O Tulagaaao i O Tatou Olaga
Ou te faafetai lava ona o lenei valaaulia ou te lauga ai ma ou te tatalo ina ia molimoli atu e le Agaga la’u molimau ma upu i o outou loto.
A o ou mafaufau loloto i le soifuaga o lo tatou perofeta pele, o Peresitene Gordon B. Hinckley, sa faamanatu mai ai ia te au le fuaiupu lenei mai ia Henry Wadsworth Longfellow:
O soifua o tamalii maoae tatou te manatua ai
O le ta’uaogaina o o tatou olaga e mafai,
Ma, a fai i lagi la latou folauga, latou te tuua lava
O latou tulagaaao i o tatou olaga.1
O le aso, ou te faamoemoe a o tatou faamamaluina lona talatuu, ia tatou manatunatu loloto i “tulagaaao i o tatou olaga” lea ua tuua e Peresitene Hinckley. Mafaufau po o a mea o le a e manatua pe a ou ta’ua le taimi o Peresitene Hinckley. I le taimi puupuu na matou mafuta faatasi ai, e mafai ona ou ta’ua na o ni nai tulagaaao mai le anoanoai na uunaia ai au.
O Gordon B. Hinckley o le sooupu maoae. Sa ia tatalaina faitotoa i ala o faasalalauga a le lalolagi ma faamanino atu ai le Ekalesia i se aofia i le lalolagi atoa. Na amata ina ua faatoa taliu mai le misiona o se faifeautalai talavou, ua silia ma le 70 tausaga talu ai, na ia amata faaaogaina ia atavili, o atatifaga, ata lanu, tamaitusi, ma tusitusiga mo faifeautalai e faamatala atu ai le tala o la tatou Ekalesia. O auala lava nei, o loo faaauau pea ona faaleleia atili, ma o loo faaaogaina pea lava i le taimi nei.
O le taimi o Hinckley ua avatu ai le galuega faafaifeautalai i le lalolagi uma. Toeitiiti atoa le 13 tausaga o le tulai mai o le au peresitene a Peresitene Hinckley, ua silia ma le 400,000 faifeautalai ua tofia, e tusa ma le 40 ma ona tupu pasene o faifeautalai uma na tofia talu ona faatulaga le Ekalesia. E toetoe o le tasi vaetolu o tagata uma o le ekalesia i le taimi nei, na papatisoina talu ona avea Peresitene Hinckley ma o tatou perofeta. O le lu’i a Peresitene Hinckley ina ia faateleina taumafaiga faafaifeautalai ma lo tatou faatumauina o tagata fou e liliu mai, o loo tumau lava ona avea o se poloaiga o loo taumafai pea ina ia faataunuuina.
Atonu o tulagaaao o Peresitene Gordon B. Hinckley o loo sili ona lausilafia ma e faavavau foi nai lo nisi “tulagaaao i o tatou olaga”, o le fausiaina lea tusa ma le 75 malumalu fou talu ona avea o ia ma Peresitene. O sauniga uma lava o loo faia i nei malumalu, ua avea ma se molimau o le tofa mamao faaperofeta ma le faautautaga poto a Peresitene Hinckley ina ia faalatalata mai malumalu i tagata. Tatou te matua faafetai taitoatasi faapea foi ma le Ekalesia mo lenei talatuu ofoofogia.
O se tasi “tulagaaao i o tatou olaga” o Peresitene Hinckley o lona uiga malie faatalasua. O i latou uma lava sa galulue faatasi ma ia pe sa faalogo foi ia te ia o saunoa, e manatuaina se mea na iloatino ai lona agamalie faatalasua.
Ou te manatua se taimi i ni tausaga ua mavae atu ina ua amata ona ia faaaogaina se tootoo. Sa ou taunuu atu i le ofisa o le Pulega a le Ekalesia pe tusa o le 7:00 i le taeao, ma ina ua ou latalata atu i le eleveita, sa ou iloa atu Peresitene Hinckley ma se leoleo o agai mai i le eleveita. Sa ou oomiina le faamau, ma sa matala mai le faitotoa o le eleveita, ona ou laa lea i totonu, ma taofi le faitotoa. Sa mafai ona ou lagona atu Peresitene Hinckley, ma lona tootoo, ua latalata mai. Ina ua oo mai o ia i le faitotoa o loo matala, sa tilotilo mai Peresitene Hinckley ia te au, ma savali pea lava, ma faapea mai, “Earl, alu oe ia i le eleveita. Ou te alu i faasitepu.” Sa tapuni le faitotoa o le eleveita. Sa faapena le maualuga o o’u lagona. Sa logomalie lo’u malaga i luga o le fogafale ou te i ai, a o la e a’ea’e le perofeta a le Alii i faasitepu i lona ofisa.
I se isi taimi, a o ulufale atu le Au Pulega Aoao—ua laei i o latou suti paauli, ofutino papae, ma fusiua masani—i se fonotaga ma le Au Peresitene Sili, sa saunoa mai Peresitene Hinckley, ma le agamalie ma soisoi, “Pei uma lava outou o ni penguins.”
O le a tatou misia lava lona agamalie faatalasua.
E moni lava o Peresitene o se tamalii ua le mafaitaulia mea ua ia faataunuuina. E tele naua mea e naunau i ai, ma o se tamalii e poto faapitoa i le tele o itu. O le fausiaina o le Nofoaga Autu mo Konafesi, o se tasi foi lea o talatuu maoae o Peresitene Hinckley, ua tatou molimauina ai le saga atiina ae ma le faalauteleina o faatinoga faamusika ma tala faatino i le Ekalesia. Ua lelei atu o tatou olaga ona o nei avanoa faaleaganuu ua tatou maua.
O se tasi o talatuu ua aupito sili ona faateleina o talatuu uma a Peresitene Hinckley ma e moni lava o se tasi ia o ona “tulagaaao i o tatou olaga” o a’oga a le Ekalesia. O le matagofie o le Iunivesite o Polika Iaga ma le faalauteleina o lotoa o le BYU–Idaho, BYU–Hawaii, Kolisi Faapisinisi a le LDS, ma Seminare ma Inisitituti o Mataupu Faalelotu, o faailoga vaaia na o lona fiafia i a’oga ma lona alofa i le au aooga. O le faavaeina o le Tupe Faaagaga mo Aoga, i le fitu tausaga talu ai, ua faalauteleina ai lenei talatuu. Toeitiiti atoa le 30,000 tamaiti aoga, i le tele o vaega o le lalolagi, ua faaleleia atili nai o latou olaga e ala i avanoa ofoofogia o a’oga.
O se mea e faaleai se malama-lama i ai, ae e matua taua i le faafoega o le Ekalesia, o le faavaeina lea e Peresitene Hinckley o Korama a Fitugafulu, e avea ma se tasi o korama pulefaamalumalu i le Ekalesia. O le faateleina o le numera o korama ma uso o le Au Fitugafulu ua faafāina ai le taulimaina o le faatupulaia ma le taitaiga o le Ekalesia ma faataunuuina ai le poloaiga faatusi paia ua mafai nei e le Toasefululua ona “valaaulia le Au Fitugafulu, pe a tatau ia i latou se fesoasoani, e faataunuuina valaaulia mo le talaiga ma le taitaiga o le talalelei, ae le o nisi.”2
Atonu o le “tulagaaao” e sili ona patino ma e umi foi ona manatua, o lona alofa i tagata. Atonu ua tofu i tatou taitoatasi i lenei aofia toatele naua i le lalolagi atoa, ma se manatua faapitoa o Peresitene Hinckley. Ou te faamoemoe e mafai i a’u faamatalaga ona faaleo atu ai nisi o o outou finagalo—pe ana faapea tou te maua le avanoa e faaali mai ai i le aso.
Mo tamaiti taitoatasi o le Peraimeri, autalavou, talavou matutua, tagata o le au paia, ma uo, ou te fia faapea atu, faafetai lava, Peresitene Hinckley. Faafetai atu mo lou soifua faatamalii tautua i le Alii. Faafetai atu mo lau faataitaiga o le faamaoni ma le tumau mausali. Faafetai atu i lau tofa loloto ma lau faautautaga. Faafetai atu mo au saunoaga, o tusitusiga, ma fautuaga musuia.
Faafetai atu mo lau molimau mausali i le valaauga o le Perofeta o Iosefa Samita. Faafetai atu mo lau molimau ma aoaoga e faatatau i le Tama Faalelagi ma la tatou sootaga, o ni atalii ma afafine agaga, ia te Ia. Faafetai atu mo lau molimau ia Iesu Keriso.
Faafetai atu mo “tulagaaao [ua e tuua] i o matou olaga.” Faafetai atu mo lou faailoa mai ia i matou, e te alofa ia i matou. Ua faaopoopo lo matou lelei ona o oe. Ou te fia faafetai atu foi i le aiga o le au Hinckley, mo lo outou faasoa mai o lo outou tama ma lo outou tamamatua ia i matou.
Le Pele Peresitene Hinckley, sa matou matauina lava le afu o lou soifua i nofoaga faitele. Olioli laia i la oulua mafutaga ma lau pele o Marjorie, o isi o lou aiga, ma taitai na mua i malae o le Ekalesia.
Peresitene Hinckley, matou te alolofa ia te oe. I le suafa o Iesu Keriso, amene.