O Lenei Perofeta Agamalu
Na ou uluai feiloai ia Gordon B. Hinckley i le silia ma le 50 tausaga talu ai. Sa valaauina ai au o se Fesoasoani i le Toasefululua i le konafesi lava e tasi na lagolagoina ai o ia e avea ma se sui o le Korama a Aposetolo e Toasefululua.
O ana uluai upu i le pulelaa ina ua lagolagoina e avea ma se Fesoasoani i le Toasefululua: “Ou te iloa ou te le’i sau na o au i lena auala, ma ou te matuai faafetai i le toatele o alii ma tamaitai—o alii lelei ma le maoae o loo faatasi iinei i le asō, ma … tagata lelei, o le toatele ou te le manatuaina ia igoa—o e na fesoasoani ia te au” (i le Conference Report, Aperila 1958, i. 123).
Na uluai fegalegaleai Gordon B. Hinckley ma le laumua o le Ekalesia ina ua foi mai i lona aiga mai lana misiona i Egelani. Sa talosagaina o ia e le peresitene o le misiona ina ia lipoti atu i le Au Peresitene Sili: o Peresitene Heber J. Grant, o J. Reuben Clark, Jr., ma Tavita O. MaKei. O le fonotaga e 15-minute na fuafuaina ai na oo lava i le silia ma le itula. Na talosagaina o ia e auauna atu e avea ma failautusi o le Komiti fou o tusiga a le misiona a le Ekalesia.
Sa alu lava ia ma tau saili se ofisa avanoa i soo se mea. O sana uo e fai se faleoloa a lona tama e faatau ai sapalai mo ofisa, na tuuina atu ia te ia se laulau e le tutusa vae. Sa ia tuuina i lalo o le isi vae puupuu se fasi laupapa e lagolago ai. Na ia aumaia lana lava laau lomitusi mai le fale.
Ina ua ia alu atu i le potu e teu ai sapalai e aumai se taaiga pepa, sa fesiligia o ia, “E te silafia e fia pepa i totonu o le taaiga atoa lena?”
Na ia tali atu, “Ioe, e 500 pepa.”
“O le a lau mea o le a fai i na pepa e 500?”
Sa ia tali, “O le a ou tusitusi ai i pepa uma taitasi.”
E le’i mapu lana tusitusi. Mo le tele o tausaga ma te fono ai ta’i vaiaso ma Peresitene Hinckley. E masani ona ou maua atu o ia i lana kesi o loo tusilima ana lauga.
O lo’u tofiga muamua i le avea ai ma se Fesoasoani i le Toasefululua o le avea lea ma fesoasoani ia Elder Hinckley i le Matagaluega a Faifeautalai.
E le’i leva ae malaga o ia faatasi ma Peresitene Henry D. Moyle e asiasi atu i misiona i Europa. Ina ua toe taliu mai o ia, na ia ta’u mai ai ia te au faapea o se tasi o mea sili ona faigata na ia faia sa tupu lea i Dusseldorf.
I lo la po mulimuli i Europa, sa talimalo ai Peresitene Moyle i se taumafataga i le afiafi mo faifeautalai, e aofia ai ma le alo o Elder Hinckley o Richard. Sa faamavae atu Elder Hinckley i lona atalii i le faletalimalo. Fai mai o ia, o le vaai atu ia Richard o savavali ese atu ma lana soa i le pogisa ma le malulu o le po o le mea sili lea ona faigata ua ia faia. Sa maligi ona loimata a o ia faamatalaina mai ia te au lena mea.
O le atamai tulagaese o Uso Hinckley ma le ofoofogia o lona manatuaina o mea sa vave ona manino mai. Ae sa ou aoaoina ai foi se isi mea e sili ona taua. Sa ou vaai ai i le loto o Elder Gordon B. Hinckley. O ia o se tagata e faapitoa, ma e na o ni nai taimi lava e vaai atu ai se tasi i totonu ia te ia.
I le taumafai e faamatalaina le mafaia e Peresitene Hinckley ona fesootai atu, ou te manatuaina ai i tausaga ua alu le ma malaga atu i Pakisitana ma Elder Jacob de Jager, o se tasi o Fitugafulu, o lē matou te faaigoaina “o le tagata Netalani ataata, ma fiafia.” O le na talimalo ia i matou o Mr. Suleman Habib, o se uo ua leva mai se aiga lauiloa i faletupe i Karachi.
I se tasi aso na ave ai i matou e Suleman i le aai ma agai atu ai i nuu maotua e vaai i se tasi o ana faatoaga. Na matou tau atu i se vaega toatele o le aufaigaluega, e le lelei o latou lavalava, o loo fausia se auala i piki ma suo. Sa latou tautatala i le gagana Urdu, o se gagana ma te le’i faalogo i ai muamua ma Jacob. E le’i tu lelei le taavale ae ua i fafo ia Jacob, ma miomio faatasi ma le aufaigaluega.
Sa matuai mata’i lelei o ia e Suleman ona faliu mai lea ma faapea mai ia te au, “E sili atu le fesootai a le tagata le la ma nei tagata Urdu nai lo au.” I se taimi mulimuli ane na ia toe fai mai, “E mafai e le tagata le la ona faatosina se asini po o se tupu!”
Po o le a lava le mana o fesootaiga ma faatosinaga na vaaia e Suleman ia Jacob de Jager sa sili atu ona matuai anoanoai le mauaina ia Gordon B. Hinckley.
Na oo atu i lo’u ofisa i se tasi aso se failotu Isalama na malaga mai i le Aai o Sate Leki mo se togafitiga i le Falemai o Mata o le Moran. Sa ou fuafuaina se feiloaiga ma le Au Peresitene Sili. O Dr. Abdurrahman Wahid, e pei lava o Peresitene Hinckley, e i ai ona uiga malie. Na malaga atu faatasi ma Dr. Wahid ia Dr. Alwi Shihab, o se polofesa o suesuega faaIsalama i le Iunivesite o Harvard.
I lena fonotaga, na ta’ua ai e Dr. Wahid faapea ua talosagaina o ia ina ia tauva mo le tofi peresitene o Initonesia. “Afai ae filifilia au,” na saunoa ai Dr. Wahid, “o le a avea ia Alwi Shihab ma a’u Minisita o le Va i Fafo.”
Na saunoa Peresitene Hinckley, “Afai e te fuafua e te tauva ae filifilia oe, o le a ou alu atu ma ta feiloai i Jakarta.”
Na filifilia o ia, ma na matou o i Jakarta lea sa avea ai Peresitene Hinckley ma malo faaaloalogia i se taumafataga i le Maota o le Peresitene.
O le feau faamaise muamua lava na ou mauaina i le tuumalo o Peresitene Hinckley na aumai lea mai ia Alwi Shihab. O ananafi na taunuu mai ai se meaalofa tele o fugalaau mai ia Wahid, o le sa avea muamua ma Peresitene o Initonesia.
Ou te manatu i lenei mana o fesootaiga ma uiga faafiafia o Peresitene Hinckley o se alofa ma le lotomaualalo faaleuso. Sa vaaia pea i taimi uma e tusa pe mafuta ma tagata galulue i auala pefu po o se taumafataga i se maota o se peresitene.
Na soifua a’e Peresitene Hinckley ma aoaoina i aoaoga faavae o le talalelei. O ona tuaa e i ai lo latou talafaasolopito e tau atu i le Cove Fort i le Ogatotonu o Iuta. Ua toe faaleleia, ma o loo tu nei e pei ona sa fausiaina ai e lona tama matua i aso o paionia.
O le tele o le tuputupu a’e o Peresitene Hinckley ou te to lo’u pulou i lona faletua, o Marjorie Pay Hinckley, o le sa onosai i se alii sa fealuai i taimi uma, e masani lava e 10 ana laa e muamua ai ia te ia. Mo se faataitaiga, i se tasi afiafi a o tapena lana malaga mo atunuu mamao i le taeao e sosoo ai.
Sa fesili atu ai Marjorie, “Ta te o?”
Sa ia tali, “Ta te le fuafuaina le mea lena i le taimi nei!”
Sa ia iloa, e pei ona tatau ona tatou iloaina uma, o aoaoga faavae a Iesu Keriso e matuai vaavaalua lava ma le aiga.
O le faasologa i le au peresitene O Le Ekalesia a Iesu Keriso o le Au Paia o Aso e Gata Ai o se faiga ofoofogia. E masani lava o le Aposetolo sinia e avea ma Peresitene, ae o le isi sinia e sosoo ai e avea ma Peresitene o le Korama a Aposetolo e Toasefululua. O loo auiliiliina mai i faaaliga ia upumoni ma aoaoga lea e taitaia ai e le Usoga le Ekalesia. Po o le a lava le faafitauli po o le a lava le avanoa, e mafai lava ona maua ia faatonuga ma le taitaiga i fuaiupu o tusitusiga paia.
E leai se tasi ua na iloaina le faatulagaina o mea e taumateina po o ai le isi Peresitene o le Ekalesia. O le faatulagaga lava lenei sa i ai. E leai se faufau mo le tofiga po o le tulaga, e leai foi se teenaina o le finagalo o le Alii.
E lei sailia e Gordon B. Hinckley le tele o valaauga ma tofiga na oo atu ia te ia, ae na te le’i talitualimaina foi se mea e tasi.
I se tasi o uluai faaaliga, na fetalai ai le Alii, “Ae peitai, ia mafai ona taitoatasi le tagata ma tautala atu i le suafa o le Atua le Alii, o le Faaola lava o le lalolagi” (MFF 1:20), ma “o le a oo mai mea vaivai a le lalolagi ma lepetia i lalo mea sili ma le malolosi” (MFF 1:19).
Faatasi ai ma le saoasaoa o le faatupulaia o le Ekalesia i le lalolagi atoa, e masani ai ona matou o atu i nofoaga taumamao e faatulaga pe toe faatulaga se iunite o le Ekalesia. O nisi taimi e fesiligia ai matou, “O fea o le a e maua ai ni taitai fou?” Tatou te le sailia i latou. Ua leva ona i ai iina, e pei lava ona i ai Gordon B. Hinckley iina. E saunia i latou e le Alii. O loo latou auauna faamaoni ma faia osigataulaga ina ia mafai ona auauna atu e ala i le totogi o sefuluai ma taulaga.
I se sauniga e ese mai ai e sosoo ma le papatisoga, e faaee atu ai i luga o tagata o le Ekalesia le Agaga Paia, lea e faamatalaina e tusitusiga paia o le a “aoao ia te outou i mea uma lava, e faamanatu mai foi o ia ia te outou i mea uma” (Ioane 14:26). O le Agaga Paia e Musumusu Mai. E i ai pea iina ia musumusuga, pe afai e te ola i musumusuga ma ola ia maua musumusuga.
O se tasi o mea na sili ona malamalama i ai ia Peresitene Hinckley o le upu aiga. E le faigata ona sailia ni faamatalaga i le aiga i ana lauga ma tautalaga ma fautuaga, e tusa lava pe faia i ni faapotopotoga toatele, i ni tagata taitoatasi, pe patino foi i aiga.
Ou te tuuina atu le faamamalu i le aiga o Gordon Bitner ma Marjorie Pay Hinckley. E mafai ona faamatalaina i latou o ni faataitaiga atoatoa. O i latou, e pei o lo latou tama, e lotomaualalo. O le lauiloa ua maua e lo latou aiga, latou te le o faalialiavale ai i isi, e pei lava ona sa vaaia ia te ia.
I le fanua maliu e le mamao ese ma iinei o loo i ai se maa tuugamau o loo tusia ai i luga ia “Marjorie Pay Hinckley” a o tafatafa, o le igoa o “Gordon Bitner Hinckley.”
Ina ua taunuu atu Maria i le tuugamau o Iesu, na fetalai atu se agelu ia te ia, “E le o iinei o ia: a ua tu” (Mataio 28:6; tagai foi Mareko 16:6; Luka 24:6).
E i ai foi le taimi, e mafai ai ona faapea ane ia Gordon Bitner ma Marjorie Pay Hinckley, “E le o iinei i la’ua aua ua toetutu ma ua faatasia.”
Ia faamanuia e lo tatou Tama le manatuaina o lenei perofeta agamalu ma lana soa e faavavau ma le galuega sa ia pulefaamalumalu ai, ou te tatalo atu ai i le suafa paia o Iesu Keriso, amene.