ia ua lata mai lona oti.

Ina ua faalogo Iosefa ma Ailama e uiga i le faasolo leaga o le tulaga o le la tama, na la vave atu loa i autafa o lona moega.²⁴

Na auina atu le feau e Lusi i isi tagata o le aiga ao nofo Iosefa e toalua ma lona tama. Na ia tau atu i lona tama e uiga i le papatisoga mo e ua maliliu ma faamanuiaga e maua mai ai mo fanau uma a le Atua. Na ova le olioli,ma sa augani atu Iosefa le Matua ia te ia ia faia le sauniga mo Alavini.

E lei umi ae nonofo Lusi faatasi ma le toatele o lana fanau e faataamilo i le moega o lo latou tama. Sa manao Iosefa le Matua e avatu ia te i latou taitoatasi se faamanuiaga faamavae ao i ai pea lona malosi e tautala ai. Ina ua oo i le taimi o Iosefa, sa tuu atu lima o Iosefa le Matua i luga o le ulu o lona atalii.

“Ia tumau i le faatuatua ma o le a faamanuiaina oe, ma o le a faamanuiaina lou aiga, ma au fanau pe a mavae atu oe,” na ia fai atu ai. “O le a e ola e faauma lau galuega.”

“Oi, Tama,” na tagi atu ai Iosefa, “o le a ou ola ea?”

“Ioe, o le a e ola,” na fai mai ai le peteriaka, “ma o le a e faataatia le fuafuaga o galuega uma e finagalo ai le Atua i ou lima.”

Ina ua uma ona faamanuia e Iosefa le Matua lana fanau, na ia liliu atu ia Lusi. “Tina,” na ia fai atu ai, “o oe ose tasi o fafine tulaga ese i le lalolagi.”

Na faafiti Lusi, ae na faaauau pea lona toalua. “Na masani ona ta moomoo ia ta feoti i le taimi e tasi,” na ia fai atu ai, “ae e le tatau ona e manao e te oti pe a ou oti, ona e tatau ona e nofo e faamafanafana tamaiti pe a ou alu.”

Ina ua uma sana toma, sa alaga atu Iosefa le Matua, “Ua ou vaai atu ia Alavini.” Ona ia tuufaatasi lea o ona lima ma amata ona manava lemu, seia oo ina amata ona pupuu ana manava, ma ia maliu filemu atu ai.²⁵

---

I ni nai vaiaso talu le maliu o Iosefa le Matua, na faapotopoto ai le Au Paia i Navu mo le konafesi aoao ia Oketopa 1840. Na aoao atili atu i latou e Iosefa e uiga i le papatisoga mo e ua maliliu, ma faamalamalama atu o agaga o e ua maliliu o loo faatali i o latou aiga o loo feola ina ia mauaina le sauniga faaola mo i latou.²⁶

I le va o sauniga o le konafesi, na faavavevave atu ai le Au Paia i le Vaitafe o Misisipi, i le mea o loo tutu ai ni nai toeaina i le vai e oo atu i o latou puimanava, ma valaau mai ia i latou ia papatisoina mo matua o o latou matua, tama, tina, uso ma tuafafine, ma fanau ua maliliu. Na vave lava mulimuli ane, ona papatisoina Ailama mo lona uso o Alavini.²⁷

Ao matamata atu Vilate Kimball i toeaina i le vaitafe, na ia manao ia papatisoina mo lona tina, lea na maliu i le silia ma le sefulu tausaga talu ai. Sa ia moomoo maimau pe ana ua toe foi mai Heber mai Egelani e faatinoina le sauniga, ae talu ai na uunaia e Iosefa le Au Paia ia faaolaina e ua maliliu i le vave e mafai ai, sa ia filifili ai e papatisoina mo lona tina i le taimi lava lena.²⁸

O mafaufauga foi o Ema Samita sa i ai i le aiga. O lona tama, o Isaako Hale, na maliu ia Ianuari 1839. Na te lei faamagaloina lava o ia ma Iosefa. I ni tausaga ae lei maliu o ia, na oo lava ina ia faatagaina tagata e faifai i le ekalesia e lolomiina se tusi na ia tusia e faaluma ai Iosefa ma taua le Tusi a Mamona “o se pepelo faavasivasi o mea sese ma amiogaleaga.”²⁹

E ui i lea, na alofa Ema i lona tama ma sa papatisoina mo ia i le vaitafe.³⁰ Na ia le taliaina le talalelei toefuataiina i lenei olaga, ae sa ia faamoemoe o le a le tumau ai faapena e faavavau.

---

I lena tautoulu, sa tusia ai e Iosefa ma Ioane Bennett se pepa o tulafono mo Navu. O le tusi na faia ia tuuina atu ai i le Au Paia le saolotoga e mafai ai ona latou pulea i latou lava ma puipui mai ituaiga amioletonu na latou puapuagatia ai i Misuri. Afai e pasia e le palemene a le setete le pepa tulafono, o le a mafai e tagatanuu o Navu ona pasia a latou lava tulafono mo le aai, faagaoioi fale faamasino i le lotoifale, faatu se iunivesite, ma faatulaga se militeri.³¹

Na faaauau pea ona tuputupu ae fuafuaga a Iosefa mo le ekalesia. I le faasauni ai mo le faapotopoto mai o le tele ma le tele o le Au Paia, na faavaeina e le perofeta ni nai siteki i nuu fou e lata ane i Navu. Na ia valaauina foi Osone Hyde ma Ioane Page e malaga atu i se misiona i Palesitina, lea o le a la faapaiaina ai Ierusalema mo le faapotopotoina o le fanau a Aperaamo. Ina ia taunuu iina, e tatau i aposetolo ona sopoia Europa, ma maua ai e i laua avanoa e talai ai le talalelei i le tele o ona aai.³²

“E ono vave ona tatou faamoemoe e vaai i le lolofi mai i lenei nofoaga, o tagata mai laueleele uma ma nuu uma,” na folafola atu ai e Iosefa ma le Au Peresitene Sili, “tagata o gagana uma, ma o gagana uma ma lanu uma, o le a faatasi mai ma i tatou ona tapuai i le Alii o Au i Lona malumalu paia.”³³

I le amataga o Tesema, na faamanuiaina ai Ioane Bennett i le uunaiga o le palemene a le setete o Ilinoi e talia le pepa tulafono a Navu, e tuuina atu ai i le Au Paia le pule e faatino ai a latou fuafuaga mo le aai. Ina ua toe foi atu Ioane i Navu ma le manumalo, sa viia o ia e Iosefa i taimi uma e mafai ai.³⁴

Mulimuli ane ina ua silia ma se tasi le masina, ia Ianuari 19, 1841, na faamanuiaina ai e le Alii le Au Paia i se faaaliga fou. Na ia faamautinoa atu ia te i latou ua ia faafeiloaia Eteuati Paterika ma Iosefa le Matua i Ona aao, faatasi ma Tavita Patten, lea na fasiotia i le vevesi i le Vaitafe Piopio. Na valaauina Ailama Samita e sui tulaga i lona tama o se peteriaka o le ekalesia ma sa tofia foi e galue o se perofeta, tagata vaai, ma le tali faaaliga faatasi ma Iosefa, ma faataunuuina le matafaioi a Oliva Kaotui na umia muamua i le ekalesia.³⁵

E faaopoopo i lena, na faatonuina e le Alii Ioane Bennett e tu i tafatafa o Iosefa ma faaauau pea ona talanoa ia i latou o i fafo o le ekalesia mo le Au Paia, ma folafola atu ia te ia faamanuiaga i le tulaga o ana galuega amiotonu. “O le a lē iʼuvale lona taui pe afai e talia e ia fautuaga,” na fetalai mai ai le Alii. “Ua ou vaai i le galuega na ia faia, o lea o le a ou taliaina pe afai e faaauau pea o ia.”³⁶

Na taliaina foi e le Alii taumafaiga ua tuanai a le Au Paia e fausiaina Siona i le Itumalo o Siakisone, ae ua Ia poloaiina nei i latou e fausia Navu, faatuina nisi siteki, ma fausia se fale talimalo e taua o le Maota i Navu, lea o le a maua ai se nofoaga e malolo ma mafaufau ai tagata asiasi i le upu a le Atua ma le mamalu o Siona.³⁷

Ae sili ona taua, na poloaiina e le Alii le Au Paia e fausia se malumalu fou. “Ia tuu atu ia fausia lenei fale mo lo’u igoa,” na Ia fetalai mai ai, “ina ia mafai ona Ou faaali atu ai i totonu a’u sauniga i lo’u nuu.”³⁸

O le papatisoga mo e ua maliliu o se tasi o nei sauniga. Talu mai lena taimi na faatagaina ai e le Alii le Au Paia e faatinoina papatisoga i le Vaitafe o Misisipi, ae o lea ua Ia poloaiina i latou e taofi le sauniga seia latou faapaiaina se faatanoa papatisoga faapitoa i totonu o le malumalu. “Aua o lenei sauniga,” na Ia fetalai mai ai, “e a lo’u fale.”³⁹

O isi sauniga o le malumalu ma upu moni musuia fou o le a oo atu mulimuli. “Ua ʼOu manatu ua tatau ona faaali atu i laʼu ekalesia mea sa taofi natia mai luma atu o le faavaega o le lalolagi, o mea e faatatau i le tisipenisione o le ʼatoaga o taimi,” na folafola mai ai le Alii. “Ma o le a ʼOu faaali atu i laʼu auauna o Iosefa mea uma e faatatau i lenei fale, ma lona perisitua.”⁴⁰

I le folafolaina e tauia lo latou filiga ma le usiusitai, na uunaia e le Alii le Au Paia e galulue i lo latou malosi atoa i le malumalu. “Ia fausia se fale i loʼu igoa, i le nofoaga lava lenei, ina ia outou faamaonia mai outou lava ia te aʼu tou te faamaoni i mea uma Ou te poloaiina ai outou,” na Ia poloai mai ai, “ina ia Ou faamanuiaina outou, ma faapaleina outou i le mamalu, ola pea, ma le ola e faavavau.”⁴¹

Ao amata le tausaga fou, sa foliga lelei le lumanai mo le Au Paia. Ia Fepuari 1, 1841, na latou filifilia ai Ioane Bennett e faipule i Navu, lea sa avea ai foi o ia ma faamasino sili o le fale faamasino o le aai. Na avea foi o ia ma faauluulu o le iunivesite fou, taitai sili o le militeri, ma o se fesoasoani i le Au Peresitene Sili.⁴² Sa faatuatuaina e Iosefa ma isi taitai o le ekalesia lona tomai e taitaia le aai ma faaleleia.

Ao faalautele ai le pule ma matafaioi a Ioane, sa le mafai ona teena e Ema na ia fesoasoani tele i le Au Paia. Ae sa ia le fiafia e pei ona fiafia ai le Au Paia ia te ia. Na ia manatu o Ioane sa savali faaalialia solo i le taulaga e pei o se taitai mimita, ma a le taumafai o ia e faafiafia Iosefa, na ia foliga e manatu nao ia lava ma le amanaia ai isi.

Mo ana taleni ma mea uma na aoga ai, sa i ai se mea e uiga ia Ioane Bennett na faapopoleina ai o ia.⁴³

Faamatalaga

1. “Autobiography of Emily D. P. Young,” Woman’s Exponent, July 15, 1885, 14:26; Lyman, Journal, 12; Obituary for Harriet Partridge, Times and Seasons, June 1, 1840, 1:128.

2. Obituary for Edward Partridge, Times and Seasons, June 1, 1840, 1:127–28; Lyman, Journal, 12.

3. “Autobiography of Emily D. P. Young,” Woman’s Exponent, Aug. 1, 1885, 14:37.

4. Obituary for Edward Partridge, Times and Seasons, June 1, 1840, 1:127–28. Autu: Church Periodicals[Puletini o le Ekalesia]

5. “Autobiography of Emily D. P. Young,” Woman’s Exponent, July 15, 1885, 14:26; Lyman, Journal, 13.

6. “Nauvoo” ma “Immigration,” Times and Seasons, June 1840, 1:122–24; Joseph Smith History, 1838–56, volume C-1, 1060; Bushman, Rough Stone Rolling, 405; Leonard, Nauvoo, 60–61.

7. “Proclamation, to the Saints Scattered Abroad,” Times and Seasons, Jan. 15, 1841, 2:273–74; tagai foi Leonard, Nauvoo, 59. Autu: Nauvoo (Commerce), Illinois (Navu (Komese), Ilinoi)

8. Tagai Leonard, Nauvoo, 91.

9. William W. Phelps to Joseph Smith, June 29, 1840, i le JSP, D7:303–5.

10. Joseph Smith to William W. Phelps, July 22, 1840, i le JSP, D7:345–48.

11. Woodruff, Journal, July 28, 1844; tagai foi Joseph Smith to Presendia Huntington Buell, Mar. 15, 1839, i le JSP, D6:354–56; and Esplin, “Joseph Smith’s Mission and Timetable,” 280–319.

12. Autu: Bishop (Epikopo)

13. John C. Bennett to Joseph Smith, July 25, 1840, i le JSP, D7:348–50; Bushman, Rough Stone Rolling, 411; “Bennett, John Cook,” Biographical Entry, Joseph Smith Papers website, josephsmithpapers.org.

14. John C. Bennett to Joseph Smith and Sidney Rigdon, July 27, 1840, i le JSP, D7:350–53; tagai foi John C. Bennett to Joseph Smith, July 30, 1840, i le JSP, D7:368–70.

15. John C. Bennett to Joseph Smith, July 30, 1840, i le JSP, D7:370. O le uluai kopi o lea tusi na i ai le “My anxiety to be with is daily increasing.”

16. Joseph Smith to John C. Bennett, Aug. 8, 1840, i le JSP, D7:370–74.

17. Joseph Smith, Discourse, circa July 19, 1840, i le JSP, D7:340–45. Topics: Gathering of Israel[Faapotopotoina o Isaraelu]; Zion/New Jerusalem[Siona/Ierusalema Fou]; Nauvoo Temple[Malumalu o Navu]

18. Lucy Mack Smith, History, 1844–45, book 17, [7]; book 18, [1]–[10]; Funeral Address, Times and Seasons, Sept. 1840, 1:170–73; Vilate Murray Kimball to Heber C. Kimball, Sept. 6, 1840, Heber C. Kimball, Letters, Church History Library; Obituary for Seymour Brunson, Times and Seasons, Sept. 1840, 1:176.

19. Jane Neyman, Statement, Nov. 29, 1854, Historian’s Office, Joseph Smith History Documents, Church History Library; Historical Department, Journal History of the Church, Aug. 15, 1840; Brunson, “Short Sketch of Seymour Brunson, Sr.,” 3–4; Doctrine and Covenants 137 (Visions, Jan. 21, 1836, at josephsmithpapers.org); tagai foi Tobler, “Saviors on Mount Zion,” 186, note 12.

20. 1 Korinito 15:29

21. Simon Baker, “15 Aug. 1840 Minutes of Recollection of Joseph Smith’s Sermon,” Joseph Smith Collection, Church History Library.

22. Jane Neyman, Statement, Nov. 29, 1854, Historian’s Office, Joseph Smith History Documents, Church History Library. Autu: Baptism for the Dead (Papatisoga mo E Ua Maliliu)

23. Joseph Smith to John C. Bennett, Aug. 8, 1840, i le JSP, D7:372–73; “Mormonism—Gen. Bennett, &c.,” Times and Seasons, Oct. 15, 1842, 3:955; “Bennett, John Cook,” Biographical Entry, Joseph Smith Papers website, josephsmithpapers.org; News Item, Times and Seasons, Dec. 1, 1840, 2:234.

24. Lucy Mack Smith, History, 1844–45, book 17, [7]; book 18, [3]–[4].

25. Lucy Mack Smith, History, 1844–45, book 18, [3]–[9]; Lucy Mack Smith, History, 1845, 296, 301; Smith, Biographical Sketches, 267. Autu: Joseph Smith Sr. (Iosefa Samita le Matua)

26. Vilate Kimball to Heber C. Kimball, Oct. 11, 1840, Vilate M. Kimball, Letters, Church History Library.

27. Conference Minutes, Times and Seasons, Oct. 1840, 1:185–87; Vilate Kimball to Heber C. Kimball, Oct. 11, 1840, Vilate M. Kimball, Letters, Church History Library; Nauvoo Temple, Baptisms for the Dead, book A, 149, microfilm 183,376, U.S. and Canada Record Collection, Family History Library; Black and Black, Annotated Record of Baptisms for the Dead, 6:3361; tagai foi Nauvoo Temple, Baptisms for the Dead, 1840–45, Church History Library.

28. Vilate Kimball to Heber C. Kimball, Oct. 11, 1840, Vilate M. Kimball, Letters, Church History Library.

29. Isaac Hale, Affidavit, Mar. 20, 1834, i le “Mormonism,” Susquehanna Register and Northern Pennsylvanian, May 1, 1834, [1].

30. Nauvoo Temple, Baptisms for the Dead, book A, 45.

31. Act to Incorporate the City of Nauvoo, Dec. 16, 1840, i le JSP, D7:472–88; Conference Minutes, Times and Seasons, Oct. 1840, 1:186.

32. News Item, Times and Seasons, Jan. 15, 1841, 2:287. Autu: Early Missionaries(Uluai Faifeautalai)

33. “Report from the Presidency,” Times and Seasons, Oct. 1840, 1:188.

34. Act to Incorporate the City of Nauvoo, Dec. 16, 1840, i le JSP, D7:472–88; Joseph Smith and others, Proclamation, Jan. 15, 1841, i le JSP, D7:503–4; tagai foi Bushman, Rough Stone Rolling, 410–12.

35. Mataupu Faavae ma Feagaiga 124:19, 91–96, 127 (Revelation, Jan. 19, 1841, i le josephsmithpapers.org). Autu: Hyrum Smith (Ailama Samita)

36. Mataupu Faavae ma Feagaiga 124:16-17 (Revelation, Jan. 19, 1841, i le josephsmithpapers.org).

37. Mataupu Faavae ma Feagaiga 124:22–24, 49–54, 60–61 (Revelation, Jan. 19, 1841, i le josephsmithpapers.org).

38. Mataupu Faavae ma Feagaiga 124:40 (Revelation, Jan. 19, 1841, i le josephsmithpapers.org); tagai foi Smith, “Organizing the Church in Nauvoo,” 264–71. Autu: Nauvoo Temple (Malumalu o Navu)

39. Mataupu Faavae ma Feagaiga 124:29-38 (Revelation, Jan. 19, 1841, i le josephsmithpapers.org). Autu: Baptism for the Dead (Papatisoga mo E Ua Maliliu)

40. Mataupu Faavae ma Feagaiga 124:41–42 (Revelation, Jan. 19, 1841, i le josephsmithpapers.org); tagai foi Smith, “Organizing the Church in Nauvoo,” 264–71.

41. Mataupu Faavae ma Feagaiga 124:55 (Revelation, Feb. 9, 1831, i le josephsmithpapers.org).

42. “Municipal Election,” Times and Seasons, Feb. 1, 1841, 2:309; “Inaugural Address,” Times and Seasons, Feb. 15, 1841, 2:316–18; “Trial of Elder Rigdon,” Times and Seasons, Sept. 15, 1844, 5:655; An Act to Incorporate the City of Nauvoo [Dec. 16, 1840], Laws of the State of Illinois, p. 55, section 16; “Bennett, John Cook,” Biographical Entry, Joseph Smith Papers website, josephsmithpapers.org.

43. “Memoirs of President Joseph Smith,” Saints’ Herald, Jan. 8, 1935, 49.