Ang Atong Senior nga mga Misyonaryo
Sila “ingon sa yamog nga gikan sa Ginoo, ingon sa taligsik sa ulan nga anaa sa mga balili.”
Isip usa ka sakop sa Kapangulohan sa Area sa Asia, aduna akoy espesyal nga pribilehiyo sa pagserbisyo sa usa ka dapit sa kalibutan nga akong nakat-unan sa paghigugma isip usa ka batan-ong misyonaryo nga labaw na sa 45 ka tuig ang milabay. Ang mga butang nausab sukad niadto. Ang kaniadtong gitawag nga Southern Far East Mission karon naglangkob og sobra sa 25 ka misyon. Ang pipila ka miyembro diha sa pipila ka mga branch mitubo ngadto sa 750,000 ka miyembro. Ang mga chapel mipuno sa lugar, ug ang pagsimba sa templo anaa alang sa atong mga miyembro nga taga-Asia.
Samtang ang Simbahan nagtubo sa Asia, nakahimo ako sa paghigugma ug pagdayeg sa usa ka grupo sa mga tawo kinsa wala magtinguha og ganti, wala magtinguha og pasidungog, ug wala magtinguha sa bisan unsa nga kalibutanong mga bayad. Nagtinguha lamang sila sa paghimaya sa atong Amahan nga anaa sa Langit. Sila ang atong senior nga mga misyonaryo: talagsaon, batid nga mga kaigsoonan kinsa hilum ug makugihong nagtabang sa “pagpahimutang sa katukuran niini nga simbahan, ug pagdala niini gikan sa kangiub ug gikan sa kangitngit” (D&P 1:30).
Ang ilang kasinatian, hugot nga pagtuo, pagpamatuod, ug gugma nakapahimo nila sa pagbuhat og talagsaon nga mga milagro sa pag-establisar ug paglig-on sa Simbahan sa among bahin sa ubasan sa Ginoo—gikan sa Ulaanbaatar hangtud sa New Delhi. Sila kadtong gihulagway ni Miqueas nga, “Ang mga salin ni Jacob anha taliwala sa daghang mga katawhan ingon sa yamog nga gikan sa Ginoo, ingon sa taligsik sa ulan nga anaa sa mga balili” (Miqueas 5:7).
Sa daghang mga higayon sila natingala sa mga dapit diin sila gitawag. Ang uban kanila, siguro sama ni propetang Jonas, mahimong mas mipili sa Tarsis kay sa Ninive, sama sa nahitabo. Apan sila wala “mikalagiw paingon sa Tarsis gikan sa atubangan sa Ginoo” o mipuyo “sa sulod sa tiyan sa isda tutulo ka adlaw ug tutulo ka gabii” (Jonas 1:3, 17). Hinoon, nasayud sila nga ang ilang mga call gikan sa Ginoo, “diha-diha gibiyaan nila ang ilang mga laya, ug misunod kaniya” (Mateo 4:20).
Ang pipila sa ilang daghan ug nagkalain-laing mga buluhaton naglakip sa pagtrabaho sa mga templo, pagtudlo sa seminary ug institute, pagserbisyo sa mga opisina sa misyon, pagdumala sa Perpetual Education Fund, pagserbisyo sa mga branch (pagtudlo, pagbansay, pagpaaktibo, ug pagpakigbahin), pagtudlo ug pagtabang sa mga tawo sa pagpalambo og mga kahanas sa trabaho ug pagpalambo sa panarbaho, nagtrabaho sa ilang gipili nga propesyon (abogasiya, panalapi, enhinyero, edukasyon, pag-atiman sa panglawas), pagpahimutang sa tawhanong mga serbisyo, ug pagsangkap og kahupayan panahon sa mga baha, mga linog, ug uban pang mga kalamidad sa kinaiyahan. Ang uban kanila gani moapil sa pagpangita, pagtudlo, ug pagbunyag og bag-ong mga miyembro!
Sila si Elder Phil ug Sister Brenda Frandsen ang usa niana nga magtiayon. Sila miserbisyo sa Kaohsiung, Taiwan. Dugang sa iyang mga responsibilidad, si Elder Frandsen miserbisyo isip magtatambag sa presidente sa misyon. Ang mosunod nga mubo nga interbyu uban sa mga Frandsen naghulagway sa mga hunahuna ug mga pagbati sa daghang magtiayon ug mahimong mosangkap og mga panabut niadtong nagkonsiderar sa misyonaryo nga pagserbsiyo.
Unsa ang inyong mga hunahuna samtang kamo namalandong sa pagserbisyo og misyon?
Sister Frandsen: “Kami kanunay nag-istorya kabahin sa pagserbsiyo og misyon human managko ang among mga anak. Sa dihang miabut na ang panahon, lisud sa pagsabut asa kami moadto ug unsa ang angay namong buhaton. Human sa daghang mga paghisgot, si Elder Frandsen misugyot nga among itugyan ang pagpili ngadto sa Ginoo. Sa dihang among nadawat ang among call sa misyon, dili gyud unta ni labaw ka kulbahinam. Kini among gikonsiderar nga usa ka espesyal kaayo nga panalangin!”
Unsa ang inyong mga pagbati kabahin sa pagbalik sa inyong orihinal nga natad sa misyon?
Elder Frandsen: “Ang pagbalik human sa 44 ka tuig nga pagbiya mao ang labing magantihon nga kasinatian. Sa usa ka dapit diin sa una adunay gamay kaayo nga branch sa giabangan nga building, karon didto adunay nagbarug nga nindot kaayong stake center. Ang usa ka otso anyos nga batang lalaki nga akong kaila sa una karon usa na ka mapahinungoron nga presidente sa stake. Ang kalamboan niini nga bahin sa kalibutan sa tinud-anay kahibulungan gayud. Matag adlaw adunay usa ka bag-ong espirituhanon nga kasinatian samtang si Sister Frandsen ug ako nagtrabaho sa pagtabang og mga indibidwal sa pag-angkon o paglig-on sa ilang mga pagpamatuod.”
Nabati ba ninyo nga nagamit sa epektibong paagi?
Elder Frandsen: “Kanunay namong nagamit ang among mga talento ug mga kasinatian, ug kami nakadiskobre og mga talento nga wala namo masayri nga kami aduna. Nakat-on ako pag-usab og daghan sa akong Inintsik. Si Sister Frandsen makatubag sa telepono sa Inintsik ug makabasa og mga ngalan aron ikapasa ang sulat. Among nabati nga ang pagkat-on og bag-ong mga kahanas sa among edad maayo alang sa among tigulang na nga mga utok!”
Apan kumusta man ang inyong pamilya?
Sister Frandsen: “Nabalaka ako nga malayo sa among mga anak ug mga apo. Apan, adunay talagsaong mga kauswagan sa teknolohiya sa komunikasyon nga anaa alang sa senior nga mga misyonaryo. Sa ubang bahin, makadungog ug makakita ako og mas daghan gikan sa among pamilya kaysa among gibuhat sa dihang kami anaa sa panimalay. Kami nakabaton og dili moubos lima ka apo samtang dinhi kami, diin among giihap nga usa sa labing dako nga panalangin sa tanan. Bisan tuod og dili man nako masapnay ang bag-ong natawo nga mga bata, makakita kami sa mga litrato ug mga video sa labing madali nga panahon sa matag panghitabo. Imbis nga nakapalayo kini sa among pamilya, sa daghang mga paagi ang among misyon mas nakapasuod kanamo.”
Elder Frandsen: “Sa tinuoray, among nabati nga kami mipalapad sa among pamilya pinaagi sa paglarga og misyon. Kami ang ‘mga apohan’ sa mga misyonaryo. Kada adlaw kami naghinam-hinam alang sa batan-ong mga misyonaryo sa pagpakigbahin sa ilang mga misyon uban kanamo. Kami nahigugma kanila—ug sila nahigugma kanamo! Dili ba kamo malingaw nga maminaw sa mga returned missionary nga mo-report sa ilang mga kasinatian sa pagpakigbahin sa ebanghelyo? Kami makadungog niadtong mga kasinatian kada adlaw samtang kini bag-o pa ug kadaghanan wala pay giusab. Ang pagtan-aw sa mga misyonaryo nga mohingkod ug motubo ngadto sa pagka-epektibo nga magtutudlo sa ebanghelyo ug mga lider bililhon kaayo!”
Sister Frandsen: “Samtang wala kami, kami naghimo gihapon sa misyonaryo nga buhat didto sa Arizona. Duha sa among suod kaayo nga mga higala midapit sa mga misyonaryo sa ilang mga panimalay. Dugang pa, ang among anak nga babaye ug ang iyang bana mihukom sa pagsangyaw sa ebanghelyo ngadto sa usa ka tawo. Isip resulta, usa sa ilang mga higala bag-ohay lang nga nabunyagan. Mas naningkamot kami sa pagserbisyo, mas daghang panalangin ang among nadawat. Imposible ang pagbalos sa Ginoo.”
Ang pagserbisyo ba og misyon nakapalingaw kanimo sa personal nga paagi?
Elder Frandsen: “Ang misyonaryo nga buhat dili gayud laay! Adunay bag-ong mga hagit ug bag-ong mga panimpalad kada adlaw. Dugang sa atong mga buluhaton sa opisina, kami magtudlo og klase sa Iningles sa Sabado sa buntag ug sa klase sa Doktrina sa Ebanghelyo sa Dominggo sa buntag. Kaduha sa usa ka semana kami magtudlo og mga klase sa Iningles sa pagpangandam sa kolehiyo alang sa mga returned missionary. Kami usab miapil sa pagpangita ug pagtudlo sa mga investigator. Ang matag oportunidad sa pagserbisyo moabli og bag-ong mga oportunidad sa pagtudlo sa ebanghelyo.”
Aduna ba kamoy tambag alang sa mga magtiayon nga naghunahuna og misyon?
Sister Frandsen: “Tingali usa sa akong dakong kahadlok mao ang problema sa panglawas; hinoon, kami nakasinati og mga panalangin sa panglawas. Ang among misyonaryo nga eskedyul makaayo sa panglawas. Kami sayo nga mamangon, matulog og sayo, mag-ehersisyo kada adlaw, ug mangaon og makahimsog nga mga pagkaon. Ang Ginoo nagpanalangin sa mga misyonaryo uban sa kalig-on sa pagbuhat sa ilang mga buluhaton. Dili ka kinahanglan nga mahadlok!”
Elder Frandsen: “Kami usahay mopahiyum kon kadtong atua sa balay maghunahuna nga kami naghimo og sakripisyo. Ang sakripisyo gamay ra kaayo kompara sa mga panalangin, hingpit nga kalipay, ug katagbawan nga nahatag sa Dios kanamo matag adlaw.”
Ang mga kasinatian sa mga Frandsen mao ang kasagarang mga komento nga among madungog gikan sa ubang senior nga mga misyonaryo nga nagserbisyo sa tibuok Asia. Bag-ohay lamang, usa ka senior nga magtiayon nahimong emosyonal sa dihang gitambagan nga mahimo nilang humanon ang ilang misyon sa mas sayo og usa ka bulan aron sila maanaa na sa panimalay panahon sa Pasko. Kami naghunahuna nga ang ilang mga luha mao ang mga luha sa hingpit nga kalipay alang sa oportunidad nga magkahiusa pag-usab uban sa ilang mga bata ug mga apo sa Pasko. Wala lamang kaayo namo masabti nga ang ilang mga luha mao ang luha sa kaguol. Nasayud nga sila mahimong wala nay laing oportunidad sa pagserbisyo sa sama niini nga kapasidad usab, sila nagtinguha sa paggahin og usa ka Pasko sa katapusang higayon diha sa natad sa misyon!
Akong gitahud ang atong senior nga mga misyonaryo. Sila tinud-anay nga gihatagan og gahum sa mga dapit diin gikinahanglan ang pagpahimutang sa katukuran niini nga simbahan ug pagdala niini gikan sa kangiub ug gikan sa kangitngit.
Ang senior nga mga misyonaryo nagserbisyo sa daghan ug nagkalain-laing mga buluhaton.
Ibabaw, gikan sa wala: Sila si Elder ug Sister Frandsen uban sa mga misyonaryo sa ilang district; si Elder Frandsen nangandam sa pag-tracting uban sa batan-ong mga elder; si Sister Frandsen nagserbisyo sa Primary; ang Templo sa Siyudad sa Mexico, Mexico, diin sila si Brother ug Sister Ortíz nagserbisyo (tan-awa sa ubos); sila si Elder ug Sister Lopes gitawag sa pagtabang og kolekta ug pagsulat sa kasaysayan sa Simbahan sa Brazil.
Mga paghulagway sa litrato pinaagi ni Steve Bunderson, Hyun Gyu Lee, Welden C. Andersen, Cody Bell, Farrell Barlow, ug David Stoker
Sa tuo: ang unang tulo ka mga litrato sa maayong kabubut-on nila ni Phil ug Brenda Frandsen; litrato sa Templo sa Siyudad sa Mexico, Mexico pinaagi ni Welden C. Andersen; litrato pinaagi ni Laureni Ademar Fochetto