Peresitene Gordon B. Hinckley

Ua faafofoga malo o le lalolagi i lona siufofoga.

I le aso 20 o Aokuso, 1935, sa fono ai Peresitene Heber J. Grant ma ona fesoasoani, o J. Reuben Clark Jr. ma Tavita O. MaKei, ma se taulealea tulaga ese e le’i leva ona taliu mai i le fale mai se misiona i Egelani. A o galue ai o ia i le ofisa o le Misiona i Europa i Lonetona, sa galue lelei i mea tau faasalalauga, ma fesoasoani e amatalia se silafia lautele lelei mo le Ekalesia, ma fesoasoani foi e tusia ni tusi e aoga mo le talaiga. Na silafia lelei e le Au Peresitene Sili se mea ofoofogia i le alii e 25 tausaga le matua, o Gordon Hinckley; o lana faatalatalanoaga lea na faapea e 15 minute na sili atu ma se itula. I le lua aso mulimuli ane, sa latou talosagaina ai o ia e sau e faigaluega mo le Ekalesia e fai ma failautusi o le Komiti faatoa faavae o Tusitusiga a le Misiona, Leitio, ma Faalauiloaga.

Ua faatoa amata le galuega a Gordon Bitner Hinckley mo le Alii ma Lana Ekalesia. Na amata lava o se tagata faigaluega i le Ekalesia, ona sosoo ai lea ona avea ma se fesoasoani i le Toasefululua ma se Aposetolo, o se fesoasoani i Peresitene e toatolu o le Ekalesia, ma mulimuli ai ona avea ma Peresitene, sa galue punouai o ia i le aumaia O Le Ekalesia a Iesu Keriso o le Au Paia o Aso e Gata Ai “i fafo nai le mea lilo ma le pogisa” (MFF 1:30) ia avea ai o se “aai ua tu i luga o se mauga” (Mataio 5:14) ma lona malamalama ua susulu atu i luma o tagata. I le tauaveina o lona faamoemoe laualuga mo mea lelei, agaalofa, faautautaga poto, ma lona agamalie i le salafa o le kelope, e le gata ina sa feiloai atu Peresitene Hinckley i tagata o le Au Paia o Aso e Gata Ai, ae sa faapea foi i le au tusitala o le lotoifale, o faauluuluga o malo, ma le au failipoti o televise. O lana taitaiga o se Peresitene o le Ekalesia, sa iloga i lona tuuavanoa atu i le au faasalalau, o le tuputupu ae le mafaatusalia o le Ekalesia ma le fausiaina o malumalu, ma le popolega mo faafitauli e feagai ma tagata i soo se itu.

E ui lava i nofoaga uma sa ia malaga i ai, o tagata sa ia feiloai atu i ai, ma le tulaga lauiloa na ia aumaia i le Ekalesia, ae sa taumafai lava Peresitene Hinckley e soifua maualalo ma se tulaga e le taualoa. Na te lei faia ni faaiuga ina ia faagaeetia ai isi tagata ae ia mulimuli ai i uunaiga faaleagaga. O se migao filemu mo lona Tama i le Lagi, ma ona tuaa ma a latou osigataulaga, ma mo le silafia faaleagaga ma le poto salalau, sa taialaina ai le perofeta lona 15 o le Ekalesia toefuataiina.

O Se Fale o le Aoaoga

Na soifua mai Gordon Bitner Hinckley i le aso 23 o Iuni, 1910, i se aiga e naunau faalelotu ma sa maoae aoaoga, ma o ia o le atalii ulumatua o Ada Bitner ma Bryant Stringham Hinckley, o ni sikola o le atamai na feiloai a o avea Bryant ma peresitene o le Kolisi Faapisinisi a le LDS a o faiaoga Ada i le Igilisi ma le faafonokarafi. Na maliu le faletua muamua o Bryant, o Christine, ma tuua ai [Bryant] ma se fanau e toavalu. Sa tuufaatasia ma le manuia e i la’ua ma Ada na fanau ma la la’ua lava fanau e toalima.

O le soifua a’e i se aiga e i ai se faletusi sa faatumulia i le silia ma le afe voluma o tusi talafatu, talafaasolopito, ma galuega faafilosofia, na mafai ai ona avea Gordon ma tagata faitautusi faaloloto. Sa ia te ia se naunauga mo le malamalama lea sa le mafai ona faamalieina e oo lava ina ua avea ma tagata matua.

Peitai o lona soifua faatamaitiiti sa aofia ai mea e sili atu nai lo tusi ma le suesue. Sa faatau e le aiga se faatoaga i le eria maotua i lena taimi o East Millcreek, i tua atu o le Aai o Sate Leki, ma le faamoemoe e faamalosia ai le faavae vaivai o Gordon. O iina, i le taumafanafana, sa moe ai Gordon i fafo i lalo o se vanimonimo sa lilofia i fetu, ma inu le susu fou mai le povi, ma sa ia aoaoina ai ni lesona taua e pei o le “tomai o le teteleina o laau ia Ianuari ina ia fua mai ai ni fua matagofie ia Setema.”¹

O le alofa, faaaloalo, ma afiafi faaleaiga o mea uma ia na tuufaatasia ai le aiga toatele.

A o laitiiti o ia, sa mauaina e Gordon lona faamanuiaga faapeteriaka. Sa faamaonia ai faavaloaga e faapea o le a “avea o ia ma se taitai maoae ma le lototoa i le totonugalemu o Isaraelu… . O le a avea oe ma se avefeau o le filemu; o le a faalogo malo o le lalolagi i lou leo ma latou maua ai se malamalama i le upumoni e ala i le molimau ofoofogia o le a e tuuina atu.”²

Ia Viia Le Tagata

O le taimi o le talavou na oo mai ai ni aafiaga faaleagaga ia Gordon Hinckley ua faatagata matua, e aofia ai se aafiaga mamana patino o le a ia manatuaina i lona olaga atoa. Sa fai si le fia alu o ia i lana uluai sauniga muamua o le au perisitua a le siteki, a o avea ma tiakono, ae ui o lea sa o Gordon ma lona tama, o le sa nofo i luga o le tulaga aua o ia o se tasi o le au peresitene o le siteki. Sa vave ona mou atu lagona o le faatautau ina ua gotouga ifo i lona loto upu o le viiga amata: “Viia le na fetaia’i ma Ieova! Le Perofeta na tofia e Iesu.”³ Na ia toe ta’ua: “Sa i ai se mea na tupu ia te au lava ia ina ua ou faalogo i na tamalii faatuatua o pepese… . O iina na oo ifo ai i lo’u loto se talitonuga maumaututu, o le tagata lea sa latou lagiina ai le pese, o se perofeta moni lava a le Atua.”⁴

O Se Faauoga ma Marjorie

Sa faauu Gordon mai le Aoga Maualuga a le LDS i le 1928, ma sa naunau o ia e amata lana a’oga i le Iunivesite o Iuta, ma sa naunau foi e tulitulimatai se faauoga tumau ma se tamaitai talavou o le isi ituauala. Sa la masani mai lava o laiti. Sa amata ona fegalegaleai i gaoioiga a le uarota. E ui lava ina sa faamatalaina e Gordon Hinckley ia lava o ‘se tamaitiiti e meia ma matamuli—e mata taelagoa ma vasi,”⁵ ae sa manatu lava Marjorie Pay o ia e ola ai le pati. “E tumu lava o ia i le naunautai i taimi uma,” o le tala lea a [Marjorie]. A ulufale mai Gordon i le potu, e sagisagi fiafia lava a’u uo ma faapea mai, ‘Lea ua sau!’ ”⁶

Sa atiina ae e Marjorie ma Gordon se faauoga mafana i le taimi na ulufale atu ai Gordon i le Iunivesite o Iuta ma le faamoemoe ia maua sona faailoga i galuega tusitusia faaPeretania. O nisi o ana vasega atonu na faaopoopo atu i se lagona faaletonu na amata ona maua e Gordon ona o le Pau Tele o le Tamaoaiga. “O se taimi o le matuai lotovaivai, ma sa matua faalogoina i totonu o le lotoa a le aoga,” na ia manatua ai. “Sa amata ona ou tuufesili i nisi o mea, atonu na aofia ai i sina fuataga itiiti le faatuatua o o’u matua. E le o se mea e le masani ai tamaiti aooga o le iunivesite, ae na iloga le ogaoga o le siosiomaga i lena taimi… . O le molimau na oo mai ia te au a o ou tamaitiiti, na tumau ai lava ia te au ma sa avea ma se papuipui lea sa ou pipii i ai i na tausaga faigata,”⁷ o lana tala lea.

“Faagalo Oe Lava ae Alu e Galue”

Soo se faaletonu na tauivi ma Gordon i le kolisi e lei taofia ai o ia mai lona auai atoatoa i le Ekalesia. Sa ta’ua e Peresitene Hinckley e uiga i aso o i ai i le iunivesite, “Sa i ai i lo’u loto se mea e uiga i le alofa i le Atua ma lana galuega tele sa tauaveina a’u i luga a’e o o’u masalosaloga ma atuatuvalega.”⁸

I le masina o Iuni 1932 sa maua ai e ia lona faailoga tikeri i mea tau faatufugaga mai le Iunivesite o Iuta. Sa le i popole Gordon i le maualuga e 30 pasene o le leai o ni galuega i le malo, ae sa fuafua o ia e saili se tupe mo sana sini sa naunau i ai: o le suesue lea i le Aoga Faatusitala a le Iunivesite o Kolumipia i le Aai o Niu Ioka.

I na ona po o le faaletonu o le tamaoaiga, e toaitiiti ni alii talavou sa fuafua e faamisiona, ma e toaitiiti foi ni aiga sa gafataulimaina ona totogi. O lea, sa maofa ai Gordon ina ua faalogo atu i lona epikopo o fesili atu ia te ia pe o mafaufau e alu i se misiona. Sa talia e Gordon le valaauga. O le mea moni lava, o le tina o Gordon, o Ada, lea sa maliu ona o le kanesa i le 1930, na mafai ai ona faatupe lana misiona. Sa maua e le aiga se teugatupe sa ia teuina ai sui mai ana faatauga, ma le faamoemoe e faaaoga i se aso mo misiona a lana fanau. Na mafai ai e Gordon ona malaga atu i Lonetona i le 1933.

E lei pine ae sosoo mai ai ma se aafiaga tupito. E tele lava ina ta’ua e Peresitene Hinckley i lea taimi ma lea taimi o “lo’u aso o faaiuga… . O mea lelei uma lava na tutupu ia te au talu mai lena taimi, e mafai ona ou tau lelei lava i lena [aso].”⁹ Ona o le lotovaivai i le fiu e talai i tagata e le fia faalogo ma le tu’itu’i i faitotoa ae le tatalaina mai, sa tusi atu ai Gordon i lona tama: “Ua ou faamaimauina lo’u taimi ma au tupe. Ou te le iloa pe i ai se aoga o lo’u nofo ai iinei.”

Sa tali atu i ai Bryant Hinckley, le sikola o le atamai ma se faiaoga o le amio pulea: “La’u Pele Gordon. Ua ou maua lau tusi… . E na o le tasi lava la’u fautuaga. Faagalo oe lava ae alu e galue. Alofaaga, O Lou Tama.” Faatasi ma le tusi i lona lima, sa toe foi Gordon i lona potu ma mafaufau ai i le fuaiupu sa ia aoaoina i lana suesuega i tusitusiga paia i lena taeao: “Aua ai se fia faasaogalemuina lona ola, e maumau ai ia te ia; a o le faamaumau lona ola ona o a’u ma le talalelei, e faasaoina e ia” (Mareko 8:35). “Sa ou alu ifo i o’u tulivae,” na ia toe tomanatu ai, “ma osia se feagaiga ma le Alii o le a ou taumafai e faagalo a’u lava ae ou alu e galue.”¹⁰

I le 1934 sa tofia ai o ia e avea ma se fesoasoani ia Elder Joseph F. Merrill o le Korama a Aposetolo e Toasefululua ma peresitene i le Misiona a Europa. Sa tusia e Gordon tala sa lolomi i le lomiga a le Ekalesia o le Millennial Star ma, e sili atu foi ona taua mo le galuega faafaifeautalai, i le mekasini o le London Monthly Pictorial. Sa matua maualuga le talitonuga o Peresitene Merrill i le faifeautalai talavou, ma o lea na ia auina atu ai Elder Hinckley e talanoa ma le faauluuluga o se kamupani lomitusi tele sa nafa ma le lolomiina o se tusi sa i ai ni tala sese e uiga i le Ekalesia. O lea feiloaiga na taunuu i le tuuina e le kamupani o se faaupuga i totonu o le tusi e faafitia ai so latou silafia e amata atu i lena taimi.

Galuega i Mea Tau Faasalalauga

Talu ai le faamanuiaina o fesootaiga a Gordon ma nusipepa faaPeretania, o lea na talosagaina ai o ia e Peresitene Merrill e faaoo atu i le Au Peresitene Sili le manaomia e le Misiona i Europa o nisi tusiga ma ia sili atu ona lelei. E ui lava sa faamoemoe pea o ia e ulufale atu i le Iunivesite o Kolumipia, ae sa le mafai e Gordon Hinckley ona natia ana taleni mai le Au Peresitene Sili. O lana faatalanoaga ma i latou na iu ai ina faigaluega o ia o se failautusi i le Komiti o Tusitusiga a le Misiona, Leitio, ma Faalauiloaga.

Mai le 1935 e oo atu i le 1958, a o avea ai ma se tagata faigaluega i le Ekalesia, sa tusia e Gordon Hinckley le tele o tamaitusi o le talalelei, tusia tusi mo faifeautalai, faia polokalama i le leitio, vaavaaia i latou sa faaliliuina le Tusi a Mamona mai le faaPeretania i isi gagana, ma taiulu i le faaaliga a le Ekalesia mo le Faaaliga a le Lalolagi i San Francisco i le 1939. O ia foi sa amataina le faaaogaina o gaosiga faaotio visio i le galuega faafaifeautalai, ma oo atu ai ina faaaoga i malumalu ma faaaliga a le Ekalesia. O na tausaga o le tautua i le Ekalesia, sa na o sina taimi itiiti o le Taua Lona Lua a le Lalolagi na motusia ai, ina ua faigaluega o ia i se tulaga faalepulega i le Nofoaga mo Nofoaafi i Denver ma Rio Grande i Denver, Colorado.

O tausaga na faigaluega ai Gordon i le Ekalesia, sa aofia ai ma le puleaina ma tausia le polokalama faafaifeautalai i le taimi o le Taua i Korea, ma le gaosiga o le atavili o le malumalu, lea na uluai faaaogaina i le Malumalu o Bern i Suitiselani, aua sa tautuaina se aofia e tele gagana eseese e faaaogaina.

O Se Isi Fale o le Aoaoga

Sa faaipoipo Gordon i lona tuaoi, uo, ma se manamea, o Marjorie Pay, i le Malumalu o Sate Leki i le aso 29 o Aperila, 1937.

Sa tupu lo latou aiga e aofia ai afafine e toatolu ma atalii e toalua: O Kathleen (Barnes Walker), Richard Gordon, Virginia (Pearce), Clark Bryant, ma Jane (Dudley). Sa fai aso malolo le aiga i vaega eseese o le Iunaite Setete, faitau ma talanoaina tusi lelei, ma e fiafia tele i talanoaga malie e fai i le latou laulau e talisua ai.

O le faiga sa faaaoga e Gordon e tausi ai ana fanau, sa tutusa lelei ma le faiga sa faaaoga e lona lava tama: e toafilemu, e ‘anoa, ma e leai foi ni aoaiga mamafa. E le uunaia malosi foi e se tasi o i la’ua matua le fanau ia amiotonu. Ina ua feagai Richard ma fesili ma faaletonu e masani ai se talavou, o le faataitaiga a lona tama na maua ai e ia se uunaiga aupito sili. “Sa pei lava Papa o se taula,” o lana tala lea. “Sa ou iloaina i lo’u loto, na ia iloa e moni le talalelei… . E moni lava le Atua ma e patino lava ia te ia.”¹¹

O Le Korama a Aposetolo e Toasefululua

Sa manaomia i le galuega a Gordon Hinckley ona ia talanoa atu e le aunoa i le Usoga. Ina ua talosagaina o ia e Peresitene MaKei e alu atu i lona ofisa i le faaiuga o le vaiaso o le konafesi ia Aperila i le 1958, sa manatu Gordon ua manaomia o ia e le Peresitene mo se mea e faatatau i le galuega. Ae nai lo lena, sa talosagaina o ia e Peresitene MaKei ia avea o se Pulega Aoao. A o lagonaina le maofa ma le lofituina, sa lagolagoina Gordon Bitner Hinckley, e avea ma se Fesoasoani i le Korama a le Toasefululua i le aso 6 o Aperila, 1958.

I le 1960 sa tofia ai le Au Pulega Aoao e tauaveina le matafaioi mo eria tetele o le lalolagi, ma o se tasi o tofiga aupito faigata sa tuu atu ia Elder Hinckley: O Asia. Sa tele naua le eria, ma o gagana eseese ma le lavelave na luitauina ai faifeautalai. Na faafaigata lava ona o feteenaiga faaupufai. Sa galue punouai Elder Hinckley i lenei konetineta tele naua e atiina ae le taitaiga i le lotoifale, faamalosiau faifeautalai, ma saili ni fanua mo falelotu i esetete sa matua taugata tele ni tau na maketiina ai. Na oo ina ua alolofa tagata Asia ia te ia ona o lona naunau e savali i magaala, malaga i taavale e feoa’i ai tagata lautele, ma tausami i taumafa a le atunuu. Na saunoa se tasi o taitai o le Ekalesia i Iapani, e talanoa Elder Hinckley ma faalogo foi e pei lava o ia o se tagata Asia.¹²

Sa faaauau pea ona galue punouai Elder Hinckley i Asia e oo lava ina ua mavae le Aso Toonai e le mafaagaloina, 30 o Setema, 1961, ina ua lagolagoina o ia o se tasi o le Korama a Aposetolo e Toasefululua. “O se mea e matautia,” na saunoa ai Peresitene Hinckley. “O lea ituaiga o valaauga e aumai faatasi ma se lagona o le matafaioi ma le tiute e molimau atu i le Alii.”¹³ E lei pine ae iloa e tagata lava latou o le ekalesia i le lalolagi atoa le fofoga lafolafo faaleagaga, malie, ma le malamalama sa iloga ai le tula’i mai o Elder Hinckley. O ana savali faagaeetia loto na matua pa’ia aganuu ma tuaoi e ala i le tuufaatasia o le malosi, agamalu, ma lona lava tausua i se ala e ootia ai le au taualoa faapea foi le au le taualoa.

O le avea ai ma se tasi o le Toasefululua, sa vaaia ai e Elder Hinckley le galuega i Amerika i Saute ona sosoo ai lea ma Europa. E lei tele sona taimi i tiute faaletaitai ma tulei saunoa ai, ae sa tele i le tuuina atu o galuega alofa ma fesoasoaniga mo le soifua manuia o tagata. I le 1970, mo se faataitaiga, ina ua faatoa tuua lava e le vaalele na malaga ai Elder Hinckley mai Lima, i Peru, ae taia loa le atunuu e se mafuie faataumaoi. Ina ua maua e ia le tala i Chile, sa taofia e ia ana fonotaga sa fuafua ae toe taliu atu i Peru, lea na la sailia ai ma le peresitene o le misiona ia faifeautalai ma tagata o le au paia, ma faamaopopo taumafaiga fesoasoani, ma malaga atu i nuu na faatamaia e avatu i ai le faamafanafanaga.

I le avea ai o ia ma se Pulega Aoao, sa tele komiti sa tautua ai Elder Hinckley, e aofia ai le Au Perisitua Aoao, Komiti Faamaopoopo a le Ekalesia, ma le Komiti Faafoe o Paketi ma le Faasoasoaina. Ae o nisi o ona sao aupito maoae, sa alia’e mai ma le mautinoa, i fesootaiga lautele ma le au tusitala ma le lalolagi. Sa faaauau pea ona ia atiina ae tusitusiga mo faasalalauga ma vaavaai e le aunoa mo ni ala sili atu e faaaoga ai le poto faaneionapo e fesootai ai ma le Au Paia o Aso e Gata Ai i le lalolagi atoa. Ina ua tulai mai faafitauli ogaoga, sa tofia Elder Hinckley na te faaleoina tulaga o le Ekalesia i le au faasalalau. “O Uso Hinckley … e sili atu ona fiafia i tofiga faigata ma e le matamuli foi pe a oo ina feagai ma i latou e fai le Ekalesia ma o latou fili,”¹⁴ o se faamatalaga lea a Peresitene Thomas S. Monson.

O Le Au Peresitene Sili

Na avea Elder Hinckley ma se tasi o le Korama a Aposetolo e Toasefululua i nofoaiga a Peresitene e toafa: O Tavita O. MaKei, Iosefa Filitia Samita, Harold B. Lee, ma Spencer W. Kimball. I le aso 23 o Iulai, 1981, sa vaetofia ai o ia e avea ma se fesoasoani lona tolu ia Peresitene Kimball ua auma’ia, o ona fesoasoani foi o Marion G. Romney ma N. Eldon Tanner, ua faaletonu foi lo la’ua soifua maloloina. E lei toe tuua ai lava e Gordon B. Hinckley le Au Peresitene Sili. Sa avea o ia ma se fesoasoani ia Spencer W. Kimball, o Ezra Taft Benson, ona sosoo ai lea ma Howard W. Hunter. Sa ia tauaveina le tele o tiutetauave ina ua faiifo le soifua maloloina o na Peresitene, ma faaauau ai le galuega a le Ekalesia i lalo o faatonuga a lona taitai.

Na ia tusia mulimuli ane: “Sa toetoe lava o se avega taufaafefe i nisi o taimi… . Ou te manatua se tasi taimi patino, na ou alu ifo ai i o’u tulivae i luma o le Alii ma ole atu i ai mo se fesoasoani i le totonugalemu o [se] tulaga ua matua faigata lava. Ma o iina na oo mai ai i lo’u mafaufau na upu faamautinoa, ‘Ia filemu ma ia iloa o a’u o le Atua’ (MFF 101:16).”¹⁵

A o avea o ia ma se fesoasoani, sa i ai ni mea maoae ma ni suiga na tulai mai i le Ekalesia. O nei mea e aofia ai le faaaogaina o sefuluai aoao ma taulaga e lagolago ai iunite i lotoifale o le Ekalesia, ma le 1991 i le faalaugatasia o saofaga a faifeautalai. E le gata i lea, ae sa filifilia lava foi e ia nofoaga, ma vaaia ata mamanu, ma faapaia malumalu e 20 i le vaitau o le 1980.

E le o feutagaiga uma a Peresitene Hinckley ma le lalolagi atoa sa faigofie. Sa ia faataatitiaina ma le faautauta ia faamatalaga o loo faamatalaina ai ia manatu i mea uma mai lava i le faaipoipoga a le itupa e tasi e oo i taaloga faitupe e oo atu i fono aoai a le Ekalesia. Ae sa faaauau foi ona ia fatuina i mea e faaaogaina e faagaeetia ai, vaaia le gaosiga o atavili o malumalu fou i le amataga o le 1990 ma le fuafuaina mamao faalemafaufau o le tala mo le Measina, o se ata o loo faaalia ai le talatuu o paionia o le Au Paia o Aso e Gata Ai.

Ina ua faiifo le soifua maloloina o Peresitene Benson i le amataga o le 1990, sa fefaasoaai ai e Peresitene Hinckley ma Peresitene Thomas S. Monson ia galuega o lea aso ma lea aso i le Au Peresitene Sili seia oo ina ua tuumalo Peresitene Benson i le 1994. Na toe lagolagoina foi e nei fesoasoani e toalua ia Howard W. Hunter i le taimi na avea ai ma Peresitene lona 14 o le Ekalesia seia oo ina ua tuumalo i le aso 3 o Mati, 1995.

Na lagona e Peresitene Hinckley le lofituina i le pule o le a ia tauaveina. “E leai ma so’u manatu pe faapefea lona lofituina o le a i ai,”¹⁶ na ia toe manatuaina ai. I se tasi taeao po, sa ia alu atu ai na o ia i le fogafale lona fa o le Malumalu o Sate Leki. Ina ua uma ona faitau mai i tusitusiga paia, sa ia iloiloina ia ata vali o le potu o loo faaalia ai le soifuaga o le Faaola. “Sa sili atu ona ou faagaeetia i le ata o le Faasatauroga,” sa ia tusia ai. “Sa ou mafaufau loloto i le tau na totogiina e lo’u Faaola mo lo’u togiolaina. Sa ou mafaufau i le tiutetauave mamafatu o le tu atu e avea ma Ana perofeta i le lalolagi. Sa ou le magagana ma ou tagi ai i o’u lagona o le le atoatoa.” Ae sa ia tuua le malumalu i lena aso ma se tautinoga mamana e faapea “o loo galueaiina e le Alii Lona finagalo e faatatau i Lana galuega ma Lona malo.”¹⁷

Sa vaetofiaina Peresitene Gordon B. Hinckley i le aso 12 o Mati, 1995, e avea ma Peresitene lona 15 O Le Ekalesia a Iesu Keriso o le Au Paia o Aso e Gata Ai, faatasi ai ma Thomas S. Monson o le Fesoasoani Muamua ma James E. Faust o le Fesoasoani Lua. Sa latou auauna atu faatasi mo le silia ma le 12 tausaga, seia oo ina ua tuumalo ia Peresitene Faust ia Aokuso o le 2007. Sa lagolagoina ia Peresitene Henry B. Eyring e avea ma Fesoasoani Lua i le Au Peresitene Sili i le aso 6 o Oketopa, 2007, i le konafesi aoao.

O Se Aapa Atu i le Lalolagi

O le tuusao o Peresitene Hinckley i faasalalauga na tautuaina ai le galuega lea sa ia aafia ai talu ona taliaina se galuega i le Ekalesia i le 1935. Ua ausia nei lana misiona i le aumaia lea o le Ekalesia “nai le mea lilo ma le pogisa” (MFF 1:30). E moni lava, sa ia ausiaina, ma faailoa atu ai i le lalolagi O Le Ekalesia a Iesu Keriso o le Au Paia o Aso e Gata Ai e le o se tamai vaega faalelotu faaitumalo i Amerika i sisifo.

I le avea ai ma Peresitene, sa ia faaauau pea ona feiloai atu i taitai o upufai ma le au fai tofa o le lalolagi. O Novema 1995 na tauaao atu ai e Peresitene Hinckley ma Elder Neal A. Maxwell o le Korama a Aposetolo e Toasefululua i le peresitene o Amerika o Bill Clinton ma le sui peresitene o Al Gore se kopi o le folafolaga i le aiga a o latou feiloai i le Fale Paepae e talanoaina ia auala e faamalolosia ai ia aiga. Mulimuli ane ina ua faatalanoaina ia Peresitene Hinckley i luga o le televise e le fai lipoti o le 60 Minute o Mike Wallace, e faitau miliona ia tagata Amerika sa faalogo i se perofeta soifua o molimau mai i le Uluai Faaaliga, faamalamalama le perisitua, ma talanoaina isi mataupu faavae o le talalelei. I le gasologa o tausaga sa ia alu atu ma saunoa i le tele o vaega o pisinisi, upufai, ma vaega logologoa. O nisi o ia vaega e aofia ai le National Association for the Advancement of Colored People, o le General Society of Mayflower Descendants, ma le U.S. Conference of Mayors. Sa avea o ia ma malo faaaloalogia i le polokalama i le televise o le Larry King Live.

Na amataina e Peresitene Hinckley le seneturi e luasefulutasi i le avea lea ma uluai Peresitene o le Ekalesia e laugaina le National Press Club i Uosigitone, D.C., ma taliina ai fesili i soo se mataupu mai gafa e oo i fesoasoaniga alofa. Sa ia tusia foi le tele o tusi i le avea ai ma Peresitene o le Ekalesia. O le tusi muamua, Standing for Something: 10 Neglected Virtues That Will Heal Our Hearts and Homes, sa faamatuu mai i le amataga o le 2000. Sa avea ma tusi o le 10 pito i luga o tusi faalelotu e sili ona alumia i le faasologa a le Publishers Weekly. I le 94 o ona aso soifua i le 2004, na maua ai e Peresitene Hinckley le Pine a le Peresitene mo le Saolotoga mai le peresitene o le Iunaite Setete o George W. Bush.

Faatasi ma le Au Paia

Na tuu e Peresitene Hinckley se faamuamua i le feiloai ma le Au Paia o Aso e Gata Ai i soo se mea. “Ua ou filifili a o o’u maua le malosi, o le a ou alu atu i tagata iinei, ma atunuu mamao,” na ia saunoa ai i le konafesi aoao ia Aperila 1996. “Ou te moomoo matou te miomio faatasi ma tagata ou te alofa i ai.”¹⁸ E le’i leva talu ona lagolagoina e avea ma Peresitene i le 1995, ae tuuvaa atu loa o ia i se malaga i Atumotu o Peretania, ma sa na o se amataga lena. I le 1996 sa latou feiloai ai ma tagata i atunuu e 22 i Amerika Tutotonu ma Amerika i Saute atoa, o Europa, ma Asia, ma setete e 13 o le Iunaite Setete. Na avea o ia ma uluai Peresitene o le Ekalesia e asiasi atu i Saina.

I tausaga na sosoo ai, sa ia tulitulia pea lea saoasaoa. Ia Ianuari 2000, mo se faataitaiga, sa ia alu ai i se malaga e 23,000-maila (37,000-km), e 10-aso i le Pasefika, ma feiloai atu i tagata o le Ekalesia i Kiripati, Ausetalia, Initonesia, Sigapoa, ma Guam. I le 2004 na ia faapaiaina ai le Malumalu o Accra Ghana, ma asiasi atu i le Au Paia i Cape Verde, ma faimalaga atu i Europa atoa. E oo mai i le 2005 ua silia ma le tasi le miliona maila ua malaga ai Peresitene Hinckley i le avea ai ma perofeta a le Alii, i le na o le tausaga lava lena, sa ia malaga atu ai i Rusia, Korea i Saute, Taiwan, Hong Kong, Nigeria, ma isi atunuu.

I lalo o le taitaiga a Peresitene Hinckley, sa aapa atu ai foi le Ekalesia ia i latou e le tagolima i le salafa o le kelope. Mo se faataitaiga, i le 1996, na foai atu ai e le polokalama o fesoasoaniga alofa a le Ekalesia ia lavalava mo tagata e 8.7 miliona i atunuu e 58, tasi le miliona pauna (450,000 kilokalama) o masini ma mea e faaaogaina mo gasegase ma a’oga i atunuu e 70, ma le $3.1 miliona (Tupe Amerika) le tau o meaai, sapalai faafomai, ma oloa o faatoaga i Korea i Matu sa matuai pagatia i le leai o ni meaai.¹⁹ O Mati 2000 sa ia faasilasilaina ai le faatuina o le Tupe Faaagaga mo Aoga, e maua ai nonogatupe e fesoasoani ai i talavou o le Au Paia o Aso e Gata Ai i le lalolagi atoa ina ia mauaina ni aoaoga ma tomai e talafeagai mo le sailia o ni galuega talafeagai. I le 2004–05 na ofo atu ai e le Ekalesia se fesoasoaniga tele i e na aafia i le galulolo i Asia Saute i Sasae, o le Afa Fulifao o Katrina, ma le anoanoai o isi mala faalenatura i atunuu eseese.

Fausiaina mo le Lumanai

O le fausiga o fale paia na tele se matafaioi a le pulega a Peresitene Hinckley na faatinoina ai. Ia Iulai o le 1997 na fofogaina ai e le perofeta le tatalo o le faapaiaga i le suatiaina o le eleele mo le Maota fou o Konafesi i le Aai o Sate Leki. O Aperila 2000 na tulai mai ai se maota matagofie ma le tele mo konafesi, lea e ofi ai le 21,000 tagata, o le toatele o i latou e le’i manatu muamua e malaga mai i le Aai o Sate Leki ona o le popole i le le maua o ni nofoa i totonu o le Tapeneko. “Ua lata i le 50 tausaga o o’u faatali mo lenei aso, talu le taimi na ou auai ai i le Ekalesia,”²⁰ o le faamatalaga lea a se tagata Samoa o le Ekalesia e 72-tausaga.

Na faasilasila e Peresitene Hinckley ia Oketopa o le 1997 e faapea o le a amataina e le Ekalesia ona fausia ia malumalu laiti i eria e toalaiti tagata o le Ekalesia e i ai. O le fuafuaga na mafua ai le faateleina o malumalu. E silia ma le 70 malumalu i atunuu e 21 na fausiaina i lalo o lana taitaiga. Ia Oketopa o le 2005 na suatia ai e Peresitene Hinckley le eleele mo le fausiaina o se Faletusi o Talafaasolopito o le Ekalesia e tulaga ese foi lona fausaga i le taulaga o le Aai o Sate Leki, ma le faamoemoe e faamaeaina i le ogatotonu o le 2009.

O taumafaiga a Peresitene Hinckley e fausia le Ekalesia na oo atu lava i le faaaogaina o le Initoneti. Ina ua maea ona faavaeina lona tulaga i luga o le Initoneti i le i ai o le LDS.org, na tatalaina ai e le Ekalesia i le 1999 se Uepi saite o talafaasolopito o aiga, o le FamilySearch.org, lea ua talileleia e le lautele o tagata naunautai. I le 2001, na tatalaina ai le Mormon.org e taliina ai fesili e uiga i aoaoga a le Ekalesia. O isi vaega o le Initoneti na ofoina mai, na fuafua e tautuaina ai tagata o le Ekalesia ma i latou o isi faatuatuaga—e pei o le JosephSmith.net.

O Se Soa e Faavavau

O Aperila 29, 2003, na faamanatuina ai e Peresitene Hinckley se mea taua na tupu ia te ia lava, o le atoaga lea o le 66 tausaga o lana faaipoipoga. A o ia toe tomanatu i lana faaipoipoga, sa ia faaiuina ai e faapea, “Afai e tuuitiitia e le tane le manatu ia te ia lava ae sili atu mo lana ava, o le a tatou maua ni aiga sili ona fiafia i le Ekalesia ma le lalolagi.”²¹

E le’i atoa se tausaga ae maliu Sister Hinckley, i le aso 6 o Aperila, 2004, na mafua mai ona ua afu lona soifua. E faitau afe le Au Paia sa auai atu i lona falelauasiga, ae o le isi toatele sa maimoa atu i le televise. Sa faitauina e le atalii ia Clark Hinckley se tusi a lona tama na tusia i lona toalua: “Afai e i ai se aso i le lumanai o le a oo mai ai le aao o le oti i se tasi o i ta’ua, o le a i ai loimata, ioe, ae o le a i ai foi se faamautinoaga toafilemu ma le mautinoa o se toe faatasia ma se paaga e faavavau.”

O Le Au Paia o Aso e Gata Ai e Tatau Ona I Ai

Sa soifua Peresitene Hinckley e auauna atu ma ia ositaulaga. Sa ia soifua mo lona aiga ma mo tagata o le Ekalesia, o e sa ia aapa atu i ai i ana saunoaga ma ana faigamalaga. I le saunoa atu i na tagata o le ekalesia i le gasologa o le konafesi aoao ia Oketopa 2006, na ia saunoa ai: “O Iuni na te’a nei na faailoga ai le 96 o o’u tausaga. Ua ou iloa mai le tele o punātala, le anoanoai o taumatematega e faatatau i lo’u malosi. Ou te manao e avatu sa’o se faamaninoga. Afai ou te ola pea mo nai nisi masina, o lona uiga o le a ou toeaina tele atu nai lo se isi lava peresitene na i ai muamua o le ekalesia. Ou te le fai atu ona o se faalialiavale, ae o le agaga faafetai.” Ona ia faaopoopo mai ai lea o le saunoaga lenei: “Ua faataga au e le Alii ou te ola; ou te le iloa pe o le a le umi. Ae pe o le a lava le taimi, o le a tumau pea ona ou tuuina atu le mea silisili i o’u tiute.”²²

Ia Aokuso o le 2005 na uunaia ai e Peresitene Hinckley ia tagata o le Ekalesia ina ia faalatalata i le Faaola e ala lea i le faitauina o le Tusi a Mamona a o le’i oo i le faaiuga o le tausaga. Ua uma lena ona matauina i le faailogaina lea o le lona 200 o aso soifua o le Perofeta o Iosefa Samita, na i ai foi se uiga faapitoa o le 2005 i tagata o le Ekalesia o e na taliaina le luitau, na oo atu ai le faateleina o tagata na faitauina le Tusi a Mamona i se toatele e sili atu nai lo soo se isi lava taimi i le talafaasolopito.

E masani ona fautuaina e Peresitene Hinckley, i lana auala agalelei ma le agamalu le Au Paia o Aso e Gata Ai ina ia avea ma faataitaiga lelei. “Ia avea i tatou ma tagata lelei,” na ia tau mai ai ia i tatou i se saunoaga i le konafesi aoao o Aperila 2001. “Ia avea i tatou ma tagata faauo. Ia avea i tatou ma tagata faituaoi lelei. Ia avea i tatou ma tagata e tatau ona i ai tagata O Le Ekalesia a Iesu Keriso o le Au Paia o Aso e Gata Ai.”²³

Tatou te mananao e fai na mea aua sa tatou vaai i le auala sa ia tausi ai i isi, e tusa lava po o a o latou tulaga po o talitonuga faalelotu. Sa tatou vaai i lona popole mo tagata liliu mai. Sa tatou vaai i le auala sa ia faaaoga ai lana aoaoga ma le faaleagaga e saunoa mai ai ma le mana, faia ai faaiuga atamai, ma tuuina atu ai i le lalolagi “se faaaoao i e ua faatuatua” (1 Timoteo 4:12). Sa tatou faalogo ia te ia o ata ia te ia lava ma faataitai mai le lotomaualalo moni, a o ia soifua ai i lona soifuaga ma le lotopulea ma le malosi. Ae o le sili o na mea uma, ua tatou malamalama ma faateleina lo tatou alolofa ia Iesu Keriso ona o lenei perofeta lona 15 e le mafaagaloina o aso e gata ai, o Gordon Bitner Hinckley.