Pagtukod og Malungtarong Pundasyon

Presidente Henry B. Eyring, Unang Magtatambag sa Unang Kapangulohan, “Mga Hagit nga Buntugon,” Liahona, Mayo 2012, 24.

Isip batan-on nagtrabaho ko sa pagbutang og mga footing ug pundasyon sa bag-ong mga balay. Sa ting-init lisud ang pagbugkal sa yuta alang sa hulmahan nga pagabubu-an og semento para sa footing. Walay mga makina. Piko ug pala ra ang among gigamit. Ang pagtukod og lig-ong pundasyon sa mga building lisud niadtong mga adlawa.

Nanginahanglan usab kini og pailub. Human og bu-bu para sa footing, kami magpaabut nga mouga. Bisan gusto namong magpadayon sa trabaho, maghulat na usab kami human sa pagbu-bu sa pundasyon usa namo kuhaon ang mga hulmahan.

Ug ang mas makapadayeg sa usa ka bag-ong tigtukod mao ang makuti ug dugayng proseso sa mabinantayong pagbutang sa mga metal bar sulod sa hulmahan aron malig-on ang pundasyon.

Sa samang paagi, ang sukaranan kinahanglan ayohon pag-andam alang sa pundasyon sa atong pagtuo aron makalahutay sa unos nga moabut sa kinabuhi. Ang lig-ong pundasyon sa pagtuo mao ang personal nga integridad.

Ang makanunayong pagpili sa matarung makamugna og lig-ong pundasyon sa atong pagtuo. Magsugod kini sa bata pa, kay ang matag kalag natawo nga may gasa sa Espiritu ni Kristo. Tungod sa Espiritu kita masayud kon kita nakahimo og sakto o sayop diha sa atubangan sa Dios.

Kining mga pagpili, kadaghan mahitabo, makaandam og lig-ong sukaranan diin matukod ang atong pagtuo. Ang metal nga hulmahan asa ibubu ang mga kinahanglanon sa atong pagtuo mao ang ebanghelyo ni Jesukristo, lakip ang tanang pakigsaad, ordinansa ug mga baruganan niini.

Usa sa mga yawe sa malungtarong pagtuo mao ang eksaktong paghukom nga igo na ang panahon aron sa paglig-on. …

Ang pagpalig-on dili awtomatik mahitabo tungod sa dagan sa panahon, apan kini nanginahanglan og panahon. Ang pagkatigulang lang dili makahimo niini. Pinaagi lang sa makanunayong kinasingkasing nga pagserbisyo sa Dios ug sa uban nga ang pagpamatuod sa kamatuoran dili mabugto ang kalig-on sa pagkaespirituhanon.

Mga Pangutana nga angay Palandungon:

Makahinumdom ba kamo og panahon sa dihang gitestingan ang inyong personal nga integridad? Giunsa ninyo pagtubag?
Sa unsa nga paagi nga ang pagserbisyo sa Dios ug sa uban pinaagi sa pagtuon nakapalig-on sa inyong espirituhanon nga pundasyon?

Ikonsiderar sa pagsulat sa inyong mga hunahuna sa inyong journal o hisguti kini ngadto sa uban.