Potutusi
O MEA TAUA NA TUTUPU I LE AU PERESITENE A GORDON B. HINCKLEY
Saafiafiga Mo: Gordon B. Hinckley

O MEA TAUA NA TUTUPU I LE AU PERESITENE A GORDON B. HINCKLEY

I le gasologa o tausaga i le avea ai o Gordon B. Hinckley ma Peresitene o le Ekalesia:

  • Na vaaia le faatupulaia o le faitau aofai o le Ekalesia mai le na o le 9 miliona i le 13 miliona.

  • Na faapaiaina malumalu e 63, e aofia ai malumalu i Palamaira, Navu, ma Uinita Kuota ma le tele o malumalu laiti, o le uluai malumalu o lea ituaiga sa ia faasilasilaina i le 1997.

  • Na sili atu ma le 90 asiasiga i atunuu i fafo atu o le Iunaite Setete ma le anoanoai o malaga i totonu o le atunuu e feiloai ma le Au Paia o Aso e Gata Ai. E silia ma le miliona maila sa faimalaga ai o se Peresitene o le Ekalesia.

  • Na faailoaina atu i le Ekalesia ma le lalolagi, faatasi ai ma le Au Peresitene Sili ma le Korama a Aposetolo e Toasefululua, le “O Le Aiga: O Se Folafolaga i le Lalolagi” (Liahona, Oke. 2004, 49) ma le “O Le Keriso Soifua: O Le Molimau a Aposetolo” (Liahona, Ape. 2000, 2–3).

  • Na vaaia le faaopoopoina o korama e ono a le Au Fitugafulu—o le Tolu i le Valu—i le taitaiga o le Ekalesia.

  • Na vaaia le faasalalauina o le konafesi aoao i gagana e silia ma le 80, o le lomiaina o le Liahona i gagana e 51, ma le faaliliuina o le Tusi a Mamona po o ona vaega filifilia i gagana e 106 ma amata ona lolomi ma faasalalauina e se kamupani lomitusi tele.

  • Na vaaia atoa le fausiaina ma le faapaiaina o le Maota Autu mo Konafesi, lea e faatoluina le aofai o tagata e mafai ona matamata ai i le konafesi aoao. Na ia faapaiaina foi le Tapeneko na toe faafouina.

  • Na feiloai atu i le tele o taimi ma faauluuluga o malo ma isi taitai o malo mai le peresitene o le Iunaite Setete e oo i le tupu o Toga ma le peresitene o Kana.

  • Na aoaoina taitai perisitua i sauniga faaleaoaoga a taitai i le lalolagi atoa na faasalalauina e ala i le satelite.

  • Na fofogaina le faavaeina o le Tupe Faaagaga mo Aoga.

  • Na vaaia soo i luga o le televise i le Iunaite Setete ma Ausetalia.

  • Na talosaga atu i tagata o le Ekalesia e faitau le Tusi a Mamona i masina faaiu o le 2005, lea na oo atu ai ina tele atu tagata na faitauina le tusi nai lo soo se isi lava taimi i le talafaasolopito.

  • Na tusia le tele o tusi na faatauina i le Iunaite Setete atoa.