Fakamālohia ʻe ha Himi

Ketiue Latasoma, Saute ʻAfilika

Ne u fakakaukau ke u kau ʻi ha feʻauhi malafoni mo hoku kaungāngāué ʻi Uesiteni Keipi ʻi Saute ʻAfilika. Naʻá ku fakamālohisino mo ngāue mālohi ʻaupito ʻi he teuteu ki he feʻauhí.

ʻI he ʻaho ʻo e feʻauhí naʻá ku ʻā hake ʻo lau ʻeku folofolá mo lotu. Naʻá ku manavasiʻi ka naʻá ku ongoʻi pē ʻoku fie maʻu ke u falala ki he ʻEikí. Ne u ʻilo kapau te u fai ia, te Ne ʻomi ha tokoni mo ha poupou.

Naʻe fie maʻu ke mau lele pe lue ʻi ha kilomita ʻe 40 (maile ʻe 25). Naʻa mau kamata he 8 pongipongí. Naʻe mokomoko e ʻeá pea kiʻi ʻuhoʻuha, pea ʻi he kamatá naʻá ku fiefia ʻi heʻeku lué pea sai ʻeku feʻauhí. Ka ʻi he toe ʻa e kilomita ʻe 10 ki he tepí naʻe faingataʻa ʻaupito ʻa e feʻauhí kiate au. Naʻe mingi ʻa e uoua ʻi hoku vaʻe ʻe taha, pea fā hoku vaʻé. Naʻá ku loto foʻi. Pea kamata leva ke u hiva ha foʻi himi:

ʻOua naʻa vaivai pe manavahē

He ko ho ʻOtuá Au pea te u kei tokoniʻi koe].

Te u fakamālohia, tokoniʻi pea fokotuʻu koe], …

ʻO faitokonia ʻe hoku toʻukupu māfimafí.

(“ ʻE Kāinga Kuo Langa ha Tuʻunga,” Ngaahi Himí, fika 37)

Ne fakafonu hoku ʻatamaí ʻe he ngaahi lea ʻo e himí pea tokoni ke hiki hoku vaʻé, peá u fakaʻosi ʻa e feʻauhí ʻaki ʻa e mālohi ʻo e himi ʻa e ʻEikí.

Ne akoʻi au ʻe he meʻa ne hokó, ko e ongoongolelei ʻo Sīsū Kalaisí ʻoku fekauʻaki ia mo e kātakí. ʻOku hangē ia ha lue pe lele ʻi ha lová. ʻOku tau faʻa ongosia, tau mālōlō, pea tau toe kamata lue. ʻOku ʻikai mole ʻa e ʻamanaki ʻa e Tamai Hēvaní ʻiate kitautolu neongo pe ko e hā e tuʻo lahi ʻetau toó; kiate Ia ko e meʻa ʻoku mahuʻingá ko e tuʻo lahi ʻo ʻetau toe tuʻu ki ʻolunga ʻo hoko atu e feingá. Ko ʻEne ongoongoleleí ʻoku fekauʻaki foki ia mo e aʻu ki he tepí.