SAAFIAFIGA MO PERESITENE HINCKLEY

Sa ia te ia se loto o se auauna, ma le faautautaga poto a se taitai.

O le tala i le tuumalo o Peresitene Gordon B. Hinckley, na faaosofia ai le sasaa mai o faamaisega ma saafiafiga mai le lalolagi atoa. O nisi nei o ata o le anoanoai o le alofa ma le faamemelo sa faaalia mo ia.

Peresitene George W. Bush, Iunaite Setete o Amerika: Ua matua oo ifo i le ta’ele o o ma’ua loto ma Laura le faanoanoa ona o le tuumalo o la ma’ua uo pele o Gordon B. Hinckley… . [Na ia] faaalia se loto o se auauna ma le faautautaga poto a se taitai… . Sa ou maua se lagona faamamaluina ou te tuuina atu ai ia te ia le Pine o le Saolotoga, o le taui aupito maualuga a lo tatou malo, e aloaia ai lana tautua mo tagata lautele i lona soifuaga atoa… . E mafuta atu o ma’ua mafaufauga ma tatalo mo ona alo e toalima faapea le aiga uma o le au Hinckley.

Bishop Carolyn Tanner Irish, Episcopal Diocese o Iuta: E faigata lava ia te au ona ou mafaufau i le lalolagi ma le faatuatua o nuu ma alalafaga e aunoa ma ia. I lona taitaiina o le Ekalesia o le Au Paia o Aso e Gata Ai mo le fiasefulu o tausaga, sa avea o ia ma ona fatu ma loto i le fia miliona—o tagata e auai i le ekalesia ma i latou foi e le auai. E pei foi o le toatele o isi, sa matua tuia lava lo’u loto i lana faautautaga poto, o lona siufofoga agalelei, ma ana agamalie faatamalii.

Jeanetta Williams, Peresitene, NAACP o Iuta, Nevada, ma Idaho: Ou te fia molimoli atu la’u faamaisega o’oo’o, mai le taele o lo’u loto i le aiga o Peresitene Hinckley, faapea foi tagata o le Ekalesia. Sa ou faamemelo lava ia Peresitene Hinckley. Sa ou masani lelei ia te ia, ma o le a ou matua misia lava lona siufofoga ma lona popole mo le alaalafaga

Larry King, Larry King Live, CNN: O Peresitene Hinckley sa le na o se taitai o se ekalesia; o ia o se uo maoae. E matua toaitiiti lava ni tagata ua ou feiloai atu i ai i lo’u olaga, latou te maua lona naunautaiga, o lona malamalama, po o lana tofa. O le a matua misia lava o ia.

Peresitene Ólafur Ragnar Grímsson, Iselani: O le maliu o Peresitene Gordon B. Hinckley, ua misia ai e le Ekalesia a Iesu Keriso o le Au Paia o Aso e Gata Ai ma le lalolagi atoa se taitai maoae ma le atamai, o se tamalii e i ai le tofa mamao ma le lototoa. Ua misia e tagata o Iselani se uo lelei, ma ou te ofoina atu i le Ekalesia a Iesu Keriso a matou faamaisega mai le ta’ele o o matou loto.

Dr. Hussein Hassouna, Amepasa o Setete a Arapi i le Iunaite Setete: O se faanoanoaga tele lo’u mauaina o le tala i le tuumalo o Gordon B. Hinckley, le Peresitene O Le Ekalesia a Iesu Keriso o le Au Paia o Aso e Gata Ai. Ou te manatuaina pea lo’u feiloai atu ia te ia i la’u asiasiga i le Aai o Sate Leki i ni nai tausaga talu ai. Sa matua faagaeetia lava au i lona silafia, poto, ma le naunau i mea o tutupu i le lalolagi.

Zamira Sydykova, Amepasa o le Ripapelika o Kyrgyz i le Iunaite Setete ma Kanata: O le Susuga a Hinckley o se tagata maoae … o le na faamasania atili le kelope i le faaMamona, ma faalauiloa ai le ava fatafata ma le faaaloalo feusia’i i tagata i soo se mea.

Yuval Rotem, Amepasa o Isaraelu i Ausetalia: Ou te auai faatasi atu ma le fia miliona o tagata i le lalolagi atoa e faamamaluina ma faanoanoa faatasi mo lenei tamalii agaalofa ma le agalelei… . Na uunaia lava au o Peresitene Hinckley o se taitai malosi e i ai se tomai e malamalama ai i le tele o itu e sili ona taua o soo se faafitauli. Ou te matua talisapaia lava ana taumafaiga maoae e atili aumaia faatasi ai Kerisiano ma tagata Iutaia.

Ina ia maimoa pe faafofoga i saunoaga mai sauniga o le falelauasiga o Peresitene Gordon B. Hinckley, faaaoga le www.lds.org/presidenthinckleymemorial.

FAAMAMALUINA PERESITENE HINCKLEY E LE TUPULAGA

Sa faasalalauina e telefoni feaveai i le lalolagi atoa le tala i le tuumalo o lo tatou perofeta faapelepele o Gordon B. Hinckley i le afiafi o le Aso Sa, 27 Ianuari. E lei umi se taimi ae faatumulia peau o le ea i feau feaveai i telefoni a le tupulaga e taufai fefaamalosiaua’i ai le tasi i le isi ina ia fai o latou ofu lotu o le Aso Sa nai lo ofu masani, e o ai i le a’oga i le aso na sosoo ai e faamamalu ai ia Peresitene Hinckley.

Sa i ai se tasi tina i Mesa, Arisona na ofo ina ua ia vaaia lana tama o ala po ma auli lona sakete mo le aoga i le Aso Gafua. Fai mai a ia, ina ua maua e lana tama teine o Mackenzie, le anoanoai o feau feaveai i le telefoni, sa tonu ia te ia ma ana uo e ofu o latou ofu lotu i le aoga, e faamamalu ai le perofeta. Ma sa faapena foi le faitau afe o isi.

Sa faamatala e le atalii o le afafine o Peresitene Hinckley, o James Pearce, lona iloa i le mafuaaga na matuai toatele ai le tupulaga na ofuina o latou ofu aupito lelei i le aoga: “Sa matuai alofa lava o ia i le tupulaga talavou, ma sa faapena foi ona latou [tupulaga] alolofa faamama’i ia te ia. Sa latou faailoa atu lena mea e ala i a latou amio.”

O lena lava agaga e tasi sa faaalia i le auala e amata mai i le sauniga o le falelauasiga agai atu i le fanua maliu, a o talotalo atu e le tupulaga talavou o latou solosolo papae ma tuu i luga ni tootoo e faatofa atu ai i le perofeta.