Talafaasolopito o le Ekalesia
Mataupu 3: O Se Taua Lelei

Mataupu 3

O Se Taua Lelei

alii fusu o Chuck Woodworth e fusu ma le Torpedo a Toga

I le ta o le fitu i taeao uma, Aso Gafua e oo i le Aso Toonai, na feiloai ai Mosese Muti ma ona uso a faifeautalai i le nofoaga e fausia ai le falesa i Niue. Na sau Elder Archie Cottle, o se supavaisa o le fauga o fale mai Ogden, Iuta, i le motu ia Mati 1957 ma lona aiga ma isi faifeautalai Toga e toalua e amata ona fausia le falelotu fou ma le fale o le misiona. O lea Ia, o le falesa tumau muamua lava a Niue o le Au Paia o Aso e Gata Ai lea ua amata ona iloa lona ata ata mai i lalo o ni niu e taape solo.

Sa fiafia Mosese i lana galuega i le motu. O ia ma se isi faifeautalai Toga sa la galueaiina maa i luga o puipui pito i fafo o le falesa. Na iloa e faifeautali o le mauaina o alii i le lotoifale e fesoasoani i le galuega faatino e ono luitauina, aemaise lava ona sa i ai isi galuega faigata a alii e fai i le motu. Ae o se vaega tuuto o tamaitai matutua e masani ona ofofua atu e fesoasoani e ala i le tosoina mai o oneone po o le fesoasoani i isi galuega i le nofoaga e fau ai le fale.

Sa faitio faalilolilo le peresitene o le itu o Chuck Woodworth e uiga i le le vave ona alualu i luma le galuega o le falesa. Ma sa le mafai e Mosese ona tuuaia o ia. E lei valaauina Chuck o se faifeautalai galue, ae o le leai o ni tagata faigaluega volenitia i Niue o lona uiga sa tatau ona ia tuuto atu le tele o le taimi e fau ai le fale ae faaitiitia ai le taimi i le soifua manuia faaleagaga o le Au Paia i le itu.

Sa uunaia pea e Mosese ia Chuck ina ia onosai. “O tagata lelei nei,” sa ia faamanatu atu ai i le alii talavou i se tasi taimi. “O i latou o fanau o le Alii. Ou te le iloa se mea e leaga ai i latou. Sei o tatou vaavaai mo o latou malosiaga ma taulai atu i o latou malosiaga.”

Ma le isi, o le fauina o se falesa e le o se mea faigofie mo tagata faigaluega e lei i ai ni tomai. E tatau i alii ona talepe amu, eli faavae, sasaa sima, ma saunia le palu—e faia uma i lima. O lenei mea e masani ona mafua ai ni papā o lima, lavelavea, ma isi manuaga. Ma o nisi taimi e manaomia ai e tagata se taimi e pue ai le agaga o le auauna atu.

Ina ia faapupula lenei manatu, sa faamatala atu e Mosese ia Chuck e uiga i lona aafiaga i le fausiaina o le Kolisi o Liahona o se faifeautalai galue. “E toalima i matou na amataina le Liahona ma galulue mo le silia ma le tausaga ona faatoa ”fesoasoani mai lea o se tasi, o lana tala lea. “A o matou fauina, sa matou faia ma le vaai atu o o matou mata i tupulaga i le lumanai.”

Sa onosai foi Mosese ia Chuck. Sa la faaaluina ma Salavia le tele o po e talanoa ma fefautuaai ai ma le faifeautalai, ma sa avea o ia e pei o se atalii ia i laua. Na amata foi ona valaauina i la’ua e Chuck o “papa” ma “mama.” O lona lava tamā na tuua lona aiga, ma tuua ai le tina o Chuck e tausi na o ia le fanau e toaono. Sa tauaveina e le alii talavou le tele o le ita ma le tiga, ma sa ia faafetai i le i ai o Mosese i lona olaga i le taimi nei.

“Na te silafia moni lava le uiga o le faatuatua ma le auauna atu,” na tusia ai e Chuck. “Sa ia aoaoina au i mea semanu e tele ni tausaga ou te aoao ai e aunoa ma lana fesoasoani.”

Ae, mai lea taimi i lea taimi, sa moomoo lava Chuck e auauna atu i se isi nofoaga. I se tasi aso, sa ia iloa ai sa amataina e le Kolisi o Liahona se au fusu, ma sa ia vaaia se avanoa mo se suiga. Sa avea o ia ma se tagata tomai faapitoa i le fusu a o lei alu i lana misiona. Ae a pe a ia talosaga atu i le peresitene o le misiona e siitia atu o ia i Toga e faauma ai lana misiona o se faiaoga ma se faiaoga fusu i le aoga? O le kolisi, i lona aotelega, sa i ai taimi sa faigaluega ai faifeautalai.

Sa tetee Mosese i le manatu. O le faaaluina o le silia ma le tausaga e galue ai ma aoao atu i autafa o Chuck, sa ia talitonu ai na auina mai e le Atua le alii talavou i Niue mo se mafuaaga. Soo se taimi lava e faapitoa ai le faigata o se galuega, e faaluaina e Chuck ana taumafaiga ma tauaveina le sili atu nai lo lana vaega o le galuega. Ma ina ua iloa e Chuck ua anapopogi Mosese ma Salavia ina ia mafai ona la fafagaina faifeautalai ma isi tagata faigaluega, sa ia faaitiitia lana ’ai i le mea e gata ai ina ia lava meaai totoe mo le ulugalii.

Ia Iuni 1957, i le taimi o se tasi o a latou talanoaga ma Chuck, sa ta’ua ai e Mosese ma Salavia le tele o lo la naunau e o i le malumalu. Sa la iloa ua lata ina mae’a le malumalu i Niu Sila, ae o le malaga atu iina sa le mafai lava ona latou oo atu i ai i tulaga tautupe.

O a la upu na uunaia ai Chuck, ma o lona manao e faauma lana misiona i le Kolisi o le Liahona ua foliga mai ua le o toe taua tele. Ae faapefea pe afai, i le maea ai o lana misiona, ona alu lea i Niu Sila ma luiina se tagata fusu siamupini i se fusuaga togitupe—o se gaoioiga e lava lona tele ia maua ai le ituaiga seleni e manaomia e le Au Muti e o ai i le malumalu fou? O se mea sili ona itiiti e mafai ona ia faia aemaise lava i le uma ai o le tele o mea sa la faia mo ia.

O le fa o aso mulimuli ane, sa ia tusi atu ai ia Johnny Peterson, o lona pule i le Iunaite Setete, ma fai atu ia te ia e lafo mai ni meafaipele i Niue.

Pe tusa o le taimi lea, sa matuai manaomia ai lava e le Misiona a Saute Sasae Mamao se faifeautalai fou. O se tasi o tamaitai e toafa sa auauna atu i Hong Kong faatoa toe foi atu i le Iunaite Setete mo mafuaaga o le soifua maloloina, ma tuua ai se avanoa e lei faamoemoeina i le misiona. Sa silafia e Peresitene Grant Heaton o tuafafine o loo totoe sa vave manaomiaina le fesoasoani, o lea na ia valaauina ai Nora Koot o se faifeautalai faamisiona i le lotoifale.

I le lua tausaga ua mavae, na avea ai Nora ma se tagata taua tele i le misiona. Ina ua faatoa taunuu le au Heaton i Hong Kong, sa la faatagaina o ia e faafesootai le Au Paia uma i le eria, ma ua avea le laumua o le misiona e pei o lona fale lona lua. O nisi taimi e na te vaaia ai le fanau laiti a le au Heaton. O isi taimi sa ia aoaoina ai faifeautalai i gagana Cantonese ma le Meniterini. Faatasi ai ma Luana Heaton, sa ia aoao atu tala o le Tusi Paia i se vasega o le aoga Sa mo tamaiti i le aai.

Sa vave ona talia e Nora le valaauga o le misiona. O se tasi o le Au Paia i le lotoifale, o se faifeautalai e igoa ia Lee Nai Ken, sa auauna atu i se misiona mo se taimi puupuu i Hong Kong, ma sa naunau lava Peresitene Heaton e valaau nisi Au Paia i le lotoifale o ni faifeautalai. Sa masani ona tauivi faifeautalai Amerika i Matu e aoao le gagana Saina ma le aganuu i le lotoifale. E toatele tagata i le aai sa masalosalo i tagata ese ma o nisi taimi sa fenumiai ai faifeautalai ma sui o le malo o le Iunaite Setete.

Peitai, o Nora ma isi Au Paia Saina, ua malamalama i le aganuu i le lotoifale ma e lei popole i le papupuni o le gagana. Ma le isi, e masani ona sili atu ona lelei lo latou fesootai ma tagata sa latou aoaoina. I le avea ai ma se tagata sulufai mai Saina tutotonu, sa iloa e Nora le tulaga sa i ai le amataina o le olaga i se aai tumutumu, lea sa itiiti ai le sapalai o fale ma galuega.

O le toatele o tagata o le Ekalesia ma le Au Paia faaolioli i Hong Kong o ni tagata sulufai, ma sa sailia e Peresitene Heaton ni auala e tausia ai lo latou soifua manuia faaleagaga. I le 1952, sa folasia mai ai e le Ekalesia ni lesona se fitu, po o ni talanoaga, e fesoasoani ai i tagata faamoemoe e liliu mai e saunia mo le avea ai ma tagata o le Ekalesia. I le fetuunai ai i manaoga faalelotoifale, sa atiina ae ai e Peresitene Heaton ma ana faifeautalai ni lesona se sefulufitu o le talalelei e ono faananau i ai le toatele o tagata i Hong Kong o e sa le o ni Kerisiano pe sa na o se malamalamaaga faavae i talitonuga faaKerisiano. O nei lesona na talanoaina ai autu e pei o le aigaAtua, o le Togiola a Iesu Keriso, o uluai mataupu faavae ma sauniga o le talalelei, ma le Toefuataiga. O le taimi lava na papatiso ai, na maua ai e tagata liliu mai ni lesona faaopoopo e luasefulu mo tagata fou.

I le po a o lumanai ai le vaetofiaina o ia o se faifeautalai, sa fai ai se miti manino a Nora. Sa tu o ia i luga o se auala pisi, na siomia e le gaogaosa ma le vāvāō, ae ona vaaia ai se fale matagofie. Sa savali atu o ia i totonu ma vave ona lagonaina le filemu ma le toafimalie. O tagata i totonu o le fale sa laei papae, ma sa iloa e Nora nisi o i latou o ni faifeautalai o loo auauna atu i le taimi nei i Hong Kong.

Ina ua lipoti atu Nora i le ofisa o le misiona i le aso na sosoo ai, sa ia tau atu i faifeautalai e uiga i lana miti. Sa maofa i latou. Na faapefea ona ia iloa foliga o se malumalu? Na te lei asiasi muamua lava i sea fale.

Na taunuu mai mea faipelē a Chuck Woodworth i Niue ia Oketopa 1957, ma sa lagolago e le aiga atoa o Muti ana toleniga. Sa faia e Salavia mo ia se polotu’i mai taga pateta, ma sa fesoasoani Mosese e lipea faalelei pe a manaomia ai. Peitai, faatasi ai ma le tele naua o tiutetauave o le misiona i le motu, e lei tele se taimi o Chuck po o le aiga e faaalu i toleniga. O nisi taeao e ala vave ae ai Chuck i le ta o le lima e tamo’e. Talu ai ona sa pogisa fafo, e tietie atu ai le atalii sefuluono tausaga o Muti, o Paula, i se uila afi i ona tua, ma faamalamalama ai le auala i le moli o luma.

O le mea e lelei ai, ua foliga tino lelei mai Chuck mo se fusuaga. O le nutililiiina o amu mo le tausaga ua tuanai na faatumauina ai lona malosi faaletino. Sa ia faia foi ni nai faaaliga faafaipele i le motu e suetupe ai mo le falesa. Ae mata o le a lava na o ni nai toleniga?

A o lei alu lana misiona, sa faaaluina e Chuck le tele o itula i le fale toleni, e toleni faamasani mo faipelega tauitupe i sisifo o le Iunaite Setete ma Kanata. O le tele o paga na fusu ai, o isi alii fusu faapolofesa e lē lauiloa, a e sa ia fusu foi ma isi alii fusu lauiloa i le lalolagi e pei o Ezzard Charles ma Rex Layne.

O le fusuaga ma Rex, o se alii lauiloa o le Au Paia o Aso e Gata Ai e fusu i paga mamafa, sa sili ona faigata o paga a Chuck. Ua te’a Rex ma lona tulaga malosi faaletagata faipele, ae pe tusa ma le luasefulu-lima pauna e sili atu ai lona mamafa nai lo Chuck, ma o ana osofaiga faigata faifaipea na taofia ma mau ai Chuck i le maea mo taamilosaga saua e sefulu. Sa tumau pea Chuck i luga i ona vae, ae sa tuu atu e faamasino le manumalo ia Rex.

Na lipotia e le nusipepa i le lotoifale e faapea o “Woodworth, sa le lava le malosi.”

Ia Tesema, na oo mai ai le tala i Niue e faapea o se asosi o faipelega i Niu Sila sa faatulagaina se faipelega mo Chuck ma Kitione Lave, o le “Torpedo Tonga.” E pei o Rex Layne, o Kitione o se tagata fusu e pei o se pulu ]povipoa] o sē e na te faaaogaina lona tinotelē ma le malosi e fasi ai ana paga. I se fusuaga e faasaga i se tasi o alii tulaga muamua i paga mamafa i le lalolagi, sa manumalo ai Kitione i le taamilosaga lona lua i se tu’i oti.

Sa faamaloloina Chuck mai lana misiona i le amataga o Ianuari 1958, i le maea ai ona latou tuua ma isi faifeautalai se taualuga i luga o le falesa fou. Sa tusi atu e Salavia se tusi faamavae ia te ia, ma faamautinoa atu ia te ia le alofa ma le lagolago e le mavae a lona aiga. “La’u tama e, taumafai i le aupito malosi e te mafaia,” sa ia fai atu ai ia te ia. “Aua le lotovaivai ma o le a e manumalo. Pe a o faatasi lou malosi ma a matou tatalo, e leai se mea o le a faalavelave ia te oe. Matou te faalagolago i le Atua e fesoasoani ia te oe.”

Sa faatulagaina le fusuaga mo le aso 27 Fepuari, 1958. O lena aso atoa na anapopogi ai ma tatalo Mosese, Salavia, ma le la fanau mo Chuck. Ina ua oo mai le afiafi, sa latou faapotopoto ai i le falesa ma le toatele o tagata o le Ekalesia ma uo ina ia faalogologo i le fusuaga i luga o le leitio. Talu ai o le faasalalauga e faaPeretania, sa faaliliuina ai e Mosese i le faaNiue.

O se fuainumera silia o le toeitiiti sefululima afe tagata na o mai i le Malae o Carlaw i Aukilani, Niu Sila, e molimauina le fusuaga. O se tulaga faigata na faasaga tonu atu ia Chuck a o ia ulu atu i totonu o le maea o faipelega. Sa mamafa atu Kitione i le luasefulu-pauna nai lo ia, ma i aso a o lumanai ai le fusuaga, na faalogo ai Chuck ua faaigoa o ia o se “manu iti” o le a le umi atu sona taimi i se taamilosaga se tasi e fusu ai.

O le taimi lava na tatagi ai le logo, na faavave atu ai Kitione ia Chuck. “O le a itutasi le fusuaga,” o le oi lea a se tagata mai le aofia.

Na ’alo Chuck mai le vave atu ma so’a Kitione e aunoa ma se aafiaga. Sa tali atu Kitione i ana moto i se faasologa vave, ma lavea ai le ulu ma le tino o Chuck. Ona alu atu lea o Kitione mo le tu’ioti. Sa sauni o ia ma alu atu loa se amoti malosi o le limaagavale. Sa toe solomuli Chuck, ma alu atu sa’o le meafaipele a Kitione ma tau i lona auvae. Sa malosi o le tu’i na lelea ai Chuck i luga o maea [o le malae fusu]. Ma mo sina taimi, sa foliga mai na mou atu mea uma sa siomia ai o ia.

I le tali vave atu, sa uu mai ai e Chuck ia Kitione ma pipiimau ai a o taavilivili le lalolagi na siomia ai o ia. Sa taumafai le laufali e tuueseese i la’ua, ae na ta mai le logo. Ua uma le taamilosaga.

Sa manino le mafaufau o Chuck a o ia faatalitali i lana tulimanu. Ina ua amata le isi taamilosaga, sa alu atu atu o ia i le ogatotonu o le maea ma se malosiaga fou. Sa faafeiloai o ia e Kitione i ni moto na felelei atu, ma sauni e tuu atu se tu’i e faauma ai, ae sa osooso solo Chuck. Sa ia taamilomilo i lona fili, ma taumamao mai tulimanu, ta soo atu ana soa ia te ia. Sa le mafai e le Torpedo ona tumau i lea saoasaoa. I le gasologa o taamilosaga fou taitasi, sa lagona e Chuck lona malosi atili. Sa mafai ona ia lagona atu le valaau faamalosi a le au maimoa a o faaopoopoina ona ai.

Na uma le fusuaga i le mavae ai o taamilosaga le sefululua, ma sa tuuina atu e faamasino le manumalo ia Chuck. Sa lelei le taliaina e Kitione o lona faiaina. “Sa ou fiafia i le fusuaga,” o lana tala lea. “O lena Woodworth o se tagata fusu saoasaoa lelei—ma o se alii lelei tele.”

Na auina atu e Mosese ia Chuck se feau faauaealesi i le aso na sosoo ai. “Faafetai tele lava mo se fusuaga lelei—ma le manumalo ai,” o upu ia o le uaealesi. Na tali atu Chuck i le lafoina atu o tupe na lava e fafaga ai le aiga mo le taimi na totoe o le latou misiona ma auina atu ai le ulugalii i le Malumalu o Niu Sila.

I ni nai masina mulimuli ane, i le isi itu faafeagai o le lalolagi, na taofia ai e leoleo i le Ripapelika Temokarasi o Siamani ia Henry Burkhardt e luasefulu-fitu tausaga le matua. Sa toe foi atu o ia i le itu i sasae, o se vaega o Perelini na puleaina e komenisi ina ua uma ona feiloai ma Burtis Robbins, o le peresitene o le Misiona a le Ekalesia i Siamani i Matu i le vaega i sisifo o le aai. E ui sa le o se solitulafono le malaga atu i Perelini i Sisifo—o se eria na i lalo o le pulega a le Malo Aufaatasi, Farani, ma le Iunaite Setete—ae o le faia soo o lea mea e pei ona sa fai e Henry na aliae ai ni masalosaloga.

Na toeitiiti atoa le sefulu tausaga talu ona vavae Siamani i le Malo Tutotonu o Siamani (BRD), po o Siamani i Sisifo, ma le Ripapelika Temokarasi o Siamani (GDR), po o Siamani Sasae. O atunuu uma e lua sa faaauau pea ona avea ma vaega autu i le Taua Faalealofa i le va o le Iunaite Setete, o le Soviet Union, ma a latou lava paaga. O le i ai i le ogatotonu o le teritori o GDR, na avea ai Perelini i Sisifo ma faatusa o le tetee atu i le faakomunisi. O le taimi lea, na tulai mai ai le GDR o se tasi o le tele o atunuu na tosinaina e le Soviet i Europa tutotonu ma sasae.

A o finau nei atunuu feteenai mo le pulea o le lalolagi atoa, sa latou tauvavā e atiina ae ni auupega malolosi atu ma ni tekinolosi e sili atu ona maoae. O le faatuatuaina o malo tna feteenai sa o se mea ma tau le maua. Na ono nanā atu e soo se tasi ni mea faalilolilo i le fili.

Sa lei i ai se tetee o Henry ina ua aveese atu o ia e leoleo i se nofoaga i Konigs Wusterhausen, o se taulaga i fafo atu o Perelini i Sasae. Na fai si umi o mata’itu o ia ma lona aiga e leoleo faalilolilo o le Stasi, a le GDR. O lona valaauga o se fesoasoani muamua i le au peresitene o le misiona na tuuina atu ai o ia i se fesootaiga masani ma Peresitene Robbins ma isi taitai o le Ekalesia Amerika. Ma o lena mea, faatasi ai ma ana asiasiga faisoo i Perelini i Sisifo, na avea ai o ia ma fili masalomia o le setete.

Sa le’i faapena o ia. Ina ua uma ona faamauina i le Malumalu o Swiss ia Novema 1955, sa toe foi atu Henry ma lona faletua, o Inge, i le GDR ma sa usiusitai i le tele o tapulaa a le malo i tagata faalelotu. Sa leai ni faifeautalai po o ni taitai ese i le atunuu, ma sa le mafai ona fesootai sao atu Henry ma taitai o le Ekalesia i le Aai o Sate Leki. Sa tatau foi ia te ia ma le Au Paia ona auina atu a latou lauga i sauniga faamanatuga i taitai o le malo mo le siakiina ao lei mafai ona latou laugaina.

O le avea ai ma taitai sili ona maualuga o le Ekalesia i GDR na aafia ai le soifua o Henry. Sa na o ni asiasiga pupuu i lona aiga na mafai ona ia vaai ai ia Inge ma le la tama teine faatoa fanau mai, o Heike. A leai, sa malaga o ia i le misiona atoa, ma auai atu i le lima afe o le Au Paia na salalau atu i paranesi e fasefulu-lima i le salafa o le atunuu.

Soo se taimi lava e ta’uleagaina ai e se tagata o le Ekalesia le malo, uunaia se tasi e malaga atu i le Iunaite Setete, pe le totogiina foi se aitalafu, sa faaataata mai le aafia ai o Henry. I le lua tausaga na muamua atu, ina ua taumafai leoleo e taofi faifeautalai o le lotoifale mai le asiasi atu i se isi tagata o le Ekalesia, sa ia auina atu se faitioga aloaia i le malo, ma tuuina atu aia tatau a faifeautalai ma talosaga atu mo se “lagolagosua lelei atu” mai leoleo. Sa faaaloalo o ia ma le loto i ai ma fesootai ma taitai o le malo, ma e masani lava ona manuia ai ana taumafaiga.

I le nofoaga o leoleo i Knigs Wusterhausen, sa faaalu ai e Henry le po i le suesueina o ia. I lana taavale sa i ai ni nai meaalofa mai ia Peresitene Robbins ma anomea mo le ofisa o le Ekalesia i Siamani Sasae. Ina ua vaai atu leoleo i nei mea, sa latou tuuaia Henry i le solia o le tapu a le GDR i ona tagatanuu i le mauaina o foai mai faalapotopotoga i atunuu i fafo. I a latou upu, na ia solia se “solitulafono o aiaiga faaletamaoaiga.”

E lei faalogo lava Henry i lea tapu muamua. Sa ia ta’u atu i tagata na suesueina o ia, sa malaga atu o ia i Perelini i Sisifo i masina uma. “Na pau le faamoemoega o la’u fonotaga ma le Susuga ia Robbins,” sa ia faamalamalama atu ai, “o le talanoaina lea ma ia o gaoioiga faalelotu faapea foi ma mataupu tautupe e fesootai i ai.”

O meaalofa mai le peresitene o le misiona e le o ni meaalofa e le masani ai. “Na ou mauaina ni meaalofa i lenei faatinoga, po o ituaiga o vailaau faafomai, i a matou fonotaga taitasi faalemasina,” na lipoti atu ai Henry. “Matou te mauaina foi ni afifi i le meli na auina mai i lo matou ofisa i Dresden ma mai fafo.”

Sa aveesea e leoleo ia meaalofa, su’e ato a Henry, ma su’e e aunoa ma le faia lelei nisi o lipoti o le misiona sa ia aumaia. O le leai o se mea e masalomia ai o ia, na latou faatonuina ai Henry e faitau, faamaonia, ma sainia se lipoti aloaia o lana fonotaga ma Peresitene Robbins. E oo atu i le taimi lena, ua ta le fa i le taeao. Na iu lava ina latou tatalaina o ia mai le vaavaaia mulimuli ane i lena aso.

O le pue faapagotaina o Henry na semanu e ono sili atu ona leaga. Ina ua maua e leoleo se faifeautalai Siamani i Sasae ma se kopi o le Der Stern, le mekasini a le Ekalesia i le gagana Siamani, sa latou faafalepuipuiina o ia mo le iva masina. Sa taumafai Henry ma isi e fesoasoani i le faifeautalai e faatumauina lona lototele, ae sa itiiti se mea na mafai ona latou faia. Sa ia faailoa atu le i ai ia te ia o le mekasini, ma o taitai o le malo—i le mataupu lea—sa le tuu avanoa.

O ia ituaiga o faafesagaiga ma leoleo sa suia ai Henry. Sa le toe i ai sona fefe pe a feagai ma leoleo, aemaise lava pe a leai se mea sese na ia faia po o le Au Paia. O aso uma lava e aofia ai le faia o tulaga lamatia mo le talalelei, ma sa avea o se mea masani.

Sa masani ona ia lagonaina e pei na tu o ia i le vae e tasi i le falepuipui.

I le taeao o le aso 12 o Aperila, 1958, na maua ai e Mosese ma Salavia Muti le la vaaiga muamua o le Malumalu o Niu Sila. Sa tu i luga o se maupuepue vao e iloa atu ai se vanu lautele e fitusefulu-lima maila i saute o Aukilani. O lona mamanu sa faigofie ma faaonapo nei, e pei o le Malumalu o Suisi. Sa i ai ni puipui vali papae o le sima na faamalosia ma se tila e tasi lea na tulai maualuga e silia ma le 150 futu i le ea.

Sa o mai i Niu Sila le aiga o Muti i le taimi tonu lava e auai i le fale tatala. E faitau afe tagata mai vaega uma o Niu Sila, Ausetalia, ma motu o le Pasefika sa naunau e vaai i le malumalu, o lea sa tatau ai ia Mosese ma Salavia ona faatali mo se itula ma le afa ona faatoa faia lea o le latou malaga maimoa.

Ina ua i ai i totonu, sa mafai ona latou ofo i le matagofie o le malumalu ma talisapaia le osigataulaga maoae a le Au Paia i le lotoifale. E pei o le falesa i Niue, ma se aofaiga faatupulaia o fale o le Ekalesia i Oceania atoa, sa tele lava ina fausia le malumalu e faifeautalai galulue. O nei tagata faigaluega na siitia atu iina ma o latou aiga e fausia e le gata i le malumalu ae faapea foi le lotoa na sosoo ai o le Kolisi a le Ekalesia i Niu Sila, o se aoga maualuga fou e pulea e le Ekalesia.

O le aso na sosoo ma la latou malaga maimoa i le malumalu, sa valaaulia ai Mosese e lauga i se sauniga faamanatuga a le Au Paia Toga i le eria. A o latalata atu o ia i le tulaga, sa ia mafaufau e uiga i le folafolaga na faia e Siaosi Alapati Samita ia te ia i le luasefulu tausaga talu ai, ina ua ia fai mai o le a auai atu Mosese i le malumalu e aunoa ma sana lava tupe e alu ai. E lei ta’uina atu e Mosese ia Chuck Woodworth e uiga i lenei folafolaga. Ina ua totogi e le alii talavou le malaga a le au Muti i le malumalu, sa ia faataunuuina ma le lē iloa le valoaga.

“O au o se tagata e molimau atu i upu na saunoa i ai le perofeta o aso e gata ai,” na ta’u atu ai e Mosese i le faapotopotoga. “Ou te iloa o Siaosi Alapati Samita o se perofeta moni a le Atua, aua ua avea i ma’ua ma lo’u toalua ma molimau o ana saunoaga.” Ona ia saunoa lea e uiga i le ositaulaga a Chuck mo le aiga o Muti. “Ua matou i ai iinei i lenei po ona o le alofa e le muta o se tagata,” na ia molimau atu ai. “O le a le galo lava ia i matou i o matou olaga, e tusa lava po o le a le mea e tupu.”

E tasi le vaiaso mulimuli ane, na malaga mai ai Peresitene Tavita O. MaKei i Niu Sila ma faapaiaina le malumalu. Sa faataunuuina e le fale se valoaga sa ia faia i le toeitiiti fasefulu tausaga talu ai, ina ua ia asiasi atu i Niu Sila i lana uluai misiona faaaposetolo i le salafa o le lalolagi. I lena taimi, sa ia tau atu ai i se vaega o le Au Paia Māori o le a i ai se aso latou te maua ai se malumalu. O lana faamatalaupu i le taimi o le lauga o Stuart Meha, lea ua faatoa maea nei ona faaliliuina le faaeega paia i le gagana Māori.

A o ofoina atu e Peresitene MaKei le tatalo o le faapaiaga mo le malumalu, sa ia faamamaluina faifeautalai faigaluega ma isi Au Paia o e sa faapaiaina a latou mea uma e fau ai le malumalu ma isi fale o le Ekalesia. “Talosia ia faamafanafanaina tagata taitoatasi na saofaga i le agaga ma ia tele ona faamanuiaina ai,” sa ia tatalo ai. “Talosia ia faamautinoa atu ia i latou ua ia i latou le lotofaafetai o le faitau afe, atonu e faitau miliona, i le isi itu ua mafai nei ona tatalaina faitotoa o le falepuipui ma folafola atu i ai le laveaiga.”

O Mosese ma Salavia na maua faaeega paia ma faamauina mo le olaga nei ma le faavavau i ni nai aso mulimuli ane. A o i ai i totonu o le malumalu, sa lagona e Mosese le mamalu o le afio ai o le Atua. “E mafai faapefea ona ou le alofa i lo’u Tama oi le Lagi ma Lona Alo, o Iesu Keriso, i mea uma ua ou maua, ina ua ou iloa sa La i ai iina mo a’u i le malumalu?” na ia fai atu ai mulimuli ane. O le aafiaga na tuuina atu ai ia te ia se vaaiga fou i le fuafuaga e faavavau a le Atua.

“O mea uma ua ou faia ma faia i le Ekalesia o loo faasino uma atu i le malumalu,” na ia iloaina ai. “Ua na o le pau lea o le nofoaga paia e mafai ona tuufaatasia ai se faalapotopotoga faaleaiga ma tumau ai ma le maopoopo e faavavau.”

  1. Muti and Muti, Man of Service, 154; “J. Archie Cottle and Family Called to Tongan Mission,” Church News, Feb. 4, 1956, 10; Woodworth, Mission Journal, Mar. 2–June 1, 1957; Niue District, Tongan Mission, Minutes, June 27, 1956, 3:27–28; “Mission Home,” “West Side of the Chapel,” “Concrete Wall and Part of the Tower; One Classroom and Office,” and Partially Finished Mission Home, Photographs, Charles J. Woodworth Papers, CHL. Autu: Polokalama o le Fauga o Fale

  2. Muti and Muti, Man of Service, 168; Muti, Book of Remembrance, [33], [73]; Woodworth, Mission Journal, Dec. 29, 1956; Mar. 2, 1957; Apr. 1–3, 9, 13, 15, and 17, 1957; Charles Woodworth to Marsha Davis, Jan. 8, 1957, Charles J. Woodworth Papers, CHL; Mortensen, Mission Journal, Mar. 30 and Apr. 11, 1957; Mortensen, “Serving in Paradise,” 20–22.

  3. Muti and Muti, Man of Service, 155; Woodworth, Mission Journal, July 1, 4, 9–10, 14, 22, and 30, 1956; Aug. 17, 1956; Sept. 10, 1956; Nov. 9, 1956; Dec. 9 and 13, 1956; Jan. 21, 1957; June 8–9, 1957; Charles Woodworth to Marsha Davis, June 25, 1956; Feb. 26, 1957, Charles J. Woodworth Papers, CHL; First Presidency to Mission Presidents, Dec. 2, 1949, First Presidency, Circular Letters, CHL; Muti, Interview Notes [2012].

  4. Muti and Muti, Man of Service, 154–55; Mortensen, “Serving in Paradise,” 37; Woodworth, Mission Journal, Sept. 17, 1955; Oct. 22, 1955; June 7 and 13, 1956; Mar. 5–7, 9, 15, 18–19, 21, and 30, 1957; July 30, 1957; Mortensen, Mission Journal, Sept. 3, 1956.

  5. Muti and Muti, Man of Service, 126–27, 336–37; Woodworth, Mission Journal, Dec. 26, 1956; Harold Lundstrom, “Unification Affects Many Campuses,” Church News, July 18, 1953, 9. Ua faasa’oina upusii mo le manino o le faitauina; “o i latou,” “latou,” ma “lo latou” i le amataga na suia ia i “o i matou,” “matou,” ma le “lo matou.”

  6. Woodworth, Mission Journal, Aug. 16, 1955; Sept. 21, 1955; Aug. 4–5, 10, 24, and 26, 1956; Nov. 7 and 19, 1956; Dec. 8, 13, and 29, 1956; Feb. 17–18, 1956; Mar. 31, 1957; July 22, 1957; Muti, Interview Notes [2021], 2; Woodworth, Oral History Interview, 42, 47, 56; Muti and Muti, Man of Service, 181–82; Macke, “Oral History of Lois Maurine Lambert Woodworth Macke,” 13; Charles Woodworth to Marsha Davis, Aug. 16 and 25, 1956; Jan. 8, 1957, Charles J. Woodworth Papers, CHL. Ua faasa’oina le upusii mo le manino o le faitauina; “iloa” i le uluai tusiga ua suia i le “iloaina.”

  7. Woodworth, Mission Journal, Jan. 22, 1956; Nov. 19, 1956; Jan. 2 and 18, 1957; Feb. 3, 1957; Apr. 25, 1957; May 5–6, 1957; Charles Woodworth to Marsha Davis, Jan. 8, 1957; Charles Woodworth to Ralph Olson, Feb. 17, 1957; Charles Woodworth to Fred Stone, Feb. 26, 1957, Charles J. Woodworth Papers, CHL; Dalton, Autobiography, 1, 4–5, 14–15.

  8. Muti and Muti, Man of Service, 155, 165–66, 182.

  9. Woodworth, Mission Journal, Apr. 24, 1957; June 15, 19, and 22, 1957; Woodworth, Autobiography, 3; Woodworth, Oral History Interview, 56; Charles Woodworth to Marsha Davis, Feb. 18, 1957; June 18, 1957, Charles J. Woodworth Papers, CHL.

  10. Heaton, Personal History, volume 2, 116; Jue, Reminiscence, 5; China Hong Kong Mission, Manuscript History and Historical Reports, May 26, 1957; “Local Sister Called to Be a Missionary,” [18].

  11. Heaton, Personal History, volume 2, 19; Hardy, “Personal History,” volume 2, 87; Heaton and Heaton, Documentary History, 175; “Local Sister Called to Be a Missionary,” [18].

  12. Jue, Reminiscence, 5; Southern Far East Asian Mission Report, 16, 19–21.

  13. Jue, Mission Reminiscences, 1; Heaton and Heaton, Documentary History, 175; Jue, Reminiscence, 1–2; Southern Far East Asian Mission Report, 16–19; Peterson, “Crisis and Opportunity,” 141; Britsch, From the East, 232–33.

  14. Heaton and Heaton, Documentary History, 25, 32, 35–36, 54–55; Heaton, Personal History, volume 2, 70; Britsch, From the East, 242–43, 251; Allen and Leonard, Story of the Latter-day Saints, 568; A Systematic Program for Teaching the Gospel ([Salt Lake City]: The Church of Jesus Christ of Latter-day Saints, 1952); Heaton, Oral History Interview [Interview 3], 72. Autu: Hong Kong

  15. Britsch, From the East, 244; Jue Family, Oral History Interview [2019], 56–61; Hardy, “Personal History,” volume 2, 83.

  16. Woodworth, Mission Journal, Aug. 15–16, 1957; Sept. 2, 1957; Oct. 17, 1957; Nov. 1, 16, and 29, 1957; Dec. 21, 1957; Muti and Muti, Man of Service, 201; Muti, Interview Notes [2021], 1; Woodworth, Oral History Interview, 57; Charles Woodworth to Marsha Davis, Nov. 2, 1957, Charles J. Woodworth Papers, CHL.

  17. “Chuck Woodworth Quits Ring to Perform Service for Church,” Joplin (MO) Globe, July 31, 1955, C2; “Charles Pleases in Ring Exhibitions Here,” Rocky Mountain News (Denver), Apr. 30, 1954, 52; “Ezzard Charles,” in Odd, Encyclopedia of Boxing, 26; Al Warden, “The Tragedy of Rex Layne,” Ogden (UT) Standard-Examiner, May 25, 1954, A8; “Woodworth Set for Ring Return,” Joplin Globe, Jan. 9, 1958, B2.

  18. Art Grace, “U-M Boxer Started Layne’s Ring Career,” Miami Daily News, Apr. 1, 1953, B2; Woodworth, Oral History Interview, 63; “Layne, Chuck Tangle in Bout Tonight,” Salt Lake Tribune, Aug. 30, 1954, 25; Al Warden, “The Tragedy of Rex Layne,” Ogden (UT) Standard-Examiner, May 25, 1954, A8; “Tale of Tape for Monday’s Woodworth-Layne Scrap,” Salt Lake Tribune, Aug. 29, 1954, B10; “Layne Continues Comeback with Win over Woodworth,” Daily Herald (Provo, UT), Aug. 31, 1954, 6.

  19. Woodworth, Mission Journal, Nov. 13 and Dec. 6, 1957; “Kitione Lave—The Tongan Torpedo,” New Zealand Ring, Feb. 25, 1958, 5; “Island Boxers Are Doing Well,” Pacific Islands Monthly, Apr. 1955, 143; “Boxing Youth Prevails,” Times (London), Apr. 25, 1956, 15; “Grand Slam,” Daily News (New York City), Apr. 27, 1956, 72.

  20. Woodworth, Mission Journal, Dec. 26 and 30–31, 1957; Jan. 3 and 14, 1958; Salavia Muti to Charles Woodworth, Feb. 2, 1958, Charles J. Woodworth Papers, CHL.

  21. Woodworth, Mission Journal, Feb. 29, 1958; Muti, Interview Notes [2021], 2; Woodworth, Oral History Interview, 64.

  22. “Ringwise American Too Good,” Auckland (New Zealand) Star, Feb. 28, 1958, 7; “Return Fight Here Soon for Woodworth and Kitione Lave?,” and “Noel Holmes’ Sports Talk,” Auckland Star, Feb. 28, 1958, 24; Auckland Boxing Association, “Announcer’s Card,” [Feb. 27, 1958], Charles J. Woodworth Papers, CHL; Woodworth, Oral History Interview, 60–61; tagai foi Britsch, “Charles (‘Chuck’) J. Woodworth,” 175–76.

  23. “Ringwise American Too Good,” Auckland (New Zealand) Star, Feb. 28, 1958, 7; Woodworth, Oral History Interview, 61–63; “Return Fight Here Soon for Woodworth and Kitione Lave?,” Auckland Star, Feb. 28, 1958, 24; Woodworth, Mission Journal, Feb. 29, 1958; tagai foi Britsch, “Charles (‘Chuck’) J. Woodworth,” 175–77.

  24. Mosese Muti to Charles Woodworth, Telegram, Feb. 28, 1958, Charles J. Woodworth Papers, CHL; Woodworth, Oral History Interview, 63; Woodworth, Mission Journal, Feb. 29, 1958.

  25. Kuehne, Henry Burkhardt, 33-34. Sa toe faaigoaina le Misiona a Siamani Sasae i le Misiona a Siamani Matu i le 1957. (Kuehne, Mormons as Citizens of a Communist State,436.)

  26. Wilke, Path to the Berlin Wall, 65–66, 122; Trachtenberg, Constructed Peace, 96–103, 146–47, 195, 204–5.

  27. Kuehne, Henry Burkhardt, 13–37; Hall, “The Church of Jesus Christ of Latter-day Saints in the Former East Germany,” 489–95; Alvin R. Dyer to First Presidency, Oct. 25, 1960, First Presidency, Mission Correspondence, 1946–69, CHL. Autu: Taua Faalealofa; Siamani

  28. Burkhardt, Journal, Nov. 11, 1955; Spencer W. Kimball, Journal, Jan. 14, 1962; Burkhardt, Oral History Interview [1991], 4–8; Kuehne, Henry Burkhardt, 42; tagai foi Kuehne, Mormons as Citizens of a Communist State, 437–39.

  29. Kuehne, Henry Burkhardt, 20–31, 34; Spencer W. Kimball, Journal, Jan. 14, 1962.

  30. Kuehne, Henry Burkhardt, 30–35. Ua faasa’oina le upusii mo le manino o le faitauina; “Herr Robbins” i le uluai tusiga ua suia i le “Susuga.” Robbins.”

  31. Muti, Book of Remembrance, [70]; Gordon B. Hinckley, “Temple in the Pacific,” Improvement Era, July 1958, 506–8; Theodore L. Cannon, “The President in New Zealand,” Church News, Apr. 26, 1958, 8–9; Theodore L. Cannon, “Inside the New Zealand Temple,” Church News, Apr. 19, 1958, 8–9; Au Paia, voluma 3, mataupu 39.

  32. Wendell Mendenhall, “Story of New Zealand Temple,” 1–7, in First Session, Apr. 20, 1958, New Zealand Temple Dedication Services, CHL; Newton, Tiki and Temple, 226, 232, 242–44, 249–50, 255–56; Cummings, Mighty Missionary of the Pacific, 30, 38–39, 57–68; tagai foi Gordon T. Allred, “The Great Labor of Love,” Improvement Era, Apr. 1958, 229, 269–71. Autu: Polokalama o le Fauga o Fale; Aoga a le Ekalesia; Niu Sila; Fausiaina o Malumalu

  33. Muti, Book of Remembrance, [70], [84]; Woodworth, Oral History Interview, 64.

  34. Gordon B. Hinckley, “Temple in the Pacific,” Improvement Era, July 1958, 508–9; Au Paia, voluma 3, mataupu 14; McKay, Diary, May 16, 1957; June 18, 1957; Nov. 4, 7, ma le 15, 1957; Newton, Tiki and Temple, 257; “Dedicatory Prayer by Pres. McKay,” Church News, May 10, 1958, 6. Autu David O. McKay; Faapaiaga o le Malumalu ma Tatalo o le Faapaiaga

  35. Hamilton New Zealand Temple, Temple Records for the Living, 1955–91, Apr. 23, 1958, microfilm 458,071, FSL; Muti, Book of Remembrance, [82]; Muti and Muti, Man of Service, 199. Autu: Faamauga