Mataupu 34
Malosi mo Soo Se Tulaga
I le taeao o le aso 15 o Oketopa 2004 na savali ese mai ai Anne Pingree mai se vaalele i Santiago, Chile. I le avea ai ma fesoasoani lua i le au peresitene aoao o le Aualofa, na sau o ia e feiloai ma le Au Paia i le lotoifale ma aoao faamasani taitai o le Aualofa ma le au perisitua.
I ana fono, na fuafua ai Anne e faaaoga tamaitusi na faafaigofie mo aoaoga faamasani na atinaeina e le komiti mo le faitau ma tusitusi a le pulega a le Aualofa. O tamaitusi taitasi e tusa ma le sefululua itulau o faaalia ai atapue lanu ma mataupu faavae faigofie mai le Tusitaulima a le Ekalesia mo Faatonuga. Sa faamoemoe o ia e faaaoga le tamaitusi i le uelefea a le Ekalesia e fesoasoani ai i taitai o le Aualofa ma le au perisitua e aoao e faataua le tasi ma le isi ma galulue faatasi.
Ae na te lei tuua le Iunaite Setete, na maua e Anne se imeli mai ia Elder Carl B. Pratt o le Au Peresitene o le Eria a Chile Na faatoa tatala lava e le Ekalesia ni nofoaga tutotonu se lua mo punaoa faauelefea i Chile, o nofoaga taitasi na faofale ai se faleteuoloa a epikopo, nofoaga tutotonu mo le sailia o galuega, ma se ofisa o faufautua. Pe a tufatufa atu punaoa o le uelefea, na tatau i epikopo ona galulue faatasi ma le au peresitene o le Aualofa. Ae sa lei faia e epikopo i Chile lenei mea.
I Santiago, sa iloa ai e Anne le tele o faafitauli i le talanoaga amata ma Elder Pratt ma Elder Francisco J. Vinas, le peresitene o le Eria a Chile. Sa faamatala e Elder Vinas o le toatele o le Au Paia I Chile sa faafaigata le faitau tusi, o lea sa latou taitai ai e ala i aga i fanua nai lo le fesili i le tusitaulima. E pei o le tele o eria o le lalolagi, o le faamatalaga le sao e uiga i tulaga faafeusuaiga a tamaitai sa malosi i Chile, ma o nisi pereistene o siteki ma epikopo sa lei fefautuaai ma a latou taitai o le Aualofa.
Na saunoa Elder Fina, “O le mea ou te manao ia te oe e fai o le aoao atu pe faapefea ona fai.” “Aoao atu tatou te taitai e ala i le aoaoina o mataupu faavae o loo i le tusitaulima.”
I le aluga o le vaiaso na sosoo ai, na talanoa atu ai Anne i le fia selau o le Au Paia. E toatele sa talanoa i lo latou talisapaia o le auaunaga talu ai nei a Elder Jeffrey R. Holland o se peresitene o le Eria o Chile. E ui lava na valaauina i laua ma Elder Oaks e auauna atu i o laua eria mo le tasi le tausaga, na toe faaopoopoina e le Au Peresitene Sili se isi tausaga i o la valaauga, ua tuuina atu ai se taimi faaopoopo e lagolago ai taitai i lotoifale ma faamalosia le Au Paia.
O le taulai atu o lona gauai i le maualalo o le faatumauina o tagata auai i Chile ma le auai i sauniga, sa galulue vavalalata Elder Holland ma faifeautalai ma le Au Paia i aso uma e toe aumai tagata i le lotu. Ina ia faamāmā le avega a taitai perisitua i le eria lea na i ai uarota ma paranesi na vaivai, na ia toe faatulagaina ai le tele o iunite o le Ekalesia, faaitiitia le numera o siteki i Chile mai le 115 i le 75.
Na ia faapuupuuina foi sauniga i le Aso Sa i le eria mai le tolu itula i le lua ma le sefululima minute, e tuu atu ai i le Au Paia le tele o le taimi e aoao ai le talalelei a Keriso, faatasi ma aiga, asiasi i tagata o loo i ai tauiviga, ma faataunuu valaauga. Ao feagai pea le Ekalesia i Chile ma faigata i le faatumauina o tagata, e toatele le Au Paia sa talitonu o le a lelei mea uma i le lumanai.
I fonotaga ma taitai o le Aualofa ma le au perisitua, sa faamanatu atu e Anne ia i latou o i latou o e galulue ma isi i le galuega a le Atua. “Uso e, faamolemole mulimuli i le faataitaiga a le Au Peresitene Sili ma le Toa Sefululua,” sa ia faamalosi atu ai. “Faalogo i leo o tamaitai—i lo latou malamalama atamai ao latou faasoa atu faamatalaga aoga i fonotaga a le komiti o le uelefea, fonotaga a le aufono a le uarota, ma fonotaga a tausimea faalemasina.”
Sa ia faamalosi atu foi i taitai o le Aualofa ina ia sauni e fautua faatasi ma taitai perisitua. “O mai saunia i fonotaga a le aufono ia faia se eseesega anoa,” sa ia saunoa ai. “O lona uiga o le o mai ma ni fofō ma ni manatu, ae le na o le faailoaga o luitau po o faafitauli.”
Ina ua talanoa e uiga i le uelefea, sa faaaoga e Anne se masini e faali ai ata ma le tamaitusi o le uelefea ua faafaigofieina e aoao ai taitai i le ala e fai ai fonotaga a le komiti o le uelefea ma asiasiga i aiga e manaomia le fesoasoani. Sa ia faamamafa atu o peresitene o le Aualofa na nafa ma le faia o asiasiga i aiga pe a talosaga ai epikopo.
“O le peresitene e asiasi atu i le uso i lona fale. E mafai ona ia iloiloa mea o manaomia e le uso. A faalogo o ia ma le totoa, o le a fesoasoani le Agaga Paia ia te ia e fautua atu ni auala e taulima ai na manaoga,” na aoao mai ai le tamaitusi. “A uma le asiasiga i le aiga, e toe foi atu le peresitene i le epikopo po o le peresitene o le paranesi ma lipoti atu le mea na ia iloaina.”
Sa lagona e Anne o le toatele o taitai perisitua e o mai i nei fonotaga ma mafaufau matala, naunau mo faamalamalamaga i auala e galulue ai ma le Aualofa i le uelefea. Ma na foliga mai sa faapitoa le agaga faafetai o peresitene o le Aualofa mo le aoaoga faamasani. Ina ua maea se tasi o fonotaga, sa alu atu se tamaitai ia te ia ma faapea atu, “Sa ou popole. O lea ua ou iloa nei le mea e fai.”
Mulimuli ane, na toe mafaufau ai Anne i tagata na ia feiloai i ai. O le lelei o o latou olaga ma lo latou tuuto i le galuega a le Alii na musuia ai o ia.
“Ou te fiafia tele i mea uma ua ou aoaoina ma aemaise o mea uma na ou vaai i ai i lenei malo,” sa ia lipoti atu ai i le pulega aoao a le Aualofa. “O loo latou taumafai malosi e fai le mea latou te mafaia e fausia ai le Ekalesia.”
I le taimi lea, i le isi itu o le lalolagi, na faafeiloai ai e Allwyn Kilbert ma ona uso a faifeautalai i le Misiona a Bangalore Initia ni taitai fou o le misiona o Brent ma Robin Bonham i lo laua nofoaga o le auaunaga.
O le au Bonham na faatoa omai mai Iuta, lea na la maua mai ai aoaoga faamasani i le taiala fou a faifeautalai ua taua Tala’i La’u Talalelei. O le taiala na mamanuina e tuuina atu ai i faifeautalai le fetuunai na latou manaomia e aoao atu ai le talalelei a le Faaola ao taialaina ai e le Agaga e taulima ai manaoga o tagata latou te feiloai i ai.
Ao aoao atili Allwyn e uiga i le Tala’i La’u Talalelei, sa fiafia tele o ia e faaaoga. Sa auai o ia i le Ekalesia i lona nuu o Coimbatore, Initia, ia Mati 2001, ma sa ia lagona le nofo aitalafu i le polokalama faafaifeautalai. Ina ua maliu lona tinamatua i nai masina talu ona mavae lona papatisoga, sa ia maua le mafanafana i mea na aoao atu e faifeautalai e uiga i le ata o le faaolataga. Ma ina ua uma ona faitauina tusiga e uiga i le galuega faafaifeautalai i le Liahona, o le mekasini faavaomalo a le Ekalesia, sa tonu ia te ia e auauna atu i se misiona.
O faifeautalai o le Au Paia o Aso e Gata Ai na uluai o atui Initia i le vaitaimi o le 1850, ma talu mai lena taimi na nonofo ai lava ni nai tagata o le Au Paia i le atunuu. Ae sa lei amata tuputupu ae le Ekalesia seia oo i nai fiasefulu tausaga o le seneturi lona luasefulu. I le vaitaimi o le 1980, na auina atu ai e taitai o le Ekalesia ia faifeau matutua mai le Misiona a Sigapoa i eria i Initia. E ala mai i nei faifeautalai ma taumafaiga a le Au Paia i le lotoifale, ma mauaa ai le Ekalesia. I totonu o le sili atu ma le tasi le piliona o tagata i le atunuu, e na o le ova atu ma le lima afe faselau o tagata o le o Au Paia o Aso e Gata Ai.
Ma o lea tuputupu ae na tumau pea le lemu mo le tele o tausaga. I le 1996, i le tolu tausaga talu ona faavaeina le Misiona a Bangalore Initia, sa faatapulaa ai e le malo le numera o faifeautalai mai atunuu ese e galulue i le atunuu. O le toatele o tagata i Initia o Initu po o Mosalemi, ae toalaititi lava o Kerisiano, Sikh, Puta, Jain, Baha’i, po o le Parsi. Ina ua aoao atu Allwyn ma isi faifeautalai e uiga i le Faaola ma Lana Ekalesia, e toatele tagata sa le masani i mataupu faavae autu o loo i lesona.
Na talitonu Allwyn e mafai e le Tala’i La’u Talalelei ona fesoasoani i faifeautalai e fetuunai savali o le talalelei i tagata uma, e tusa lava po o a o latou talaaga po o talitonuga. Ma le sili atu ma le fasefulu tausaga, o lesona a faifeautalai na faia mai i lesona tusitusia e ono. I se faatusatusaga, na ta’u atu e le Tala’i La’u Talalelei i faifeautalai e taulai atu i le aoaoina o mataupu faavae o le talalelei ina ia mafai ona latou fetuutuunaia lelei a latou lesona i tagata latou te aoaoina.
O le mataupu aoaoina fou na tuuina atu ai i faifeautalai lesona e lima i le Toefuataina, o le ata o le faaolataga, le talalelei a Iesu Keriso, o poloaiga, ma tulafono ma sauniga o le talalelei. O isi mataupu i le tusi na aoao atili ai faifeautalai e uiga i le matafaioi a le Tusi a Mamona, iloaina o le Agaga, atiina ae o uiga faaKeriso, ma isi mataupu faavae taua.
“E totonugalemu i le fuafuaga a le Tama, le Togiola a Iesu Keriso,” faitau se fuaitau autu se tasi mai le lesona muamua. “E ala i le Togiola ua mafai ai ona tatou saoloto mai le avega o a tatou agasala ma atiina ae ai le faatuatua ma le malosi e fetaia’i ai ma o tatou tofotofoga.”
O nai masina na sosoo ai, sa tapena ai e Peresitene ma Tuafafine Bonham le misiona iasuia i le Tala’i La’u Talalelei. I se konafesi faalesone ia Aokuso 2004, sa la talanoa atu ai i faifeautalai e uiga i le faaaoga tatau o le taimi, o se tasi lea o mataupu faavae mai le mataupu aoaoina fou. I le aso na sosoo ai, na tusi atu ai Allwyn i le fale i lona aiga e uiga i suiga. “O se polokalama ua faailoa mai e le mo na o Initia ae mo le salafa atoa o le lalolagi,” na ia faiatu ai ia i latou. “Ua tuuina atu i faifeautalai le tele o le saolotoga faapea foi ma le tali atu o le tagata mo ia lava.”
Ia Setema, na valaauina ai e Peresitene Bonham ia Allwyn e avea ma se taitai sone i Chennai, o se nuu i le talafatai i sautesasae o Initia. I fonotaga faalesone, na faaaoga ai e Allwyn le Tala’i La’u Talalelei e aoao faamasani ai isi faifeautalai ma fesoasoani ia i latou e fetuunai i le metotia fou mo le faasoa atu o le talalelei.
E lei umi, ae saoasaoa le alu o le galuega faafaifeautalai i Chennai. Sa feiloai Allwyn ma ana soa i se tamaitai e igoa ia Mary ma le tama a lana tama o Yuvaraj. Sa fiafia le aiga i le talalelei toefuataina ina ua lesitala Yuvaraj i se aoga sa faatautaia e le Au Paia o Aso e Gata Ai i le lotoifale. Ao aoao atu e faifeautalai lesona mai le Tala’i La’u Talalelei, sa faaalia e Mary le fiafia faapitoa i le faamauina i lona toalua ua maliu, na maliu i ni tausaga ua tea. Sa iloa e faifeautalai sa taua aiga ia Mary, o lea na latou fetuunaia ai le la latou savali ina ia taulai atu i lona natura e faavavau. Ma ina ua valaaulia e Allwyn ma ana soa o ia ma Yuvaraj e papatiso, sa la taliaina.
I le aso o lo la papatisoga, e toalima isi tagata na papatiso ai foi.
I le aso Sa, 26 o Tesema 2004, sa savali ese ai Stanley Wan mai ana fono a le Ekalesia i Hong Kong e tali lana telefoni. Ua silia ma le sefulu tausaga talu ona fesoasoani o ia ia Peresitene Hinckley e filifili le nofoaga mo le Malumalu o Hong Kong. Ua avea nei o ia ma fitugafulu eria pulefaamalumalu i Asia ma galue ai o se pule o le uelefea a le Ekalesia i le eria.
O le valaau mai le telefoni sa mai ia Garry Flake, o le faatonu a le Ekalesia mo le tali atu mo fesoasoani alofa. Sa faanatinati mai lona leo. Sa ia fiailoa e uiga i se sunami i Indonesia.
Sa lei iloa e Stanley le mea na talanoa mai ai Garry. Sa faauma lana valaau ae valaau atu i le ofisa a le Ekalesia i Indonesia. Na leai se tasi iina na tele se iloa e uiga i le sunami, ae na amata ona aliae ane lipoti o tala fou.
I se taimi o lena taeao, na oso ai se mafuie tele lava i le Vasa Initia, i fafo ane o le talafatai i sisifo o le tamai motu o Sumatra i Indonesia. O le malosi o le mafuie na taape atu i le salafa o le vasa, na faaoso ai ni mapue maualuluga o le vai sami agai i le laueleele. I Indonesia, Initia, Sri Lanka, Meleisia, ma Taialani, na taia ai e galu tetele ia taulaga ma nuu, lolovaia ai alatetele ma folasi ai fale ma faletetele. O se numera e le mailoa o tagata na misi pe maliliu.
O le taimi lava na latou malamalama ai i le lautele ma le ogaoga o le mea na tupu, na tonu loa i a Stanley ma Garry e feiloai i Colombo, Sri Lanka, e iloilo le tulaga. Na i ai ni faifeautalai ma na tusa ma le 850 tagata o le Ekalesia i le motu. Ae e le pei o Indonesia ma Initia, o Sri Lanka sa lei i ai se ofisa o le pulega a le Ekalesia po o se aufaigaluega a le Ekalesia i le lotoifale.
I le taimi lava lea, na alu ai loa Stanley i le malaevaalele. Na taunuu o ia i Sri Lanka pe tusa o le tuneva o le po ma vaaia ai le motu ua faatumulia i le aufaasalalau, faalapotopotoga alofa, ma tagata o loo sailia uo ma aiga. I lona faletalimalo, na tuu atu ai lona potu i se malo na ia totogia se tau maualuga atu, o lea na ia suea ai faifeautalai i le lotoifale ma sa moe ai i le fola.
I le aso na sosoo ai, na taunuu ai Garry Flake mai le Iunaite Setete, ma sa la faaaluina ma Stanley le taeao e fono ai ma taitai o paranesi ma le au paia. Ona la faataamilo lea i le motu e iloilo mea ua faaleagaina.
O le talafatai i sasae o Sri Lanka sa sili le leaga o le lavea. O mea uma sa la vaaia, o fale ma fale tetele ua toulu i lalo. Na feomai auala i taavale ma tagata o loo taumafai e sosola ese mai le vevesi. Na le toe feoai pasi ma nofoaafi. E faitau afe ma afe tagata na nonofo i autafa o faaputuga o otaota ua leai ni fale, ao sailia e fitafita ni isi o sao mai.
I tausaga talu ai nei, na tuuina atu ai e le Ekalesia le toomaga i faalavelave i le salafa o le lalolagi, fesoasoani i tagata sulufai i atunuu na olopala i taua o Kosovo, Sierra Leone, ma Afakanisitana; tagata na afaina i lologa i Venesuela ma Mozambique; ma e na faasaoina mai i mafuie i El Salvador, Turkey, Kolomupia, ma Taiuani. I le taimi nei, i Asia sautesasae, ua i ai i le Ekalesia ni pailate o sapalai mo mea faafomai mo le faaaogaina i eria na afaina i le sunami. Faatasi ai ma tupe mo fesoasoani alofa a le Ekalesia, na faatauina ai e Stanley ma Garry ni sapalai faaopoopo o mea faafomai mo faalavelave faafuasei, meaai, ma isi punaoa mo taitai i le lotoifale e tufatufa atu i tagata na afaina ai. Sa laua faasino atu foi tagata o le Ekalesia e faaaoga falelotu i le lotoifale e tuufaatasi ai pusa o mea e faaaoga mo le tumama ma isi sapalai mo le toomaga.
Ina ua uma ona faaalu ni nai aso i Sri Lanka, na malaga atu loa Stanley ma Garry i Indonesia. O iina na latou feiloai ai ma le Faifeau Faamaopoopo o le atunuu mo le Manuia o Tagata, o lē sa galulue muamua ma Garry.
“O le a lou manaoga sili?” Na fesili atu ai Garry ia te ia.
“Matou te manaomia ni taga mo tino maliliu,” na tali atu ai le faifeau.
Na fesootai atu Stanley ma Garry i e latou te iloa i Beijing, ma na latou maua ai se kamupani e mafai ona latou lafo atu i le aso le sefuluafe o taga mo tino maliliu. Ona faatulaga loa lea e Stanley ma Garry le lauina atu i Indonesia.
Faatasi ai ma le auina atu o taga mo tino maliliu, na tuuina atu e le Ekalesia ia faleie, tapoleni, pusa o mea faafomai, ma lavalava ua faaaoga mo tagata na mafatia i le sunami. Na latou auai faatasi ma le faalapotopotoga o toomaga a Musalemi e kiliva atu le silia ma le fitusefulu tane o sapalai faaopoopo.
Ae sa matua tele naua isi mea e fai. Soo se mea na liliu atu i ai Stanley ma Garry, sa la vaaia ai tagata na manaomia le fesoasoani. E faitau afe na lipotia ua maliliu i Sri Lanka ma Indonesia. Ma le isi faitau afe na maliliu i Taialani.
Ma sa vave le faateleina o le aofai o tagata maliliu.
Sa taoto Allwyn Kilbert i lona moega, e faatalitali mo lona taimi e faaaoga ai le fale taele, ae oso loa le mafuie i Chennai, Initia. I le po na muamua atu, sa lelavava o ia ma ona uso faifeautalai ina ua uma ona auai atu i le gaoioiga o le kerisimasi ma le latou paranesi. Ina ua amata na lulu lona moega, na manatu o ia o loo fia malie lana soa.
“Aisea ua e luluina ai lo’u moega?” na ia valaau atu ai. “O lea ua ou ala.”
O lana soa, o Revanth, na ulu mai i le potu. “O se gatete,” sa ia fai mai ai. “O se mafuie.”
Sa le masani ona lulū ni mafuie i le itu i saute o Initia, ae sa lei manatu tele i ai faifeautalai. E oo lava foi ina la taunuu atu i le falesa i se taimi mulimuli ane o lena taeao, sa lagona e Allwyn sa i ai se mea na faaletonu. Ina ua amataina o le lotu faamanatuga, sa faafuasei ona faamavae le peresitene o le paranesi o Seong Yang mai le tulaga ma tuua le falesa. Sa toetoe lava a le malolo le ūū o lana telefoni feaveai i valaau e uiga i le lolovaia o le talafatai i le sunami. Sa ia tuua le falesa e siaki lona fale, lea sa latalata i le matafaga, ma iloilo mea na manaomia e le Au Paia na afaina i le faalavelave.
Mulimuli ane i lena aso, sa o atu ai Allyn ma ana soa i le matafaga e vaai i le mea na tupu. Sa faatuina e alii leoleo ni pa puipui e taofia ai tagata matamata ma sa latou leoleoina le eria i a latou solofanua. I le matafaga, sa tatoso ese mai e tagata tino mai le vai, lea na oo atu i le silia ma le afa maila i uta. I le talafatai atoa, o nuu faifaiva laiti ua faatamaia, ma o le toatele o tagata faifaiva ua leiloloa a latou vaa ma meafagota. I le taulaga o Nagapattinam, e 185 maila i saute o Chennai,ua ia i le faatamaiaga ua sosolo lautele atu
O le taeao na sosoo ai na o ai Allwyn ma ana soa i le falelotu o le Paranesi Muamua o Chennai e fesoasoani i le galuega auauna atu na faatulaga e paranesi e lua i le taulaga. I le po, na auina atu ai e le Ekalesia ni loli tutumu o sapalai mai se taulaga e toeitiiti fa selau maila le mamao. Mo le isi lua aso, na tuufaatasia ai e faifeautalai ma tagata o le ekalesia ma faavasega pusa mo toomaga na i ai lavalava, mea mo moega, aitema mo le tumama, ma mea e faaaoga e aai ai.
I le Aso Lua 28 o Tesema, na feiloai ai Allwyn ma ana soa ma Peresitene Bonham, le peresitene o le latou misiona. Talu mai ona taia i le sunami, na galulue ai le Au Paia o Aso e Gata Ai i Initia i le tufatufaina atu o mea na tuuina mai e le Ekalesia mo tagata ua afaina. Ina ua uma ona uta loli ma le fia selau o pusa o mea mo le tumama ma isi sapalai, sa malaga loa faifeautalai ma Peresitene Bonham e tiliva atu nei mea i le nofoaga o le Koluse Mumu a Initia.
I le nofoaga, sa iloa mai e le alii na faafeiloaia i latou pine o o latou igoa. “Oi, o outou mai le Ekalesia,” o lana tala lea. “O a mea na tou aumai?”
Na latou tali atu na i ai ni moli matagi, pusa o mea mo le tumama ma ni tone o lavalava. Sa fiafia le taitai i le foai ma faiatu ia i latou e alu atu le loli i totonu o le fale.
I totonu na latou maua ai tagata o tumutumu i faaputuga tetele o lavalava. O tagata faigaluega o loo faia talifofoga ma totigilima na faavasegaina faaputuga, ina ia mautinoa o mamā ma tulaga lelei ia lavalava. Sa momoli atu foi e tagata mai lotu ma faalapotopotoga eseese ia sapalai, ma na faaaluina e Allwyn ma isi faifeautalai le tele o itula e la’u ese ai uta a loli ma avatu sapalai i mea na manaomia ai.
Ao ia vaavaai atu i tagata mai vaega eseese, na taia Allwyn i le ala na latou galulue faatasi uma ai ona o le alolofa mo o latou tuaoi.
“O loo i ai tagata lelei i soo se mea,” na ia manatu ai.
Ia Me 2005, ua ono masina talu na tafafao faamasani ia Emma Acosta ma lana uo tama, o Hector David Hernandez. Sa sefuluiva ona tausaga, ae faatoa foi mai [Hector] mai lana misiona i le Aai o Guatemala. Sa matuai faamemelo le tasi i le isi ma ua amata ona talanoa e uiga i le faaipoipoga. Ae i Tegucigalpa, Honotura, lea o loo nonofo ai, o alii ma tamaitai talavou e le masani ona faaipoipo seia mavae ni nai tausaga o tafafao faamasani ma faamaeaina a latou aoaoga i le iunivesite.
Na lesitala talu ai nei Emma i se iunivesite mo tagata lautele, ma sa filimaoti o ia iamaua lona tikeri. I le tausaga na mumua atu i le fonotaga aoao a Tamaitai Talavou a le Ekalesia, na uunaia ai e Peresitene Hinckley ia tamaitai talavou ina ia latou mafaufau loloto ia latou aoaoga. “Ia maua aoaoga uma e te mafaia,” na ia saunoa mai ai. “O le aoaoina o le ki lea i avanoa.”
Sa fuafua foi Hector David e auai i le iunivesite. Sa la iloa ma Emma e toatele o tagata aooga ua faaipoipoina ua faamaamulu ma le aoga ona o tiutetauave tau tupe lea e o mai faatasi ma le faaipoipoga ma le tausiga o se aiga. Ae, na la lagona lava le uunaiga e le Agaga e aua nei tolopoina le faaipoipoga .
I se tasi aso, na fai atu ai Emma ia Hector David e uiga i le malaga a le uarota i le malumalu i le Malumalu o le Aai o Guatemala. Ma e lei oo muamua lava o ia i se malumalu ma sa manao e alu.
“Aisea ta te le o faatasi ai ma fesili i le Alii po o le a le mea e finagalo i ai o Ia i le ta mafutaga?” Na fautua atu ai Hector David. I le aluga o tausaga, na uunaia ai e taitai o le Ekalesia ia tagata talavou e saili le taitaiga a le Alii i fesili e uiga i faauoga ma faaipoipoga. Sa lei manaomia e Emma ma Hector David le o i le maota o le Alii ia maua se faaaliga patino, ae o se nofoaga paia e mafai ona la lagona ai le latalata atu ia te Ia ma Lona Agaga ao laua sailia le taitaiga.
O le aai o Guatemala o se malaga e sefulufa itula mai Tegucigalpa. I lo la taeao muamua i le malumalu, sa faataunuu ai e Emma ma Hector David papatisoga mo e ua maliliu. Ina ua laaese mai Emma mai le potu sui, sa ia maua Hector David o faatalitali mo ia i talane o le vai papatiso, na laei papae. Ao ia papatisoina ia, sa ia maua se molimau patino e tatau ona ia faaipoipo ia te ia [Hector David].
Mulimuli ane, ina ua uma se sauniga o le faaeega paia a Hector David, sa ia faatasi atu ia Emma i le togalaau i lotoa o le malumalu. Sa ia uuina lona lima ma opo o ia. Sa maua foi e ia se tali. “Ou te lagona o le a i ai faatasi le Alii ma i taua,” na ia fai atu ai. “O le a Ia tuuina mai ia i taua le malosi mo soo se tulaga e oo mai e amata atu nei.”
I nai vaiaso mulimuli mai, sa faigaluega Emma i le faleoloa a lona aiga ae ona maua se valaau mai ia Hector David. Sa ia tau atu ia te ia na faatoa uma ona talanoa i lona tamā e uiga i le faaipoipo ia te ia. Sa lei tulaga lelei le talanoaga. O lona tamā o se tasi o le Au Paia o Aso e Gata Ai, ae ua fai si umi e lei toe alu i le lotu. Sa le malamalama o ia pe aisea na manao ai Emma e faaipoipo loa.
Ina ua uma le telefoni, na vaaia e Emma lona tamā ua ulu atu i le faleoloa,na pāū ona foliga. Sa ia faamalo atu ia te ia i lana faamau, ae sa manino lava sa le fiafia o ia. Sa popole o ia nei tei ua le uma lona tikeri.
“Afai ua e fuafua e faaipoipo, e sili ona sue sau galuega,” o lana tala lea. “Ou te le manao e te toe sau e faigaluega iinei.”
O le le mautinoa po o fea a alu i ai mo se galuega, sa alu ai Emma i le nofoaga autu o punaoa mo galuega a le Ekalesia i Tegucigalpa. Na tatalaina i le 2002, o se tasi o le fia selau ua faatulagaina i le lalolagi e fesoasoani i Au Paia ia maua se galuega sili atu ona lelei. O faiaoga i le nofoaga autu o faifeautalai i le lotoifale ua maea mai misiona. Sa latou talanoa atu ia te ia e uiga i Tupe Faaagaga mo Aoga, lea na faailoa mai e Peresitene Hinckley i le 2001, ae mo le taimi nei sa lei manao o ia e fai se nonoga tupe mo le aoga. Sa latou tuu atu foi ia te ia ni motugaafa iauala e fai ai faatalanoaga mo se galuega ma fesoasoani e fatu se tusi o ona talaaga faaleaoaoga ma faalegaluega. O le faaauupegaina ai i nei tomai, sa vave ona ia maua se galuega i se faletupe.
Ao latalata mai le aso o lana faaipoipoga, sa lagona e Emma le lotovaivai. E ui lava na ioe lona tamā e fesoasoani e totogi le faaipoipoga, ae sa latou faaleoa ma isi tauaiga lo latou tetee i le faaipoipoga.
O lo latou le taliaina na mamafatu lea ia Emma I se tasi aso, na tootuli ai na o ia i lona potumalolo e tatalo. “O le mea lenei na e fetalai mai ia i maua e fai,” sa ia fai atu ai i le Tama Faalelagi. “O lea ou te taumafai e usiusitai.”
Sa faafusei lava, ona oo mai i lona mafaufau le tala e uiga i le Faaola na savali i luga o le vai. Sa ia manatua le ala na taumafai ai Peteru e alu atu ia Iesu, ae na magoto ina ua fefe o ia. E faapei o Peteru, na lagona foi e Emma le pei ua malemo.
Ae na oo mai i ona luga se lagona toafilemu. “Afafine, o loo e tulimatai atu i le afā,” na fetalai mai ai le siufofoga o le Alii ia te ia. “Ua na o lo’u manao lava e te vaai mai ia te a’u. Taulai mai ia te au, i le mea ua uma ona ou tuu atu i lou loto.”
Sa ia lagona e pei na tago mai le Alii i lona lima, e pei ona Ia tago atu i le lima o Peteru.
I le faaiuga o Setema 2005, sa galue malosi ai Angela Peterson i le masina atoa e tapena mo se asiasiga mai se tagata maualuga a le malo mai Sasae Tutotonu. O se vaega o lana galuega fou i se ofisa o sootga faavaomalo ma faalemalo i Uosigitone,DC, o nisi taimi sa talosagaina ai o ia fuafua ni savaliga maimoa, ’aiga i afiafi, ma faafiafiaga faaleaganuu mo tagata asiasi taua.
Ina ua taunuu le tagata o le malo, sa la talanoa ma Angela, ma na iloa ai e i ai ni mea la te tutusa ai. Sa la ola uma ae i eria maotua, ma taua uma ia i laua ia aiga ma le faatuatua. Sa le inu ava le tagata o le malo ona o ona talitonuga faaMusalemi, ae na faagaeetia foi o ia ona sa le inu foi Angela.
Sa fuafuaina e Angela le tele o gaoioiga mo le nofo ai o tagata o le malo, ae ina ua mavae ni nai aso, sa ia faimai, “Ou te iloa ua ou vaai uma ia Uosigitone i le taimi lenei! E i ai se isi mea e mafai ona e faaali mai ia te au, atonu o se mea e ese?”
Na emoemo se ata i le mafaufau o Angela: o le Malumalu o Uosigitone DC. Sa tau musu o ia, ma mafaufau pe e talafeagai ona ave o ia i se nofoaga e paia ia te ia. Ae, sa le mafai ona aluese le ata o le malumalu mai lona mafaufau.
“E i ai se nofoaga se tasi ou te lei faaalia atu ia te oe,” sa ia fai atu ai. “O le nofoaga aupito taua ia te au i Uosigitone, DC.”
Sa ioe ma le naunautai le tagata o le malo e o, ma sa amata loa ona faia e Angela ni feutagaiga. Sa ia valaau atu loa i le faatonu o le nofoaga autu mo tagata asiasi i le malumalu, o Elder Jess L. Christensen, o lē na ofo mai e tapuni le fale mo ni nai itula ina ia tuu atu i le tagata o le malo se maimoaga taamilo patino.
O le aso na sosoo ai, na piki ai e Angela le tagata o le malo ma tietie atu i se auala matagofie ma taamilo i le malumalu. O le tietiega na toeitiiti itula le umi, na ia fesili atu ia te ia lea fesili ma lea fesili e uiga i le Ekalesia, ma sa ia lagonaina le oo mai o manatu ma upu i le manino atoa. Sa faalogologo o ia ma le toto’a ma na foliga fiafia i le Uluai Faaaliga, le Tusi a Mamona, perofeta o aso nei, galuega fesoasoani alofa a le Ekalesia i le lalolagi, ma le tulafono o le sefuluai.
E oo ane i le taimi na mimilo ai Angela i le pioga mulimuli o le auala o le pakaga, ua afiafi, ma na susulu malamalama le maota o le Alii i le la goto. Ao la sopoia laufanua o le malumalu, sa iloa lelei atu le faatusa o le Christus i le nofoaga autu mo tagata asiasi. Sa taitaia e Elder Christensen le maimoaga, lea sa faaalia ai se faaaliga o le Tusi a Mamona i le tele o faaliliuga, e aofia ai le gagana aloaia moni Faa-Arapi.
I le faaiuga o le maimoaga, na faaali ai e Elder Christensen le vitio o Peresitene Hinckley o molimau mai e uiga i le taua o aiga. I tafatafa o le televise sa i ai se kopi ua faavainaa o le “O Le Aiga: O Se Folafolaga i le Lalolagi.” Sa faitauina lemu e le tagata o le malo ma luelue lona ulu.
“O le mea lenei ou te talitonu i ai,” sa ia fai atu ai. “O le mea lenei e talitonu i ai o’u tagata.”
I le toe foi atu i le aai, sa faiatu le tagata o le malo ia Angela, sa faagaeetia o ia i le faamamafa a le Ekalesia i le aiga, ma sa fiafia o ia i le iloa o se isi faatuatuaga e faatauaina aiga e pei lava o lana tapuaiga. I le aso mulimuli o lana asiasiga i Uosigitone, na tuu atu ai e Angela ia te ia se kopi o le folafolaga.
“Ou te manao e avatu ia te oe se mea ou te manatu o le a aoga i tagata o lou atunuu,” sa ia faamalamalama atu ai.
O le taliaina o le meaalofa, na ia saunoa ai, “O le a fesoasoani lenei mea i o’u tagata.”