Mataupu 30
Faamanuiaga Taua
I le po o le aso 4 Oketopa, 1997, ao faia le sauniga perisitua o le konafesi aoao, na saunoa Peresitene Hinckley i le fausaga fou o malumalu ma ia talanoa mai ai i le fuafuaga a le Ekalesia e faaaoga le mamanu mo le tele o malumalu i le salafa o le lalolagi.
“Ua matou naunau,” na ia tautino mai, “e avatu malumalu i tagata ina ia latou maua ai avanoa uma mo faamanuiaga taua e maua mai i le tapuai i le malumalu,”
O Richard “Rick” Turley, le pule faatonu o le Matagaluega o Talafaasolopito o Aiga a le Ekalesia, na malamalama o nei malumalu fou o le a manuia ai le Ekalesia ma fesoasoani i le Au Paia i le lalolagi atoa e o mai ia Keriso. Ae sa toetoe le mafai e le matagaluega na sapalai ia lava igoa mo galuega o sauniga sui mo malumalu uma e limasefulu tasi o faaaoga nei. Atoa ai ma malumalu ua vave nei le fausiaina, o le Ekalesia ua tatau na suia le tulaga o i ai le talafaasolopito o aiga.
O le vaega o le faafitauli, na iloa e Rick ma isi taitai o le Ekalesia, o le sauniaina o igoa mo galuega i le malumalu e alu ai se taimi umi toe taugata. I nisi atunuu, o tagata o le Ekalesia e malaga i se mamao sili atu e saili igoa o o latou tuaa i faamaumauga o teuina ai. O isi tagata o le talalelei e saili i se taimi umi ma faigata mo faamatalaga latou te manaomia. Afai e le o iai sao le ata matamata ninii i le vaega autu o le latou talafaasolopito o aiga i le lotoifale, o le a latou totogiina ina ia lafo atu, faatali mo le tele o vaiaso e taunuu mai ai, ona toe foi atu lea i le vaega autu e iloilo ai. O le lola masani e taofia e tusa ma le afe ata, o le feaveai e ala i tagata taitoatasi o le a faigata. E laitiiti lava tagata e maua le taimi mo mea uma ia—ma e le o tagata uma foi e nonofo latalata i le vaega autu o talafaasolopito o aiga.
O lau lava komepiuta na faavave ai nisi o nei galuega i le 1980. I le amataga o le sefulu tausaga, o tagata o le Ekalesia na fauina polokalama ma fatuina Faila mo Tupuaga Patino, o se polokalama i le komipiuta e faatagaina tagata i faamaumauga, teuina, ma faasoa faamatalaga e uiga i o latou tuaa ma fausia se gafa o le aiga. Na faafaigofieina foi e le polokalama mo le selau o afe o tagata faaaoga e tuuina mai ai igoa i le malumalu e ala mai le TempleReady.
Ae peitai o le faagasologa o le auina atu e fai lava si lavelave, ae maise lava tagata e le o masani i le i ai o sana komepiuta. O tagata faaaoga o le PAF na fatuina la latou lava utuofaamatalaga, e masani na faaiu i le faaluaina o faamaumauga pe a tuuina atu e se tasi igoa o le aiga i le Ekalesia. Talu ai o nei faila e lei otometi lava na faafou pe a maea ona faia e se tasi galuega o le malumalu mo tuaa, e eseese lava tagata o le Ekalesia e masani ona faia sauniga mo le tagata lava e tasi ma lona le iloaina.
O ia faafitauli sa luitauina ai foi ia Peresitene Hinckley. O le lua tausaga talu ai, ina ua galue Rick i le Matagaluega o Talafaasolopito o Aiga, na valaau atu ai le perofeta ia te ia i se fono. Na ia fia malamalama pe o faia e le Ekalesia mea uma e faataunuu ai lana misiona o le togiola o e ua oti.
“Rick,” na saunoa atu ai le perofeta, “e mafai ona e faamautinoa mai ia te au o punaoa uma lava ua tatou tuuina atu i talafaasolopito o aiga ua faasaolotoina ai agaga mai le falepuipui o agaga?”
“Ou te manao e mafaufau ua tatou faia,” na tali atu ai Rick. Ae na ia talitonu e tatau na faaleleia le polokalama.
Sa malie i ai Peresitene Hinckley ma fai atu ia te ia e faaleleia.
Ma lenei poloaiga, na manaomia ai e le Matagaluega o Talafaasolopito o Aiga le fatuina o se auala faigofie e tuuina atu igoa mo galuega faalemalumalu—o se faagasologa e faigofie atu o le a toatele tagata e auai. O komepiuta o le a faavaveina le faagasologa o le sueina o faamatalaga o aiga mai faamaumauga ma faatulaga i utuofaamatalaga e mafai ona sueina. Ae ina ia taofia le faia faalua, o komepiuta e tatau na fesootai i le tasi ma le isi—o se mea e le o mafai ona faia e le polokalama i le taimi nei. O utuofaamatalaga e tatau na i ai i le initoneti.
I lea taimi, o le uepi i le lalolagi atoa na itiiti ifo ma le sefulu tausaga, ma le Ekalesia ua na o sina mea itiiti o i ai i le initoneti. Na faalauiloaina le uepisaite e aunoa ma se faatupulaia i le 1996, ma nisi taitai o le Ekalesia na tumau pea le masalosalo i tekinolosi fou ma sa laitiiti le iloa i ai. O le Matagaluega o Talafaasolopito o aiga sa le lava le tomai faatekinolosi e fauina ai se tulaga i le initoneti e manaomia e taofi ai utuofaamatalaga. Sa latou manaomia le fesoasoani—ma sa latou manaomia le taimi.
Ma ua amata ona alu le taimi. I le konafesi aoao ia Aperila 1998, na fofogaina mai e Peresitene Hinckley o le a fausia malumalu fou e tolusefulu o le a mulimuli i le fausaga fou, e faaopoopo atu i le sefulufitu malumalu ua fausia nei.
“O lenei mea o le a atoa i ai le fasefulufitu o malumalu fou e faaopoopo atu i le limasefulu-tasi o loo galueaina nei” na saunoa ai le perofeta. “Ou te manatu e sili ai ona tatou faaopoopo i ai le isi lua ina ia oo atu i le faaiuga o le seneturi, e lua afe i ai tausaga ‘talu ai le afio mai o lo tatou Alii ma le Faaola o Iesu Keriso i la le tino.”
“Ua tatou agai atu i se saoasaoa tatou te lei vaaia lava muamua,” sa ia saunoa ai.
O le faasilasilaga na musuia ai Rick. Ae o lenei ua i ai nei se faanatinati sili atu e faasaoasaoa le galuega a le talafaasolopito o aiga a le Ekalesia.
E le o toe mamao le tausaga 2000.
I le amataga o Aperila 1998, na o atu ai Felicindo ma Veronica Contrera i le Malumalu o Santiago Chile. O Felicindo faatoa valaaulia e auauna atu o se epikopo i le latou uarota, ma sa ia popole e uiga i le Au Paia oi lalo o lana tausiga. Sa maualalo pea le auai i le uarota. Sa ia manao e ole atu mo le fesoasoani a le Alii i le toe aumaia o tagata o lana uarota i le lotu.
Ao tatalo Felicindo, sa faapitoa lona naunau e fesoasoani i le autalavou. E toalaiti lava i latou e auai mai soo i le lotu, e ui lava o le sefulufa o i latou ua lava le matutua e o i le misiona, ae leai se tasi sa saunia e auauna atu. O i latou o se vaega tele o sitaili i Chile, lea e itiiti ifo i le sefulu pasene o alii talavou agavaa o loo i misiona, o se pasene maulalo atu i soo se eria i le lalolagi atoa. I lona loto, sa moomoo Felincido mo le autalavou e toe foi mai i le lotu ma sauniuni i latou lava mo le galuega faamisiona.
I se taimi puupuu mulimuli ane, na sau ai se alii e sefuluvalu tausaga le matua o Juan mo le taimi muamua i sauniga o le Aso Sa i se taimi umi. O Juan sa avea ma sui o le korama a ositaulaga, ae sa masani ona ia faamisi le lotu ina ia alu e taalo soka O se tagata taalo talenia—e lelei tele na manatu ai nisi tagata e mafai na taalo faapolofesa—ma o le taaloga e taua tele ia te ia. Ae talu ai nei, na ia lagona le tuuatoatasi, leai se malōlō, ma le le mautonu. Na musumusu atu le Agaga Paia ia te ia e toe foi i le lotu ma auauna atu i se misiona. Ae sa ia lagonaina le pei na te manaomia se taiala e fesoasoani ia te ia e faia se suiga i lona olaga.
I le lotu, na ia talosaga ai e fia talanoa ma Felicindo. “Ua ou filifili e toe toaga,” o lana tala lea.
“Sa ou faatali mo oe,” o le tala lea a Felicindo. Na ia valaaulia Juan i lona ofisa mo se faatalanoaga. Na la talanoa e uiga i le manao o Juan e sauniuni mo se misiona. I le iloaina o le galuega faafaifeautalai e manaomia ai alii ma tamaitai talavou e faafetauia ni tulaga faatonuina faapitoa faaleagaga, amioga lelei, faalelagona ma faaletino, na fesoasoani ai Felicindo ia te ia e fatu se polokalama.
“Muamua, o le a ta o muamua e saunia oe ia maua lou faamanuiaga faapeteriaka,” na ia fai atu ai ia Juan, “ina ia e iloa po o le a le mea e tau mai e le Alii ia te oe.” A uma lena, ona la galulue lea mo lana talosaga o le misiona. Na valaaulia e Felicindo o ia e faitau le Tusi a Mamona ma totogi lana sefuluai. Na talia e Juan le lu’i, ma mai lena lava taimi, sa la talanoa soo ai ma Felicindo e uiga i sauniuniga mo le misiona.
Sa galulue foi Felicindo ma isi tagata o le uarota. Sa faagaeetia o ia i le fautuaga a le Au Peresitene Sili e manaomia e tagata uma o le ekalesia ona i ai se uo, se tiutetauave, ma faafaileleina i le “afioga lelei a le Atua.” I le mulimulitaia o taiala fou mai le laumua o le Ekalesia, o ia ma faifeautalai faamisiona ua faia ia mautinoa ia auai atu tagata i le lotu faamanatuga ao lei auai i le Ekalesia. Sa faamautinoa foi e ia ma isi tagata o le uarota e lagona e tagata e o mai i le lotu le talisapaia ma foi atu i aiga ua fafagaina faaleagaga.
Ina ua ia toe valaaulia tagata e toe foi mai i le lotu, na faamalosiauina i latou e Felicindo e saunia e tagofia le faamanatuga ma faafou a latou feagaiga o le papatisoga. Na ia faiatu i tagata ua toe foi mai e auai i Mataupu Faavae o le Talalelei i vasega a le Aoga Sa e fesoasoani ia i latou e manatua aoaoga faavae e uiga i le Foafoaga, le Togiola a Iesu Keriso, salamo, ma isi mataupu faavae o le talalelei. Ma na ia maua ni auala mo i latou e auauna ai i le uarota.
Na ia faatulagaina foi mo le falelotu ia matala i le aluga o le vaiaso. Na ia maua foi le faatagaga e ki moli o le malae taalo i tua o le fale ia mafai ai na taaalo soka le autalavou ma isi taaloga i le po. Na amata na faaaoga e tagata o le au paia le falelotu mo afiafi faaleaiga ma isi gaoioiga, e pei o tala faatino ma polokalama o aganuu faaChile. Na fesoasoani Felicindo e faatulaga le aufaipese a le uarota, ma o a latou musika na faaopoopoina ai le Agaga i le sauniga faamanatuga.
Ao faaaluina le tele o taimi o tagata o le uarota i le falelotu, ua amata ona latou tausia faalelei foi, ma na tupu ae lo latou alofa i le fale E lei leva, ae vaaia e Felicindo le faaleleia o le auai i le lotu faamanatuga. Na ia talitonu o nei suiga o tali i lana tatalo i le malumalu.
O ni nai masina mulimuli mai, i le ogatotonu o le 1998, na malaga atu ai Mary McKenna, o se faifeautalai ua maea mai Perisipeni, Ausetalia, i Provo, Iuta, e aoao atili e uiga i le Especially for Youth, o se konafesi e lima aso mo le autalavou laiti a le Au Paia o Aso e Gata Ai i le Iunaite Setete. E tele mea na faalogo i ai Mary e uiga i le EFY i le tausaga na muamua atu ao auai i le Education Week—o se faasologa o vasega, faigalotu, ma isi gaoioiga mo tagata matutua ma tupulaga talavou na faia i tausaga taitasi i le lotoa o le Iunivesite o Polika Iaga.
I lana asiasiga na muamua atu, sa ia auai ai i se vasega na aoaoina e Brad Wilcox, o se failauga ma se tusitala lauiloa i le autalavou laiti e tautatala Faaperetania o le Au Paia o Aso e Gata Ai. Ina ua uma le vasega, sa faatali o ia e talanoa ma ia e uiga i le Education Week.
“Atonu o se mea matuai faavalevalea lava lenei,” na ia fai atu ai, “ae o au o se taitai o le autalavou i Ausetalia, ma matou te manaomia le mea o loo ia te outou.”
I le senituri ma le afa talu na faatulaga le paranesi muamua i Ausetalia ua tupu nei le Ekalesia i le toeitiiti selau afe tagata o le au paia. Na i ai siteki i le toeitiiti o aai tetele uma o Ausetalia ma se malumalu i Sini. Ae e toatele le autalavou o loo tauivi pea, ma o nisi ua le o i misiona, le faaipoipo i le malumalu, pe toaaga pea i le Ekalesia. Ua latou lagona le motusia mai le tasi ma le isi ma manaomia ni tagata e faataitai i ai o e e mafai ona faaali atu ia i latou le ala e faalatalata atu i le Atua ma ola i Ana poloaiga.
Ao faalogologo atu Brad i le tala a Mary e uiga i luitau o le autalavou laiti i Ausetalia, sa melo tagi o ia, ma ia tau atu ia te ia le tele o mea e uiga i le EFY. E pei o konafesi masani a le autalavou a le siteki, o le EFY na mamanuina e faamalosia ai le faatuatua o tagata talavou laiti. Ae nai lo le faatinoina e siteki i le lotoifale, sa lagolagoina e le BYU ae vaavaaia e faufautua o talavou matutua nofofua. I le faalogo atu o faamatala e Brad le fiafia sa i ai i le autalavou, sa lagona e Mary o se aafiaga faapea pei o le EFY o le a fesoasoani i tamaitai ma alii talavou Ausetalia.
Sa ia faaaluina ni nai masina na sosoo ai e galue ia faia ia avea le manatu ma mea moni. Sa lagolagoina e taitai o le Ekalesia i totonu ma le faataamilosaga o Perisipeni, na faatu ai se komiti o le Au Paia mai siteki i le lotoifale e faatulaga se gaoioiga a le EFY i le latou eria.
I le taimi nei, ua tasi le tausaga mulimuli ane, na toe foi atu ai Mary i Provo e feiloai ma Susan Overstreet, o le faatonu o le EFY i le lotoa a le BYU. Sa le mafai e le iunivesite ona lagolago sauniga a le EFY i fafo atu o Amerika i Matu, ae na fesoasoani Susan ia Mary ma le komiti i Perisipeni. Sa ia aveina Mary i gaoioiga o le aoaoina faamasani o faufautua ma faailoa atu o ia i isi taitai o le EFY I le taimi lea, sa malilie ai Brad Wilcox ma le isi failauga o le EFY, o Matt Richardson, e o mai i Ausetalia ma lauga i le gaoioiga.
Ma na toe foi atu Mary i Ausetalia, ma i ni nai masina na sosoo ai, sa feiloai soo ai le komiti e fuafua le gaoioiga, atoa ai ma le saofaga o siteki taitasi e taulamua i le fuafuaina o meaai, fale, faigalotu, musika, ma isi tiute. Na fautuaina atu e peresitene o siteki ni failauga faaopoopo, ma na maua e Mary talavou matutua e auauna atu o ni faufautua. O nisi o faifeautalai ua uma misiona, o nisi sa sauni mo misiona, ae o isi sa leai ni fuafuaga e auauna atu i se misiona. Na faatulaga e Mary ni kosi o aoaoga faamasani mo tagata uma.
Sa faamoemoe le komiti ia faia le EFY e talia fiafia ai le autalavou laiti uma i le eria o Perisipeni, e le na o le Au Paia o Aso e Gata Ai. E le pei o le polokalama i le Iunaite Setete, lea e totogi ai le faitau selau o talā e auai ai, O le EFY i Ausetalia o le a fesoasoani siteki i le lotoifale e totogi ina ia auai ai tagata i se tau taugofie. Ma ao faamoemoe e tatau i tagata uma e auai aiona tausia tulaga faatonuina a le Ekalesia i le konafesi, na faamalosia e le komiti ia siteki e valaaulia talavou e le ni tagata o le Ekalesia.
Ia Aperila 1999, na faalauiloa ai e Mary ma lana komiti le Especially for Youth muamua i fafo atu o Amerika i Matu i le vaega autu o le siteki i Perisipeni. Toeitiiti afe le autalavou mai le aai ma eria lata ane na o mai. Ina ua taunuu Brad ma Matt i luma o le aofia, o le mea muamua na la faia o le taitai oi latou i ni faamanuia. Na fai si faateia o le autalavou, ae sa latou auai ai lava ma le naunautai. Sa vave ona manino o le EFY e le o se konafesi masani a le Ekalesia.
I nai aso na sosoo ai, na aoao ai le autalavou mai failauga, usu pese, ma fiafia i siva ma faaaliga taleni, ma faasoa a latou molimau. O le taimi lea, na tapue ai e le au peata ni ata mo se ata faasolo i le aso mulimuli.
Sa matua fiafia Mary i le tele o mea na fiafia i ai le autalavou ma o latou faufautua i le EFY. Oi latou uma na faia se vaega i le gaoioiga, na vaaia lo latou foi i aiga ma se faatuatua malosi ia Iesu Keriso. O faufautua na le i ai se fuafuaga e faia ni misiona na suia o latou mafaufau ma tuuina atu pepa talosaga mo misiona. O nisi o talavou sa le o ni tagata o le Ekalesia ina ua latou auai na o atu loa feiloai ma faifeautalai ma talia le papatisoga. Ma sa foi atu faufautua talavou matutua nofofua i a latou uarota ma mananao e galulue i Tamaitai Talavou ma Alii Talavou.
Sa matuai manuia le Especially for Youth i Perisipeni—ma sa sauni Mary ma lana komiti e toe fai foi.
I le taimi lea, i le motu o Fiti i le Pasefika, sa lei fiafia tele Juliet Toro ma lana tane o IIiesa i le Ekalesia. Na suia lena mea ona o le la fanau matutua, na uunaia e le tina o Juliet o se Au Paia o Aso e Gata Ai, na amata ai ona auai i le lotu i Aso Sa ma vasega seminare i aso o le vaiaso. Na tonu ia Juliet ua oo i le taimi e valaaulia ai faifeautalai e aoao o ia. Ma ina ua o atu, sa fiafia o ia i le mea na ia faalogo i ai.
Na auai le fanau a Toro i le Ekalesia ia Mati 1999, ma mulimuli atu ai Juliet i le lua vaiaso na sosoo ai. Ae ui i lea, o IIiesa, na faaauau pea faalefiafia o ia. I le popole ina ne’i avea lona toalua o le tagata e toatasi o le aiga e le opogiina le talalelei toefuataiga a Iesu Keriso, na tatalo faatauanau ai Juliet ina ia auai foi o ia i le Ekalesia.
I le taimi na papatiso ai Juliet, sa na o le fa siteki a le Ekalesia i Fiti ma na lata i le sefulu lua afe tagata. Sa faatalitali ma le naunautai le Au Paia i Fiti i le fausiaina o le malumalu i Suva, o le aai o le laumua o loo nonofo ai Juliet ma lona aiga. Ina ua taunuu le Ekalesia i Fiti i le ogatotonu o le vaitau o le 1950, sa masani ona faia e tagata osigataulagatetele tautupe e auai ai i le malumalu o le Alii i Hawaii po o Niu Sila. Na faamāmāina lenei avega i le 1983, ina ua faapaiaina e le Ekalesia le malumalu i Samoa, Toga, ma Tahiti. Ae, o le malaga i le malumalu i Nukualofa Toga, e latalata mai o le tolu, sa tumau pea le taugata.
Ina ua ta’u mai e Peresitene Hinckley le igoa o Fiti o le isi vaega o le tolusefulu malumalu fou, sa olioli le Au Paia i Fiti. O le i ai o se maota o le Alii i Suva o le a faatagaina ai i latou ma le Au Paia i le atumotu o Vanuatu, Niu Kaletonia, Kiripati, Nauru, ma Tuvalu e auai atili atu i le malumalu—ma sili atu le taugofie o le tau e malaga ai.
Na amata le fauina o le Malumalu ia Me 1999, i le lua masina talu na uma le papatisoga o Juliet. I lena taimi, sa ia iloa ai o le Iunivesite o Polika Iaga sa faataitaia le polokalama o aoaoga mamao i le Kolisi a le AAG i Fiti o se aoga maualuga e onaina e le Ekalesia i Suva. O le mautauave a le BYU, “The World Is Our Campus,” ma sa vaavaai le pulega a le aoga mo ni auala taugofie e aumai ai ni avanoa se tele i tagata o le Ekalesia i le lalolagi atoa. O le initoneti na mafai ai e polofesa i Provo ona talanoa mai i tamaiti aoga i Fiti toetoe i le taimi lava lea.
O le polokalama na lesitalaina ai tamaiti na faauu mai aoga maualuga i nisi o vasega o le iunivesite. O tamaiti aoga atamamai faafaiaoga mai le BYU o le a faia ia vasega e i latou lava, ae o polofesa o le BYU na fatuina kosi o le a tuuina mai le lagolago i le initoneti mai le ono afe maila le mamao Mai se totogi laititi mo le lesitala, o le a maua ai e tamaiti aoga se togi e tuu atu i se tikeri a le iunivesite.
Sa fiafia Juliet i le polokalama. O i laua ma IIiesa na avea ma tamaiti aoga o le iunivesite i le taimi muamua na la feiloai ai, ae na la tuua le aoga e faigaluega, ma iu ai ina amataina se aiga. Mo le sili atu ma le sefulu tausaga, sa tausia ai e Juliet lana fanau i le fale. Sa manao e toe faalautele ana aoaoga, o lea na ia talanoa ia IIiesa e uiga i ai. Na ioe o ia e tatau ona lesitala.
I le aso muamua o le vasega, na faailoa ai e juliet ma isi i latou lava. O le toatele o tagata talavou a le Ekalesia, na faatoa o ese mai aogamaualuga pe faatoa foi mai mai ni misiona talai. Sa toaitiiti tamaiti aoga faatoa atoa le tai tolusefulu, e pei o Juliet.
Ina ua amata vasega, sa popole Juliet ua matua tele o ia e toe foi i le aoga. O vasega na matele ina taulai i le atinaega o tomai e faia ai ni pisinisi. I le aluga semesa e lua, na ave ai e ia ma le limasefulu lima o tagata o lana vasega ia kosi o le tausitusi, pulega faapisinisi, tamaoaiga, Igilisi, amioga i faalapotopotoga, ma le Mataupu Faavae ma Feagaiga. Sa le’i manatu Juliet na ia iloaina ni mea se tele e pei tamaiti aoga laiti, ma sa popole o ia ne’i iloa e se tasi e itiiti ni mea na ia iloa. O le mea mulimuli lava na ia manao i ai o le foliga faavalevalea i le vasega.
I le po o le Aso Tofi, ao lei leva na amata le aoga, na fai atu ai James Jacop, le faatonu o le polokalama, ia Juliet e tatau ona auai i se fono i lena po i se falelotu lata ane o le Ekalesia.
O le le mautonu, sa mulimuli atu ai o ia ia James i le falesa. Ina ua la taunuu iina, sa tau atu ai i le afa o lana uarota o loo faatali mai le falesa mo ia. Ona ia vaaia lea o IIiesa, o loo ofu i ofu papae mo le papatisoga. Na ia maua faalilolilo aoaoga a faifeautalai. I le taimi nei ua sauni o ia e auai ma ia ma le la fanau i le Ekalesia.
Na maligi loimata o le olioli o Juliet. Sa ia iloa na faafofoga le Atua i ana tatalo. Na iu inafaatasia lona aiga i le faatuatua. Sa faamoemoe o ia, o le a ia i se aso, o le a faamauina ai i latou i le maota o le Alii.
Ao amata e le Ekalesia le vave fausiaina o malumalu, na faatagaina e taitai le Matagaluega o Talafaasolopito o Aiga e fatuina se utuofaamatalaga e suesue ai talafaasolopito o aiga i le initoneti. Na totogi pauina e le matagaluega se kamupani tekinolosi e atiina ae se tulaga ma se fesootaiga i le initoneti, ma sa tapenaina e le aufaigaluega o Talafaasolopito o Aiga faamatalaga mo le uepisaite fou. E oo ane ia Setema, ua gaosia e le kamupani tekinolosi se faataitaiga aoga, na tuu atu ai ia Rick ma lana vaega le faamoemoe e mafai ona latou saunia le utuofaamatalaga mo le faataitaia i ni masina.
I le taimi lea, na mafaufau ai le vaega i igoa e pei o le Ancestors, RootSearch, ma le KindredQuest mo le utuofaamatalaga. Mulimuli ane, sa malilie ai le Matagaluega o Talafaasolopito o Aiga i se igoa ua latou faaaogaina mo a latou faaputuga o utuofaamatalaga ua faasoaina atu i le CD-ROM: ma le FamilySearch.
E pei ona faamoemoeina, o le utuofaamatalaga na saunia mo le faataitaiga i le amataga o le 1999. O le uepisaite fou na mafai ai ona maua faamaumauga o le faselau miliona o tagata ua maliliu ma faatagaina ai tagata faaaoga e faasoa atu faamatalaga i isi. E leai se tasi na mautinoa pe o le a le lelei o le suiga i tagata o le Ekalesia o le faaaogaina o se utuofaamatalaga i le initoneti mo a latou galuega o talafaasolopito o aiga. Ae na fausia e le vaega se saite e taulima ai le lima miliona o tagata asiasi i le taimi.
I le taimi o le faataitaiga, na liki ai i fafo e se tagata le tuatusi o le uepi, ma e sili atu ma le tolu miliona itulau o le FamilySearch.org na lavea ai. I nai aso mulimuli ane, na oo i le sefulutasi miliona. I le te’i, na faateleina ai e Rick ma lana vaega le gafatia a le uepisaite ina ia mautinoa na saunia mo le faaaogaina e tagata lautele i le aso e faalauiloa ai.
Ia Me, na lele atu ai Rick i Washington DC, mo le tasi o faalauiloaga e lua na fai faatasi. Ao taitaia e Elder D. Todd Christofferson o le au peresitene o Fitugafulu le gaoioiga i le Faletusi o Talafaasolopito o Aiga i le Aai o Sate Leki, na taitaia e Rick ma Elder Russell M. Nelson se gaoioiga i le National Press Club i Washington. Na fiafia Rick i le gauai atu lea ua siomia ai le uepisaite. E oo ane i le taeao o le faalauiloa, ua maua le tolusefulu miliona o tagata asiasii le aso, o mea uma e aunoa ma le faasalalauina. O tagata mai konitineta uma—e faapea foi le Anetatika—sa asiasi atu foi i ai.
“Faafetai mo le faia ia avanoa e ala i le initoneti!” na tusi atu ai se tasi tagata faaaoga. “O se taimi sefe tele mo au. E mafai ona faigaluega i le fale ma kuka foi le aiga i le po ma fai le tagamea—mea uma i le taimi e tasi!”
“E le lava lo’u viia o le tou uepisaite,” na tusi mai ai se tasi. “O le amata ii, ao i ai i le fale, o le a sefe ai le tele o le taimi mo au i le nofoaga autu o talafaasolopito o aiga.”
O le aso na sosoo ai, na fai ai Rick ma sui o le Ekalesia i le polokalama o le Today , o se polokalama lauiloa i le taeao a le televise i le Iunaite Setete. Sa saofai o ia i senofoa o le faatonu i luma meapueata ma le fai polokalama o Katie Couric. I lo la va sa i ai se komipiuta o loo faailoa mai ai le uepisaite fou a le FamilySearch.
“O le sueina o aa o o tatou aiga ua avea nei ma mea fiafia sili ona lauiloa,” na saunoa ai Katie ao ia faalauiloa atu Rick i le aumaimoa. “I le taimi nei ua i ai i le initonei le faaputuga sili ona telē i le lalolagi o faamaumauga o gafa.”
O le fesili muamua a Katie sa faatatau i le Ekalesia. “Aisea ua i ai i Mamona ni faamaumauga se tele o gafa?” sa ia fesili ai.
“Matou te talitonu o aiga e mafai ona faavavau,” na faiatu ai Rick. “Ina ia mafai e o matou tagata ona fai sailiiliga, matou te faaputuina ai faamaumauga mai le lalolagi atoa.”
I le faaaogaina o igoa o se tasi o ona tuaa ma le tasi o tuaa o Katie, sa ia faaali mai lea i le aumaimoa o le televise le auala e alu ai i utuofaamatalaga a le saite ma maua faamatalaga e uiga i o la tuaa. Sa faagaeetia Katie i le faigofie e le uepisaite ona faia e tagata galuega o talafaasolopito o aiga.
“E te totogia se tupe mo le faaaogaina?” sa ia fesili atu ai.
“E leai se totogi,” na fai atu ai Rick.
I totonu o ni nai aso, na lofituina ai le FamilySearch.org i le tusa ma le selau miliona tagata e faaaogaina. Na amata le uepisaite i se amataga ofoofogia.