Vahe 10
ʻOku Mahuʻinga ʻa e Taimí
ʻI he faʻahitaʻu failau ʻo e 1966, naʻe muimui ai ʻa Toketā ʻAsisi ʻAtia ʻi ha tokotaha ngāue ki ha tauhiʻanga fakamatala ʻi he Misiume ʻAati Lahi ʻi Niu ʻIoké. ʻI heʻene vakai holó, naʻá ne maʻu ha faile ʻo fakaava ia. Naʻá ne ofo ʻi he meʻa naʻá ne vakai ki aí.
Naʻe ʻi loto ha ʻū laʻipepa kiliʻi kaho faka-ʻIsipite motuʻa. Naʻe maumau lahi ʻa e ʻū pepa kiliʻi kahó, ka naʻe lava ʻa ʻAsisi ʻo ʻiloʻi ʻa e fakatātā ʻo ha ongo tangata, ko e taha naʻe tokoto ʻi ha sea naʻe fuo hangē ha laioné pea ʻi hono tafaʻakí naʻe tuʻu ai ʻa e tokotaha ʻe tahá. Naʻe puli ʻa e ongo nima mo e kongaloto ʻo e tangata ʻi he seá pea mo e ʻulu ʻo e tokotaha ʻoku tuʻú ʻi heʻene hā ʻi he pepa kiliʻi kahó. ʻI ha kiʻi feinga ke tauhi ʻa e fakamatalá, naʻe fakapipiki kulū ai ʻe ha tokotaha ha laʻipepa ki he pepa kiliʻi kahó pea tā ai ʻa e ngaahi konga naʻe pulí.
Naʻe ʻikai ko ha mēmipa ʻa ʻAsisi ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ka ʻi heʻene hoko ko ha palōfesa ʻo e hisitōliá mo e ngaahi lea fakafonuá ʻi he ʻUnivēsiti ʻo ʻIutaá, kuó ne feohi ai mo e Kāingalotú ʻi he taimi lahi ke ʻiloʻi ko e meʻa naʻá ne vakai ki aí ko ha ʻata mei he Tohi ʻa ʻĒpalahamé ʻi he Mataʻitofe Mahuʻingá.
Naʻe ʻi ai mo ha ʻū konga pepa kiliʻi kaho kehe ʻe hiva naʻe tauhi fakataha mo e ʻata ko ʻení. ʻI hono vakaiʻi ʻe ʻAsisí, naʻá ne maʻu ha tohi fakamoʻoni ne fakapapauʻi ai naʻe ʻi ai ʻa e taimi naʻe hoko [ʻa e pepa kiliʻi kahó] ko ha koloa ʻa e palōfita ko Siosefa Sāmitá. Ko e ʻaho naʻe hā ʻi he tohi fakamoʻoni ko ʻení ko e taʻu 1856 pea naʻe fakamoʻoni hingoa ki ai ʻa Siosefa Sāmiti III, ʻEma Sāmita, mo e husepāniti hono ua ʻo ʻEmá, ko Luisi Pitamoni.
Naʻe maʻu ʻa e ʻū kongokongá mei ha ʻū takainga pepa kiliʻi kaho naʻe maʻu ʻe he palōfita ko Siosefá mo ha Kāingalotu kehe ʻi haʻanau fakatau mai ha ngaahi sino naʻe fakatolonga mei ha tauhiʻanga koloa fakakuongamuʻa ʻi he 1835. Hili ha taʻu ʻe fitu mei ai, naʻá ne pulusi ʻa e ngaahi ʻata mei he pepa kiliʻi kahó fakataha mo ha liliu naʻe ui ko e Tohi ʻa ʻĒpalahamé. Hili ha ngaahi taʻu mei he pekia ʻa Siosefá, naʻe fakatau atu ʻe ʻEma ʻa e ngaahi sino naʻe fakatolongá mo e ʻū pepa kiliʻi kahó, pea naʻe vahevahe ia ʻe he tokotaha foʻou naʻe ʻoʻoná pea fakatau atu ha niʻihi ki ha misiume ofi mai. ʻI he ngaahi taʻu lahi, naʻe pehē kuo mole ʻa e ʻū takainga tohí ʻi ha vela, ka naʻe faifai pea ʻiloʻi naʻe ʻi ai ha ʻū konga [ʻo e takainga tohí] ʻi he fakahahaké ʻi he Misiume Metulōpolitaní.
Naʻe pehē ʻe ʻAsisi, “ʻOku ʻikai totonu ke ʻi heni ʻa e ngaahi fakamatala ko ʻení.” Naʻá ne ʻiloʻi ʻa e mahuʻinga ʻo e ʻū kongokongá ki he Siasí, peá ne fili ai ke tokoni ki hono fakafoki ia ki he Kāingalotú.
ʻI he taʻu tatau, naʻe ongoʻi lōmekina ʻa e fefine taʻu hongofulu-mā-fā ko ʻIsapeli Sanataná, ʻi hono ʻātakai foʻoú. Naʻá ne toki mavahe mai pē mei hono ʻapi ʻi Siuteti ʻOpelekoní, ko ha kolo ʻi he fakatokelau ʻo Mekisikoú, ke kau ki he Senitulō ʻEsikolā Penemelito te lasi ʻAmelikasi, ko ha ʻapiako ʻa e Siasí ʻi Mekisikou Siti. Naʻe tupu tokolahi ʻa e loto kolo ʻi he kolomuʻá ki ha kakai ʻe toko fitu miliona, pea naʻe kehe ʻa e teuteu mo e lea ʻa e kakaí mei he meʻa naʻá ne anga ki aí.
Naʻe fuʻu fakamatāpule ʻaupito ʻenau founga lea ʻaki ʻa e “kātaki,” “mālō,” mo e “tulou.” Naʻe ʻikai ko e founga lea ia ʻa e kakai ʻi he tokelaú.
Naʻe fokotuʻu lelei ʻa e ongoongolelei kuo fakafoki maí ʻi Mekisikou ʻi he taʻu 1800 tupú, pea kuo ʻi he fonuá ʻeni ha siteiki mālohi ʻe ua. ʻI he ngaahi taʻu ʻe uofulu tupu kuohilí, kuo tupulaki ʻa e tokolahi ʻo e Kāingalotu ʻi Mekisikoú mei he nimaafé ki he toko tolumano onoafe tupu.
ʻI he tupu tokolahi ʻa e mēmipasipí, naʻe fiemaʻu ʻe he kau takimuʻa ʻo e Siasí ke fakapapauʻi ʻoku maʻu ʻe he toʻu tupu kei tupu hake ʻo e Kāingalotu Mekisikoú ʻa e faingamālie kotoa pē ki he akó mo e ako ngāué. ʻI he taʻu 1957, naʻe fili ai ʻe he Kau Palesitenisī ʻUluakí ha kōmiti ke fakatotoloʻi ʻa e ako ʻi Mekisikoú pea fai ha ngaahi fokotuʻu ki hono fokotuʻu ʻo e ngaahi ako ʻa e Siasí ʻi he fonuá. Naʻe ʻiloʻi ai ʻa e ngaahi kolo ʻoku ʻikai lahi feʻunga ʻa e ngaahi akó ke feau ʻa e tupu tokolahi ʻa Mekisikoú, pea naʻe fokotuʻu ai ʻe he kōmití ke fakaava ha ngaahi ako lautohi ʻi he fonuá, pea pehē ki ha ako māʻolunga, ʻunivēsiti, mo e akoʻanga fakafaiako ʻi Mekisikou Sití.
ʻI he taimi ko iá, naʻe fakalele ʻe he Siasí ʻa e ngaahi akoʻanga ʻi Nuʻu Sila, Haʻamoa Hihifo, Haʻamoa ʻAmelika, Tonga, Tahiti mo Fisi. ʻI he taimi naʻe fakaava ai ʻa e ongo ʻapiako lautohi ʻe ua ʻi Sileí hili ha ngaahi taʻu siʻi mei aí, naʻe fai foki ʻe he Siasí ha ngāue ki ha akoʻanga ʻi Mekisikou. ʻI he aʻu ʻa ʻIsapeli ki Penemelitó, naʻe ʻosi lesisita ha fānau ako ʻe toko toluafe valungeau ʻi he ngaahi ʻapiako lautohi ʻe uofulu-mā-nima mo e ongo ʻapiako māʻolunga ʻa e Siasí ʻi Mekisikoú.
Ko Penemelitó ko ha ʻapiako māʻolunga naʻe taʻu ʻe tolu pē ʻa e ako aí. Naʻe fakaava ia ʻi he taʻu 1964 ʻi ha kelekele ʻeka ʻe 287 ʻi he fakatokelau ʻo Mekisikou Sití. Naʻe fuofua ʻilo ʻe ʻIsapeli fekauʻaki mo e ʻapiakó lolotonga ʻene ʻi he ʻapiako lautohi naʻe fakalele ʻe he Siasí ʻi ʻOpelekoní. Neongo naʻe ʻikai ke ne saiʻia ʻi he nofo mamaʻo ʻi ha ngaahi maile ʻe lauiafe mei hono ʻapí mo e fāmilí, ka naʻá ne loto-vēkeveke ke ʻalu ki he ngaahi kalasí pea ako ha ngaahi meʻa foʻou.
Ko e kau ngāue ʻi he ʻapiakó ko e kau faiako kotoa ʻa e Siasí mei Mekisikou. Naʻe toʻo ʻe he kau akó ʻa e ngaahi kalasi naʻe fiemaʻú ʻi he lea faka-Sipeiní, faka-Pilitāniá, fiká, siokālafí, hisitōlia ʻo e māmaní, hisitōlia ʻo Mekisikoú, paiolosiá, kemisitulií mo e fīsikí. Naʻa nau lava foki ʻo lesisita ʻi he ngaahi kalasi kau ki he lēsoni ʻātí, sipotí, mo e tekinolosiá. Naʻe hoko ʻa e polokalama seminelí, ʻa ia naʻe fakalele makehe mei he akó, ko e ako fakalotu ia maʻá e fānau akó.
Naʻe poupou ʻa e tamai ʻa ʻIsapelí, ʻa ia naʻe ʻikai mēmipa ʻi he Siasí, ki he fakaʻānaua ʻa ʻIsapeli ke ako ʻi Penemelitó pea naʻá ne loto ke fakangofua [ʻa ʻIsapeli] mo hono tehina ko Hilitaá ke na lesisita fakataha. Naʻe siʻi ange ʻa Hilitā ʻaki ha taʻu ʻe taha, ka kuó ne kalasi fakataha pē mo ʻIsapeli talu mei he lautohi puleʻangá koeʻuhí he naʻe ʻikai fie ʻalu toko taha ʻa ʻIsapeli ki he akó.
Kuo fononga atu ʻa ʻIsapeli mo Hilitā ki Penemelito mo ʻena faʻeé. Naʻe kei langa ʻa e ʻapiakó heʻenau aʻu atú, naʻe kei lau-kelekele pē ha ngaahi feituʻu, mo ha ngaahi faleako pē ʻe niʻihi, pea mo ha fanga kiʻi fale iiki ʻe hongofulu-mā-nima ke nofo ai ʻa e fānau akó. ʻI he taimi tatau, naʻe ofo ʻa ʻIsapeli ʻi he lahi ʻo e ʻapiakó.
Naʻe tataki ia mo ʻene kulupú ki he fale fika uá. Naʻe talitali lelei kinautolu ʻe he pule ʻo e fale nofoʻangá, ʻa ia naʻá ne fakaʻaliʻali ange ʻa e ʻū mīsini foó, tautauʻanga valá ke tuku ai ʻenau ngaʻotoʻotá, mo e ʻū loki mohé ʻoku ʻi ai ha ongo mohenga fungavaka (bunk beds) ʻe ua. ʻOku ʻi ai foki ha loki kai, peito, mo e loto-fale ʻi he fale loki faá.
Naʻe fakamoleki ʻe ʻIsapeli ʻa e taimi lahi ke siofi ʻa e fānau ako kehé mo feinga ke liliu ki ha anga-fakafonua kehe. ʻOku fakafuofua ki he fānau ako ʻe toko nimangeau ʻi Penemelitó, ko e tokolahi tahá mei he fakatonga ʻo Mekisikoú. Naʻe kehe ʻenau ngaahi aʻusiá meia ʻIsapeli, pea naʻá ne ʻiloʻi ai naʻe kehekehe ange foki ʻenau meʻatokoní. Naʻá ne ʻohovale ʻi he lahi ange ʻa e ngaahi meʻa fifisí mo e ngaahi meʻa ke fili mei ai ki he feimeʻatokoní.
Tatau ai pē pe ko e hā ʻa e ngaahi faikehekehe ʻo e anga-fakafonuá, ka naʻe fiemaʻu ʻa e fānau ako kotoa ʻi Penemelitó ke nau tauhi ʻa e lao tatau. Naʻa nau muimui ʻi ha taimi-tēpile pau ʻo e ʻā pongipongiá, fai ʻa e ngaahi ngāue fakaʻapí, mo e ʻalu ki he ngaahi kalasí. Naʻe poupouʻi foki ke nau fakatupulaki ha ngaahi ʻulungaanga fakalaumālie mālohi, hangē ko e ʻalu ki he lotú mo e faʻa lotú. ʻI he tupu hake ʻa ʻIsapeli mo hono tehiná ʻi ha fāmili naʻe kehekehe ai ʻa e tui fakalotu ʻo e kau mēmipa ʻo e fāmilí, kuo teʻeki ai ke na fakahoko maʻu pē ʻa e ngaahi meʻá ni kimuʻa kae tālunga mo ʻena omi ki Penemelitó.
ʻI ha ngaahi ʻaho siʻi ʻo e tūʻuta ʻa ʻIsapelí, naʻá ne fakatokangaʻi ha fānau ako ʻe niʻihi naʻa nau taʻelata pea nau foki. Neongo ʻa e foʻou ʻa e kakaí, meʻatokoní, mo e anga-fakafonuá, ka naʻá ne loto-lahi ke nofo pea [feinga ke] lavameʻa.
Naʻe lekooti ʻe Palesiteni Tēvita O. Makei ʻi heʻene tohinoá ʻi he ʻaho 1 ʻo Sānuali 1967, “ʻOku hangē ʻoku ʻikai moʻoni ʻa e ʻamanaki ke hoko hoku taʻu hivangofulu-mā-fā.” Naʻá ne fakaʻaongaʻi ha ʻaho lōngonoa ʻi ʻapi, ʻo ne fakakaukauloto ki he ngaahi meʻa lahi kuó ne aʻusiá. Naʻá ne fakakaukau, “Kuó u maʻu ha moʻui fiefia mo fakalata! Ko ha taimi lōloa ia, ka ʻi he taimi tatau naʻe vave ʻene hokó.”
Ka naʻe hohaʻa ʻa e palōfitá ʻi heʻene ʻamanaki atu ki he taʻu foʻoú. Naʻá ne tohi ʻo pehē, “ʻOku fefaʻuhi ʻa e māmaní mo e faingataʻá.” ʻI he ʻaho kotoa ʻoku lipooti mai ai ʻe he ngaahi nusipepá mo e televīsoné ʻa e ngaahi tau, fekeʻikeʻi fakamatakali mo fakapolitikale, mo e ngaahi fakatamaki fakanatula. Naʻe kei hokohoko atu pē ʻa e fekeʻikeʻi ʻa e ʻIunaiteti Siteití mo e Sovieti ʻIunioní. Pea tokolahi ʻa e kakai ʻi ʻĒsia, ʻAfilika mo ʻAmelika Lotoloto mo Saute naʻa nau uesia ʻi he ngaahi fekeʻikeʻi fakalilifu fakavahefonuá pea naʻa nau manavasiʻi ai naʻa holoki ʻa e ngaahi puleʻangá pea vahevahe ʻa e ngaahi tukui koló.
Naʻe tautautefito ʻa e hohaʻa ʻa Palesiteni Makeí ki he tau fakalotofonuá, ʻa ia kuo laka hake ʻeni ʻi he taʻu ʻe hongofulú ʻa ʻene hoko ʻi he puleʻanga fakatonga-hahake ʻo ʻĒsia ko Vietinamí. ʻI ha feinga ke taʻofi ʻa e kominiusí mei hono fokotuʻu i ʻi he fonuá, naʻe toki tuku atu ai ʻe he ʻIunaiteti Siteití ha konga kau ʻe toko 450,000 ki Saute Vietinami. Ko ʻeni kuo vave ʻa e fakautuutu ʻo e taú, pea kuo tokolahi fau ha kau sōtia mo e kau siviliane kuo nau mate ʻi he ongo tafaʻakí fakatouʻosi.
ʻI Saikoní, ko e kolomuʻa ia ʻo Saute Vietinamí, naʻe ʻi ai ha ngaahi kolo ʻo e Siasí ʻa ia naʻe fakataha ai ha meimei Kāingalotu fakalotofonua ʻe toko tolungeau mo ha niʻihi ʻo e kau mēmipa ʻo e Siasí ʻe meimei toko fāafe naʻa nau ngāue ʻi he kongakau ʻAmeliká. Naʻe toki ʻaʻahi atu ʻa ʻEletā Kōtoni B. Hingikelī ʻo e Kōlomu ʻo e Kau ʻAposetolo ʻe Toko Hongofulu Mā Uá mo ʻEletā Melioni D. Hengi ʻo e Fakataha Alēlea ʻUluaki ʻo e Kau Fitungofulú ki he fonua kuo hoko ai ʻa e taú. Lolotonga ha konifelenisi fakavahefonua mo e Kāingalotú, naʻe fakatapui ʻe ʻEletā Hingikelī ʻa e fonuá ki hono malangaʻi ʻo e ongoongoleleí mo lotua ke melino ʻa e fonuá. Naʻá ne tautapa, “Fakavaveʻi ange muʻa ʻa e ʻaho ʻe tuku ai ʻa e ngaahi longoaʻa ʻo e taú.” Kimui ange ʻi he efiafi ko iá, naʻe fakahoko ʻe he kau takimuʻa ʻo e Siasí ʻa ʻenau fakamoʻoní lolotonga iá ʻoku longoaʻa mai pē ʻa e pā ʻa e ʻū meʻafana tangikē taú mei he mamaʻó.
Naʻe ʻamanaki ʻa Palesiteni Makei ke hōloa ʻa e moveuveú mo e fekeʻikeʻí ʻi he 1967, ka naʻe ʻikai hoko ia. ʻI Suné, naʻe kamata ai ha tau ʻa ʻIsileli mo hono ngaahi fonua kaungāʻapí, pea tuʻu fakatuʻutāmaki ai ʻa e vahefonuá. ʻI he māhina hokó, naʻe hokohoko atu ai ʻa e ngaahi moveuveu fakapolitikalé ʻi Naisīlia ʻo hoko ai ha tau fakalotofonua. Lolotonga iá, naʻe hoko ʻa e fakautuutu e tokolahi ʻa e kau pekiá pea mo e niʻihi naʻe ʻikai ke nau poupouʻi ʻa e tau ʻi Vietinamí, ke ne fakatupunga ai ha ngaahi fakahāhāloto hokohoko pea fetāʻaki he taimi ʻe niʻihi ʻi he ʻIunaiteti Siteití. Naʻe aʻu foki ki he tumutumú ʻa e ngaahi fekeʻikeʻi fakamatakalí ʻi he fonuá, pea naʻe lahi fau ʻa e ngaahi fetāʻakí ʻi he ngaahi kolo lalahí.
Naʻe hohaʻa ʻa e palōfitá ki he uesia ʻe he moveuveu ko ʻení ʻa e toʻu tupú. Naʻe loto-mamahi ha kakai kei talavou ʻi he ngaahi meʻa ʻoku hoko ʻi he māmaní, pea nau fehuʻia ai ʻa e tuʻunga moʻui mo e anga-fakafonua ʻo ʻenau mātuʻá mo e ngaahi kuí. Naʻe kamata ʻahiʻahiʻi ʻe he toʻu tupu tokolahi ʻa e ngaahi faitoʻo taʻe-fakalao fakatuʻutāmakí, kau ʻi he ngaahi angaʻuli fakasekisualé, mo fakaʻaongaʻi ʻa e ngaahi lea taʻefeʻungá.
Naʻe ʻofeina ʻe Palesiteni Makei ʻa e toʻu tupu ʻo e Siasí, pea naʻe ʻikai ke ne loto ke nau tō ki he tauhele ʻo e faʻahinga ākenga ko ʻení. Naʻá ne poupouʻi ʻa e toʻu tupu ʻo e Kau Māʻoniʻoni ʻi he Ngaahi ʻAho Kimui Ní ke nau kau atu ki ha ngaahi ako fakalotu ʻi he lolotonga ʻo e uiké—semineli pe ʻinisititiuti—ʻa ia te nau lava ai ʻo fakatupulaki ʻa e ngaahi ʻulungaanga faka-Kalaisí pea feohi foki mo e niʻihi ʻoku nau maʻu ʻa e tuʻunga moʻui mo e ʻulungaanga tatau. Naʻe toki faʻu ʻe he Siasí ha tohi tufa naʻe ui ko e Ki Hono Fakamālohia ʻo e Toʻu Tupú ke tokoni ki he kau talavoú mo e kau finemuí ke nau ʻilo, mahino pea moʻui ʻaki ʻa e ngaahi tuʻunga moʻui ʻa e Siasí ki he moʻui maʻá, teití, hulohulá, teuteú mo e ʻulungāngá. Ka naʻá ne tui ʻoku ʻi ai foki mo e fatongia ʻa e mātuʻá mo e kau takimuʻa ʻo e Siasí ke akoʻi mo fakahaaʻi ki he toʻu tupú ʻe lava ke ʻomi ʻe he moʻui angatonú ʻa e fiefiá.
ʻI he konifelenisi lahi ʻo ʻOkatopa 1967, naʻe hoko ʻa e puke ʻa Palesiteni Makeí ke ʻikai ai ke ne lava ʻo fai ʻene leá ʻiate ia pē, ko ia, naʻá ne kole ki hono foha ko Lōpetí ke ne lau ia ki he Kāingalotú.
Naʻe lea ʻa e palōfitá ʻi he kamataʻanga ʻo e fakatahaʻanga ʻo e konifelenisí ʻo pehē, “ʻI heʻeku fakakaukau ki he kahaʻu ʻo e Siasí ni, ʻoku ou ongoʻi ʻoku ʻikai ha toe pōpoaki mahuʻinga ange ke fakahoko atu ka ‘ke mou taha,’ pea fakaʻehiʻehi mei he ngaahi meʻa te nau fakatupu ha vā kovi ʻi he kāingalotú.”
ʻI he ngaahi taʻu kimuʻa aí, kuo feinga ʻa e ngaahi ngāue fakafekauʻaki ʻa e Siasí ke fakatahaʻi ʻa e Kāingalotú ʻaki hano fakafekauʻaki ʻa e ngaahi polokalamá mo fakamamafaʻi ʻa e fatongia ʻo e lakanga fakataulaʻeikí, ʻapí mo e fāmilí. ʻI he taʻu ko iá, kuo hanga ai ʻe he fakafekauʻaki ʻa e Siasí ʻo ʻai ke tatau ʻa e ngaahi meʻa ʻi he ngaahi makasini fakavahaʻapuleʻangá pea fakafeʻiloaki ha naunau fakalēsoni pē ʻe taha. Koeʻuhí ko e tupulaki fakaemāmani lahí, naʻe toe ui ʻe Palesiteni Makei ha “kau fakafofonga fakavahefonua ʻo e Toko Hongofulu Mā Uá” ʻe toko onongofulu mā hiva ke tokoni ʻi hono akoʻi ʻo e kau palesitenisī fakasiteikí, pea tokoni ai ki hono fakalele ʻo e Siasí pea ke fakahoko maʻu pē foki ia ʻi he tapa kehekehe ʻo e māmaní.
ʻI he fehangahangai ʻa e Kāingalotú mo e ngaahi fekeʻikeʻi fakasōsialé mo e feliliuaki ʻa e ngaahi tuʻunga ʻulungāngá ʻi he sōsaietí, naʻe ʻamanaki ʻa Palesiteni Makei mo e kau taki māʻolunga kehe ʻo e Siasí ʻe tuku atu ʻe he ngaahi polokalama fakafekauʻakí ha pōpoaki ʻo e uouangatahá mo ha fakavaʻe tuʻumaʻu maʻá e kakaí ʻi he māmaní.
Naʻe talaange ʻe Palesiteni Makei ki he Kāingalotú, “ʻOku ʻi ai ha pole ʻoku tuʻunuku mai. ʻOku totonu ke hoko ko ʻetau kaveinga ʻa e taha ʻi he taumuʻá, ʻo fengāueʻaki lelei ʻa e taha kotoa ʻi he faʻunga ʻo e houalotu ʻa e Siasí ʻo hangē ko hono fakahā mai ʻe he ʻEikí.”
ʻI he taʻu tatau ko iá, naʻe tokangaʻi ai ʻe Huani Keuna ʻOke ha fānau fefine ʻe meimei toko valungofulu ʻi he Nofoʻanga ʻo e Fānau Paea ko Songiukí ʻi Soulu, Saute Kōlea. ʻI hono fakangāueʻi ia ke pule ʻi he nofoʻanga ʻo e fānau fefine paeá ʻi he 1964, naʻe ʻikai ke ne talaange ki he niʻihi Palotisani naʻa nau fakapaʻangá ko ha tokotaha ia ʻo e [Siasi ʻo Sīsū Kalaisi ʻo e] Kau Māʻoniʻoni ʻi he Ngaahi ʻAho Kimui Ní. Naʻe ʻikai ke fuʻu mahino lelei ʻa e Siasí ʻi Saute Kōlea. Ko hono moʻoní, ʻi hono papitaiso ʻo Keuna ʻOke ʻi he 1962, naʻe tuli ia mei he akoʻanga faka-Kalisitiane naʻá ne faiako aí.
Kuo aʻu ʻeni ki he meimei toko toluafe tolungeau ʻa e tokolahi ʻo e Kāingalotú ʻi Saute Kōleá. Naʻe kau ʻa Kimi Ho Siki ki he Siasí ʻi he taʻu 1951 lolotonga ʻene ako ʻi he ʻIunaiteti Siteití, ʻa ia ko e fuofua tokotaha Kōlea ia ke kau ki he [Siasi ʻo Sīsū Kalaisi ʻo e] Kau Māʻoniʻoni ʻi he Ngaahi ʻAho Kimui Ní. Kimuʻa peá ne pekia ʻi he taʻu 1959, naʻe foki atu ʻa Ho Siki ki Saute Kōlea, ʻo hoko ko ha palōfesa pea mo e tokotaha pule ʻi ha ʻunivēsiti, pea naʻá ne fakafeʻiloaki ʻa e ongoongolelei kuo fakafoki maí ki ha niʻihi ʻo ʻene fānau akó. Naʻe tokoni ʻa e kau ako ko ʻení fakataha mo e kau sōtia ʻAmeliká, ki he tupulaki ʻa e Siasí ʻi he fonuá. Naʻe pulusi ha tatau faka-Kōlea ʻo e Tohi ʻa Molomoná ʻi he taʻu 1967.
Neongo naʻe ʻikai ke fakahā ʻe Keuna ʻOke ki he niʻihi naʻa nau fakapaʻanga iá ʻene mēmipa ʻi he Siasí, ka naʻe ʻikai ke ne mā ʻi heʻene hoko ko ha [mēmipa ʻo e Siasi ʻo Sīsū Kalaisi ʻo e] Kau Māʻoniʻoni ʻi he Ngaahi ʻAho Kimui Ní. Naʻá ne hoko ko ha palesiteni Fineʻofa ʻi hono koló pea faiako ʻi ha kalasi Lautohi Faka-Sāpate ʻa e fānaú. Naʻá ne talitali lelei foki ʻa e ʻaʻahi mei he kāingalotu ʻo e Siasí ʻa ia naʻa nau fie tokoni ʻi he ʻapi nofoʻanga ʻo e fānau paeá. ʻI he ʻaho ʻe taha, naʻe telefoni atu ai ha sōtia ʻAmelika ko Sitenilī Polonisoni kia Keuna ʻOke. Ko ha mēmipa ia ʻo e [Siasi ʻo Sīsū Kalaisi ʻo e] Kau Māʻoniʻoni ʻi he Ngaahi ʻAho Kimui Ní ʻa ia naʻe vahe ke ngāue ʻi Soulu, pea naʻá ne fie ʻaʻahi ki he ʻapi nofoʻanga ʻo e fānau paeá ke fai ha ngaahi hiva ke fakafiefiaʻi ʻa e fānaú.
Naʻe haʻu ʻa Siteni hili ha ngaahi ʻaho siʻi mei ai. Naʻe meimei fute ʻe ono mo e konga hono māʻolungá pea naʻe lōloa ia ʻi he taha kotoa. Naʻe fiefia ʻa e fānau fefiné ke fanongo ki heʻene hivá. Kuó ne hiki ha ʻalapama hiva kimuʻa pea ui ia ki he ngāue fakakautaú, pea naʻá ne ʻamanaki atu ke lekooti ha ʻalapama ʻe taha ʻi heʻene ʻi Saute Kōleá.
Naʻe talaange ʻe Keuna ʻOke kia Siteni hili ʻenau fakatahataha maí, “Kimuʻa peá ke tā hoʻo kītaá, kuo teuteu ʻe he fānaú ha meʻa maʻau.”
Naʻá ne faʻa tuku ki he fānau fefiné ke nau hiva ki he kau ʻaʻahí, pea kuo nau taukei ʻi he hivá. ʻI heʻenau hivaʻi ha ngaahi hiva kia Sitení, naʻe ofoofo ʻa Siteni. Naʻe mālie ʻaupito ʻenau hiva fakafaʻahí.
Naʻe kamata leva ke toutou ʻaʻahi ʻa Siteni ki he ʻapi nofoʻanga ʻo e fānau paeá ke hiva mo e fānau fefiné. Naʻe ʻikai fuoloa, kuó ne fokotuʻu ange ke nau lekooti fakataha ha foʻi ʻalapama, pea ʻe tokoni ʻa hono fakatau atu ʻo e hivá ki he nofoʻangá.
Naʻe saiʻia ʻa Keuna ʻOke ʻi he foʻi fakakaukau ko iá. Kuó ne tukupā ʻi heʻene hoko ko ha finemuí ke ngāue mateaki ʻi hono ʻai ke lelei ange ʻa e māmaní. Ko ha tokotaha kumi hūfanga ia mei Noate Kōlea, naʻe mole ʻene tamaí ʻi heʻene kei siʻí pea naʻá ne ʻiloʻi ʻa e faingataʻa ki he fānau fefiné ke lavameʻa ʻi Kōleá taʻe ʻi ai ha poupou mālohi mei he fāmilí mo e koló. Naʻe siolalo ha kakai tokolahi ʻi he fonuá ki he fānau fefine paeá pea naʻe ʻikai ha ʻamanaki te nau lavameʻa. Ke lava ʻa Keuna ʻOke ʻo akó, naʻá ne fefaʻuhi mo e masivá mo e mole ʻene mātuʻá mo hono ʻapí. Naʻá ne ʻamanaki ʻe hoko ʻene hiva mo Sitení ke tokoniʻi ai ʻa e fānau fefine ʻokú ne tokangaʻí ke nau ʻiloʻi honau mahuʻingá—pea tokoni ki he kāinga kehe ‘i Kōleá ke nau fakatokangaʻi ia.
Naʻe ʻiloʻi ʻe Siteni ha fale hiki hiva, pea ʻi he ngaahi māhina hokó, naʻe tokoni ʻa Keuna ʻOke kiate ia mo e fānau fefiné ke fakaangaanga mo lekooti ʻa e ngaahi hivá. ʻI hono ʻoange ʻe he sōtiá kia Siteni ha ʻaho mālōlō ʻe tolungofulu mei he ngāué, naʻá ne foki ki ʻapi ki he ʻIunaiteti Siteití peá ne hiki ʻa e ngaahi lekōtí ki ha ‘ū peleti kalamafoni. Naʻá ne foki leva ki Kōlea pea fokotuʻutuʻu ke hiva mo e fānau fefiné ʻi ha polokalama makehe ʻa ha televīsone ʻAmelika manakoa naʻe lolotonga lekooti ai.
Naʻe aʻu mai ʻa e ʻalapamá, ko e Daddy Big Boots: Stan Bronson and the Song Jook Won Girls, (Ongo Puti ʻa Tetí: Siteni Polonisoni mo e Tamaiki Fefine Songi Suki Uoní) ki Soulu ʻi he konga kimuʻa ʻo e taʻu 1968. Naʻe fiemaʻu ʻe Keuna ʻOke ke hoko ʻa hono tuku atu ʻo e ʻalapamá ko ha meʻa lahi ʻi Kōlea, ko ia naʻá ne fakaafeʻi leva ʻa e palesiteni ʻo Saute Kōleá, ko e ʻamipasitoa ʻo e ʻIunaiteti Siteití, mo e komanitā ʻo e kongakau ʻa e Ngaahi Puleʻanga Fakatahataha ʻi Kōleá ke nau kau ki he fakafiefia ʻo hono tukuange ʻo e ʻalapamá ʻi ha ʻapiako māʻolunga fakalotofonua maʻá e fānau fefiné. Ko e ʻamipasitoá pē naʻe lava ʻo kau maí, ka naʻe ʻomi ʻe he niʻihi kehé honau fakafofonga, pea naʻe ola lelei ʻa hono tuku atu ʻo e ʻalapamá.
Naʻe ʻikai fuoloa, kuo fuʻu manakoa ʻaupito ʻa e kau hiva mei he Nofoʻanga ʻo e Fānau Paea Songiukí.
Lolotonga iá, ʻi he ʻIunaiteti Siteití, naʻe maʻu ʻe Tulumani Mateseni, ko ha palōfesa filōsofia ʻi he ʻUnivēsiti Pilikihami ʻIongí, ha fakamatala mei hono kaungāngāue ko Lisiate Pusimaní, ko ha palōfesa ʻi he vaʻa hisitōliá. Naʻe hohaʻa ʻa Lisiate koeʻuhí ko ha fakamatala fakaako naʻá ne toki lau. Naʻe faʻu ia ʻe Uesilē Uolotā, ko ha faifekau Pelesipiteliane ʻi he hihifo-lotoloto ʻo e ʻIunaiteti Siteití. Naʻá ne pehē kuó ne fakahalaʻi ʻa e ʻUluaki Mata Meʻa-hā-mai ʻa Siosefa Sāmitá.
ʻI he ngaahi taʻu kuohilí, kuo feinga ha kakai ke fakatupu ha veiveiua ʻi he hisitōlia toputapu ʻo e Siasí, ʻoku nau fakaʻaongaʻi he taimi lahi ʻa e ngaahi fakamatala ʻoku ʻikai fakamoʻoniʻi. Ka naʻe kehe ʻa e fakamatala ko ʻení. Naʻe talaange ʻe Lisiate kia Tulumani, “Ko ha fakamatala kuo hiki lelei pea kuo fai ha ngaahi fakatotolo ki ai. Ko hono moʻoní, naʻe tui ha kaungāngāue ʻe taha ʻe ala hoko ia ko ha fakamanamana fakatuʻutāmaki moʻoni ki he tui ʻa e Kāingalotú.
Naʻe ʻave ʻe Lisiate ha tatau ʻo e fakamatalá kia Tulumani. Naʻe fakatokangaʻi ʻe Uesilē Uolotā he ʻikai ke ne lava ʻo fakaʻikaiʻi fakahangatonu naʻe mamata ʻa Siosefa Sāmita ki he Tamaí mo e ʻAló ʻi he faʻahitaʻu failau ʻo e 1820, ko ia naʻá ne fakatotoloʻi ai ʻa e fakamatala ʻa e palōfitá fekauʻaki mo e feituʻu fakahisitōlia ʻo e ʻUluaki Mata Meʻa-hā-maí.
ʻI he ngaahi taʻu lahi, ko e fakamatala pē ʻe ua kuo ʻilo ʻe he Kāingalotu ʻo e Siasí naʻe hiki ʻe Siosefa kau ki he mata meʻa-hā-maí. Ko e fakamatala ʻoku ʻilolahia tahá, naʻe kamata ʻi he 1838, ʻoku maʻu ia ʻi he Mataʻitofe Mahuʻingá. Ko e fakamatala ʻe tahá kuo pulusi ia ʻi he Times and Seasons, ko ha nusipepa ʻa e Siasí, ʻi he konga kimuʻa ʻo e 1840 tupú. Neongo ia, ka kuo toki ʻiloʻi kimuí ni ʻe ha tokotaha naʻe ʻosi mei he ʻUnivēsiti Pilikihami ʻIongí pea ko ha tokotaha tauhi tohi ʻākaivi ʻa e Siasí, ha ongo fakamatala kimuʻa ange ʻo e ʻUluaki Mata Meʻa-hā-maí ʻi he tauhiʻanga naunau ʻa e Siasí ʻo e ngaahi pepa ʻa Siosefa Sāmitá.
Kuo vakaiʻi fakalelei ʻe Uesilē ʻa e ngaahi fakamatala ʻe faá ke fakaʻaliʻali ha ngaahi meʻa ʻoku fepakipaki fakahisitōlia ʻiate kinautolu. Pea ʻi heʻene vakaiʻi ʻa e fakamatala ʻa e palōfitá naʻe tupu mei he ngaahi fakaake ʻo e lotú fakalotofonuá ʻa e fekumi [ʻa e palōfitá] ki he ʻEikí ʻi he faʻa lotú, naʻe ʻilo ai ʻe Uesilē naʻe ʻikai ha fakamoʻoni ʻo ha faʻahinga fakaake ʻo e lotú ne ofi ki he ʻapi ʻo Sāmitá ka naʻe toki ʻi ai ia ʻi ha meimei taʻu ʻe nima hili ʻa e ʻUluaki Mata Meʻa-hā-maí. Naʻe fakaʻuhingaʻi ʻeni ʻe Uesilē, ko ha faʻufaʻu pē ʻe Siosefa Sāmita ʻene talanoá.
Naʻe fakapapauʻi ʻe Tulumani naʻe hala ʻa e ngaahi meʻa naʻe ʻiloʻi ʻe Uesileé. Ka koeʻuhí naʻe siʻisiʻi ʻa e ngaahi fakatotolo fakahisitōlia kuo fai ki he ʻUluaki Mata Meʻa-hā-maí pea mo e kamataʻanga ʻo e Siasí, naʻe ʻikai ha founga ke ne fakamoʻoniʻi ʻaki ia. ʻI he hoko [ʻa Tulumani] ko ha palesiteni misiona mālōloó, naʻá ne ʻiloʻi kuo tokolahi ha kakai kuo nau tali ʻa e ongoongolelei kuo fakafoki maí koeʻuhí ko e fakamoʻoni mālohi ʻa e palōfitá ki heʻene mātā ʻa e Tamaí mo e ʻAló. ʻOku hangē ʻa e fakafepaki ko ʻeni ki he ʻUluaki Mata Meʻa-hā-maí ko ha fakafepaki ki he fakavaʻe totonu ʻo hono Fakafoki Mai ʻo e Ongoongoleleí.
Hili hono lau ʻe Tulumani ʻa e fakamatalá, naʻá ne tānaki mai ha kulupu tokosiʻi ʻo e kau faihisitōlia ʻi Sōleki Sití. Naʻe tokaʻi kotoa kinautolu ko e kau ako mataotao mo e kau mēmipa mateaki ʻo e Siasí. ʻI heʻenau aleaʻi ʻa e fakamatala ʻa Uesileé, naʻa nau fakatokangaʻi te nau lava ʻo fakaʻaongaʻi ʻenau taukei fakaakó ke tokoni ki he Siasí. Naʻa nau fiemaʻu mo e kakai kehe naʻe tuí ke toe fakatotolo foʻou ʻa e hisitōlia ʻo e Siasí ʻo kamata mei he kamataʻangá. He ʻikai lava ʻo fakafepakiʻi ʻa e fakamatala ʻa Uesilē Uolotā fekauʻaki mo e ʻUluaki Mata Meʻa-hā-maí kae ʻoua kuo nau fakahoko [ʻa e fakatotoló].
Naʻe fokotuʻutuʻu ʻe he kulupú ha kōmiti, ʻo taki ai ʻa Tulumani, ke poupouʻi ʻa e kau mataotao ʻo e Kau Māʻoniʻoni ʻi he Ngaahi ʻAho Kimuí Ní ke nau ako ʻa e hisitōlia ʻo e Siasí ʻi he kamataʻangá. Ke tali ki he fakamatala ʻa Uesileé, naʻe fokotuʻu ʻe he kōmití ke ʻave ha kau faihisitōlia ʻe toko nima ki he fakahahake ʻo e ʻIunaiteti Siteití ke fakatotolo ʻa e ngaahi fakaake fakalotú mo e ʻUluaki Mata Meʻa-hā-maí. Meʻapangó, naʻe ʻikai haʻanau paʻanga feʻunga.
Naʻe fuofua feinga ʻa e kōmití ke tānaki ha paʻanga ki he fakatotoló mei he kau tokoni fakatāutahá. ʻI heʻenau ʻiloʻi naʻe ʻikai ke fuʻu ola leleí, naʻe fetuʻutaki leva ʻa Tulumani ki he Kau Palesitenisī ʻUluakí. Kuo poupouʻi ʻe Palesiteni Makei mo hono ongo tokoní ʻa e ngaahi ngāue kehe ke ako mo paotoloaki ʻa e hisitōlia ʻo e Siasí. Hangē ko ʻení, ʻi he ngaahi taʻu kimuʻá, naʻa nau tokoni fakapaʻanga ki hono fakatau mai mo tauhi ʻa e ngaahi ʻapi fakahisitōlia ʻi Nāvū, ʻIlinoisí, ʻa e ʻuluʻi ʻōfisi ʻo e Siasí mei he taʻu 1839 ki he 1846.
Naʻe saiʻia foki ʻa e Kau Palesitenisī ʻUluakí ʻi he ngaahi kongokonga ʻo e ngaahi pepa kiliʻi kaho ʻa Siosefa Sāmitá. Naʻe fokotuʻutuʻu ʻe Palesiteni N. ʻElatoni Tena ʻi heʻene ngāue vāofi mo ʻAsisi ʻAtia mo e Misiume Metulōpoliteni ʻo e ʻĀtí, ke fakafoki ʻa e pepa kiliʻi kahó ko ha meʻaʻofa ki he Siasí. Naʻe lipooti ʻa e ngāue ko ʻení ʻe he ngaahi nusipepa ʻi he ʻIunaiteti Siteití, pea fai ai ʻe he Siasí ha fakataha mo e kau faiongoongó ʻo pulusi ha ngaahi ʻīmisi ʻo e ngaahi konga tohí ʻi he Improvement Era. ʻI hono kole ʻe he Kau Palesitenisī ʻUluakí, naʻe nō atu ʻa e ngaahi konga tohí kia Hiu Nipilī, ko ha palōfesa ʻi he ʻUnivēsiti Pilikihami ʻIongí, ke ako lahi ange ki ai. Naʻe maʻu ʻe Hiu, ko e tokotaha fekumi mataotao ʻa e Siasí ʻi he ngaahi meʻa ʻo onoʻahó, ha fakamoʻoni fakahisitōlia mālohi ʻokú ne poupouʻi ʻa e moʻoni ʻo e Tohi ʻa Molomoná pea naʻá ne fakapapauʻi ke fai ʻa e meʻa tatau mo e Tohi ʻa ʻĒpalahamé.
Naʻe kole ʻe Tulumani ʻi ha tohi ʻi he faʻahitaʻu failau ʻo e 1968 ki he Kau Palesitenisī ʻUluakí ha $7,000 ke fakapaʻanga ʻaki ʻa e ngaahi folau fakatotoló. Naʻá ne talaange, “Kuo fakafepakiʻi lahi fakahisitōlia ʻa e ʻUluaki Mata Meʻa-hā-maí. ʻOku mahuʻinga ʻa e taimí.”
Naʻe tomuʻa fakakaukau ʻa e Kau Palesitenisī ʻUluakí ke ʻoua naʻa fakapaʻanga ʻa e ngāué. ʻI he ngaahi taʻu kimui ní, kuo fakamoʻua ʻa e Siasí ke langa ha ngaahi falelotu lahi ange ʻi he funga ʻo e māmaní, pea talu mei ai mo e tokanga ange ʻa e kau takimuʻa ʻo e Siasí ki he ngaahi fakamolé.
Ka naʻe vilitaki pē ʻa Tulumani. Naʻá ne toki feʻiloaki mo Uesilē Uolotā ʻi ha konifelenisi ʻi he hisitōlia ʻo e Siasí, pea naʻá ne ongoʻi ai ʻa e feinga ʻa e faifekaú ke fakahalaʻi ʻa Siosefa Sāmitá.
Naʻe talaange ʻe Tulumani ki he Kau Palesitenisī ʻUluakí, “Te ne fai ha meʻa pē ke ne ʻuluaki maʻu ʻa e ngaahi maʻuʻanga fakamatalá. ʻOku mau ongoʻi ʻoku ʻikai fakapotopoto ke toloi ʻa e ngāue ko ʻení.” Naʻá ne kole heni ha $5,000.
Naʻe toe fakakaukauʻi ʻe Palesiteni Makei mo hono ongo tokoní ʻa e kole ko ʻení pea nau loto ke fakapaʻanga ʻa e kau fakatotolo mataotaó.
ʻI ha efiafi māfana ʻi Sepitema ʻi he konga kimui ʻo e taʻu ko iá, naʻe heka toko taha atu ai ʻa Maeta Holitei, taʻu hongofulu-ma-fā, ʻi ha pasi ki Fulatoni, ko ha kiʻi kolo ʻi Losi ʻEniselesi, Kalefōnia. Naʻá ne vakai atu ki tuʻa ʻi he matapā sioʻatá ki he ʻulu moli ʻi he ongo tafaʻaki fakatouʻosi ʻo e halá, ko ha fōtunga kehe ʻaupito mei hono ʻapi ʻi he toafá ʻi he kauʻāfonua ʻo ʻIutā mo ʻAlesoná.
Ko Maetá ko ha Tinei, ko ha fefineʻi fonua ʻo e Puleʻanga Navahoó. Kuó ne tupu hake ʻi ha ʻēlia kuo tuku makehe maʻá e Tangataʻi Fonua Totonu ʻo ʻAmeliká ʻi loto ʻi he ngaahi moʻunga toputapu ʻe faá, ʻoku nau fakaʻilongaʻi ʻa e fakangatangata tukufakaholo ʻo e ʻapi tupuʻa ʻa hono kakaí. ʻI he senituli hongofulu-mā-hivá, kuo fokotuʻu ai ʻe he Puleʻanga ʻAmeliká ʻa e konga fonua tuku makehé mo e ngaahi feituʻu kehe mei he ngaahi kelekele naʻa nau faʻao mei he ngaahi kulupu Tangataʻi Fonua Totonu ʻo ʻAmeliká hangē ko e Navahoó ke fakaʻataʻatā ha feituʻu moʻó e kau nofo fonua pālangí, kau ai ʻa e Kāingalotu ʻo e Siasí. Naʻe faingataʻaʻia ha ngaahi fāmili tokolahi ʻi hono fakamālohiʻi ke nau nofo ʻi he ngaahi kelekele masivesiva kuo tuku makehé.
Naʻe lahi ʻa e konga fonua tuku makehe ʻo Navahoó ʻa ia naʻe nofo ai ʻa Maetá, pea naʻe nofo fevāmamaʻoʻaki ʻa e kakaí, ʻo faingataʻa ai hono ʻave mo fakafoki mai ʻo e fānaú mei he akó. Lolotonga iá, ko e ngaahi ʻapiako nofo-maʻu naʻe fakapaʻanga ʻe he Puleʻangá, naʻe faʻa fuʻu tokolahi pea ʻikai lahi hono fakapaʻangá. ʻI he ngaahi tūkunga ko ʻení, naʻe tokolahi ha ngaahi mātuʻa Tangataʻi Fonua Totonu ʻo ʻAmelika, naʻa nau fāifeinga ki he fakalakalaka ʻa e moʻui ʻo ʻenau fānaú ʻo nau ʻave ai ʻa e fānaú ki he ngaahi ʻapiako mavahe mei he konga fonua kuo tuku makehé.
Naʻe haʻu ʻa Maeta ki Kalefōnia ko e konga ʻo e Polokalama Fakafetongi Fānau Ako ʻInitia ʻa e Siasí, pea naʻá ne fononga ke nofo mo ha fāmili pālangi naʻe teʻeki ke ne fetaulaki mo kinautolu. Naʻe kau ʻa e ngaahi taʻokete ʻo Maetá ʻi he polokalamá, pea naʻá ne fakaʻamu ke fai ʻa e meʻa tatau. Neongo naʻá ne vēkeveke ke lesisita, ka naʻá ne tailiili fekauʻaki mo e fāmili foʻou te nau ohi iá.
Naʻe fokotuʻu ʻa e polokalama fakafetongí ʻi he taʻu 1954, ʻi hono tataki ʻe ʻEletā Sipenisā W. Kimipolo. Hangē ko e Kāingalotu tokolahi ʻo e Siasí he taimi ko iá, naʻá ne fakakaukau ko e Tangataʻi Fonua Totonu ʻo ʻAmeliká, ko ha hako tonu kinautolu ʻo e kakai ʻi he Tohi ʻa Molomoná. Naʻá ne tui ʻoku ʻi ai ʻa e fatongia ʻo e kāingalotu ʻo e Siasí ke tokoni ki honau ngaahi tuongaʻane mo e tokoua Leimaná ke nau maʻu ʻa e ngaahi faingamālie fakaakó pea fakakakato honau ikuʻanga fakalangi ko ha kakai ʻo e fuakavá
ʻI he polokalama ko ʻení, naʻe mavahe ai ʻa e fānau Tangataʻi Fonua Totonu ʻo ʻAmeliká mei honau ngaahi ʻapi ʻi he konga fonua naʻe tuku makehé ke nofo mo e ngaahi fāmili naʻe kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, lolotonga ʻa e taʻu fakaakó. Naʻe fakataumuʻa ʻa e polokalamá ke lava ʻa e fānau akó ʻo ako ʻi ha ngaahi ako lelei ange pea aʻusia ʻa e ngaahi ʻapi ʻoku fakatefito ʻi he ongoongoleleí. ʻI he taʻu 1968, naʻe meimei toko toluafe ʻa e fānau ako mei ha ngaahi haʻa ʻe onongofulu-mā-tolu naʻe ʻave ki ha ngaahi ʻapi ʻi Kānata mo e ngaahi vahefonua ʻe fitu ʻi he ʻIunaiteti Siteití. Neongo naʻe Siasi kotoa ʻa e fānau ako fakafetongí, ka naʻe ʻi ai hanau niʻihi naʻe ʻikai ke nau loko kau ki he ngaahi meʻa faka-Siasí kimuʻa pea nau kau mai ki he polokalamá.
Naʻe fanongo ʻa Keleni Veni Uēkeneni, ʻa ia naʻá ne tataki ʻa e polokalamá ʻi Saute Kalefōniá, fekauʻaki mo Maeta lolotonga ʻa e nofo ʻa Maeta mo ha fāmili ʻi Kanapa, ʻIutā. Naʻe saiʻia ʻa Maeta ʻi he nofo mo kinautolú pea naʻá ne maheni lelei mo hona ʻofefiné. ʻI hono fakaafeʻi ʻe Keleni ʻa Maeta ke kau ʻi he polokalama akó ʻi Kalefōniá ʻi he kamata ʻo ʻene foomu tolú, naʻá ne tali fiefia ʻa e fakaafé.
Ko Maeta ko e siʻisiʻi taha ia ʻi he ngaahi ʻofefine ʻe toko ono ʻo Kalavini Holitei mo ʻEvelini Kelengí. Naʻe kau ʻene mātuʻá ki he Siasí ʻi he kamakamata ʻo ʻena nofo-malí, ka naʻe ʻikai ke na toe tokanga ki ai kimui ange. Neongo naʻe papitaiso ʻa Maeta ʻi hono taʻu valú, ka naʻe ʻikai ke ne ʻalu maʻu pē ki he lotú, pe mahino kiate ia ʻa e mahuʻinga ʻo hono papitaiso iá. ʻI hono fiemaʻu ke fakalakalaka ʻa e ako ʻa Maetá, naʻe fakahū ia ʻe heʻene mātuʻá ʻi he ngaahi ʻapiako nofomaʻu maʻá e Tangataʻi Fonua Totonu ʻo ʻAmelika ʻi ʻAlesoná ʻi heʻene fuʻu lahi feʻungá, ko ia ai naʻe lahi ʻene hiki holó.
Naʻe ʻiloʻi ʻe Maeta ha ngaahi fāmili ʻi he konga fonua tuku makehé ʻa ia naʻe feʻofaʻaki ʻa e ongomātuʻá pea fiefia ʻa e fānaú. Ka naʻe ʻikai kau ai hono fāmilí. Hili ʻa e vete-mali ʻene mātuʻá, naʻe tuʻo ua ‘a e toe mali ʻene faʻeé. Naʻe toe ʻi ai ha fānau ʻe toko ono ʻa e faʻē ʻa e Maetá mei he ongo mali ko ʻení, pea ʻi he lahi ʻene mamaʻo mei ʻapí, naʻe pau ai ke tokangaʻi ʻe Maeta ʻa e fānau naʻe iiki ange aí. Naʻe tuʻo lahi hono liʻaki ʻo Maeta mo e toenga ʻo e fānaú ʻo laulau ʻaho ʻo ʻikai siʻanau meʻatokoni mo e vai feʻunga. Naʻá ne fai hono lelei tahá ke fafanga ʻa e fānaú, ko e taimi ʻe niʻihi naʻe fafanga ʻaki ʻa e sipi naʻe mafu mo e ʻū meʻakai kapa.
ʻI ha ʻaho ʻe taha, naʻe fakapaku keke ʻa Maeta ʻi tuʻa, naʻe sio atu ʻene faʻeé ʻo pehē atu, “Ko e meʻa pē taha te ke ʻaonga ki aí ko e fakafanau.” Naʻe mamahi ʻa e loto ʻo Maetá. ʻI he momeniti ko iá, naʻá ne tukupā ʻi hono lotó, “te u fai ha meʻa ke u lavameʻa ai.”
ʻI he tūʻuta ʻa Maeta ʻi he tauʻanga pasi ʻi Saute Kalefōniá, naʻá ne ongoʻi fiemālie ke mavahe mei heʻene faʻeé. Ka naʻá ne tailiili ʻi heʻene vakai atu ki ha ongomeʻa ʻikai ke fuʻu matuʻotuʻa ʻokú na hū mai ʻi he matapaá. Naʻá ne fakakaukau, “Te na hoko ko ʻeku ongomātuʻa foʻoú.”
Naʻe anga fakalongolongo mo mā ʻene tamai naʻá ne pusiaki iá ko Sipenisā Pelekí. Naʻe fakafeʻiloaki ʻa Maeta kiate ia ʻi he loto-taʻepauʻia, he kuo ngaohikovia [ʻa Maeta] ʻe he kakai tangata kuó ne ʻiloʻi ʻi heʻene moʻuí. Neongo iá, ka naʻe maʻu ʻe heʻene faʻē ohi ko Vená, ha laumālie fakafiemālie.
Naʻá na ʻomi ʻa Maeta ki hona ʻapí, ʻo ne feʻiloaki ai mo ʻena fānaú, ko Lusi naʻe taʻu hongofulu-mā-nima mo Leli naʻe taʻu hongofulu-mā-tolu. Naʻe ʻi ai foki mo ha fānau lalahi ange ʻa e fāmili Pelekí kuo nau hiki atu mei ʻapi. Naʻe kamata ke angai ʻa Maeta ki hono ʻapi foʻoú, naʻe lahi ʻa e tafuʻanga afí pea ʻi ai mo ha ngoue naʻe fonu ʻi he matalaʻiʻakaú. Naʻe tautefito ʻene fiefiá ʻi heʻene loki toko tahá, he ko e talu ʻene tupu mo ʻene loki fakataha pē mo hono ngaahi tehiná.
Ka naʻe ʻikai ke fiemālie kakato ʻa Maeta. Naʻe fuʻu longoaʻa ʻa e loto koló pea ʻuli mo e ʻeá. Pea neongo naʻe manavaʻofa ʻa e ongomātuʻa naʻá na ohi iá, ka naʻe fakakaukau ʻa Maeta pe naʻá na fakaʻaongaʻi pē nai ʻena manavaʻofá ke kākaaʻi ia ke ne fai ʻa e ngaahi ngāue fakaʻapí, ʻo hangē ko ia naʻe faʻa fai ʻe heʻene faʻeé kiate ia he taimi ʻe niʻihi.
Naʻe ʻikai ke ne fakatomala ʻi heʻene haʻu ki Kalefōniá, ka naʻá ne manatu ʻofa ki he lōngonoa ʻo hono fonua totonú ʻi heʻene tokoto ʻi hono mohengá ʻi he pō ko iá, ʻo hohaʻaʻia ʻi he longoaʻa ʻo e feleleaki ʻa e ʻū meʻalelé ʻi he hala lahí.