Toʻu Tupú
Ko e Kau Faifekau Tokolahi ʻi Heʻeku Moʻuí
ʻI he fuofua Sāpate naʻá ku maʻu lotu ai mo e ongo faifekaú naʻá ku fakatokangaʻi ha kakai ne u tupu hake mo ʻiloʻi mei he koló. Naʻá ku sio ki he taha ʻo hoku ngaahi kaungāmeʻa mamae mei he akó, ko e ongo sekelitali mei he lautohi siʻí mo e akoʻanga māʻolungá, ko e taʻahine naʻe ʻikai ke fuʻu sai hoku ʻulungāanga ki aí ʻi he kuohilí, mo ha talavou naʻá ku manako ai.
Ne ʻi ai e kaunga ʻa e niʻihi fakafoʻituitui ko ʻení ki heʻeku moʻuí. Ko hoku kaungāmeʻa mamaé ko ha finemui angatotonu moʻoni, pea koeʻuhí ko ia, ne u fili ke hokohoko atu ʻeku fekumi fekauʻaki mo e Siasí. Naʻe tokoniʻi au ʻe he ongo sekelitali naʻá na manatuʻi au mei he akó ke u ʻilo ʻoku ou mahuʻinga. Naʻá ku ako ʻa e ʻofa faka-ʻOtuá mo e ʻofa faka-Kalaisí mei he finemui naʻá ne tali lelei au neongo naʻe ʻikai te u ʻulungāanga lelei kiate ia ʻi he kuohilí. Naʻe tā ʻe he talavou naʻá ku manako aí ha sīpinga lelei, naʻe hā mei ai ha maama pea naʻá ku saiʻia ke feohi mo ia.
Ne tokoni e ngaahi meʻá ni ke u ʻilo, neongo ʻeku toki fetaulaki mo e ongo faifekaú, ka naʻe ʻosi teuteuʻi au ʻe he Tamai Hēvaní ke u tali ʻa e ongoongoleleí ʻo fakafou ʻi he kakai ko ʻení. Naʻá ku ako meiate kinautolu ko e ngaahi meʻa iiki ʻoku tau fakahokó ʻe ʻaonga lahi ia. Kae mahuʻinga tahá, kuó u ako ko e ngāue fakafaifekaú ʻoku kamata pē meiate au.