Gikan sa Natad sa Misyon
Milagro diha sa Stoplight
Nagsakay siya og scooter, naghulat sa signal sa traffic. May mga segundo lamang ako sa pagpakigsulti kaniya.
Sa diha nga ang akong kauban, si Elder Platt, ug ako naglakaw agi sa merkado sa mga dalan sa Taichung, Taiwan, mihunong kami sa usa ka dako nga interseksyon ug mipaabut sa pula nga siga. Mao pa gyud ang paghunong, nadungog nako ang usa ka pamilyar nga tingog sa among luyo. Sa dihang daghan nga mga scooter mihunong sa among kilid, milingi ako sa pagtan-aw kinsa ang among maistoryahan. Niana nga higayon, usa ka klaro nga pagbati misanap sa akong kasingkasing ug salabutan. Walay tingog nga gipamulong, walay pulong nga gilitok, apan aduna akoy impresyon nga ako kinahanglang makigsulti niana nga lalaki diha sa scooter pipila lamang ka lakang sa akong wala.
Milihok ako uban ang pagbati sa pagkadinalian aron makigsulti niana nga lalaki. Gibati ko nga ingon og may usa ka tawo sa tinuoray nagduso kanako gikan sa luyo ug nagpalihok sa akong mga tiil alang kanako. Giukab ko ang akong ba-ba ug gipangutana ang lalaki, “Maayo ba ang imong adlaw karon?” Mitan-aw siya kanako ug mitubag nga ngil-ad ang iyang adlaw. Niana nga higayon ang stoplight mibalhin gikan sa pula ngadto sa green, ug ako nawad-an og paglaum. Nahadlok ako nga ang lalaki molarga. Ako walay nasulti kaniya kalabut sa Pagpahiuli sa tinuod ug buhi nga Simbahan ni Jesukristo, kalabut ni Propeta Joseph Smith, o kalabut sa Basahon ni Mormon. Wala gani nako masulti kaniya ang pangalan sa Simbahan.
Ang mga tawo nga naglibut kanamo misugod sa paglarga, apan ang lalaki wala. Misugyot siya nga kami mopadaplin aron magsinultihanay pa ug dugang. Nahingangha ako, apan mapasalamaton ako nga mituman sa iyang sugyot. Diha sa daplin sa kalsada, si Elder Platt ug ako mipakigbahin ngadto kaniya sa pangalan sa Simbahan ug daghan pa.
Pila ka semana wala madugay, kana nga lalaki, si Su Meng-We, ug ang iyang duha ka anak nga mga lalaki ug duha ka anak nga mga babaye gibunyagan ug gikumpirmahan nga mga miyembro sa Ang Simbahan ni Jesukristo sa mga Santos sa Ulahing mga Adlaw.
Gikan niana nga kasinatian, nakat-unan ko nga samtang kita matinud-anong maningkamot sa pagbuhat sa buluhaton sa Ginoo sa Iyang paagi ug sa Iyang panahon, kita usahay may pribilehiyo sa pagsaksi og mga milagro. Si Propeta Moroni mipahayag nga ang “Dios wala mohunong sa pagka-Dios sa mga milagro. Tan-awa, dili ba ang mga butang nga gihimo sa Dios kahibulongan sa atong panan-aw?” ( Mormon 9:15–16) Ang mga milagro makaabut uban sa pagtandog sa mga kasingkasing ug sa pag-usab sa mga kinabuhi.
Ang Isangyaw ang Akong Ebanghelyo naglangkob niini nga saad ngadto sa mga misyonaryo ug mga miyembro sa Simbahan: “Ang Ginoo nag-andam sa mga katawhan sa pagdawat kaninyo ug sa gipahiuli nga ebanghelyo. Mogiya Siya kaninyo o mogiya Siya kanila nganha kaninyo. … Ang ingon nga mga tawo moila nga kamo mga sulugoon sa Ginoo. Sila maandam sa paglihok sa inyong mensahe.”1 Dili kadto aksidente nga si Elder Platt ug ako diha niana nga piho nga stoplight ug niana nga untop nga oras.
Ang Langitnong Amahan nasayud ug nahigugma sa matag usa kanato sa tinagsa-tagsa. Sa dili tinuyo nga paagi, Siya naghatag og paagi alang kanatong tanan nga modangat sa kahibalo kalabut sa gipahiuli nga ebanghelyo. Ang Ginoo mabinantayon sa mga hagit ug sa mga kalisud sa kinabuhi ni Su Meng-Wei. Nasayud siya nga si Su Meng-Wei bag-o lamang nga nawad-an og trabaho. Nasayud siya nga ang mabingkilon nga mga pulong nalitok diha sa balay ni Su niana nga buntag.
Ang ebanghelyo nakadala og dugang kalinaw ngadto sa pamilya ni Su ug nakalig-on sa mga relasyon sa ilang pamilya. Kini nakatabang kanila sa pagkaplag og mas dako nga kalipay ug direksyon sa kinabuhi. Sila nakakaplag sa gahum sa pag-atubang sa mga hagit sa kinabuhi uban ang paglaum ug walay kahadlok.
Kita tingali dili makakita niini sa sinugdanan, apan kadtong kinsa giandam makaila nga kita mao ang mga sulugoon sa Ginoo. Mamatikdan nila ang usa ka butang nga lahi kanato. Makit-an nila ang kaayo ug buot nga masayud pa og dugang mahitungod niini. Sa diha nga ilang masinati ang Espiritu Santo, sila maandam sa paglihok sa among mensahe. Ingon nga kini nga mensahe nakatandog sa mga kasingkasing ug nakausab sa mga kinabuhi sa pamilya Su sa Taiwan, busa kini makahimo ug motandog sa mga kasingkasing ug mousab sa mga kinabuhi niadto nga atong nailhan, bisan asa man kita nga dapit sa kalibutan.
Sa pag-ampo alang sa paggiya, makapangutana kita kada adlaw sa atong mga kaugalingon niini nga pangutana: kang kinsa ako masayud nga ang Ginoo nag-andam nga moabut sa kahibalo sa gipahiuli nga ebanghelyo? Ang pagbansay sa atong hugot nga pagtuo niini nga paagi, kita maandam sa pagsunod sa mga pag-aghat sa Espiritu Santo ug sa pag-ukab sa atong mga ba-ba sa pagpakigbahin sa bililhon nga mga kamatuoran nga kita gipanalanginan karon nga makahibalo.
Ang katingalahan nga mga oportunidad sigurado nga mosunod.
Paghulagway pinaagi ni Michael Parker