Mga Pangutana ug mga Tubag
“Sa among pamilya ako ang kinamanghuran nga may lat-ang og daghang mga tuig. Ako kanunay nga mobati nga dili maapil sa mga kalihokan ug mga pag-istoryahanay sa akong mga igsoon. Unsay akong mahimo aron mapalambo ang among relasyon?”
Kini nga hagit mahimong usa ka oportunidad aron sa pagpahibalo sa imong igsoon nga mga lalaki ug igsoon nga mga babaye nga gusto nimong mas malakip sa ilang mga kinabuhi. Siguro wala sila masayud nga gibati nimong wala kay apil. Mahimo nimong istoryahan ang imong mga ginikanan kabahin niini. Sila makahatag og pipila ka nindot nga mga ideya.
Isugyot sa imong mga igsoon nga mobuhat og pipila ka mga kalihokan nga imong mabuhat uban nila, ug paghunahuna og mga hilisgutan nga mahimo ninyong istoryahan. Hunahunaa ang ilang mga iskedyul ug mga interes samtang ikaw magplano og mga pamaagi sa paggugol og panahon uban kanila. Ang pagpaminaw kanila ug pagpakita og interes sa ilang mga kalihokan dili lamang makapalambo sa imong relasyon uban kanila apan makatabang usab kanimo nga makakat-on. Sila nakasinati og mga butang nga imo unyang masinatian sa sunod nga mga tuig.
Hinumdumi kon unsa kaimportante ang mga pamilya sa plano sa atong Langitnong Amahan. Kon ikaw mag-ampo alang sa Iyang panabang, Siya modasig kanimo og mga ideya alang sa pagpalambo sa imong relasyon ngadto sa imong mga igsoon. Pagbaton og kaisug sa pagbuhat sa mga pag-aghat nga imong madawat.
Pakig-istoryahi Sila
Sa among pamilya, ako usab ang kinamanghuran nga may lat-ang og daghang mga tuig, apan ang akong nadiskobrehan mao nga ang akong mga igsoon gusto nga sila makaila kanako sama sa nga ako gusto nga makaila kanila. Ang imong mga igsoon siguro maganahan kaayo kon imo silang tawagon aron lang makig-istorya o dapiton sila sa pagpanggawas alang sa paniudto sa usa ka higayon. Sultihi sila kon unsa na ang nahitabo sa imong kinabuhi. Kini makahimo og dakong kahulugan ngadto kanila kon ikaw komportable nga mopakigbahin sa imong mga hunahuna ug mga pagbati uban kanila. Sultihi usab sila og mga espiritwal nga mga hilisgutan. Dili lamang kini makatabang kanimo nga mas maduol ngadto kanila apan usab sa imong Langitnong Amahan.
Kelsey H., 16, Alberta, Canada
Himoa nga usa ka Maayo nga Ehemplo.
Ako usab nakasinati niining lisud nga sitwasyon. Sa akong hunahuna ang labing maayo nga butang nga atong mahimo mao ang pagkahimong usa ka ehemplo ngadto sa atong mga mas maguwang nga mga igsoong lalaki ug mga igsoong babaye. Sa ingon niini nga paagi, ang gugma ug kalinaw maanaa kanatong tanan. Kinahanglan nga ato silang sultihan giunsa nato sila sa paghigugma, ug kita kinahanglang maningkamot nga magkahiusa isip usa ka pamilya. Sa labing dali nga panahon o sa kinaulahian sila makaamgo kon unsa ka dako ang atong gugma kanila. Ako nasayud nga kining mga butanga mamaayo ra sa hinay-hinay.
Ádám B., 16, Gyor-Moson-Sopron, Hungary
Paggahin og Panahon nga Magkauban
Usahay lisud ang paggahin og panahon uban sa mas maguwang nga mga igsoon tungod sa pag-eskwela ug uban pang mga kalihokan sa matag adlaw. Apan kon imong mahimo, duol lang ug pagpakig-istorya kanila, sultii sila kabahin sa imong adlaw, ug tan-awa kon kumusta ang ilang gipangbuhat. Kon ikaw adunay mga problema sa bisan unsa nga butang, ikaw mahimong mohangyo sa ilang mga opinyon aron sila makahibalo nga imong gihatagan og bili ang ilang mga ideya. Tagda sila sa samang paagi nga ikaw gusto nilang tagdon. Kamo mahimong magdula ug maggihan og panahon nga magkauban—kini makatabang kaayo. Kinahanglan usab nimo silang sultihan kon unsa ka dako ang imong gugma kanila. Apan ang labing importante sa tanan, mao ang pag-ampo. Ang Langitnong Amahan kanunay nga motabang kanimo.
Katherine M., 14, Idaho, USA
Tagda Sila nga may Pagkamabination
Isip kinamanghuran sa among pamilya, usahay ako mobati nga dili maapil sa mga kalihokan ug istoryahanay sa akong mga igsoon, ug para kanako kini makapasakit. Apan kon akong hunahunaon si Jesukristo, ako nakaamgo nga pinaagi sa pagpakigbahin sa susama nga mga bili uban sa akong pamilya, kami mahimong makalig-on ug makaawhag sa usag usa. Tagda ang tanan nga may pagkamabination ug pagkadungganon. Ipakita nga ikaw interesado kanila, ug ipahibalo kanila nga ikaw nabalaka kanila.
Joseph M., 16, Leyte, Philippines
Tagamtama ang Matag Higayon nga Magkauban
Usahay ako mobati nga ako nakalimtan tungod kay ang akong mga igsoong babaye adunay ilang kaugalingon nga mga kalihokan, sama sa akong mga ginikanan. Sa pagpadayon sa dagan sa panahon, ako nakasabut nga silang tanan nahigugma kanako ug dili nila gusto nga dili mogahin og panahon ngari kanako apan ang tanang butang adunay ilang panahon. Importante ang pagtagamtam sa matag higayon nga imo silang makauban, sa pagkatawa, sa pagkamabination, sa pagkaparaygon, ug labaw sa tanan sa pagpakita sa imong gugma ngadto kanila. Importante usab alang kanimo nga mag-ampo ug mangayo sa atong Langitnong Amahan aron sa pagtabang kanimo mga mahimong masuod sa imong igsoong mga lalaki ug igsoong mga babaye. Siya makadungog kanimo ug motabang kanimo.
Roberto S., 18, Santiago, Chile
Paggahin og Panahon sa Pag-istoryahanay
Ako ang kinamanghuran sa pito ka mga anak. Sa dihang ako bata pa, ako mibati nga dili apil, apan ako usab nakaamgo nga sila nahigugma kanako, labaw pa kaysa akong gihunahuna. Siguro, karon ikaw dili pa kaayo makasandurot kanila, apan ang labing maayo nga panahon nga akong makauban ang akong mga igsoon mao ang pag-istoryahanay. Ako nakaamgo nga sila adunay dakong pagsalig kanako, ug ingon ana gihapon sa karon. Aron sa pag-istorya uban kanila, ako maningkamot og tabang kanila sa ilang mga buluhaton, mabination ngadto kanila, maglikay nga masuko ngadto kanila, ug makighiusa kanila aron sila makatabang kanako. Kadto nakatabang kanako nga mobati nga ako gilakip ug gihigugma.
Maria H., 19, Mexico City, Mexico