Ang mga Panalangin sa Templo
Gikan sa usa ka debosyonal nga pakigpulong sa Unibersidad sa Brigham Young nga gihatag niadtong Nobyembre 15, 2005. Alang sa kompleto nga teksto sa pakigpulong sa Ininglis, bisitaha ang http://speeches.byu.edu.
Ang templo usa ka sagrado nga balay, usa ka balaan nga lugar diin ang importante nga mga seremonya ug mga ordinansa pagahimoon aron sa pag-andam kanato alang sa kahimayaan.
Ang mga panalangin sa pagtuga sa templo ingon kaimportante alang sa matag usa kanato sama sa atong pagbunyag. Sa ingon niini nga rason kinahanglan nga atong andamon ang atong mga kaugalingon nga kita limpyo aron makasulod sa templo sa Dios.
Ang kahigayunan nga makasulod sa templo ug pagahimoon mismo sa atong mga kaugalingon ang sagrado nga mga pakigsaad didto mao ang usa sa labing dako nga mga panalangin nga atong maangkon niini nga mortalidad. Dayon, inigkahuman nato og himo niadto nga mga pakigsaad, ang atong pagkamasulundon sa pagpuyo niini matag adlaw mobarug isip pagpakita sa atong hugot nga pagtuo, gugma, debosyon, ug espirituhanon nga pasalig sa pagtahud sa atong Langitnong Amahan ug sa Iyang Anak, nga si Jesukristo. Ang atong pagkamasulundon nag-andam kanato sa pagpuyo uban Kanila ngadto sa kahangturan. Ang makaluwas nga mga ordinansa sa templo mga kinahanglanon sa—ug gani mao ang pinakapokus sa—mahangturong plano sa kalipay.
Ang Doktrina sa Templo
Ang templo sa tinuoray usa ka lugar diin ikaw “nagpuyo sa kalibutan apan dili kalibutanon.” Kon ikaw anaa sa kasamok ug adunay hilabihan kaimportante nga mga desisyon nga naghasol sa inyong hunahuna ug kalag, mahimo nimong dalhon kining mga kabalaka ngadto sa templo ug makadawat og espirituhanon nga paggiya.
Kita kinahanglan nga makabaton og usa ka pagpamatuod ug usa ka pagbati nga may balaan nga pagtahud kon anaa sa balay sa Ginoo. Aron sa pagpreserbar sa pagkabalaan sa templo ug sa pagdapit sa Espiritu sa pagpanalangin niadtong kinsa mosulod sa balaan nga templo alang sa ilang mga ordinansa ug mga pakigsaad, kita gitudloan nga walay mahugaw nga butang ang mahimong makasulod sa templo. Ang balaan nga pagtahud sa templo usa kaimportante nga butang sa pagdapit sa Espiritu aron mopuyo sulod niini matag oras sa matag adlaw.
Sa dihang bata pa ako, ang akong amahan midala kanako gikan sa Long Island, New York, aron sa paglakaw sa mga nataran sa Templo sa Salt Lake, sa paghikap sa templo, ug sa paghisgot sa kaimportante sa templo sa akong kinabuhi. Mao kadtong higayona nga ako mihukom nga sa umaabut nga adlaw ako mobalik aron sa pagdawat sa mga ordinansa sa templo.
Sa tibuok kasaysayan, sa matag dispensasyon, ang Ginoo misugo sa iyang mga propeta nga ang mga templo kinahanglang pagatukuron aron ang Iyang mga katawhan makadawat sa mga ordinansa sa templo. Si Moises ug ang mga Israelita napanalanginan og usa ka templo nga madala-dala, ang tabernakulo, diin ang sagrado nga mga ordinansa ubos sa Balaod ni Moises gipanghimo—ug diin, sa matag okasyon, ang Ginoo makig-istorya ngadto kang Moises. Si Haring Solomon nakahuman og usa ka matahum nga templo sa Jerusalem, diin sa kaulahian natumpag. Dayon, panahon sa pagpangalagad ni Kristo, lain nga templo sa Jerusalem ang gitukod.
Kita nakakat-on gikan sa Basahon ni Mormon nga si Nephi nagtukod og usa ka templo “sama sa templo ni Solomon” (2 Nephi 5:16). Uban pa nga mga propeta nga Nephite, apil nila ni Jacob ug Haring Benjamin, nagtudlo sa mga katawhan sa templo (tan-awa sa Jacob 1:17; Mosiah 1:18).
Makahuluganon kaayo, sa diha nga ang nabanhaw nga Ginoong Jesukristo mipakita ngadto sa mga Nephite niadtong A.D. 34, Siya mipakita ngadto sa templo (tan-awa sa 3 Nephi 11:1–11).
Si Propeta Joseph Smith mitudlo, “Ang Simbahan dili makompleto og tukod, sa iyang sakto nga paagi, ug dili gyud mahitabo, hangtud nga ang Templo mahuman, diin adunay mga lugar nga andamon alang sa paghimo sa mga ordinansa sa Priesthood.”1
Ang Templo sa Kirtland mao ang unang templo niining ulahing mga adlaw, ug kini adunay importante nga bahin sa pagpahiuli sa mga yawe sa priesthood. Si Joseph Smith, isip resulta sa pag-ampo, gibisitahan ni Jesus sa Templo sa Kirtland niadtong Abril 3, 1836 (tan-awa sa D&P 110). Ang Manluluwas mipakita nga may himaya ug midawat sa Templo sa Kirtland isip Iyang balay. Niadto nga higayona sila si Moises, Elias, ug Elijah mipakita usab aron sa paghatag sa mga yawe sa priesthood nga ilang gihuptan. Si Elijah mipahiuli sa mga yawe sa gahum sa pagbugkos, sama sa gisaad ni Malaquias, aron kita makatagamtam sa tanang mga panalangin sa templo sa atong kinabuhi.
Ang atong kaliwatan nga mga pioneer mihuman sa Templo sa Nauvoo ug mibuhat sa sagrado nga mga ordinansa didto. Ang Templo sa Nauvoo mao ang unang templo diin ang mga endowment ug mga pagbugkos gipanghimo, diin naghatag og dakong kalig-on ngadto sa mga pioneer samtang sila naglahutay sa mga kalisud sa pagtabok sa mga patag ngadto sa Zion diha sa Salt Lake Valley. Sila natugahan og gahum sa balaan nga templo. Ang bana ug asawa nabugkos sa matag usa. Ang mga anak nabugkos ngadto sa ilang mga ginikanan. Daghan kanila ang namatyan og mga miyembro sa pamilya sa ilang pagpadulong, apan sila nasayud nga dili kadto ang katapusan para kanila. Sila nabugkos na sa templo hangtud alang sa tanang kahangturan. Sa kaulahian, pinaagi sa pagpadayag nga nadawat ni Presidente Brigham Young, ang mga Santos mitukod og mas daghang templo sa Kasadpan.
Karon aduna nay 130 ka naglihok nga mga templo, nagtugot sa mga matinud-anon nga mga miyembro sa Simbahan sa tibuok yuta sa pag-adto sa balay sa Ginoo aron sa pagdawat sa ilang mga ordinansa sa templo ug maghimo og mga pakigsaad uban Kaniya.
Mga Ordinansa sa Templo
Ang nag-unang katuyoan sa templo mao ang pagsangkap og mga kinahanglanon nga mga ordinansa alang sa atong kahimayaan sa celestial nga gingharian. Ang mga ordinansa sa templo mogiya kanato ngadto sa atong Manluluwas ug mohatag kanato sa mga panalangin nga moabut kanato pinaagi sa Pag-ula ni Jesukristo. Ang templo mao ang labing dako nga unibersidad sa pagkat-on nga nahibaloan sa tawo, naghatag kanato og kahibalo ug kaalam kabahin sa Paglalang sa kalibutan. Ang mga instruksyon sa endowment naghatag og paggiya kon unsaon nato sa pagpuyo sa atong mga kinabuhi dinhi sa yuta. Ang kahulugan sa pulong nga endowment mao ang “gasa.” Ang ordinansa naglangkob og sunod-sunod nga mga instruksyon kon unsaon nato sa pagpuyo ug mga pakigsaad nga atong pagahimoon aron magpuyo nga matarung pinaagi sa pagsunod sa Manluluwas.
Ang lain nga importanting ordinansa mao ang pagkabugkos hangtud sa kahangturan sa celestial nga kaminyoon. Kini nga pagkigsaad sa kaminyoon nagtugot sa mga anak nga mabugkos ngadto sa ilang mga ginikanan ug ang mga bata nga natawo sa pakigsaad mahimong bahin sa usa ka mahangturon nga pamilya.
Ang Doktrina ug mga Pakigsaad nagtudlo kanato: “Bisan unsa nga imong bugkuson diha sa yuta pagabugkuson didto sa langit; ug bisan unsa ang imong bugkuson diha sa yuta, diha sa akong ngalan ug pinaagi sa akong pulong, miingon ang Ginoo, kini nabugkos sa gihapon sa mga langit” (D&P 132:46).
Kon ang magtiayon nagluhod sa altar, ako isip usa ka tigbugkos [sealer] ako nasayud sa akong tahas isip usa ka representante sa Ginoo. Ako nasayud nga kon unsa ang gibugkos dinhi sa yuta sa literal nga paagi nabugkos sa langit—dili na gayud pagabulagon kon ang mga gibugkos magpabilin nga matinud-anon ug molahutay hangtud sa kahangturan.
Ako nakaobserbar sa daghang katuigan nga daghang magtiayon nakahimo sa pagpadayon og lig-on ug makahuluganon nga mga kaminyoon samtang sila nagpabilin nga magmatinud-anon sa mga pakigsaad nga ilang gihimo sa ilang mga kaugalingon sa templo. Kining mga malampusong magtiayon adunay pipila ka mga butang nga pareho.
Una, kining mga magtiayon nakaila sa usag usa kon si kinsa sila—anak nga mga lalaki ug anak nga mga babaye sa Dios. Sila nagsabut og mahangturon nga mga tumong nga sila usab mopuyo uban sa atong Langitnong Amahan ug sa Iyang Anak, nga si Jesukristo. Sila naningkamot nga mobiya sa mga paagi sa kinaiyanhon nga tawo (tan-awa sa Mosiah 3:19).
Ikaduha, sila nasayud sa doktrina ug sa kaimportante sa makaluwas nga mga ordinansa sa templo ug sa mga pakigsaad sa templo ug sa ilang kinahanglanon aron pagkab-ot sa mahangturong mga tumong.
Ikatulo, sila mipili sa pagkab-ot og mahangturong mga panalangin sa gingharian sa Dios kay sa temporaryo nga mga kabtangan sa kalibutan.
Ikaupat, kini nga mga magtiayon nakahunahuna nga kon sila mabugkos alang niini nga panahon ug hangtud sa kahangturan, sila mipili og kauban hangtud sa kahangturan—ang ilang mga adlaw sa pagpangulitawo nahuman na! Wala nay kinahanglan nga tan-awon pa!
Ikalima, kini nga mga magtiayon naghunahuna sa usag usa sa dili pa ang ilang mga kaugalingon. Ang pagkahakog makapawala sa mga balatian sa pagkaespiritwal. Pinaagi sa pagpakig-istorya sa Ginoo diha sa pag-ampo, sila dungan nga mitubo ug wala magkabulag. Sila nag-istoryahanay sa usag usa, mao nga dili motugot nga ang gagmay nga mga problema mahimong dagko nga mga problema. Sila mag-istoryahanay dayon kabahin sa “gagmay nga mga butang nga makapasakit” nga may gamay nga kahadlok nga malain. Pinaagi niini, kon mapuno na sa masakit nga mga butang ug kon mahisgutan na sa usag usa, walay pagbuto sa pait nga mga pagbati sa usag usa. Mas maayo kon ipakigbahin ang sakit nga mga pagbati sa dili pa kini mobuto sa kasuko. Sila andam nga mangayo og pasaylo ug mopasaylo kon ilang mapasakitan ang ilang hinigugma. Ilang ipakita ang ilang paghigugma sa usag usa ug nahimong mas suod. Sila nagdasigay ug naglig-unay sa usag usa.
Ang mga Panalangin sa Templo
Ang templo usa ka sagrado nga balay, usa ka balaan nga lugar diin ang importante nga makaluwas nga mga seremonya ug mga ordinansa pagahimoon aron sa pag-andam kanato alang sa kahimayaan. Importante nga kita makaangkon og sigurado nga kahibalo nga ang atong pagpangandam sa pagsulod sa balaan nga balay ug ang atong pag-apil niining mga seremonya ug mga pakigsaad mao ang pipila sa labing importante nga mga panghitabo nga atong masinati sa atong mortal nga kinabuhi.
Kita boluntaryo nga mianhi sa mortal nga pagsulay gikan sa presensya sa Dios nga Amahan uban sa kabubut-on, nasayud nga kita makasinati og “katugbang sa tanan nga mga butang” (2 Nephi 2:11). Ang atong katuyoan mao ang pagsul-ob sa tibuok taming sa Dios ug mosagubang “sa nagdilaab nga mga pana sa dautan” uban sa panagang sa hugot nga pagtuo ug sa espada sa Espiritu (tan-awa sa D&P 27:15–18), aron sa paglahutay hangtud sa kahangturan, ug mahimong takus nga mobarug ug mopuyo sa presensya sa Dios nga Amahan ug sa Iyang Anak, nga si Jesukristo, hangtud sa tanang kahangturan—aron sa pagkab-ot niining gitawag nga kinabuhing dayon.
Litrato sa Templo sa Salt Lake ni Welden C. Andersen; sa tuo: paghulagway sa litrato pinaagi ni John Luke
Si Moises ug ang mga Israelita napanalanginan og usa ka templo nga madala-dala, ang tabernakulo, diin ang sagrado nga mga ordinansa ubos sa Balaod ni Moises gipanghimo—ug diin, sa matag okasyon, ang Ginoo makig-istorya ngadto kang Moises.
Gihulagway ni Ted Henninger