Ebanghelyo sa Akong Kinabuhi
Nga Kita Unta Makabaton og Hingpit nga Kalipay
Ang tanan nga mihimo sa akong misyon nga malisud ingon og nagpugong kanako gikan sa pagbati og hingpit nga kalipay. Apan kini gikinahanglan ba?
Wala kini magdugay alang kanako ang pagkaamgo nga ang akong misyon mahimo nga malisud kaayo kay sa akong gidahum. Giatubang nako ang pipila ka wala damha nga mga hagit. Naninguha akong magpabilin nga positibo, apan ang akong mga paningkamot napakyas, naghimo kanako nga nawad-an sa kadasig. Mapasalamaton, nadawat nako ang pagdasig diha sa mga zone conference, diin kanunay nga gitapos uban sa usa ka miting sa pagpamatuod.
Nakahinumdom ako og usa ka piho nga zone conference sa dihang ang matag misyonaryo mibarug sa atubangan, nagpahayag sa hingpit nga kalipay sa pagserbisyo og misyon. Samtang ang miting nagpadayon, misugod ako sa pagbati og kagil-as. Nahimo akong misyonaryo sulod na sa tibuok tuig apan wala gayud mibati sa hingpit nga kalipay nga gihulagway sa uban. Mibiya ako niana nga komperensya nga bug-at og kasingkasing ug naglibug, nagpangutana gani kon nganong nagserbisyo ako sa misyon. Unsay sayop kanako? Ngano nga dili nako mabati kanang sama nga hingpit nga kalipay? Sa wala madugay niana nga pagkagabii akong gipahayag ang akong mga kabalaka ngadto sa Langitnong Amahan ug nangutana Kaniya unsaon nako sa pagbati sa ingon nga hingpit nga kalipay.
Daghan nga mga semana sa kadugayan, samtang nagtambong og stake conference, akong nadawat ang akong tubag atol sa usa ka pakigpulong sa akong mission president. Bisan tuod og siya namulong ngadto sa mga gatusan nga nanambong, gibati nako nga siya misulti direkta ngari kanako. Namulong siya mahitungod sa hingpit nga kalipay sa Katubsanan ni Kristo nga matag usa kanato makasinati sa matag adlaw. Mipamatuod siya nga bisan atol sa malisud ug walay kasigurohan nga mga panahon, kita makasinati og hingpit nga kalipay gikan sa pagsabut sa kahulugan sa Pag-ula sa Manluluwas.
Nasayud ako nga kadto nga mga pulonga alang kanako. Ang Langitnong Amahan mitubag sa akong pag-ampo. Tingali ang akong misyon wala mahitabo ingon sa akong gihunahuna nga mahitabo, apan ang Manluluwas nahigugma kanako ug mitubos sa akong mga kasal-anan. Ang hingpit nga kalipay nga akong gihunahuna nga wala pa gayud nako masinati miliyok kanako. Wala lamang nako maablihi ang akong kasingkasing sa pagsinati niini.
Ang akong mga hagit mipadayon, apan kini nga kasinatian mitudlo kanako nga ako makasinati sa hingpit nga kalipay pinaagi sa pagpili sa pag-abli sa akong kasingkasing ngadto sa matubsanong gahum sa Manluluwas ug pinaagi sa pagpakigbahin sa akong pagpamatuod niana nga gahum ngadto sa uban.
Tungod sa akong misyon ako midangat sa pagsabut nga ang mga sitwasyon ug ang mga palibut walay malungtaron nga gibug-aton diha sa atong abilidad sa pagsinati og hingpit nga kalipay. Hinoon, ang tinuod nga hingpit nga kalipay naggikan sa pagsunod ug sa pagtuo diha sa Langitnong Amahan ug sa Iyang Anak, si Jesukristo, kinsa mihimo sa kinabuhi dinhi— ug sa umaabut— “nga [kita] unta makabaton og hingpit nga kalipay”2 Nephi 2:25).
Kita makasinati og hingpit nga kalipay gikan sa pagsabut sa kahulugan sa Pag-ula sa Manluluwas.
Ang Labing Gamhanan sa Tanan, ni Del Parson, sa maayong kabubut-on sa Church History Museum