Panahon sa Pagpakigbahin

Kita Nagtuo nga ang Banay Gi-orden sa Dios

“Ang banay mahinungdanon ngadto sa laraw sa Tiglalang alang sa walay katapusan nga destinasyon sa Iyang mga anak (“Ang Banay: Usa ka Pamahayag ngadto sa Kalibutan”).

Si Amalickiah usa ka dautan nga tawo. Iyang gisaaran ang mga Nephite og daghang mga butang kon sila mohimo kaniya nga hari. Daghang mga tawo ang mituo kaniya ug mitalikod sa pagkamatarung.

Si Moroni mao ang kapitan sa mga kasundalohan sa mga Nephite. Siya matarung ug mituo ni Jesukristo. Sa dihang si Moroni nakadungog nga daghang mga tawo ang nadala ni Amalickiah, si Moroni nasuko kaniya. Nasayud siya nga ang mga tawo anaa sa kakuyaw nga mawad-an sa ilang kagawasan.

Si Moroni migisi og piraso sa iyang kupo ug misulat diha niini, “Agi og paghinumdom sa atong Dios, sa atong tinuohan, ug kagawasan, ug sa atong kalinaw, sa atong mga asawa, ug sa atong mga anak” (Alma 46:12). Iyang gihigot ang panapton sa tumoy sa usa ka tukon ug gitawag kini og bandila sa kalingkawasan. Dayon siya nag-ampo alang sa mga katawhan ug mibisita kanila, nagwara-wara sa bandila sa kalingkawasan ug mitawag sa mga Nephite sa pag-apil kaniya sa pagpanalipod sa ilang kagawasan. (Tan-awa sa Alma 46:1–21.)

Kamo nagpuyo sa usa ka panahon nga adunay mga tawo sama ni Amalickiah kinsa buot nga mopalayo kanato sa pagsunod sa plano sa Langitnong Amahan. Usa sa mga labing importante nga bahin niana nga plano mao ang mga pamilya.

Gusto ang Langitnong Amahan nga ang mga miyembro sa Simbahan makasabut sa Iyang plano alang sa mga pamilya. Ang Unang Kapangulohan ug ang Korum sa Napulog Duha ka mga Apostoles misulat sa “Ang Banay: Usa ka Pamahayag ngadto sa Kalibutan” sa pagpahayag unsa ang atong gituohan mahitungod sa mga pamilya. Sama sa bandila sa kalingkawasan, ang pamahayag makaawhag kanato sa paghinumdom ug sa pagpasabut unsay atong gituohan.

Kalihokan

Tangtanga ang pahina H4, ug ipapilit kini sa mas baga nga papel. Ibitay ang pamahayag sa usa ka lugar diin makita kini sa inyong pamilya ug mahinumdom sa kaimportante sa paglig-on sa usag usa.

Mga Ideya sa Panahon sa Pagpakigbahin

“Ang Banay: Usa ka Pamahayag ngadto sa Kalibutan” usa ka moderno nga pagpadayag. Ipapaminaw sa mga bata makapila ka higayon nga ilang madungog ang mga pulong “pagpadayag” o “gipadayag” sa ilang pagdungan og subli sa ikasiyam nga artikulo sa hugot nga pagtuo. Itudlo nga ang Dios mopadayon sa pagpadayag sa Iyang kabubut-on ngadto sa Iyang mga anak. Kini nga komunikasyon gikan sa Dios gitawag og pagpadayag. Paghatag og kopya sa “Ang Banay: Usa ka Pamahayag ngadto sa Kalibutan” ngadto sa matag bata, ug ipasabut nga ang pamahayag mao ang pagpadayag nga gihatag sa atong panahon pinaagi sa pinili nga mga sulugoon sa Dios. Hatagi ang matag klase og lain-laing hugpong sa mga pulong gikan sa pamahayag nga nawala ang pipila ka mga pulong. Patabanga silang tanan sa pagsulat sa mga blangko sa sakto nga mga pulong. Pananglitan: “Ang mao ngadto sa Tigalalang alang sa walay katapusan nga destinasyon sa Iyang mga anak.” Dapita ang matag klase sa pagbarug ug pag-recite sa ilang nakompleto nga hugpong sa mga pulong. Kantaha ang unang bersikulo sa “Ang Pamilya Iya sa Dios” (Liahona, Okt. 2008, H12–H13). Ipasabut nga ang pamahayag sa banay mao ang pagpadayag gikan sa Dios ug nga kita kinahanglang makasabut ug magsunod sa mga pagtulun-an niini. Kuhaa ang mga kopya sa pamahayag; gamiton kini nimo pag-usab sa ikatulong semana.
“Ang Banay: Usa ka Pamahayag ngadto sa Kalibutan” nagtudlo sa kaimportante sa kaminyoon. Dapita ang pipila ka mga miyembro sa ward o branch nga giaprobahan sa bishop o branch president nga moapil sa panel discussion sa kaimportante sa kaminyoon (tan-awa sa “Panel Discus-sions,” Pagtudlo, Walay Labaw ka Mahinungdanon nga Tawag [1999], 175–76). Sa sayo pa, hatagi sila sa mga pangutana nga imong ipangutana. Mga Pananglitan: Sa unsa nga paagi nga ang Langitnong Amahan mipanalangin kaninyo ug sa inyong kapikas? Makapaambit ba kamo og usa ka istorya mahitungod sa pagtudlo sa ebanghelyo nga nakatabang kaninyo nga mahimong maayong asawa (o bana)? Unsa ang mabuhat sa mga anak karon aron sa pagpangandam nga maminyo sa umaabut? Mahimo kang mosugyot nga ang mga partisipante moribyu sa “Ang Banay; Usa ka Pamahayag ngadto sa Kalibutan.” Papuli-puliha ang mga bata sa pagpili ug sa pagbasa sa usa ka pangutana. Paboluntaryoha ang mga sakop sa panel sa ilang mga tubag. Ipamatuod ang kaimportante sa kaminyoon diha sa plano sa Langitnong Amahan.

Paghulagway sa litrato pinaagi ni Matthew Reier