Ko e Meʻa ʻOku Tau Tui Ki Aí
ʻOku Malava ʻa e Fakatomalá Makatuʻunga ʻi he Fakaleleí
ʻOku tau haʻu ki he māmaní ʻi he taumuʻa ke tupulaki mo fakalakalaka. ʻOku tuai ʻetau fakalakalaká ʻi he taimi ʻoku tau faiangahala aí. ʻOku ʻikai ha tangata ʻi māmani ʻe taʻefaiangahala, tuku kehe pē ʻa Sīsū Kalaisi ʻa ia naʻá Ne moʻui haohaoa (vakai, Tangata Malanga 7:20; Loma 3:23; 1 Sione 1:8).
Ko e faiangahalá ko hono maumauʻi e ngaahi fono ʻa e ʻOtuá. Taimi e niʻihi ʻoku tau faiangahala ʻi he fakahoko ha meʻa ʻoku tau ʻilo ʻoku hala, pea ko e taimi ʻe niʻihi ʻoku tau faiangahala ko e ʻikai ke tau fai ʻa e meʻa ʻoku tau ʻilo ʻoku totonu ke tau faí (vakai, Sēmisi 4:17).
Ko e fono kotoa pē mei he ʻOtuá ʻokú ne tāpuekina kitautolu ʻo kapau te tau talangofua ki ai (vakai, T&F 130:20–21). Ka ʻo kapau he ʻikai ke tau talangofua ki ai, kuo fokotuʻu mo ha tautea (vakai, ʻAlamā 42:22). ʻOku ui hono foaki e ngaahi tāpuakí pe ngaahi tauteá ʻoku ui ia ko e fakamaau totonu.
Kuo hanga ʻe he Tamai Hēvaní ʻo ʻai ke tau lava ʻo fakatomalá koeʻuhí ko ʻEne ʻofa ʻiate kitautolú: ke vete mo siʻaki ʻetau ngaahi angahalá pea ikunaʻi ia. Naʻá Ne foaki hono ʻAlo pē Taha naʻe Fakatupú, ʻa Sīsū Kalaisi, ke fua ʻetau ngaahi angahalá. ʻA ia, naʻe fua ʻe Sīsū ʻa e tautea ʻo ʻetau talangataʻa ki he ngaahi fekau ʻa e ʻOtuá ʻo fakatatau ki he fono ʻo e fakamaau totonú. Koeʻuhí kuo fua ʻe he Fakamoʻuí ʻetau ngaahi angahalá, he ʻikai ke tau fua kakato ʻa e tauteá ʻo kapau te tau fakatomala (vakai, T&F 19:16). Naʻe “totongi ʻa e ngaahi fie maʻu ʻa e fakamaau totonú” (Mōsaia 15:9) ʻe Heʻene Fakaleleí, ʻo lava ʻa e Tamai Hēvaní ʻo fakamolemoleʻi kitautolu ʻi he ʻaloʻofa mo taʻofi ha ngaahi tautea.
Ko e fakatōmalá ko e meʻaʻofa ia ʻa e ʻOtuá kiate kitautolu. ʻOku mahuʻinga ia ki heʻetau fiefia ʻi he moʻui ní. ʻI heʻetau fakatōmalá ʻoku tau maʻa, ʻo malava ai ke tau toe foki ki he ʻao ʻo ʻetau Tamai Hēvaní (vakai, Mōsese 6:57).
ʻOku kau ʻi he founga fakatomalá ʻa e:
-
Tui ki heʻetau Tamai Hēvaní mo Sīsū Kalaisi (vakai, ʻAlamā 34:17).
-
ʻIlo hoʻo ngaahi angahalá pea ongoʻi loto lavea (vakai, Luke 16:15; ʻAlamā 42:29–30).
-
Vete ʻetau ngaahi angahalá ki he Tamai Hēvaní pea, ʻo ka fie maʻu, ki he pīsopé pe palesiteni fakakoló (vakai, T&F 61:2).
-
Siʻaki ʻetau ngaahi angahalá (vakai T&F 58:43).
-
Totongi fakafoki ʻo ka lava (vakai, ʻIsikeli 33:15–16).
-
Fakamolemoleʻi ʻa kinautolu kuo faihala mai kiate kitautolú (vakai, T&F 64:9; 3 Nīfai 13:14–15).
-
Moʻui angatonu (vakai, T&F 1:32).