Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he pulusinga ko ʻení ha ngaahi fakamatala mo e ʻekitivitī ʻa ia ʻe lava ke fakaʻaongaʻi ʻi he efiafi fakafāmili ʻi ʻapí. Ko e niʻihi pē ʻeni ʻo ha ngaahi sīpinga.

“Ako ke Fakafanongo mo Mahino ʻa e Laumālié,” p. 24; mo e “Ko e Hiná mo e Kihiʻi Leʻo Siʻí,” p. 68: ʻOku akoʻi kitautolu ʻe he ngaahi fakamatalá ni ki hono mahuʻinga ʻo hono ngāueʻi ʻo e ngaahi ueʻi ʻa e Laumālié. Kimuʻa pea lau leʻo lahi ha taha ʻo e ngaahi fakamatalá ni, fakaafeʻi e kau mēmipa ʻo e fāmilí ke nau fakafanongo ki ha ngaahi founga ʻe lava ke nau ʻiloʻi ai e Laumālié. Hili hono lau e fakamatalá, mahalo naʻá ke fie fakamatala ki ha taimi naʻá ke ongoʻi ai ʻa e Laumālie Māʻoniʻoní pea fakaafeʻi e kau mēmipa ʻo e fāmilí ke nau fai e meʻa tatau.

“Ngaahi Talanoa Fakatātā ʻo e Mole pea Toe Maʻú,” p. 32: Ke akoʻi e kau mēmipa ʻo e fāmilí ki hono mahuʻinga ʻo e fekumi kiate kinautolu ʻoku mole fakalaumālié, ʻe lava ke mou vaʻinga langatoi. Hili e vaʻingá, lau ha talanoa ʻe taha pe ua mei he fakamatala ko ʻení pea vahevahe e meʻa kuó ke ako fekauʻaki mo e fekumi kiate kinautolu kuo molé. Mahalo te ke fie ʻai ke ʻiloʻi hao kaungāʻapi pe kaungāmeʻa ʻe lava ke ke fakakaumeʻa ki ai. Aleaʻi leva ha ngaahi founga te ke lava ʻo fakaafeʻi mai ʻaki kinautolu ke foki ki he Siasí.

“Ko e Ongoongoleleí ʻOku Maʻá e Tokotaha Kotoa Pē,” p. 54: ʻOku akoʻi ʻe he fakamatalá ni ʻoku “ ʻikai ha fakamatala fakafoʻituitui pau” ia ki ha taha ʻe lava ʻo hoko ko ha mēmipa ʻo e Siasí.” Ke akoʻi e fakakaukaú ni, fakakaukau ke fakafetongi e ngaahi fakaʻilonga ʻo ha ngaahi meʻakai kapa pe ʻai ha suka ʻi ha meʻa ʻaiʻanga māsima. Fakaafeʻi e kau mēmipa ʻo e fāmilí ke nau fili ha ngaahi kapa meʻakai ke kai pe ʻahiʻahiʻi ʻa e “māsimá”. Hili e ʻekitivitī ko ʻení, lau ʻa e fakamatala ʻa ʻEletā Kotoí. ʻI hoʻomou hoko ko ha fāmilí, fakakaukauʻi ʻa kinautolu te mou lava ʻo vahevahe ki ai e ongoongoleleí—ʻo aʻu pē kiate kinautolu ʻoku ʻikai ke nau kau ʻi he “fakamatala fakafoʻituitui pau” ʻo ha taha ʻe ala hoko ko ha mēmipa ʻo e Siasí he kahaʻú.

“Te Mau Fua Koe!” p. 62: ʻI hoʻomou hoko ko ha fāmilí, ʻe lava ke mou lau ʻa e fakamatalá ni pea aleaʻi ha taimi ne tokoni ai e kau mēmipa ʻo e fāmilí ki ha niʻihi kehe pe maʻu ha tokoni. Fakakaukauʻi leva ha ngaahi founga ke tokoni ai. ʻE lava ke ke fakahoko hoʻomou palaní ko ha ʻekitivitī efiafi fakafāmili ʻo ʻapi ʻi he kahaʻú.