Fakaʻitaʻi ʻe Hoku Kaungāmeʻá

Natālia Fotolovani Foulova, Netaleni

Naʻe ʻi ai hoku kaungāmeʻa ʻi he kolo naʻá ku kau ki ai ʻi Lūsiá ne ma feohi ʻi he ngaahi ʻekitivitī kotoa pē ʻa e Siasí. Naʻá ma faitatau ʻi he ngaahi meʻa lahi, naʻá ku fiefia he feohi mo iá, pea naʻá ku houngaʻia ʻi heʻeku maʻu ha kaungāmeʻa pehē.

Pea ʻohovale pē ne hoko ha meʻa faikehe. Naʻá ne fakaʻitaʻi lahi au pea naʻe ʻikai ke u ʻilo hono ʻuhingá. Naʻe ʻikai ke ne kole fakamolemole, pea ʻikai ke u toe feohi mo ia. Naʻe ʻikai pē ke u toe fakalea ki ai he ʻaho Sāpaté. Naʻe hokohoko atu ʻeni ʻi ha māhina ʻe ua. Naʻá ku loto-mamahi pea ʻikai ke u fiefia, ka naʻe ʻikai haʻane lea mai.

Peá u fanongo ʻoku teu hiki mei homau feituʻú. Naʻe ʻikai ke u tui naʻe totonu ke hokohoko pehē atu homa vā fetuʻutakí; naʻá ku fakakaukau ʻoku totonu ke ma fakalelei. Peá u manatu ai ki he folofola mei he Tohi ʻa Molomoná: “ ʻAlu koe ki ho tokouá, pea tomuʻa fakalelei ki ho tokouá, pea toki haʻu kiate au ʻi he loto-fakamātoato moʻoni, pea te u tali koe” (3 Nīfai 12:24).

Naʻe faingataʻa kiate au ke u loto-fakatōkilalo ʻo ʻuluaki kole fakamolemole, ka naʻá ku lotu peá u tā ki ai. Naʻe ʻikai ke u ʻilo pe ʻe anga fēfē ʻene tali maí, ka naʻá ku mateuteu ki he kovi tahá. Ne u ʻohovale ʻi he meʻa naʻá ku fanongo ki aí.

Naʻá ne kole mai ʻi he loto-fakamātoato ke u fakamolemoleʻi ia, pea lava ke u tala ʻi hono leʻó naʻe mamahi ʻaupito koeʻuhí ko ʻene tōʻongá—ʻo hangē pē ko aú. Ka ko e meʻa mahuʻinga tahá, naʻá ku manatu ki ha sētesi naʻá ne toutou lea mai ʻaki: “Natālia, mālō hoʻo tā maí!”

Naʻá ku fiefia ʻaupito! Naʻá ne hiki hili ha taimi nounou mei ai, ka naʻá ma māvae ko e ongo kaungāmeʻa mamae.

Ko e taha ʻo e ngaahi meʻa faingataʻa taha hono fakahokó ko ʻetau ako ke ʻofa mo fefakamolemoleʻakí. ʻI he fakamolemolé—tautautefito kapau ʻoku ʻikai ko kita ʻoku halá—ʻoku fie maʻu ke tau loto-fakatōkilalo mo ikunaʻi ʻetau loto hikisiá. Kuó u ako ʻo ʻilo ʻoku ʻaonga lahi ʻaupito ʻete fili ke te ʻuluaki fai ʻa e kole fakamolemolé mo e fakaleleí.