Vahe 30
Ngaahi Tāpuaki Mahuʻingá
ʻI he efiafi ko e ʻaho 4 ʻo ʻOkatopa 1997, lolotonga ʻo e fakataha lakanga fakataulaʻeiki ʻo e konifelenisi lahí, naʻe fanongonongo ai ʻe Palesiteni Kōtoni B. Hingikelī ʻa e fokotuʻutuʻu foʻou ʻo e temipalé peá ne lea kau ki he palani ʻa e Siasí ke fakaʻaongaʻi ʻa e sīpingá ki ha ngaahi temipale foʻou ʻi he funga ʻo e māmaní.
Naʻá ne pehē, “ʻOku mau fakapapauʻi … ke ʻoatu e ngaahi temipalé ki he kakaí pea ʻoange kiate kinautolu e faingamālie kotoa pē ke nau maʻu ai e ngaahi tāpuaki fungani ʻoku maʻu mei he moihū ʻi he temipalé.”
Naʻe mahino kia Lisiate “Liki” Tualī, ko e talēkita pule ʻo e Potungāue Hisitōlia Fakafāmili ʻa e Siasí, ʻe tāpuekina ʻe he ngaahi temipale foʻou ko ʻení ʻa e Siasí mo tokoniʻi ʻa e Kāingalotu ʻi he funga ʻo e māmaní ke nau haʻu kia Kalaisi. Ka naʻe ʻikai mei lava ʻe he potungāué ʻo feau kotoa ʻa e ngaahi fiemaʻu ʻa e temipale ʻe nimangofulu mā taha naʻe ngāué ki ha ngaahi hingoa feʻunga ki he ngāue ouau fakafofongá. ʻI he fakaʻau ke toe lahi ange ʻa e ngaahi temipale ke langá, naʻe pau ai ke liliu ʻe he Siasí ʻa e founga ʻo ʻene fakahoko ʻa e hisitōlia fakafāmilí.
Naʻe ʻiloʻi ʻe Liki mo e kau taki kehe ʻo e Siasí, naʻe kau ʻi he ngaahi palopalemá ʻa e lahi ʻo e taimi ne fakaʻaongaʻi ki hono teuteuʻi ko ia ʻo e ngaahi hingoá ki he ngāue fakatemipalé pea mo e fakamole ki aí. ʻI ha ngaahi fonua ʻe niʻihi, naʻe pau ke fononga mamaʻo ha kāingalotu ʻo e Siasí ke kumi ʻa e hingoa ʻo ʻenau ngaahi kuí ʻi he ngaahi lekooti kuo tauhí. Naʻe pau ke fekumi fuoloa mo faingataʻa ʻa e kāingalotu kehé ki he fakamatala naʻa nau fiemaʻú. Kapau naʻe ʻikai maʻu ʻi honau senitā hisitōlia fakafāmili fakalotofonuá ʻa e maikolofilimi totonú, kuo pau ke nau totongi ke fakafolau atu ia, tatali ʻi ha ngaahi uike lahi ke aʻu mai, pea foki ki he senitaá ʻo mamata ai. ʻOku maʻu ʻi ha takainga tohi angamahení ha ngaahi ʻata ʻe lauiafe, ko ia ko ha ngāue lahi ke vakaiʻi fakaʻauliliki ʻa e lekooti takitaha. Naʻe tokosiʻi pē ha kakai naʻa nau maʻu ha taimi ki he ngaahi meʻá ni kotoa—pea naʻe ʻikai nofo ofi ʻa e tokotaha kotoa pē ki ha senitā hisitōlia fakafāmili.
Naʻe fakavaveʻi ʻe he ngaahi komipiuta fakatāutahá ha niʻihi ʻo e ngāue ko ʻení ʻi he 1980 tupú. ʻI he kamataʻanga ʻo e taʻu ʻe hongofulú, naʻe faʻu ʻe he kau faʻu polokalama fakakomipiuta ʻa e Siasí ha Personal Ancestral File (Faile Tohi Hohoko Fakataautaha), ko ha polokalama komipiuta naʻá ne fakaʻatā ʻa e kakaí ke nau lekooti, tauhi, mo vahevahe ʻa e fakamatala fekauʻaki mo ʻenau ngaahi kuí mo faʻu ha ngaahi fuʻu ʻakau fakafāmili. Naʻe fakafaingofuaʻi foki ʻe he polokalamá ha lauiafe ʻo kinautolu naʻa nau fakaʻaongaʻí ke fakahū ha ngaahi hingoa ki he temipalé ʻo fakafou ʻi he TempleReady.
Neongo ia naʻe kei faingataʻa pē ʻa e founga fakahuú, tautautefito ki he kakai naʻe ʻikai feangai mo e ngaahi komipiuta fakatāutahá. Naʻe faʻu ʻe he niʻihi ne nau fakaʻaongaʻi ʻa e PAF ha tānakiʻanga fakamatala fakataautaha pē ʻanautolu, ʻo faʻa ʻasi tuʻo ua ai ʻa e ʻū lekōtí ʻi he taimi ʻoku fakahū ai ʻe ha taha ha ngaahi hingoa fakafāmili ki he Siasí. Koeʻuhí naʻe ʻikai ʻotomētiki pē hono fakatonutonu ʻo e ngaahi faile ko ʻení hili hano fakahoko ʻe ha taha ha ngāue fakatemipale ki haʻane kui, naʻe faʻa fakahoko ʻe ha kāingalotu kehekehe ʻo e Siasí ha ngaahi ouau maʻá e tokotaha tatau taʻe te nau ʻiloʻi.
Naʻe fakatupu hohaʻa foki ʻa e ngaahi palopalema peheé kia Palesiteni Hingikelī. ʻI he taʻu ʻe ua kimuʻá, ʻi he kau atu ʻa Liki ki he Potungāue Hisitōlia Fakafāmilí, naʻe ui ia ʻe he palōfitá ki ha fakataha. Naʻá ne fie ʻilo pe ʻoku fai koā ʻe he Siasí ʻa e meʻa kotoa te ne lavá ke fakahoko hono misiona ke huhuʻi ʻa e kau pekiá.
Naʻe pehē ʻe he palōfitá, “Liki, te ke lava ʻo fakapapauʻi mai kiate au ko e ngaahi maʻuʻanga tokoni kotoa pē ʻoku tau maʻu ʻi he hisitōlia fakafāmilí ʻoku nau fakatauʻatāinaʻi ʻa e ngaahi laumālié mei he fale fakapōpula ʻo e ngaahi laumālié?”
Naʻe tali ange ʻe Liki, “ʻOku ou fie fakakaukau pē ʻoku pehē.” Ka naʻá ne tui ʻe lava ke fakaleleiʻi ʻa e polokalamá.
Naʻe loto ki ai ʻa Palesiteni Hingikelī peá ne kole ange ke ne fakaleleiʻi ia.
ʻI he tuʻutuʻuni ko ʻení, naʻe fiemaʻu ai ʻe he Potungāue Hisitōlia Fakafāmilí ke faʻu ha founga faingofua ange ki hono fakahū ʻo e ngaahi hingoá ki he ngāue fakatemipalé—ko ha founga faingofua feʻunga ke fakahoko ʻe ha kakai tokolahi ange. ʻE lava ke fakavaveʻi ʻe he ngaahi komipiutá ʻa e ngāue ki hono maʻu ʻo e fakamatala fakafāmilí mei he ngaahi lekōtí pea fokotuʻutuʻu ia ʻi ha tānakiʻanga fakamatala ʻe lava ke fai ai ha fekumi. Ka ke fakaʻehiʻehi mei he ʻasi tuʻo ua ʻa e ʻū lekōtí, naʻe pau ke fengāueʻaki ʻa e ngaahi komipiutá—ko ha meʻa naʻe ʻikai lava ʻe he polokalama lolotongá ʻo fai. ʻOku fiemaʻu ke ʻi he ʻinitanetí ʻa e tauhiʻanga fakamatalá (database).
ʻI he taimi ko iá, naʻe siʻi hifo ʻi he taʻu ʻe hongofulú ʻa e ʻInitaneti Fakaemāmani Lahí, pea naʻe siʻi ke fakaʻaongaʻi ʻe he Siasí ʻa e ʻinitanetí. Ne ʻosi kamataʻi ʻe he Siasí ha uepisaiti pea naʻe ʻikai fuʻu manakoa ʻi he 1996, pea naʻe kei taʻepauʻia pē ha kau taki ʻe niʻihi ʻo e Siasí ʻi he tekinolosia foʻoú pea siʻisiʻi ʻenau taukei aí. Naʻe ʻikai maʻu ʻe he Potungāue Hisitōlia Fakafāmilí ʻa e taukei fakatekinikale ke ne faʻu ʻa e faʻahinga polokalama fakaʻinitaneti naʻe fiemaʻu ke ne fakalele ʻa e polokalama fakakomipiutá. Naʻa nau fiemaʻu tokoni—pea naʻa nau fiemaʻu ha taimi.
Pea naʻe mahuʻinga ʻa e taimí. ʻI he konifelenisi lahi ʻo ʻEpeleli 1998, naʻe fanongonongo ai ʻe Palesiteni Hingikelī ʻe langa ʻe he Siasí ha temipale ʻe tolungofulu ʻo muimui ʻi he sīpinga foʻoú, makehe mei he ngaahi temipale ʻe hongofulu mā fitu kuo ʻosi langá.
Naʻe pehē ʻe he palōfitá, “Ko ha temipale foʻou fakakātoa ia ʻe fāngofulu mā fitu ʻo tānaki atu ki he nimangofulu mā taha ʻoku lolotonga lelé.” “Te u pehē ʻe sai ke tau tānaki atu mo ha temipale kehe ʻe ua ke aʻu ʻo 100 ʻi he ʻosi ʻa e senituli ko ʻení, ko e taʻu ʻaki ia ʻe ua afe ʻtalu e hāʻele mai hotau ʻEiki mo e Fakamoʻui ko Sīsū Kalaisí ʻi he kakanó’”
Naʻá ne pehē, “ʻOku tau laka atu ʻi ha tuʻunga kuo teʻeki ai ke tau mamata ai kimuʻa.”
Naʻe ueʻi ʻe he fanongonongó ʻa Liki. Ka kuo ʻi ai ʻeni ha fiemaʻu vivili lahi ange ke fakavaveʻi ʻa e ngāue hisitōlia fakafāmili ʻa e Siasí.
Naʻe ʻikai mamaʻo ʻa e taʻu ʻe 2000.
ʻI he konga kimuʻa ʻo ʻEpeleli 1998, naʻe ʻalu ai ʻa Felisinito mo Velonika Konitelelasi ki he Temipale Sanitiako Sileí. Naʻe toki uiuiʻi pē ʻa Felisinito ke hoko ko e pīsope ʻo honau uōtí, pea naʻá ne hohaʻa fekauʻaki mo e Kāingalotu naʻá ne tokangaʻí. Naʻe kei maʻulalo pē ʻa e maʻulotu ʻi he uōtí. Naʻá ne fie kole ʻa e tokoni ʻa e ʻEikí ʻi hono fakafoki mai ʻa e kāingalotu hono uōtí ki he lotú.
ʻI he lotu ʻa Felisinitoó, naʻá ne fakaʻamua tautautefito ke tokoniʻi ʻa e toʻu tupú. Naʻe tokosiʻi pē ha niʻihi ʻo kinautolu naʻe maʻulotu maʻu pē, pea neongo naʻe taʻu motuʻa feʻunga ha toko fā ke ō ʻo ngāue fakafaifekau, ka naʻe ʻikai teuteu ha taha ia ke ngāue. Naʻa nau kau ʻi ha ākenga lahi ange ʻi Silei, ʻa ia naʻe siʻi hifo ʻi he peseti ʻe 10 ʻo e kau talavou taʻu motuʻa feʻungá naʻe ngāue fakafaifekaú, ko e peseti maʻulalo taha ʻi ha faʻahinga ʻēlia pē ʻi he funga ʻo e māmaní. Naʻe fakaʻamu ʻa Felisinito ʻi hono lotó ke foki ʻa e toʻu tupú ki he lotú mo teuteuʻi kinautolu ki he malaʻe ʻo e ngāue fakafaifekaú.
Hili ha taimi nounou mei ai, naʻe fuofua haʻu ha kiʻi tamasiʻi taʻu hongofulu mā valu ko Huani ki he ngaahi houalotu ʻo e Sāpaté hili ia ha ngaahi taimi. Ko ha mēmipa ʻa Huani ʻo e kōlomu ʻo e kau taulaʻeikí, ka naʻá ne faʻa liʻaki lotu ka ne lava ʻo vaʻinga soka. Ko ha tokotaha vaʻinga talēnitiʻia ia—naʻe lelei feʻunga ʻo pehē ʻe ha kakai ʻe niʻihi te ne lava ʻo vaʻinga fakapalōfesinale—pea naʻe mahuʻinga ʻaupito ʻa e sipotí kiate ia. Ka kimuí ni maí, naʻá ne ongoʻi tuenoa, taʻe-manonga, mo puputuʻu. Naʻe ueʻi ia ʻe he Laumālié ke foki ki he lotú ʻo ngāue fakafaifekau. Ka naʻá ne ongoʻi hangē naʻá ne fiemaʻu ha fakahinohino ke tokoniʻi ia ke fai ha ngaahi liliu ʻi heʻene moʻuí.
Naʻá ne kole ʻi he lotú ke talanoa mo Felisinito. Naʻá ne pehē, “Kuó u fakakaukau ke mālohi he siasí.”
Naʻe pehe ange ʻe Felisinito, “Naʻá ku tatali atu kiate koe.” Naʻá ne fakaafeʻi ʻa Huani ki hono ʻōfisí ke ʻinitaviu. Naʻá na talanoa fekauʻaki mo e holi ʻa Huani ke teuteu ke ngāue fakafaifekaú. ʻI heʻene ʻiloʻi naʻe fiemaʻu ʻi he ngāue fakafaifekaú ha kau talavou mo e kau finemui ke nau aʻusia ha ngaahi tuʻunga moʻui fakalaumālie, fakaeangamaʻa, fakaeloto, mo fakatuʻasino pau, naʻe tokoniʻi ia ʻe Felisinito ke ne faʻu ha palani.
Naʻá ne talaange kia Huani, “ʻUluakí, te tau teuteu atu ke maʻu ho tāpuaki fakapēteliaké, koeʻuhí ke ke ʻiloʻi e meʻa ʻoku finangalo e ʻEikí ke fakahā atú.” Hili iá, te na ngāue leva ki heʻene foomu ngāue fakafaifekaú. Naʻe fakaafeʻi foki ia ʻe Felisinito ke ne lau ʻa e Tohi ʻa Molomoná mo totongi ʻene vahehongofulú. Naʻe tali ʻe Huani ʻa e tukupaá, pea talu mei he momeniti ko iá, mo ʻene toutou talanoa mo Felisinito fekauʻaki mo e teuteu ke ngāue fakafaifekaú.
Naʻe ngāue foki ʻa Felisinito mo ha kāingalotu kehe ʻo e uōtí. Naʻá ne mālieʻia ʻi he faleʻi ʻa e Kau Palesitenisī ʻUluakí ʻoku maʻu ʻe he mēmipa kotoa pē ha kaungāmeʻa, ha fatongia, mo tanumaki ʻaki ʻa e “folofola lelei ʻa e ʻOtuá.” ʻI he muimui [ʻa Felisinito] ki he ngaahi fakahinohino foʻou mei he hetikuota ʻo e Siasí, naʻá ne fakapapauʻi mo e kau faifekau taimi kakató naʻe omi ʻa e kakaí ki he houalotu sākalamēnití kimuʻa pea nau toki kau ki he Siasí. Naʻá ne fakapapauʻi foki mo ha kāingalotu kehe ʻo e uōtí naʻe ongoʻi ʻe he tokotaha kotoa pē ʻoku haʻu ki he lotú ʻoku talitali lelei ia pea foki ki ʻapi kuo tanumaki fakalaumālie.
ʻI he taimi naʻe fakaafeʻi ai ʻe Felisinito ʻa e kakaí ke foki mai ki he lotú, naʻá ne poupouʻi kinautolu ke nau teuteu ke maʻu ʻa e sākalamēnití mo fakafoʻou ʻenau ngaahi fuakava ʻi he papitaisó. Naʻá ne kole ki he kāingalotu foki maí ke nau ō ki he kalasi Lautohi Faka-Sāpate Mahuʻinga ʻo e Ongoongoleleí ke tokoni ke nau manatuʻi ʻa e ngaahi tefitoʻi akonaki fekauʻaki mo e Fakatupú, ko e Fakalelei ʻa Sīsū Kalaisí, fakatomalá, mo e ngaahi tefitoʻi moʻoni kehe ʻo e ongoongoleleí. Pea naʻá ne kumi ha ngaahi founga maʻanautolu ke nau ngāue ai ʻi he uōtí.
Naʻá ne fokotuʻutuʻu foki ke fakaava ʻa e ʻapisiasí lolotonga ʻo e uiké. Naʻá ne maʻu ha ngofua ke fakamaama ʻa e lotoʻā ʻi he tuʻa falé koeʻuhí ke lava ʻa e toʻu tupú ʻo vaʻinga soka mo ha ngaahi vaʻinga kehe ʻi he efiafí. Naʻe kamata fakaʻaongaʻi ʻe he kāingalotu ʻo e uōtí ʻa e falelotú ki he ngaahi efiafi fakafāmili ʻi ʻapí mo ha ngaahi ʻekitivitī kehe, hangē ko e ngaahi tulama mo e ngaahi polokalama fakafonua ʻa Sileí. Naʻe tokoni ʻa Felisinito ki hono fokotuʻutuʻu ha kuaea fakauooti, pea naʻe tokoni ʻenau hivá ki hono ʻomi ʻo e Laumālié ki he houalotu sākalamēnití.
ʻI hono fakaʻaongaʻi ʻe he kāingalotu ʻo e uōtí ha taimi lahi ange ʻi he ʻapisiasí, naʻe kamata ke nau tauhi lelei ange ia, pea tupulaki mo ʻenau tokangaekina ʻa e falé. Ne ʻikai fuoloa mei ai, kuo fakatokangaʻi ʻe Felisinito ha fakalakalaka ʻi he maʻulotu ʻi he houalotu sākalamēnití. Naʻá ne tui ko e ngaahi liliu ko ʻení ko ha ngaahi tali ia ki heʻene lotu ʻi he temipalé.
Hili ha ngaahi māhina siʻi mei ai, ʻi he vaeuaʻangamālie ʻo e 1998, naʻe fononga ai ʻa Mele Makena, ko ha tokotaha ʻosi ngāue fakafaifekau mei Pilisipeini ʻAositelēlia, ki Polovo, ʻIutā, ke ako lahi ange fekauʻaki mo e Especially for Youth, ko ha konifelenisi ʻaho ʻe nima maʻá e Kāingalotu kei talavou ʻo e Siasí ʻi he ʻIunaiteti Siteití. Naʻe lahi ha ngaahi meʻa ne fanongo ai ʻa Mele fekauʻaki mo EFY ʻi ha taʻu ʻe taha kimuʻa, lolotonga ʻene kau atu ki he Uike Akó—ko ha ngaahi kalasi, fakataha lotu, mo ha ngaahi ʻekitivitī kehe maʻá e kakai lalahí mo e toʻu tupú naʻe fakahoko ʻi he taʻu kotoa pē ʻi he ʻapiako ʻUnivēsiti Pilikihami ʻIongí.
Lolotonga ʻene ʻaʻahi kimuʻá, naʻá ne kau atu ki ha kalasi naʻe akoʻi ʻe Palati Uilikoki, ko ha tokotaha lea mo faʻu tohi manakoa ʻi he lotolotonga ʻo e toʻu tupu lea faka-Pilitānia ʻo e Siasí. Hili ʻa e kalasí, naʻá ne kiʻi taimi hifo ʻo talanoa mo ia fekauʻaki mo e Uike Akó.
Naʻá ne pehē, “Mahalo ʻe ngali fakaoli ʻeni, ka ko ha taki au ʻo e toʻu tupú ʻi ʻAositelēlia, pea ʻoku mau fiemaʻu hoʻo taukeí.”
ʻI he senituli mo e konga talu mei hono fokotuʻu ʻo e fuofua kolo ʻo e Siasí ʻi ʻAositelēliá, kuo tupu ʻa e Siasí ai ʻo meimei toko taha kilu hono kāingalotú. Naʻe ʻi ai ha ngaahi siteiki ʻi he meimei kolo lalahi kotoa pē ʻi ʻAositelēlia mo ha temipale ʻi Senē. Ka naʻe faingataʻaʻia ha toʻu tupu tokolahi, pea ʻikai ʻalu ha niʻihi ʻo ngāue fakafaifekau, mali ʻi he temipalé, pe mālohi ʻi he Siasí. Naʻa nau ongoʻi māvahevahe pea naʻa nau fiemaʻu ha kau faʻifaʻitakiʻanga lelei te nau lava ʻo fakahaaʻi kiate kinautolu ʻa e founga ke nau nofo ofi ai ki he ʻOtuá mo moʻui ʻaki ʻEne ngaahi fekaú.
ʻI he fanongo ʻa Palati kia Mele ʻi heʻene talanoa fekauʻaki mo e ngaahi faingataʻaʻia ʻa e toʻu tupu ʻi ʻAositelēliá, naʻá ne fakatē loʻimata, peá ne fakamatala lahi ange fekauʻaki mo EFY. Hangē ko e ngaahi konifelenisi fakasiteiki angamaheni ʻa e toʻu tupú, naʻe fakataumuʻa ʻa e EFY ke fakamālohia ʻa e tui ʻa e toʻu tupú. Naʻe ʻikai fakalele ia ʻe he ngaahi siteiki fakalotofonuá, ka naʻe fakalele ia ʻe BYU pea tokangaʻi ʻe ha kau ʻetivaisa taautaha kei talavou. ʻI he fanongo ʻa Mele ki hono fakamatalaʻi ʻe Palati ʻene fakafiefia ki he toʻu tupú, naʻá ne ongoʻi ʻe lava ke tokoni ha aʻusia hangē ko e EFY ki he kau finemui mo e kau talavou ʻi ʻAositelēliá.
Naʻá ne ngāue ʻi he ngaahi māhina lahi hono hokó ke hoko ʻo moʻoni ʻa e fakakaukaú ni. Naʻe poupou ʻa e kau taki ʻo e Siasí ʻi Pilisipeiní, ʻo fokotuʻu ha kōmiti ʻo e Kāingalotú mei he ngaahi siteiki fakalotofonuá ke fokotuʻutuʻu ha polokalama hangē ko e EFY ʻi honau feituʻú.
Hili ʻeni ha taʻu ʻe taha mei ai, naʻe foki ʻa Mele ki Polovo ʻo fakataha mo Sūsana ʻOvasituliti, ko e talēkita ʻo e EFY, ʻi he ʻapiako BYU. Naʻe ʻikai lava ʻe he ʻunivēsití ʻo fakalele ha ngaahi sēsini EFY mavahe mei ʻAmelika Noate, ka naʻe tokoni ʻa Sūsana kia Mele mo e kōmiti Pilisipeiní. Naʻá ne ʻave ʻa Mele ki ha polokalama ako fakaʻetivaisa peá ne fakafeʻiloaki ia ki he kau taki EFY kehé. Lolotonga iá, naʻe loto ʻa Palati Uilikoki mo ha tokotaha lea EFY ʻe taha ko Mātiu Lisiatesoni, ke haʻu ki ʻAositelelia ʻo lea ʻi he polokalamá.
Naʻe foki ʻa Mele ki ʻAositelēlia, pea ʻi he ngaahi māhina siʻi hono hokó, naʻe fakataha maʻu pē ʻa e kōmití ke palani ʻa e polokalamá, ʻa ia naʻe takimuʻa ai ʻa e siteiki takitaha ne kau atú ʻi hono palani ʻo e meʻakaí, fale nofoʻangá, ngaahi fakataha lotú, mūsiká, mo e ngaahi fatongia kehé. Naʻe fokotuʻu ange ʻe he kau palesiteni fakasiteikí ha kau lea kehe, pea naʻe maʻu ʻe Mele ha kakai lalahi kei talavou ke nau hoko ko ha kau tokoni. Ko e niʻihi ko ha kau ʻosi ngāue fakafaifekau, pea teuteu ha niʻihi ke ngāue fakafaifekau, pea ʻikai ha palani ʻa ha niʻihi ke ngāue fakafaifekau. Naʻe fokotuʻutuʻu ʻe Mele ha ngaahi kalasi ako maʻá e tokotaha kotoa pē.
Naʻe fakaʻamu ʻa e kōmití ke ngaohi ʻa e EFY ke fakamānako ki he toʻu tupu kotoa pē ʻi he ʻēlia Pilisipeiní, kae ʻikai ko e Kāingalotu pē ʻo e Siasí. ʻI heʻene kehe mei he polokalama ʻi he ʻIunaiteti Siteití, ʻa ia ʻoku laungeau hono totongí ke kau ki aí, ʻe tokonia fakapaʻanga ʻa e EFY ʻa ʻAositelēlia ʻe he ngaahi siteiki fakalotofonuá koeʻuhí ke lava ʻa e kakaí ʻo kau ki ai ʻi ha totongi maʻamaʻa. Pea neongo naʻe fiemaʻu ke tauhi ʻe he tokotaha kotoa pē naʻe ʻi aí ʻa e ngaahi tuʻunga moʻui taau ʻo e Siasí ʻi he konifelenisí, ka naʻe poupouʻi ʻe he kōmití ʻa e ngaahi siteikí ke fakaafeʻi ʻa e toʻu tupu naʻe ʻikai ke nau siasí.
ʻI ʻEpeleli 1999, naʻe kamata ai ʻe Mele mo ʻene kōmití ʻa e fuofua polokalama Especially for Youth ʻo mavahe mei ʻAmelika Noate ʻi ha senitā fakasiteiki ʻi Pilisipeini. Naʻe kau mai ha toʻu tupu ʻe meimei tahaafe mei he koló mo e ngaahi feituʻu takatakai ʻi aí. ʻI he taimi naʻe tuʻu ai ʻa Palati mo Mātiu ʻi muʻa ʻi he haʻofangá, ko e ʻuluaki meʻa pē naʻá na faí ko ʻena tataki kinautolu ʻi ha fakakaekae. Naʻe kiʻi ʻohovale ʻa e toʻu tupú, ka naʻa nau kau loto-vēkeveke ki ai. Naʻe mahino ʻi he taimi pē ko iá naʻe ʻikai ko ha konifelenisi faka-Siasi angamaheni ʻa e EFY.
ʻI he ngaahi ʻaho siʻi hono hokó, naʻe ako ʻa e toʻu tupú mei he kau leá, hiva ha ngaahi hiva, fiefia ʻi he ngaahi hulohulá mo e ngaahi fakaʻaliʻali talēnití, mo vahevahe ʻenau ngaahi fakamoʻoní. Lolotonga iá, naʻe faitaaʻi ʻe he kau faitaá ha ngaahi tā ki ha slideshow ʻi he ʻaho fakaʻosí.
Naʻe fiefia ʻa Mele ʻi he lahi ʻo e fiefia ʻa e toʻu tupú mo ʻenau kau ʻetivaisá ʻi he EFY. Naʻe hangē naʻe foki ʻa e tokotaha kotoa pē naʻe kau ʻi he polokalamá, ki ʻapi mo ha tui mālohi ange kia Sīsū Kalaisi. Naʻe liliu e fakakaukau ʻa e kau ʻetivaisa naʻe ʻikai ke nau palani ke ngāue fakafaifekaú pea fakahū ʻenau foomu ngāue fakafaifekaú. Naʻe hoko atu ha niʻihi ʻo e toʻu tupu naʻe ʻikai ke nau kau ki he Siasí ʻi he taimi naʻa nau kau mai aí ke fakataha mo e kau faifekaú mo tali ke papitaiso. Pea naʻe foki ʻa e kau ʻetivaisa taautaha kei talavoú ki honau ngaahi uōtí ʻoku nau fie ngāue ʻi he Kau Finemuí mo e Kau Talavoú.
Naʻe lele lelei ʻaupito ʻa e polokalama Tautautefito ki he Toʻu Tupú ʻi Pilisipeiní—pea naʻe mateuteu ʻa Mele mo e kōmití ke toe fai ia.
Lolotonga iá, ʻi he motu Pasifiki ko Fisí, naʻe teʻeki ai maʻu ʻe Sulieti Tolo ia mo hono husepāniti ko ʻIliesá ha tokanga ki he Siasí. Naʻe liliu ia ʻi he taimi naʻe kamata ʻalu ai ʻena fānau lalahí, ʻi hono poupouʻi ʻe he faʻē ʻa Sulietí ʻa ia ne kau ki he Siasí, ki he ngaahi houalotu ʻo e Sāpaté mo e ngaahi kalasi semineli ʻi he lolotonga ʻo e uiké. Naʻe fakakaukau ʻa Sulieti kuo taimi ke fakaafeʻi ʻa e ongo faifekaú ke na akoʻi ia. Pea ʻi heʻenau fai iá, naʻá ne saiʻia ʻi he meʻa naʻá ne fanongo ki aí.
Naʻe kau ʻa e fānau Toló ki he Siasí ʻi Māʻasi 1999, pea muimui atu ʻa Sulieti hili ha uike ʻe ua mei ai. Ka neongo ia, naʻe teʻeki pē ke tokanga ʻa ʻIliesa ki he Siasí. ʻI he manavasiʻi ʻa Sulieti naʻa ko hono husepānití pē ʻi he fāmilí ʻe ʻikai ke ne tali ʻa e ongoongolelei ʻo Sīsū Kalaisi kuo fakafoki maí, naʻe kamata ke ne lotu fakamātoato ke ne kau foki mo ia ki he Siasí.
ʻI he taimi naʻe papitaiso ai ʻa Sulietí, naʻe ʻi ai ha siteiki ʻe fā ʻo e Siasí ʻi Fisi pea fakafuofua ki ha kāingalotu ʻe toko taha mano uaafe nai. Naʻe tatali loto-vēkeveke ʻa e Kāingalotu Fisí ki hono langa ʻo ha temipale ʻi Suva, ko e kolomuʻa ia naʻe nofo ai ʻa Sulieti mo hono fāmilí. Hili ʻa e haʻu ʻa e Siasí ki Fisi ʻi he konga loto ʻo e 1950 tupú, naʻe faʻa fai ʻe he kāingalotú ha ngaahi feilaulau fakapaʻanga lahi ke nau ō ki he fale ʻo e ʻEikí ʻi Hauaiʻi pe Nuʻu Sila. Naʻe holoki ʻa e mafasia ko ʻení ʻi he 1983, ʻi he taimi naʻe fakatapui ai ʻe he Siasí ha ngaahi temipale ʻi Haʻamoa, Tonga, mo Tahití. Ka naʻe kei lahi pē ʻa e fakamole ke folau ki he Temipale Nukuʻalofa Tongá, ʻa ia ko e ofi taha ia ʻi he temipale ʻe tolú.
ʻI he taimi naʻe fakalau ai ʻe Palesiteni Kōtoni B. Hingikelī ʻa Fisi ko e feituʻu ke tuʻu ai ha taha ʻo e ngaahi temipale foʻou ʻe tolungofulú, naʻe fiefia ʻa e Kāingalotu Fisí. ʻI hono maʻu ha fale ʻo e ʻEikí ʻi Suvá, ʻe lava ai ke nau ʻalu maʻu pē ki he temipalé mo e Kāingalotu ʻi he ngaahi puleʻanga ʻo Vanuatu, Niu Kaletōnia, Kilipati, Naulu, mo Tuvalú ke nau ō maʻu pē ki he temipalé—pea siʻisiʻi ange ai ʻa e fakamole ki he fefonongaʻakí.
Naʻe kamata hono langa ʻo e temipalé ʻi Mē ʻo e 1999, hili ia ha māhina ʻe ua mei hono papitaiso ʻo Sulietí. ʻI he taimi ko iá, naʻá ne ʻiloʻi ai naʻe ʻahiʻahiʻi ʻe he ʻUnivēsiti Pilikihami ʻIongí ha polokalama ako mamaʻo ʻi he Kolisi Fakatekinikale ʻa e Siasí ʻi Fisí (Fiji LDS Technical College), ko ha ʻapiako māʻolunga ʻa e Siasí ʻi Suva. Ko e kupuʻi lea ne ʻiloa ʻaki ʻa BYU ko e “Ko Māmani ʻa Hotau ʻApiakó,” pea naʻe kumi ʻe he kau pule ʻo e akó ha ngaahi founga totongi maʻamaʻa ke ʻomi ai ha ngaahi faingamālie fakaako ki ha kāingalotu tokolahi ange ʻo e Siasí ʻi he funga ʻo e māmaní. Naʻe fakaʻatā ʻe he ʻinitanetí ha kau palōfesa ʻi Polovo ke nau fetuʻutaki mo e kau ako ʻi Fisí ʻo vave ʻaupito.
Naʻe kau ʻi he polokalamá ʻa e kau ʻosi mei he ako māʻolungá ki ha ngaahi kalasi lahi ʻi he lēvolo ʻo e ʻunivēsití. Naʻe tokangaʻi fakahangatonu ʻe he kau ako poto mei BYU ʻa e ngaahi kalasí, kae ʻoatu ʻe he kau palōfesa BYU naʻa nau faʻu ʻa e ngaahi kalasí ha tokoni ʻi he ʻinitanetí mei ha maile ʻe ono afe hono mamaʻó. Ki ha kiʻi totongi siʻisiʻi, ʻe lava ke maʻu ʻe he kau akó ha maaka ki ha mataʻitohi ʻi he ʻunivēsití.
Naʻe saiʻia ʻa Sulieti ʻi he polokalamá. Naʻá ne lolotonga hoko mo ʻIliesa ko ha ongo tamaiki ako ʻunivēsiti ʻi he taimi naʻá na fuofua fetaulaki aí, ka naʻá na mavahe mei he akó ke ngāue pea faifai ʻo na kamataʻi ha fāmili. Kuo laka hake ʻi he taʻu ʻe hongofulú hono ohi hake ʻe Sulieti ʻene fānaú ʻi ʻapi. Naʻá ne fie hoko atu ʻene akó, ko ia naʻá ne talanoa ki ai mo ʻIliesa. Naʻe loto-lelei ʻa ʻIliesa ke ne lesisita.
ʻI he ʻuluaki ʻaho ʻo e kalasí, naʻe fakafeʻiloaki ai ʻe Sulieti mo e toenga ʻo e kau akó kinautolu. Ko e tokolahi ko ha kāingalotu kei talavou ʻo e Siasí, ne toki ʻosi pē mei he ako māʻolungá pe toki foki mai mei he ngāue fakafaifekau taimi kakató. Ko ha niʻihi tokosiʻi pē ʻo e kau akó naʻa nau ʻi honau taʻu uofolu tupú, hangē ko Sulietí.
ʻI he kamata ʻa e ngaahi kalasí, naʻe hohaʻa ʻa Sulieti naʻá ne fuʻu motuʻa ke foki ki he akó. Naʻe fakatefito ʻa e tokanga ʻa e ngaahi kalasí ki hono fakatupulaki ʻo e ngaahi taukei fakapisinisí. ʻI ha semesitā ʻe ua, naʻá ne toʻo mo hono kaungā-ako ʻe toko nimangofulu mā nimá ha ngaahi kalasi ʻi he tauhi tohí, pule pisinisí, ʻekonōmiká, lea faka-pilitāniá, tōʻonga fakangāué, pea mo e Tokāteline mo e Ngaahi Fuakavá. Naʻe ʻikai fakakaukau ʻa Sulieti ʻoku lahi ʻene ʻiló ʻo hangē ko e fānau ako kei siʻi angé, pea naʻá ne manavasiʻi naʻa ʻilo ʻe ha taha ʻa e siʻisiʻi ʻo e meʻa naʻá ne ʻiló. Ko e meʻa fakamuimuitaha naʻá ne fiemaʻú ke fotu ngalivale ʻi he kalasí.
ʻI ha efiafi Tuʻapulelulu, hili ha taimi siʻi mei he kamata ʻa e akó, naʻe talaange ʻe Sēmisi Sēkope, ko e talēkita ʻo e polokalamá, kia Sulieti ʻoku fiemaʻu ke ne ʻalu ki ha fakataha ʻi he pō ko iá ʻi ha fale ofi mai pē ʻo e Siasí.
ʻI heʻene puputuʻú, naʻá ne muimui ʻia Sēmisi ki he falé. ʻI heʻenau aʻu ki aí, naʻá ne vakai ai ki ha vaeua ʻo hono uōtí ʻoku talitali mai kiate ia ʻi he falelotú. Naʻá ne sio atu kia ʻIliesa, ʻokú ne tui ha vala papitaiso hinehina. Naʻá ne tali fakapulipuli pē ʻa e ngaahi lēsoni fakafaifekaú. Pea kuó ne mateuteu ʻeni ke kau fakataha mo ia mo ʻena fānaú ʻi he Siasí.
Naʻe loʻimataʻia ʻa Sulieti ʻi heʻene fiefiá. Naʻá ne ʻiloʻi kuo tali ʻe he ʻOtuá ʻene ngaahi lotú. Naʻe faifai pea faaitaha hono fāmilí ʻi he tuí. Pea ʻi ha ʻaho ʻe taha, naʻá ne fakaʻamu, ʻe silaʻi kinautolu ʻi he fale ʻo e ʻEikí.
ʻI he kamata ke lahi ange hono langa ʻe he Siasí ʻa e ngaahi temipalé, naʻe fakamafaiʻi ʻe he kau takí ʻa e Potungāue Hisitōlia Fakafāmilí ke nau faʻu ha tānakiʻanga fakamatala ki he hisitōlia fakafāmili ʻi he ʻinitanetí ʻe ala fai ai ha fekumi. Naʻe fakangāueʻi ʻe he potungāué ha kautaha tekinolosia ke faʻu ha polokalama mo ha tuʻunga fengāueʻaki ʻi he ʻinitanetí, pea teuteu ʻe he kau ngāue ʻo e Hisitōlia Fakafāmilí ʻa e fakamatalá ki he uepisaiti foʻoú. ʻI Sepitemá, naʻe ʻosi faʻu ʻe he kautaha fakatekinikalé ha sīpinga ngāue, ʻo ʻoange kia Liki Teli mo ʻene timí ha ʻamanaki ʻe maau ʻa e tānakiʻanga fakamatalá ki hano siviʻi ʻi ha ngaahi mahina siʻi mei ai.
Lolotonga iá, naʻe fakakaukau ʻa e timí ki he ngaahi hingoa hangē ko e Ancestors, RootSearch, mo e KindredQuest ki he polokalama tānakiʻanga fakamatalá. Ko hono aofangatukú, naʻe loto-taha ʻa e Potungāue Hisitōlia Fakafāmilí ki ha hingoa ne nau ʻosi fakaʻaongaʻi ki hono tānaki ʻo e ngaahi tauhiʻanga fakamatala ʻoku tufaki ʻi he CD-ROM: FamilySearch.
Hangē ko e ʻamanakí, naʻe maau ʻa e polokalama tānakiʻanga fakamatalá ke siviʻi ʻi he konga kimuʻa ʻo e 1999. Naʻe lava ke maʻu ʻi he uepisaiti foʻoú ʻa e ngaahi lekooti ʻo ha kakai pekia ʻe toko fāngeau miliona pea fakaʻatā ʻa kinautolu ʻoku nau fakaʻaongaʻí ke vahevahe ʻa e fakamatalá mo e niʻihi kehé. Naʻe ʻikai ke fakapapauʻi ʻe ha taha pe ʻe anga fēfē ha feinga ʻa e kāingalotu ʻo e Siasí ke fakaʻaongaʻi ha maʻuʻanga fakamatala ʻi he ʻinitanetí ki heʻenau ngāue hisitōlia fakafāmilí. Ka naʻe faʻu ʻe he timí ʻa e uepisaití ke ne feau ha kakai ʻe toko nima miliona te nau ngāue ʻaki ʻi he taimi pē ʻe taha.
Lolotonga hono siviʻí, naʻe mama ki tuʻa ʻa e uepisaití mei ha taha, pea naʻe laka hake ʻi he toko tolu milioná ne ʻaʻahi ki he pēsí. Hili ha ngaahi ʻaho siʻi mei ai, naʻe toko hongofulu mā taha miliona. ʻI he ʻohovale ʻa Liki mo ʻene timí, naʻa nau fakalahi ʻa e tokolahi ʻo e kakai ʻe lava ke nau fakaʻaongaʻi fakaʻangatahá ke fakapapauʻi naʻe mateuteu ke fakaʻaongaʻi ʻe he kakaí ʻi he ʻaho ʻe fakaʻatā aí.
ʻI Meé, naʻe puna ai ʻa Liki ki Uāsingatoni, DC, ki ha taha ʻo ha ongo polokalama fakaʻatā (launch) hokohoko ʻe ua. Lolotonga hono tataki ʻe ʻEletā D. Toti Kulisitofasoni ʻo e kau palesitenisī ʻo e Kau Fitungofulú ʻa e polokalamá ʻi he Laipeli Hisitōlia Fakafāmili ʻi Sōleki Sití, naʻe fakahoko ʻe Liki mo ʻEletā Lāsolo M. Nalesoni ha polokalama ʻi he National Press Club ʻi Uāsingatoní. Naʻe fiefia ʻa Liki ʻi hono ʻilo lahia ʻo e uepisaití. ʻI he pongipongi naʻe fakaʻatā (launch) atu aí, naʻe aʻu ʻo toko tolungofulu miliona ʻa e ʻaʻahi ki he pēsí ʻi he ʻaho, ʻo hoko kotoa pē ʻoku teʻeki fanongonongó. Naʻe ʻaʻahi ki ai ʻa e kakai mei he konitinēniti kotoa pē—ʻo aʻu ki ʻAnitātiká.
Naʻe tohi ʻe ha tokotaha naʻá ne ngāue ʻaki ʻa e polokalamá ʻo pehē, “Fakamālō atu ʻi hono fakaʻatā ia ʻi he ʻinitanetí! ʻOkú ne fakahaofi ha taimi lahi moʻoni. Te u lava pē ʻo ngāue ʻi ʻapi mo kei feimeʻatokoni efiafi pē mo fai ʻa e foó—fakahoko kotoa ʻi he taimi tatau pē!”
Naʻe tohi ʻe ha tokotaha kehe ʻo pehē, “ʻIkai lava ke u fakamālōʻia feʻunga hoʻomou uepisaití. ʻE kamata heni, lolotonga ʻeku ʻi ʻapí, ʻeku fakahaofi ha taimi lahi moʻoni mei he senitā hisitōlia fakafāmilí.”
ʻI he ʻaho hono hokó, naʻe fakafofongaʻi ʻe Liki ʻa e Siasí ʻi he polokalama Today show, ko ha polokalama televīsone manakoa ʻi he ʻIunaiteti Siteití. Naʻá ne tangutu ʻi ha sea ʻo e talēkitá ʻi muʻa ʻi he ngaahi meʻafaitaá mo Keiti Kōliki. Naʻe ʻi hona vahaʻá ha komipiuta naʻe fakaʻaliʻali ai ʻa e uepisaiti FamilySearch foʻoú.
Naʻe pehē ʻe Keiti ʻi heʻene fakafeʻiloaki ʻa Liki ki he haʻofangá, “Kuo hoko ʻa hono fakatotoloʻi homau ngaahi tupuʻanga fakafāmilí ko ha meʻa fakamānako ʻaupito. Kuo maʻu he taimí ni e ngaahi lekooti fakatohihohoko lahi taha ʻi he māmaní ʻi he ʻinitanetí.”
Ko e ʻuluaki fehuʻi ʻa Keití naʻe fekauʻaki ia mo e Siasí. Naʻá ne fehuʻi ange, “Ko e hā ʻoku maʻu ai ʻe he kau Māmongá ha ngaahi lekooti tohihohoko lahi peheé?”
Naʻe pehē ʻe Liki, “ʻOku mau tui ʻe lava ke taʻengata ʻa e ngaahi fāmilí. Ke fakaʻatā homau kāingalotú ke nau fai ha fekumí, ʻoku mau tānaki ha ngaahi lekooti mei he funga ʻo e māmaní.”
ʻI heʻene fakaʻaongaʻi ʻa e hingoa ʻo ha taha ʻo ʻene ngaahi kuí mo e taha ʻo e ngaahi kui ʻa Keití, naʻá ne fakaʻaliʻali leva ki he haʻofanga ʻi he televīsoné ʻa e founga ke hū ai ki he ngaahi tauhiʻanga fakamatala ʻa e saití pea kumi ha fakamatala fekauʻaki mo ʻenau ngaahi kuí. Naʻe mālieʻia ʻa Keiti ʻi he faingofua hono ʻai ʻe he uepisaití ke fai ʻe he kakaí ʻa e ngāue hisitōlia fakafāmilí.
Naʻá ne fehuʻi ange, “ʻOkú te totongi nai ha paʻanga ki hono fakaʻaongaʻi ʻení?”
Naʻe pehē ange ʻe Liki, “ʻOku ʻikai ha totongi ʻe taha.”
ʻI ha ngaahi ʻaho siʻi mei ai, naʻe lōmekina ʻa e FamilySearch.org ʻi he meimei aʻu ʻo miliona ʻa e ʻaʻahi ki he pēsí. Naʻe fakaʻofoʻofa ʻaupito ʻa e kamata ʻa e uepisaití.