Jehova Nagluwas sa Matinud-anong Daniel
Kini nga asoy gikan sa Daniel 1–2; 6
Mitan-aw si Daniel sa plato sa pagkaon nga diha sa iyang atubangan ug sa bino nga diha sa iyang kopa. Nasayud siya nga kini dili himsog nga pagkaon nga buot ni Jehova nga iyang kan-on. Dili siya mokaon niini.
Ang mga higala ni Daniel—si Sadrach, Mesach, ug Abed-nego—dili usab mokaon sa pagkaon sa hari. Ang upat ka Hebreohanon nga batang mga lalaki nadakpan didto sa Jerusalem ug gidala nga bihag ngadto sa siyudad sa Babelonia. Karon si Hari Nabucodonosor buot kanila nga mokaon sa lamian nga pagkaon ug bino. Gihunahuna niya nga kini makahimo kanila nga lig-on.
Apan si Daniel ug ang iyang mga higala nasayud nga ang pagkaon sa hari dili makapahimsog ug makapalig-on kanila. “Hatagi kami og utan nga pagakan-on ug tubig nga pagaimnon,” miingon si Daniel ngadto sa sulugoon sa hari. “Human sa napulo ka mga adlaw, ipatan-aw kami ngadto sa mga tawo nga nagkaon sa lamian nga pagkaon sa hari.” Miuyon ang sulugoon.
Matag adlaw ang sulugoon midala sa batan-ong mga lalaki og lagutmon, nga mga pagkaon nga gihimo gikan sa mga liso ug mga lugas. Ug siya midala kanila og tubig nga imnon, dili bino. Human sa 10 ka mga adlaw ang batan-ong mga lalaki nakita nga mas himsog kay sa uban nga mga bihag, busa ang sulugoon wala na mosugo kanila nga mokaon sa pagkaon sa hari.
Samtang si Daniel nagtubo, mipanalangin si Jehova kaniya og kahibalo ug kaalam. Misalig si Hari Nabucodonosor ni Daniel ug nangayo sa iyang tambag.
Sa diha nga si Hari Dario nahimong bag-o nga hari sa Babelonia, gihimo niya ang maalamong Daniel nga presidente sa iyang gingharian. Ang pipila sa mga tawo nasina ni Daniel. Nasayud sila nga siya nag-ampo katulo sa usa ka adlaw ngadto sa Langitnong Amahan. Ang nasina nga mga tawo midani sa hari sa paghimo og bag-o nga balaod. Si bisan kinsa nga makit-an nga nag-ampo kinahanglan gayud nga ibalhog ngadto sa usa ka langub diin ang gutom nga mga leon gibutang.
Ang matinud-anong Daniel nasayud sa balaod, apan sa gihapon siya nag-ampo matag adlaw. Ang mga tawo mihulat ug naminaw sa gawas sa iyang lawak. Sa diha nga ilang nadungog si Daniel nga nag-ampo, sila midali-dali ngadto sa hari.
Nawad-an sa kadasig si Hari Dario sa diha nga gisultihan siya sa mga lalaki mahitungod ni Daniel. Siya nanghinaut nga unta wala siya mopirma sa balaod, apan ang balaod kinahanglan nga pagatumanon. Gibalhog si Daniel ngadto sa langub sa mga leon, ug usa ka dakong bato gibutang sa pagtabon sa agianan.
Tibuok niana nga gabii ang hari naguol ug naghunahuna. Sayo sa sunod buntag midali siya ngadto sa langub sa mga leon. Sa usa ka kusog nga tingog mitawag ang hari, “Oh Daniel, ang imong Dios nagaluwas ba kanimo gikan sa mga leon?”
Uban sa kahupay nadungog niya ang tubag ni Daniel gikan sa luyo sa bato, “Ang akong Dios nagpadala sa iyang anghel, ug gitak-uman ang mga ba-ba sa mga leon, nga sila wala makadaut kanako.”
Sa kalipay, ang hari mipadala og balaod ngadto sa tanan nga gingharian. Ang Dios ni Daniel mao ang buhing Dios, ug Iyang giluwas si Daniel gikan sa mga leon.
Ang Doktrina ug mga Pakigsaad 89 nagtudlo kanato sa pagkaon og himsog nga mga pagkaon karon.
Gikan sa wala: detalye gikan sa Kristo ug ang Adunahang Batan-on nga Tigmando, ni Heinrich Hofmann, sa maayong kabubut-on ni C. Harrison Conroy Co.; mapa pinaagi sa Mountain High Maps © 1993 Digital Wisdom; gilitratohan ni Craig Dimond; paghulagway pinaagi ni Daniel Burr; detaye gikan sa Kristo ug ang mga Bata, pinaagi ni Harry Anderson © IRI