Ako Misaad sa Langitnong Amahan

Hiroko Fukuda, Tochigi, Japan

Sa dihang si Yukari nag-edad og tres anyos, ang iyang preschool maghatag og gatas sinagulan og kape. Tungod kay ang inahan ni Yukari mitudlo kaniya mahitungod sa Pulong sa Kaalam, si Yukari dili moinom sa kape nga gatas. Iyang sudlan ang iyang baso og tubig ug iya kining imnon imbis kape.

Usa ka adlaw si Yukari misulti sa iyang inahan, “Gusto akong moinom og kape nga gatas sama sa tanan.” Ang iyang inahan milingkod tupad kaniya ug mitabang kaniya nga makasabut nga ang Langitnong Amahan nahigugma kaniya, nga Siya dili gusto nga siya moinom og kape, ug kana usa ka sugo. Gikan nianang adlawa, si Yukari nakasiguro nga siya dili gustong moinom og kape. Sobra sa usa ka tuig ang milabay.

Usa ka adlaw niana sa dihang ang magtutudlo ni Yukari dili makaanha, laing magtutudlo ang mianha sa klase. Sa naandan, si Yukari miinom sa tubig. Ang magtutudlo nakakita ug nangutana, “Nganong nag-inom ka og tubig?” Si Yukari mipasabut nga siya nagsimba ug siya misaad sa Langitnong Amahan nga siya dili gayud moinom og kape. Ang magtutudlo nakadayeg. Gikan nianang higayona, ang preschool mihunong sa paghatag og kape nga gatas ug mihatag og laing mainom.