Ang Dios Mopanalangin Kanako
Julio Cesar Merlos, Texas, USA
Nagserbisyo ako sa opisina sa misyon sa El Salvador San Salvador Mission sa dihang ang presidente sa misyon mibalhin kanako sa usa ka area nga gisirado na sulod sa daghang mga tuig. Ang mga lider sa branch didto wala lamang mag-ampo ug magpuasa nga ang mga misyonaryo mobalik, apan sila usab nangandam alang nianang adlawa.
Sa dihang miabut ako, ang matag pamilya sa branch adunay mga higala kinsa andam na sa pagdawat sa mga misyonaryo. Usa ka miyembro mipaila-ila kanamo sa usa ka babaye nga ginganlan og Ana Oviedo, kinsa namaligya og prutas ug hinimo sa balay nga pagkaon diha sa usa sa hilabihan ka busy nga eskina sa kadalanan sa siyudad. Samtang siya didto namaligya og pagkaon usa ka Sabado sa buntag, kami mihangyo kon kami makabisita ba kaniya sa iyang panimalay ug mopakigbahin og mensahe kabahin ni Jesukristo. Siya midawat.
Sa dihang kami miabut nianang gabhiona, si Ana ug ang iyang upat ka anak nagpaabut kanamo. Gipaila-ila namo ang among kaugalingon ug misugod sa pagtudlo kanila. Kami mibati sa kadasig sa pagtudlo kabahin sa mga panalangin sa pagbalaan sa adlaw nga Igpapahulay. Gitudloan usab namo ang pamilya kabahin sa ikapulo ug sa mga gipangsaad ni propetang Malaquias (tan-awa sa Malaquias 3:10–12).
Agi og tubag, si Ana miingon kanamo nga siya nakaandam na sa pagbaligya og pagkaon sa sunod nga adlaw—Dominggo—sama sa kanunay niyang gibuhat. Kami dayon mihalad og pag-ampo, naghangyo sa Langitnong Amahan sa pagpanalangin niining pobre nga pamilya, kinsa nanginahanglan sa kinitaan sa inahan.
Pagkasunod adlaw kami nasurprisa sa pagkakita kaniya nga misimba uban sa iyang mga anak. Giabi-abi namo sila ug nangutana kaniya unsa ang nahitabo sa mga pagkaon nga iyang giandam sa pagbaligya.
“Mga Elder, migahin ako pagkagabii sa pagpamalandong sa mga saad sa Dios,” siya miingon. “Siya mopanalangin kanako.” Dayon siya midugang, “Mga Elder, asa ko mobayad sa akong ikapulo?”
Kami natandog sa iyang gipakita nga hugot nga pagtuo, ug kami nag-ampo nga ang Ginoo mopanalangin sa among mga pag-ampo alang niini nga pamilya.
Pagkasunod gabii kami miadto pagbalik sa iyang balay. Siya naghilak sa pagpasalamat tungod kay ang Dios mipanalangin gayud kaniya nianang adlawa. Siya miingon nga siya kaniadto pang namaligya og pagkaon niadto nga eskina sa tibuok niyang kinabuhi—Lunes hangtud sa Dominggo, alas 8:00 sa buntag hangtud alas 6:00 sa hapon—ug nga siya kanunay may mahabilin nga mga tinda nga dili mahalin. Apan niadto nga Lunes iyang nabaligya ang tanan niyang pagkaon sa 1:00 pa sa hapon.
Ang Langitnong Amahan mitubag sa among mga pag-ampo. Ang Ginoo mipadayon sa pagpanalangin ni Ana, ug siya dili na kinahanglan nga mamaligya pa og pagkaon sa adlaw nga Igpapahulay. Ang iyang mga anak sa wala madugay nabunyagan, apan ang bana ni Ana wala motugot sa iyang bunyag. Bisan pa niana, siya mipabilin nga matinud-anon sa ebanghelyo ug mitambong sa simbahan hangtud nga siya namatay.
Nasayud ako nga ang Langitnong Amahan mohupot sa Iyang mga saad kon kita mosunod sa Iyang mga sugo uban sa atong tibuok kasingkasing.