Mataupu 31
O Auala Faalilolilo
I le aso 26 o Oketopa, 1999, na faatali ai George A. Bonnet mo Peresitene Gordon B. Hinckley e tulai i luga. Na faatoa uma le fono faatatau o le paketi ma le Au Peresitene Sili, le Au Epikopo Pulefaamalumalu ma pulega aoao eseese ma le pulega a le Ekalesia i le Fale o le Pulega a le Ekalesia i le Aai o Sate Leki. Sa le masani ona auai Georges i le fono—sa ia i ai iina o se sui o le pule faatonusili o le Matagaluega o Fale ma Fanua—ma na ia iloa e le mafai lava na maea lelei le fono sei vagana ua tulai Peresitene Hinckley ma agai atu i le faitotoa.
Ae sa vaaia le le aluese atu o le perofeta i se mea. Nai lo lena, na ia tilotilo sa’o atu ia Georges ma fesili atu, “O le a le mea o le a tatou faia i le malumalu o Kana?” O ona mata sa aioi mai mo se tali.
Sa le iloa e Georges po o le a le tala a fai. O le fesili na matua faateia ai lava o ia. Toeitiiti atoa le sefulu tausaga na muamua atu, ao auauna atu o se faatonu o mataupu faaletino i Aferika, na ia fesoasoani e faaiuina le taofia e le Malo o Kana o gaoioiga a le Ekalesia i le faamalosiauina o Isaac Addy, o se tagata o le Ekalesia i Accra, e faalelei ma lona uso ua faaesea, o le peresitene o Kana o Jerry Rawling.
Sa maua e Georges le faaaloalo a taitai o le Ekalesia mo lana galuega i Kana. Ae o lea ua i ai nei lana galuega fou i le Ekalesia, ma sa le faatatau ia Aferika. Na pau le mea na ia iloa e uiga i le Malumalu o Kana o le, na fofogaina e Peresitene Hinckley i tua ia Fepuari 1998.
“Ou te faamalie atu,” na iu ina fai atu ai Georges, =“ou te le o aafia i le poloketi.”
Sa nofo pea Peresitene Hinckley, sa i ai pea le pupula aioi i ona fofoga. Na ia ta’u atu ia Georges o le faagasologa o le malumalu ua taofia nei. I le taimi muamua, sa foliga mai sa lagolago mai le malo o Kana i le poloketi, ma na faatauina e le Ekalesia le fanua i se alatele autu i Accra. Ae, ao lei oo i le aso na atofaina mo le suaina o le eleele ia Aperila 1999, na teena ai e le malo le tuuina mai i le Ekalesia o le pemita mo le fauga o le [malumalu]. Sa leai se tasi na iloaina pe aisea.
Ina ua maea le fono, sa savali atu Georges i le Fale o Ofisa o le Ekalesia faatasi ma le Epikopo Pulefaamalumalu o H. David Burton ma lona fesoasoani lua, o Keith B. McMullin. Na laua naunau e iloa po o lea se manatu o Georges i le mea e fai e le Ekalesia ia maua ai le faatagaga e fausia le malumalu i Accra.
Mata e mafai ona e alu i Kana?” o le fesili lea a se tasi o i laua.
“E leai lava,” na fai atu ai Georges. “Ou te fiafia e alu.”
I ni nai vaiaso mulimuli ane, na taunuu ai Georges i Kana ma maua le Ekalesia o ola malosi iina. I le taimi o le taofiga, na toeititi iva afe tagata o le Ekalesia ae leai se siteki i Kana. I le taimi nei, i le sefulu tausaga mulimuli ane, o le atunuu ua lima siteki ma le sili atu ma le sefulufitu afe tagata Ma sa tatalo faatauanau na tagata o le ekalesia ina ia toe faaauau le faagasologa o le maota o le Alii. Ina ua asiasi atu Peresitene Hinckley i Kana i le 1998, na tutulai le Au Paia ma alalaga fiafia ina ua ia fofoga mai le malumalu. E leai se tasi na mafaufauina ni faatuai.
I Accra, na feiloai ai Georges ma le tusiata o le malumalu, ma loia a le Ekalesia, ma taitai o le malo. Na la feiloai foi ma Elder Glenn L.Pace, o le Peresitene o le Eria o Aferika i Sisifo, o lē sa faafetai mo le fesoasoani a Georges. Na iloa lelei e Georges le matua le fiafia o Elder Pace i le mea ua tupu. Ae sa ia te ia pea le faamoemoe. Talu ai nei, na faia ai e le Au Paia i Aferika i Sisifo se anapogi faapitoa mo le malumalu, ma sa talitonu Elder Pace sa i ai se suiga i le tafailagi.
Ina ua maea se vaiaso o fonotaga, sa toe tolo e Georges lana malaga mo se isi vaiaso sei tuufaatasi vaega ua ia maua. E tusa ma tala a tagata na ia talanoa i ai, na faatiga ma le leiloa e sui o le Ekalesia le Accra Metropolitan Assembly [Fono Tele a Accra], o le faalapotopotoga a le malo lea e faamaoniaina poloketi o le fale i le aai. Na talitonu le AMA na ova finau ma faasausili sui [o le ekalesia] i le taimi o le faagasologa o le faamaonia o le pemita. Efoliga mai foi o i ai nai tetee mai ia Peresitene Rawling, o lē ua le o toe talanoa ma lona uso, e ui i le la faaleleiga i le taimi o le taofiga.
Na faasoa atu e Georges le mea na ia iloaina ma Elder Pace, ma na laua saunia ai se lipoti mo le Au Epikopo Pulefaamalumalu. Ona toe foi atu lea o Georges i Iuta ma le lipoti i lona lima, ua faamalieina ua ia faia lana vaega i Kana.
Toe foi i Fiti, sa fiafia ai Juliet Toro i le polokalama o aoaoga mamao a le BYU. O ana vasega sa le pei o se isi lava mea na ia oo i ai. I lona tuputupu ae, sa masani lava na fefe e fai atu fesili i le aoga, na popole nei ula lona faiaoga ia te ia i le tau atu o le mea sese. Na vave ona ia iloaina o faiaoga o le vasega na uunaia fesili ma aua lava nei manatu ifo e valea. Ma sa ia lagonaina foi le Agaga o le Alii i le potuaoga, na taitaiina lona aoaoina.
O le kuata muamua a Juliet na matua luitauina. O lana vasega faigata o pulega faapisinisi. E ui lava ua ia iloa ma sina malamalama i mataupu faavae o pisinisi, ae sa masani ona lofituina Juliet e le tele o upu fou ma faauigaga na ia aoaoina i le vasega. I le faaiuga o le kuata, sa ia lagona e pei ua tele naua mea e toefaamanatu mo le suega. Ae sa lelei ona togi i le suega ma ia maua ai le togi faaiu aupito maualuga i le vasega.
O mataupu faalelotu ma le vasega tausitusi na tulai mai ai isi luitau. I le avea ai ma se Au Paia o Aso e Gata Ai fou, sa le masani o ia i le Mataupu Faavae ma Feagaiga, o lea na ia maua ai le fesoasoani mai lona uso aoga o Sera Balenagasau, o se tagata na ola i le Ekalesia o lē na auauna atu o se faifeautalai faamisiona. Mo le tausitusi, sa ia liliu atu i lona toalua o, IIiesa. Seia oo mai taluai nei, sa faigaluega o ia i se faletupe, sa malamalama lelei o ia i le mataupu ma mafai ona fesoasoani ia te ia i meaaoga. I le faaiuga o le kuata, sa ia maua foi ni maka maualuluga i nei vasega.
Taluai o le fale o Juliet sa i le isi itu o le auala mai le aoga, na avea ma nofoaga e faapotopoto ma suesue ai tamaiti aoga. Na masani ona fesoasoani ana uo i le vasega e fai meaai ma faamama le fale. Sa fiafia Juliet e avea i latou o ni uo ma sa faafiafiaina o ia i lo latou lotomalie e auauna atu ia te ia ma lona aiga. O le vaavaai atu ia i latou na pei o le vaaia o le talalelei i lona faatinoga.
O le kuata lua na amata i le aso 1 o Setema, 1999. O nisi o tamaiti aoga sa lei lelei a latou taumafaiga na mananao e toe fai ia suega e faaleleia ai o latou togi, o lea na fatuina ai ni kosi aotele mo i latou. Ma talu ai o Juliet na sili ona lelei i le kuata muamua, na faia ai o ia o se taitai faiaoga o tamaiti aoga mo pulega faapisinisi.
Mo le isi tolu masina na sosoo ai, na faatulaga ai e Juliet ia ana meaaoga ma isi ona tiute o se faiaoga taitai ma se tina. Sa ia faia alii talavou e toalima i lana kosi o le aotelega o pulega faapisinisi e pei o ona atalii. Ao faagasolo le kuata, sa ia iloa sa sili ona to’a lelei i latou i lona i ai nai lo le i ai o o latou faiaoga taitai mai le BYU. Sa saoloto la latou talanoa i le vasega ma stau le mumusu i latou e fai atu fesili ia te ia. I le faaiuga o le kuata, na pasi uma a latou suega.
I se tasi aso, na valaau atu ai le faatonu o le polokalama ia Juliet ma tau atu ia te ia o ia o le tagata e ulu i ai le faauuga.
“O le a lena mea?” o lana fesili lea.
I lona te’i, o lona uiga o ia sa sili i aoaoga faaakatemia i tamaiti aoga uma lava i lea tausaga. Na faatupulaia lona talitonu ia te ia lava. “Ioe,” na ia fai ifo ai ia te ia lava. “E mafai ona ou faia lenei mea.”
I se taimi na lei leva ane, sa faia ai e le polokalama le sauniga o le faauuga mo tamaiti aoga ma le toeititi fa selau tagata o aiga ma uo. O le au faauu. na latou faia ni pulou lanumoana ma ofutalaloa mai le Kolisi o Tekinolosi o le AAG i Fiti, ma maua le aloaia mo le faamaeaina o le polokalama. Na maua foi e Juliet ma nai isi tagata aoga ni tusipasi faamaonia o le amataga o pisinisi mai le BYU–Hawaii Na tuuina atu e Juliet le lauga o le ulu o le faauuga.
Ina ua maea, na faailoa atu e IIiesa ma Juliet lo la agaga faafetai i se tusi ia Elder Henry B. Eyring, o le komesina o aoga a le Ekalesia. Sa ia tusi atu, “Sa ma mafaufau e le aunoa pe o le a ma mafaia ma lo’u toalua ona faaauau a ma aoaoga,” na ia tusi atu ai. “E foliga mai ua taliina a ma tatalo leleoa. E galue le Alii i auala faalilolilo.”
I le aso 1 o Ianuari, 2000, na tuuina mai ai e le Au Peresitene Sili ma le Koarama a le Toasefululua le “O Le Keriso Soifua: O le Molimau a Aposetolo,” o se folafolaga ua sainia e faamamaluina ai le Faaola i le lua afe tausaga talu ona soifua mai o Ia. “Matou te uunaia outou e faaaoga lenei molimau tusitusia i le fesoaosani e fausia le faatuatua o fanau a lo tatou Tama Faalelagi,” o le fautuaga lea a le Au Peresitene Sili.
O le folafolaga na tuuina mai ni molimau faatasi e uiga i le misiona paia a Iesu i lenei olaga atoa ma le faavavau. “Matou te tuuina atu la matou molimau i le moni o Lona soifua le mafaatusalia ma le uiga mama faifaipea o Lana taulaga togiola sili,” na tautino mai ai le au aposetolo. “E leai lava se isi ua i ai se aafiaga matua loloto na’uā o i latou uma na soifua ma o le a soifua ai i luga o le fogaeleele.”
Tolu masina mulimuli ane, ao faia le konafesi aoao ia Aperila 2000, na faamatuu mai ai e le Ekalesia le O Molimau Faapitoa a Keriso, o se ata e tasi le itula lea e faaalia ai uso taitasi o le Au Peresitene Sili ma le Korama a Aposetolo e Toasefululua o loo tuuina atu le molimau patino i le Faaola.
O le ata na amataina i le savali atu o Peresitene Hinckley o i faletele ua suluia e le la o le nofoaga autu o le BYU i Ierusalema. “O lenei aai anamua ma le malosi,” na ia faimai ai, ma tu i le faapaologa, “sa avea pea ma musumusuga ia te au. E faapea ona o lenei nofoaga o loo i ai le faailoga o le Alo o le Atua.
Ona ia toe faamatala lea o le tala ia Iesu, mai Lona fanau mai i Peteleema i Lona Toetu Mai le tuugamau. “E leai se tasi e malamalama atoatoa i le mamalu o Lona soifuaga, le malualii o Lona maliu, le lautele o Lana meaalofa i tagata,” na molimau ai le perofeta. “Matou te folafola atu faatasi ma le taitai o le toa selau, o le na faiatu i Lona maliu, ‘E moni lava o lenei tagata o le Alo o le Atua.’”
I le mulimuli ai i lenei folasaga, na see atu le ata i le molimau a le tasi aposetolo i le isi. O faasologa taitasi na pueina i nofoaga eseese. O nisi aposetolo na saunoa mai i luma o malumalu ao isi na saunoa mai i nofoaga faasolopito e pei o Palmyra, Katelani, ma Navu.
O le tu ai i lalo o se meavaai mamao e sili ona malosi i se falevaaitau, na molimau mai ai Elder Neal A. Maxwell i le faatosinaga aoao a le Faaola i le atulaulau. “A o lei taitai fanau mai o Ia i Peteleema ma oo ina lauiloa o Iesu o Nasareta, o lo tatou Faaola ma Ieova,” na ia molimau ai. “I aso a la ua mavae, i lalo o le taitaiga a le Tama, o Keriso o le Alii o le atulaulau, o lē sa foafoaina lalolagi e le mafaitaulia—o lo tatou lalolagi e na o le tasi lea.”
“Ae i le tele o Ana foafoaga,” na faaauau ai Elder Maxwell, “o le Alii o le atulaulau, o lē na matauina le pauu o manu iti uma, o lo tatou Faaola patino.”
O Elder Henry B. Eyring, o le uso fou o le Korama a Aposetolo e Toasefululua na saunoa mai mai faasitepu i sasae o le Malumalu o Sate Leki. “O malumalu ua faapaiaina o nofoaga paia ia atonu e afio mai i ai le Faaola toetu,” na ia tautino mai ai. “O vaega uma o nei fale, ma mea uma e faia ai i totonu, e atagia mai ai le alofa o le Faaola mo i tatou ma lo tatou alolofa ia te Ia.”
I le savali ma le migao i le isi itu o le faavae o le Malumalu Tuai o Navu, na tuuina mai ai le molimau a Peresitene James E. Faust i le Faaola ma Lana taulaga. “Ou te iloa e ala atu i le tiga le faamatalaina o le Togiola, o alii ma tamaitai, afai latou te salamo, e mafai ona faamagaloina a latou agasala,” na ia faimai ai. “Ona o le vavega o le Toetutu, o le a toetutu ai tagata uma mai le oti. Ou te lagona Lona alofa ma ofo i le tau na Ia totogi mo i tatou taitoatasi.”
Na faauma le ata i le molimau mulimuli mai ia Peresitene Hinckley ao tutu o ia ma ona uso a aposetolo i luma o le faatusa o Keriso i le Lotoa o le Malumalu.
“O Ia lava, o Iesu Keriso, o lē o loo tu i le ao o lenei Ekalesia lea e tauaveina Lona suafa paia,” na tautino mai ai le perofeta. “I le aufaatasi, o ni Ona aposetolo, faamaonia ma tofia e Ia ia faia faapea, matou te molimau atu o loo soifua o Ia ma o le a toe afio mai o Ia e avatu Lona Malo ma pule o se Tupu o tupu ma Alii o alii.”
I le aso 19 o Me, 2000, i le ono o masina talu na uma le faauuga o Juliet Toro, na o atu faamalosi ai fitafita faaaupegaina i totonu o le Palemene o Fiti ma ave faapagota le palemia o le atunuu ma le toatele o isi taitai o le malo. O le faalavelave na vave ona avea o se faoa faamalosi o le faigamalo. Sa ufitia le atunuu i sauaga ma le le kea i tulafono mo ni nai aso.
Sa maligi loimata o Juliet ao matamata i lipoti o le faoa faamalosi i le televise. I le taimi muamua, sa faasāina tagata uma ona feoai. Na taloka pisinisi, tapunia aoga, ma na le toe faia ni lotu. Ona tau tuumamaina lea o tapulaa, ma o le fanau matutua e toalua a Juliet sa o i se tifaga ma o la tausoga ma se uo mai le lotu. Ae e lei umi ona o, ae toe aliae foi sauaga i Suva, ma lafoai ai le aai i le vevesi. Sa popole Juliet ina ua faalogo i le talafou. Na mavae le tolu itula. Ina ua taunuu mai loa lana fanau i le fale, sa ia fusi mau i latou.
Na amata le faoa faamalosi ina ua uma le fausiaina o le Malumalu o Fiti i Suva, ma sa sauni le Au Paia mo se fale tatala ma le faapaiaga ia Iuni. Ia sa toatele tagata o le Ekalesia sa mafaufau pe nei fuafuaga o le a toe tolopoina seia maea le vevesi.
I le aso 29 o Me, na faamavae ai le peresitene o Fiti, ma na pulea faamalosi e le militeri le faigamalo. O le lua o aso mulimuli ane, na valaau atu ai Peresitene Hinckley ia Roy Bauer, le peresitene o le Misiona a Suva i Fiti, e fesili atu e uiga i tulaga iina. Na logo atu e Peresitene Bauer ia te ia na tulaga lelei lava le atunuu i lalo o le vaaiga a le militeri, e ui lava i le tulaga o le ave faapagota o loo faia lava. Na toe tatala le malae vaalele i Suva, ma ua toe mafai nei ona malaga faataamilo i le aai.
Sa faamalieina Peresitene Hinckley. “O le a ta feiloa i le masina fou,” na ia fai mai ai.
Sa faia e le Au Paia i Fiti se fale tatala laitiiti i le amataga o Iuni na faatosina atu ai le sili atu ma le sefuluono afe tagata asiasi.
I se tasi Aso Toonai, na taunuu atu ai pasi e tolu i le fale tatala ma tagata mai isi faatuatuaga. Ao alu ese atu se tasi tamaitai mai le pasi, sa iai se lagona fiafia lea na tupu malosi ifo ao ia latalata atu i le malumalu. I le tuanai, sa ia tautala tetee ai i le Ekalesia. O lea ua ia salamo ai i ana upu, ma sa ia tatalo mo le faamagaloga ao lei ulu atu i le malumalu.
“I le aso ua ou iloa o le Ekalesia moni lenei a le Alii,” sa ia fai atu ai i se tasi o le Au Paia na la feiloai i le taimi o le maimoaga. “Faamolemole auina mai faifeautalai.”
Talu ai ona o le faoa faamalosi, na tonu ai i le Au Peresitene Sili e faia na o le tasi le sauniga o le faapaiaga, ma tapulaa le aofai o tagata e tatau na auai i le sauniga. Ae, i le aso 18 o Iuni, le aso o le faapaiaga, o Juliet ma isi tagata o le Au Paia i Fiti sa tutu i fafo o le malumalu i luga o le auala tele.
O le malumalu sa tu i le pito i luga o le mauga e tilotilo atu i le Vasa Pasefika. Ina ua alu atu lemu le taavale sa avatu ai Peresitene Hinckley ma lana ava o, Marjorie, sa talotalo atu solosolo papae o le Au Paia ma alalaga atu osana. Sa atata le perofeta ma talotalo atu foi ia i latou. O le vaai o ia na faagaeetia ai agaga o tagata uma. Sa susulu le la, ma mafai e Juliet ona lagona le fiafia tele ma le ootia.
I lana saunoaga i le faapaiaga, na saunoa ai Peresitene Hinckley e uiga i le taua o fausaga fou o malumalu. Ua maea ona ia faapaiaina le sili atu ma le luasefulufa o [malumalu] i le salafa o le lalolagi. “O le maota o le Alii,” na ia tautino mai ai i le pulelaa i le potu selesitila. “E mafai ona e faia mulumuluga ma faauuga ma faaeega paia ma sau i lenei potu, ua matagofie ona faameafaleina, o iinei eui atu ai i le veli ua faatusa o lo tatou ala atu mai le olaga i se olaga fou.”
“O potu faamauga nei e lua ma ni fatafaitaulaga matagofie lea e mafai na vaai ai i faata ma maua ai le lagona o le faavavau,” na ia faaauau ai. “E leai se mea faapenei i luga o le laueleele atoa.”
E le umi ae tatalaina le malumalu mo galuega o sauniga. Ma ina ua ona saunia e ulu atu i le maota o le Alii sa faamauina faatasi loa le aiga o Toro mo le taimi nei ma le faavavau.
I le aso 10 o Aokuso, 2000, sa lagona ai e Georges Bonnet le tuuatoatasi tele. O le iva masina talu na uma lana malaga i Kana, na toe foi atu o ia i le atunuu—o le taimi lenei e auauna o se faatonu o le Ekalesia mo mataupu faaletino i le Eria o Aferika i Sisifo. O lona toalua, o Carolyn, ma le la fanau e toatolu o le a le toe umi ae faatasi atu ia te ia i Accra. Ae mo le taimi nei, sa na o ia lava.
O le faagasologa o le Malumalu i Accra sa tumau pea le taofia, ma sa faamoemoe taitai o le Ekalesia o Georges, faatasi ai ma lona tulaga taulelei mo le taitaiga malamalama ma magafagafa i Aferika, o le a fesoasoani e faaminoi i luma le poloketi. I le lagona ai o le mamafa o lona tofiga, sa moomoo ai Georges ia tutusa ma luitau sa i ona luma. Sa ia sailia lona loto ma manatu ai e uiga ia Iesu Keriso ma lana taulaga togiola.
“E ui lava ou te talitonu maumaututu i mana o le Togiola e aumaia le filemu i le loto,” sa ia tusi ai i lana api talaaga, “e leai, se masalosalo, o loo i ai isi mana ma faamanuiaga mai le Togiola ou te lei mauaina.”
Na ia taunuu loa i Accra, na vave lava na aoaoina e Georges o le mauaina o se pemita mo le fauina o le malumalu sa na o se tasi lea o le tele o tulaga ogaogaa e manaomia ai lana gauai atu i Aferika i Sisifo.
O le taimi muamua, sa ia mautinoa e mafai ona ia taulimaina le avega, lea na aofia ai isi poloketi o le fausiaina o isi fale tetele ma le malumalu i Aba, Naitiria. “Sa ou galue iinei muamua,” na ia fai ifo ai ia te ia. “E mafai ona ou faia.” Ma ina ua faatasi atu lona aiga ma ia, na itiiti ai lona lagona o le tuua toatasi.
Ae ina ua mavae se masina, sa tau le mautonu ai ia te ia. O le tele o isi ona tiute na tuua ai se taimi itiiti e alu atu ai mo le pemita o le fausiaina o le malumalu o Accra. Ao saunia ma le faamaoni le Au Paia fi Kana e ulu atu i le maota o le Alii, e leai se tasi—i totonu po o fafo o le Ekalesia e iloa pe faapefea na faauma le tautiga . O le mea e tasi sa ioeina etagata o le, o Jerry Rawling, o le peresitene o Kana, sa i tua o le faatuai.
O le lagona ai o le leai o se faamoemoe, na tatalo ai Georges. “E tele naua faafitauli, tele naua lavelave,” na ia fai atu ai. “E faapefea ona e finagalo, le Alii e, ou te faia lenei mea? O le a ou faia soo se mea e te fetalai mai ai. O le a avea au ma au meafaigaluega, ae e le mafai na ou faia na o au.”
I se taimi puupuu mulimuli ane, na amata ai ona galulue faatasi Georges ma le ofisa o le Faletua o le Peresitene o Kana e faatulaga poloketi o fesoasoani alofa. Sa ia faamoemoe o le faia o lena mea o le a fesoasoani ai i le aiga o Rawling e faamasani lelei ai i le Ekalesia ma lana misiona. Sa amata foi ona anapogi o ia i Aso Sa uma.
I le ogatotonu o Novema 2000, sa lagona e Georges o le a lelei mea uma. Sa faateleina lona talitonu sa taua ia Isaac Addy, o le uso o le peresitene i le foiaina o le faalavelave, e pei lava ona sa i ai o ia i le taimi o le taofiga. Ae sa faalotolotolua o ia e fai atu ia Isaac e alu i le peresitene e fai ma sui o le Ekalesia.
E ui lava ina sa faalelei le auso i le taimi o le taofiga, ae sa lei umi le faaleleiga. Sa tiga ai Isaac, le uso matua, e toe faiatu mo se isi manaoga. Ae sa fautuaina e le avā a Isaac, o June, e talitonu ia Iesu Keriso e fesoasoani e faalelei le la fesootaiga ma lona uso. O lea, e ui i lona tiga, na tautino atu e Isaac ia Georges o le a malie e talanoa ia Jerry e uiga i le malumalu.
I le aso 3 o Tesema, na valaau atu ai Isaac i le fale o Bonnet ma se tala fiafia. Na faafesootai atu o ia e se fesoasoani i le peresitene ma ni fesili e uiga i le malumalu ma sa fiafia le peresitene e lagolago le poloketi pe a faia e le Ekalesia ni nai suiga laiti i le faataatiaga o le nofoaga. O le Aso Sa anapogi, ma sa lei aai Georges ma Isaac i le aso atoa. Ae nai lo le tatalaina o le la anapogi i lena po, sa la o atu faatasi i le nofoaga o le malumalu e filimaoti ai pe na talafeagai le talosaga a le peresitene.
Ao la savalia le laufanua, sa la lagonaina e mafai ona la talia talosaga. “Isaac, o i o le a i ai le malumalu,” na fai atu ai Georges. “Ta fesili atu i le Tama Faalelagi e fautua mai.”
Sa la tootutuli ma faia se tatalo, e talosaga atu i le Alii e faamanuia a la taumafaiga. Na la lagona le malosi o le Agaga, ma na la valaau atu loa i le fesoasoani a le peresitene ma fai atu ua la naunau e feutagai. Sa lagona uma e Georges ma Isaac ni lagona lelei e uiga i le talanoaga.
I le lua aso mulimuli ane, na feiloai ai faalilolilo Isaac ma lona uso i le Maota i Osu, o le nofoaga e nofo ai le peresitene o Kana. Ao lei faia le feiloaiga, na valaau atu Georges ia Isaac e faamanatu atu ia te ia e tau i lona uso e alofa tele mo ia. Ona alu lea o Georges i le fale ma tatalo ma laalaa solo i le fola, ma faatalitali i se tala mai ia Isaac. Ina ua leai se valaau mai, na alu Georges i le nofoaga o le malumalu e faatalitali ai. Na iu ina tatagi le telefoni i le tolusefulu minute mulimuli ane.
“Ua maea,” na fai mai ai Isaac, ma se leo matuai fiafia. Sa la talanoa ma Jerry e uiga i le malumalu i le sefulu minute atoa. Ona la faaaluina lea o le taimi atoa e talanoa ai ma toe manatua ai lo latou aiga. I le faaiuga o le la talanoaga, na la ataata, toē, ma fetagisi faatasi. Na fai mai Jerry e mafai loa e le Ekalesia ona amata loa lava galuega o le malumalu.
Na fesili atu Isaac pe manaomia ona latou feutagai muamua ma le komiti e fuafuaina le taulaga.
“Aua le popole i ai,” na fai atu ai le peresitene. “O le a ou faia.”