Mataupu 32
O Lo Matou Malosi O Lo Matou Faatuatua
I le aso 1 o Oketopa, 2000, o Peresitene Hinckley—ua ivasefulu nei ona tausaga—na faapaiaina le Malumalu o Boston Masssachusetts i sasae o le Iunaite Setete, ua ausia ai lana sini o le i ai o malumalu ua faagaoioia nei i le selau i le faaiuga o le tausaga. O le lua masina mulimuli ane, ao sauni Kerisiano uma i le salafa o le lalolagi e faamanatu le soifua mai o le Faaola ma le amataga o le meleniuma fou, na ia faapaiaina ai isi malumalu e lua, i Recife ma Porto Alegre, Pasila. O isi malumalu e sefuluiva a le na amata ona fausiaina po o loo i ai i tulaga o le fuafuaina. Sa o se faaiuga talafeagai i se tausaga na vaaia ai le tele o malumalu ua faapaiaina nai lo se isi taimi muamua i le talafaasolopito o le Ekalesia
I le taimi o lona soifuaga, sa vaaia ai e Peresitene Hinckley le tuputupu ae o le Ekalesia mai se faalapotopotoga e fa selau afe tagata auai, o le toatele o i latou sa nonofo i Iuta, i le tasi ua ova ma le sefulutasi miliona tagata auai i atunuu e 148. I le 1910, o le tausaga fanau o le perofeta, sa na o le fa malumalu na i ai a le Ekalesia, ma o le faaeega paia sa na o le Igilisi na maua ai. O le taimi nei ua maua malumalu a le Ekalesia i le lalolagi atoa, ma ua maua le faaeega paia i le tele o gagana. O le suiga musuia i mamanu o malumalu na fesoasoani e faia ai lenei mea.
Ae o malumalu sa le na o maota ia na mafaufau i ai Peresitene Hinckley. Mo se taimi, na ia faaalia ai lona atugaluga o le Tapeneko i Sate Leki sa le o lava lona telē e nofoia uma ai i latou o e mananao e fia auai ai i le konafesi aoao. O lea na ia faatonuina ai se maota fono fou ma le gafatia e faatoluina nofoa o le Tapeneko. O le Nofoaga Autu mo Konafesi, na fausia i le poloka i matu o le Lotoa o le Malumalu na faapaiaina ia Oketopa 2000, sa o se faatulagaga ofoofogia, ma sa faafiafiaina ai le perofeta.
I lalo o le taitaiga a Peresitene Hinckley, na faaauau ai foi e le Ekalesia ona opogi tekinolosi fou. E lei leva lava na avea ma peresitene o le Ekalesia, ae ia faamaoniaina loa le fatuina o se uepisaite lea o le a maua ai e tagata faaaoga le initoneti ona maua tusitusiga paia, le molimau a Iosefa Samita, ma lauga mai o le konafesi aoao. I le faaiuga o le 2000, o le www.lds.org na aofia ai kopi faaeletonika o tusitusiga paia, tolusefulu tausaga o mekasini a le Ekalesia, “O Le Aiga: O Se Folafolaga i le Lalolagi,” ma le “O Le Keriso Soifua: O Le Molimau a Aposetolo.”
E pei lava ona vaaia e Peresitene Hinckley se gafatia tele i le initoneti o se uunaiga mo le lelei, sa ia matauina foi le i ai ai o le leaga. O ata mataga sa o se popolega tele. “Tuu ai pea!” na ia aioi mai ai. “Tetee ese e pei o se mala ona, e tutusa lava le faataumaoi.” Na ia ta’usalaina foi sauaga faaletino ma feusuaiga ma uunaia taitai o le Ekalesia e fesoasoani e aumai le tagata solitulafono i le faamasinoga tonu.
Sa popole pea le perofeta e uiga i le numera o le Au Paia o e na pauu ese mai le Ekalesia. I lalo o lana taitaiga, sa tuu ai e faifeautalai le faamamafa sili atu i le liua ao lei papatisoina, ma sa fono faatasi taitai o misiona ma siteki i fono faamaopoopo fou e talanoaina ai pe faapefea ona auauna atu i tagata fou. Ao popole Peresitene Hinckley i le le alualu i luma o le auai i sauniga faamanatuga, ae sa faamalosia o ia e ala i taumafaiga e faatumau le Au Paia i le lalolagi atoa.
I le gafoa ai o le meleniuma fou, na ia tuuina ai se faamoemoega i le tupulaga faiae. E toatele ma toatele, na o atu i misiona ma faaipoipo i le maota o le Alii. Sa ia tauaina foi ua lelei atu a latou aoaoga nai lo augatupulaga ua mavae.
I le avea ma peresitene o le Ekalesia, sa ia naunau i ni auala e fesoasoani ai i talavou a le Au Paia ia maua aoaoga ma aoaoina se matata latou te manaomia. O le amataga o lena tausaga, ao faia le fonotaga a le Pulega o Aoga a le Ekalesia, na ia lagona ai le tau atu e le Agaga ia te ia o le Kolisi o Ricks, o se aoga e lua tausaga, ua tatau ona avea ma iunivesite e fa tausaga e ta’ua o le BYU–Idaho. O lea suiga o le a tuuina atu ai i le toatele sili atu o talavou a le Au Paia o Aso e Gata Ai se avanoa e auai ai i se Iunivesite a le Ekalesia.
I le aso na sosoo ai, na faailoa atu ai e Peresitene Hinckley le manatu i aposetolo, ma na latou autasi i le faamaoniaina. Ona la fefautuaai lea ma David A. Bednar, o le peresitene o le Kolisi o Ricks, ma la filifili ai o le iunivesite fou e tatau na tulimatai atu i le aoaoina ma le faaaogaina o vasega i le initoneti e faalautele ai le numera o tamaiti aoga e lesitala i le aoga.
E lei faamaimaua e le perofeta se taimi i le fofogaina loa o le suiga. “O le a avea ma se aoga sili atu,” na ia folafola atu ai.
Talu ai nei, na ia mafaufau atili ai e uiga i tamaitai ma alii i atunuu tauatiae, ae maise lava faifeautalai ua maea misiona. O le feagai ai ma le mativa ma le le lava o aoaoga ma avanoa faigaluega, o nisi taimi latou te lagona ai le lotovaivai ma faapeapea ese atu ai ma le Ekalesia. I lana faamalosiauga, na amata ai e le Au Epikopo Pulefaamalumalu le atiina ae o ni polokalama fou e saunia ai ni nonoga tupe laiti i Au Paia i le lalolagi atoa e fesoasoani i ai latou e totogi ai aoga o matata po o iunivesite. O le faatusa ai i le Tupe Faaagaga mo Femalagaiga, o le polokalama a le Ekalesia mo le fesoasoani i le fiaafe o le Au Paia Europa e potopoto atu i Iuta i le vaitaimi o le 1800, na fuafua Peresitene Hinckley e faaigoa o le Tupe Faaagaga mo Aoga.
“Ou te lagona o lenei polokalama e musuia ma e mafai ona faamanuia ai olaga o le toatele o alii talavou ma tamaitai,” na ia tusia ai. “E mafai ona siitia a latou vaaigia ma faaosofia ai o latou faanaunauga.
Ia Novema, na faia ai e Perestene Hinckley se faasalalauga o se faigalotu faapitoa mo le au talavou a le Ekalesia. Ina ia fesoasoani ia i latou e avea ma ni soo lelei o Iesu Keriso, na ia valaaulia ai i latou e aoao ma faataitai ia Ia e ono:
Pe ova laitiiti atu ma le masina mulimuli ane, ao tau faaiuiu le tausaga, sa ia toe tomanatu ai i lona olaga ma le agalelei o le Atua. E ui lava ina vaivai le tino o le perofeta, ae o lona agaga na susulu i le filemu ma le faamalieina. “O lo’u lagona o se lagona o le faafetai loloto i lo’u Tama i le Lagi ma Lona Alo Pele,” na ia faamaumauina ai i lana api talaaga i le aso 31 o Tesema, 2000. “O le a tatou sagisagi atu nei i le tausaga fou.”
E lua masina mulimuli ane, i le aso 26 o Fepuari 2001, na saofafai ai Darius Gray ma Marie Taylor i se fale tele na faatumulia i le Faletusi o Talafaasolopito o aiga i le Aai o Sate Leki. I le pito i luma, na saunoa ai le aposetolo o Henry B. Eyring i le sili atu ma le selau le au faasalalau ma malo faaaloalogia e uiga i le poloketi o le Freedman’s Bank.
I le maea ai o tausaga e sefulutasi o galulue, nafaauma ai e Darius, Marie, ma le sili atu ma le 550 volenitia i le Falepuipui o le Setete o Iuta le aoina mai o faamatalaga e uiga i le 484,083, o igoa uma o tagata Aferika Amerika na ta’ua i faamaumauga. Talu ai nei, na amata ai e le Ekalesia ona tuuina atu le lagolago faatekinolosi ma tupe i le poloketi, ma o faamatalaga ua mafai nei na suesue ma avanoa i e sailiili i le CD-ROM ma i soo se nofoaga autu o talafaasolopito o aiga a le Ekalesia.
“I tagata Aferika Amerika, o faamaumauga o le Freedman’s Bank e fai ma sui o se fale teu mea aupito telē mo pepa o faamatalaga o fesootaiga o gafa o iloa o loo i ai nei,” na fofogaina mai e Elder Eyring. “I se taimi lata mai i le lumanai, o la matou faamoemoe foi e tuuina atu ia utuofaamatalaga e leai se totogi i le uepisaite o gafa a le Ekalesia, le FamilySearch.org.”
I aso se ia oo atu i le faasalalauga lenei, na feiloai ai Darius ma taitai i le Matagaluega o Talafaasolopito o Aiga e fuafua le faamatuu atu o utuofaamatalaga. “O le a tatou faia lava lenei mea,” na ia mafaufau ai. “O le a tupu lava.”
O le poloketi e lei mautinoa i taimi uma lona taunuuga. I le popofou, o le aoina mai o igoa mo galuega faalemalumalu na avea ma vaega faaosofia o le poloketi. Ae i le ogatotonu o le vaitaimi o le 1990, na amata e le Ekalesia ona faamalosia le faalotovaivaia tagata mai le tuuina atu o igoa o tagata e le o ni tauaiga i le malumalu. O le suiga sa o se fuafaatatau taua ma talafeagai e faaaloalogia ai aiga o lē ua maliu, ae na mafua ai ona tu le poloketi. O se taunuuga, na faame’i atu e Darius ma Marie lo la taulaiga i le fatuina o se meafaigaluega suesue e fesoasoani ai i tagata Aferika Amerika e saili o latou tuaa.
Na maea ona aoina e pagota igoa ia Oketopa 1999. Ina ua maea lena, na laua faamaonia ma le faaeteete a latou tusitusiga ma—e ui ina tolu vaiaso na loka ai le falepuipui—na faamaeaina le galuega i le ogatotonu o Iulai 2000.
O se tasi o pagota na fesoasoani e faamaopoopo le poloketi na ootia ina ua latou faamaeaina. Na te lei manatu o le galuega o le a matuai aafia ai o ia e pei ona i ai. Na ia faitau i talafaamaumau loto nutimomoia i le aveesea o tama ma tina na faapologaina mai o latou aiga. O isi talafaamaumau na taua ai tagata na tafana ma feoti. O se tasi talafaamaumau na ia aoina mai na taua ai se pepe pologa e leai se igoa na faatauese atu mo se meafaigaluega mo le faatoaga.
O le toatele o pagota na i ai ni o latou aafiaga suia olaga talitutusa. I se tasi taimi, na tau ai se taitai faamaopoopo i se volenitia o tagi. “Ou te le talitonu i le auala na taulimaina ai nei tagata,” o le tala lea a le pagota. O le tuu ai o le lima i luga o le tauau o le volenitia, na vaaia ai e le taitai faamaopoopo, o le alii sa ta ni pe’a o mataitusi faailoga o se vaega papae matautia.
O lea la ua aoina mai faamatalaga, na sue e Darius ma Marie se auala ia avanoa lautele ai i le au suesue—o se mea sa leai ni punaoa e faia ai. Sa ofo atu e se uepisaite lauiloa o gafa e faatau mai faamatalaga mo le faitau sefulu afe o talā, ae sa le taliaina e Darius ma Marie, na lagona o se mea sese le maua o se polofiti mai galuega a pagota. Nai lo le na, na la foai atu i le Ekalesia e fesuiai mo le faia ia avanoa i tagata uma o e mananao e faaaoga.
I le fuafuaga e tatalaina ai le CD-ROM, lea na faasalalau atu i Washington, DC, ma isi aai e sefulutasi i le Iunaite Setete, sa saunoa uma ai Darius ma Marie e uiga i le poloketi. Na faailoa mai e Darius o faamaumauga o loo tau mai ai le tele o tala tiga ma le logo lelei. “Ou te manatu e tele taimi ua tatou fefefe e talanoa e uiga i ituaiga [tagata],” na ia tau atu i le au faasalalau, “ae o ituaiga e moni lava. E tatau ona tatou faasoa faatasi i le talafaasolopito.”
Na talitonu o ia o le aiga o le fatu lea o le poloketi. “E faailoa atu ai ia te oe le taua na i ai aiga,” o lana tala lea. “E ui lava i le siosiomaga faigata o le pologa, sa tauivi tagata e mulimulitaia le tasi ma le isi. Sa latou galulue i ai, sa latou mulimulitaia le tasi ma le isi.”
Sa ioe i ai Marie. “Ina ua ou tau i faamaumauga a le Freedman’s Bank,” o lana tala, “Sa ou vaai faalemafaufau i le motusia e tagata Aferika Amerika o filifili o le pologa ae faamalosia sootaga o aiga.” O lea ua faamoemoe o ia o le a faaauau ona aumaia faatasi e faamaumauga ia aiga.
“O le mea tonu lena e faatatau i ai,” sa ia fai mai ai.
Ina ua valaauina Felicindo Contrera e auauna atu o se epikopo i Satiago, Chile, sa faamalolo mai lona toalua, o Veronica, o se peresitene o le aualofa a le uarota. Ae lei umi ae maua sona valaauga fou: o se faiaoga o le seminare ma le inisitiuti a le siteki.
Mo le tele o tausaga na faagaoioia ai inisitituti o mataupu faalelotu a le Ekalesia e latalata i nofoaga o iunivesite i le Iunaite Setete. Ae i le amataga o le vaitaimi o le 1970, na amata fetuunai ai e taitai o le Polokalama o Aoga a le Ekalesia ia inisititiuti e faagaoioia i siteki i le lalolagi atoa. O le suiga ua faatagaina ai au talavou matutua uma i le Ekalesia, e le nao tamaiti aoga i le iunivesite, ia manuia mai le polokalama. O pulega o le OAE i le risone na vaaia ia vasega, ae saunia e siteki ia faiaoga.
I Chile, na faagaoioia ai aoaoga faalelotu i aso o le vaiaso mo se taimi faatasi ai ma le tele o aoga laiti ma aoga tulagalua e faafoeina e le Ekalesia. Ae sa taugata mo le Ekalesia e faagaoioia aoga i atunuu uma lea o loo ia i tagata o le au paia, ma na faatonu mai i faiga faavae a le Ekalesia e faapea, o le taimi lava e lava ai aoaoga faalelalolagi e maua e le Au Paia, ona tapunia loa lea o aoga a le Ekalesia. I le 1981, na tapunia ai e le Ekalesia lana aoga mulimuli i Chile ae amata ona faalalgolago tasi i le seminare ma le inisititiuti e tuuina atu ai i le Au Paia aoaoga faalelotu.
O suesuega na faailoa ai o tamaiti aoga o le inisititiuti ua sili atu le avanoa e tumau malosi ai i le Ekalesia nai lo latou e le auai. Ae i Chile, e nao le tasi mai le lima tagata talavou matutua toaaga uma o le Au Paia na lesitala. Ae i le taimi na valaau ai Veronica, e na o le toatolu pe toafa tamaiti aoga i le siteki e o mai soo i le inisititiuti.
Na talitonu Veronica o vasega inisitituti na faia se matafaioi taua i le fesoasoani i tagata talavou e alualu i luma latalata atu i le Atua. Sa amata ona ia tau atu le inisititiuti i talavou matutua uma—ma matua o le au talavou matutua—sa ia feiloai atu i ai i le lotu. Sa ia asiasi atu foi i epikopo o uarota taitasi, ma uunaia i latou e valaaulia tagata talavou e auai i vasega. O le toatele o epikopo na lagolagoina, aemaise lava ina ua ia faasoa atu lona talitonuga maumaututu ona o le taua o le inisititiuti. E lei leva, ae sili atu ma limasefulu tamaiti aoga na auai atu i le inisititiuti.
Talu ai ona o le toatele o ana tamaiti aoga e o mai sao mai galuega po o aoga, e tele lava ina leai se taimi e aai ai ao lei amataina le vasega. I le popole ina nei le mafai na taulai atu i lana lesona pe a latou fiaaai, sa faia e Veronica ia mautinoa e maua se meaai a tamaiti aoga pe a latou taunuu mai. E masani lava na saunia mo i latou se keke po o se meaai mama. O nisi taimi na te saunia se mea mamafa, e pei o le papakiu po o ni isi taumafataga. Ae na te le tauina atu i tamaiti aoga po o le a le meaai e faamoemoeina, ma le faamoemoe o le mealilo lena e faamalosiau ai i latou e omai i le vasega.
I le amataga o le tausaga,e fesili atu ai i ana tamaiti aoga pe o le a le mea latou te mananao e aoaoina E faavae i o latou manatu faaalia, sa ia aoaoina le vasega i tusitusiga faavae e fa, o sauniuniga i i le malumalu ma le misiona, ma le faipoipoga e faavavau.
I le faaaogaina o le tusi lesona a le inisititiuti o se vaega amata, sa saunia ai e Veronica ana lesona ma le agaga tatalo, ma saili mo auala e faailoa atu ai tauiviga i aso uma a ana tamaiti aoga. Sa ia fiafia e vaevae le tusi paia i fuaiupu i le fuaiupu e faamalosia ai ana tamaiti aoga e mafaufau loloto e uiga i olaga ma aoaoga o tagata ma perofeta o latou aoaoina. Sa ia faamalosia foi tagata talavou e fai fesili.
“Afai ou te le iloa le tali o lau fesili po o se popolega o i ai,” e fai mai o ia, “O le a ou alu e sue ma o le a ou tau atu ia te oe le tali—pe o le a ta sueina faatasi.”
Ao faatupulaia le vasega a le inisititiuti, ua avea tamaiti aoga ma se vaega vavalalata lava. Sa latou fiafia e faaalu se taimi ma ia ma i latou lava. I nisi taimi, pe a latou feagai ma faafitauli faaletagata lava ia, e o mai tamaiti aoga ia te ia mo se fautuaga. E masani lava ona ia uunaia i latou e foia o latou popolega e tagata sao.
“Vaai,” sa ia tau atu ai i ai latou, “talanoa i o outou epikopo po o lou tama ma tina, aua a fai o se faafitauli i le aiga, e tatau na e foia i le aiga. Ma afai e leai se vaifofo, alu e talanoa i lou epikopo. O le mea sili lea e fai.
Na silafia e Veronica na feagai ana tamaiti aoga ma luitau. I lea taimi, sa vaivai le tamaoaiga o Chile, ma sa mafaufau le toatele o tagata talavou pe faapefea ona latou gafatia le auai i le aoga, faaipoipo, ma tausia se aiga. I le puipui o le fale o Veronica o loo tautau ai se faailo e faitauina “Faatuatua i Tulaga Aao Uma,” ma na ia talitonu o le faatino o le faatuatua ma faaaoga aoaoga a Iesu Keriso i aso uma o le olaga o le a maua ai ni taunuuga lelei.
“O le a i ai pea lava i tatou le tautevateva,” sa ia ta’u atu ai i ana tamaiti aoga. “Ae o le a i ai pea lava ia i tatou le aao o le Alii e fesoasoani ia i tatou.”
Ia Me 2001, na tuua ai e Seb Sollesta lona aiga i le Aai o IIoilo, Filipaina, e nofo ma faigaluega i le Iunaite Setete—o se miti sa ia te ia ao i ai i le kolisi. Ei ai ana uo ma tauaiga mai Filipaina ua malaga atu i le I.S., ma sa latou nonofo fiafia ma manuia o latou olaga. “Atonu ou te maua foi lea miti,” na ia manatu ai.
O lana avā, o Maridan, e lei fiafia i le manatu e tuua e ia le aiga ae malaga atu i le isi itu o le lalolagi. “O lau miti o lau lava lea miti,” na ia fai atu ai ia te ia. “E le o sa’u miti lena.” E toatolu o la atalii talavou o tausia, se pisinisi tau vailaau o loo fai, ma valaauga e faataunuu i le Ekalesia. Sa le malamalama o ia pe aisea e manao ai e aluese atu.
E tatau ona e mafaufau i ai ma le poto,” sa ia fautua atu ai. “I le avea o se tane ma se avā, e manaomia ona ta nonofo i lalo o le malu o se fale e tasi.”
E ui i le le manao e faalavelave i le miti a Seb, na iu ina malie Maridan e me’i. Na la iloa uma o le toatele o ulugalii Filipino e nonofo valavala, ma le isi soa e nofo i Filipaina ao le isi e faigaluega i fafo. Aisea e le mafai ai ona latou faia lena mea e tasi?
I le Iunaite Setete, sa nonofo Seb ma le uso o lona tamā i Long Beach, Kalefonia, o se aai i le talafatai i le itu i sisifo o le atunuu. Sa ia maua se galuega e faigaluega i le sifi o le vaeluaga o le po i se falemai lata ane. Sa faigata itula o taimi o le po, ma o le galuega sa o se luitau, ae sa lelei le totogi, ma sa fiafia Seb i le galuega.
I le faaiuga o vaiaso, sa auai atu i lana uarota i le lotoifale ona asiasi atu lea ma le uso o lona tamā i latou tauaiga. Sa fiafia o ia e fai ni uo fou ma sa masani lelei i ona tauaiga. Ae sa ia lagona foi le tuuatoatasi ma misia lana avā ma le fanau. Sa taumafai i laua ma Maridan e talanoa i le telefoni i aso uma, ae o le faia o lena mea sa taugata. O le faia o se telefoni mamao i Filipaina, sa ia faaaoga ai kata o telefoni i se tau e sefulu talā i le itula.
Ina ua maea masina e lima o faigaluega i Kalefonia, sa amata na mafaufau totoa Seb e uiga i lona toe foi i Filipaina. Na le o toe mamao ae maea lona visa, ma afai e manao e faaauau le faigaluega ai i le Iunaite Setete, e manaomia ona toe faaopoopo. Mo se taimi, na ia mafaufau ai e uiga i le omai o Maridan ma la atalii e faatasi ma ia, atonu ia nofomau, i le taimi e lava ai ana tupe. Ae sa le fiafia Maridan e nofo i le Iunaite Setete, ma sa le manao e nofo ai iina e aunoa ma lona aiga.
I le taeao o le aso 11 o Setema, 2001, na ave faamalosi ai e tagata leaga faatupu faalavelave ni vaalele lau pasese se tolu i le itu i sasae o le Iunaite Setete ma taia agai i fale i le Aai o Niu Ioka ma le eria o Uosigitone DC. O se vaalele lona fa na pau i se laufanua ina ua tetee atu le pasese i tagata na ave faamalosia le vaalele. O osofaiga na fasiotia ai le toeitiiti tolu afe tagata ma faaosofia ai salalau o le ita ma le fefe . Ao faanoanoa tagata i le lalolagi atoa, na tautino le Iunaite Setete ma ana paaga i se “taua o le matau” e faasagatau i vaega faatupu faalavelave o loo i tua o le osofaiga.
Ao matamata Seb i le faasalalauga o talafou i le televise e uiga i le faalavelave, na ia le toe lagona le saogalemu i le mea sa i ai. Ua manao e faatasi ma lona toalua ma le fanau. Sa i aiona atalii i ni tausaga faigata. Sa latou manaomia se tasi e taitaia ma faamalosia i latou ao faasolo ina matutua. Na manaomia ona i ai i le aiga ma i latou ma lo latou tina.
I ni nai aso talu ona uma le ave faamalosia, na alu ai Seb i le vaalele mo Filipaina. Na toe foi vave o ia nai lo le mea na fuafuaina, ae sa le’i faanoanoa ai. O le fiafia moni, lea ua ia iloa nei, sa le sau mai manuia faalelalolagi. E sau mai le aiga.
I le ititi ifo ma le masina talu na uma le osofaiga i le aso 11 o Setema, na saunoa atu ai Peresitene Hinckley i le Au Paia i le konafesi aoao e uiga i le faatupulaia o feteenaiga. “Ua tatou ola i se vaitau ua faia ai e tagata saua mea leaga ma mea inosia,” na ia tautino atu ai. “O lo tatou malosiaga o lo tatou faatuatua i le Silisiliese. E leai se mafuaaga i lalo o le lagi e mafai ona taofia le galuega a le Atua. O le a faaonoono mai e le fili lona ulu auleaga. Atonu e puapuagatia le lalolagi i taua ma tala o taua, ae o le a agai pea i luma lenei faamoemoe.
“Ma ao tatou agai i luma,” na ia faaauau ai, “ia tatou faamanuia tagata soifua ma aapa atu i tagata uma, siitia i latou o mafatia ma sauaina, fafaga ma faalavalava e fiaaai ma lē tagolima, faasafua atu le alofa ma le faituaoi lelei ia i latou i o tatou autafa, atonu e le o nisi o lenei Ekalesia.”
O nai masina mulimuli ane, na talimalo ai le Aai o SateLeki i Taaloga o le Tau Malulu a le Olimipeka o ni taaloga na sa faatalitali i ai Peresitene Hinckley mo le tele o tausaga. E ui lava i le osofaiga talu ai nei a tagata faatupu faalavelave, ae na aumaia e taaloga se numera e lei i ai muamua o tagata asiasi faavaomalo i Iuta, e aofia ai le afe o tagata tusitala naunau e fesili e uiga i le tupuaga faalelotu i le aai ma lana aganuu. Na faatulaga e Peresitene Hinckley le agaga o le lagolago a tagata o le Ekalesia i le faaleoina faalauaitele e faapea, o le a le talai atu faifeautalai i turisi o le Olimipeka. Ae, na faia e le Ekalesia ni laasaga e fesoasoani ai i tagata faasalalau ma isi tagata asiasi e aoao e uiga i le Au Paia.
Ia Oketopa 2001, na tatalaina ai e taitai o le Ekalesia se uepisaite fou na mamanuina e tali ai fesili autu e uiga i talitonuga o le Ekalesia ma ana faatinoga. Ao faia taaloga, na faatulagaina foi e le Ekalesia se vaega tutotonu mo ala o faasalalauga i le Fale Faamanatu o Iosefa Samita, mo tagata faasalalau. Soo se tasi e fiailoa e uiga i le Ekalesia ma ona aoaoga e mafai ona auai i le Faamalamalama le Lalolagi, o se faaaliga e totonugalemu ia Keriso, e uiga i le talafaasolopito o le Ekalesia ma le savali o le talalelei toefuataina, na faia i le fa aso o le vaiaso i le Nofoaga Autu o Konafesi.
Ina ua maea mea na tutupu i le aso 11 o Setema, o le saogalemu sa o se popolega tele i taaloga. O tulaga malosi o le saogalemu na puipuia ai nofoaga taitasi o le Olimipeka, ae sa galulue malosi faatonu e faasaosao le agaga o le aofia o se aai talimalo i le Olimipeka. Ina ia fesoasoani ia solo lelei taaloga, na saunia e le Ekalesia punaoa i le Komiti o le Olimipeka a Sate Leki, o paka taavale mo le aofia ma le tele o auaunaga eseese. Na faafiafia le Aufaipese a le Tapeneko i luma o se aofia i le lalolagi atoa e tolu piliona tagata ao faia sauniga o le tatalaga o le olimipeka. Ma e toatele le Au Paia, e aofia ai ma faifeautalai ua maea misiona sa auauna atu o ni faaliliu upu, na saofaga atu e ala i le volenitiaina o o latou taimi.
Ina ua uma taaloga, na tusia e le perofeta le aafiaga i lana apitalaaga. “Ua faamanuiaina tele le Ekalesia e ala i nei Olimipeka,” na ia tusia ai. “Tatou te lei faia lei faia se talaiga tuusao, ae ua tatou faia ni uo ma ni tagata faamemelo i le salafa o le lalolagi. O tagata na tau leai se mea na faalogo ai e uiga ia i tatou , ua tau masani nei [ia i tatou].
Na mafaufau o ia i le toatele o malo faaaloalogia, ao o malo, ma taitai o pisinisi o e na o mai i le aai e fiafia i taaloga. Na latou aumaia i lo’u mafaufau le valoaga a Polika Iaga e faapea, o le Aai o Sate Leki o le a avea ma se “auala maoae o malo,” o se nofoaga o le a asiasi atu i ai tupu ma alii mamalu.
“O le valoaga ua faataunuuina i le mea na tatou matauina i le lua vaiaso ua tea,” na tusia ai e Peresitene Hinckley. “Ia lea ua tatou toafilemu mai ma toe foi e galulue.”