Ang Ebanghelyo alang sa Tanan
Gipahiangay gikan sa “Friend to Friend,” Liahona, Abr. 1999, H2–H4.
Sa diha nga ako 11, ang akong pamilya mibalhin ngadto sa West Germany. Ang akong amahan ug inahan nagpadagan og labhanan aron mabuhi, ug ako mao ang batang lalaki nga tighatud sa linabhan. Nakita ko ang sinaw nga pulang mga bisekleta, ug ako nangandoy nga makaangkon unta og usa aron magamit sa akong mga paghatud. Apan gikinahanglan ko ang usa ka heavy duty nga bisikleta sa pagbitad sa karomata nga gisudlan sa linabhan. Milibut ako nga nagbitad nianang bug-at nga karomata sa linabhan sa wala pay klase ug human sa klase. Pait kini nga magtan-aw sa uban nga mga bata nga nagdula. Apan ang tanan sa among pamilya gikinahanglan nga motrabaho og maayo, ug ako usa ka importante nga bahin sa negosyo sa pamilya.
Sa dihang ako nagkahingkod, akong nakat-unan ang mga panalangin sa pagbuhat sa mga butang nga niana nga panahon nga wala ninyo damhang mga importante ug maayo alang kaninyo. Sa gamay pa kaayo ako, nasakit ako sa ba-ga, apan walay usa nga nakahibalo niini niana nga panahon. Sa diha nga ako nagkahingkod, misulod ako sa air force. Nakit-an sa mga doktor ang mga lama diha sa akong mga ba-ga. Tungod sa kabug-at sa trabaho sa pagsikad nianang bug-at nga karga, sa usa ka paagi ang akong lawas naayo sa iyang kaugalingon. Nakabaton ako og resistensya. Nakabaton ako og kalig-on. Ang mga doktor miingon nga ang sakit miayo sa iyang kaugalingon ug ako mipasar sa pisikal nga eksamin. Kay kon wala pa kadto, ako unta dili mahimo nga usa ka piloto.
Isip usa ka piloto, nalupad nako ang tibuok kalibutan. Dili gayud ako pul-an sa pagtan-aw sa mga bitoon, sa mga panganod, ug sa mga talan-awon sa ubos. Nakita ko ang kanindot sa nagkalain-laing mga nasud uban sa ilang nagkalain-laing mga kultura. Nasayud ako gikan sa pag-adto niadtong mga dapita ug sa pagkakita sa mga katawhan ug sa pagkakita sa Simbahan niadtong nagkalain-laing mga dapit nga ang ebanghelyo alang sa tanan, dili igsapayan unsa nga nasud ikaw nagpuyo o unsa ang imong mga tradisyon. Kini mao ang ebanghelyo ni Jesukristo. Ang pulong sa Dios—nahisulat man kini diha sa kasulatan o gipamulong sa buhi nga mga propeta, gibasa man nato kini sa mga magasin sa Simbahan o nadungog kini diha sa kinatibuk-ang mga komperensya—alang sa tanan.
Sa wala: paghulagway pinaagi ni David Meikle; sa tuo: mga paghulagway pinaagi ni Beth M. Whittaker