Padayon sa Hugot nga Pagtuo sa Makalibug nga Kalibutan

Ni Bishop Gérald Caussé

Unang Magtatambag sa Presiding Bishopric

Sa paglig-on sa atong mga pagpamatuod ug pagprotektar gikan sa sayop, kinahanglan kanunay natong amumahon ug lig-unon ang atong pagtuo.

Natawo ko sa habagatang kasadpan sa France “sa matarung nga ginikanan” (1 Nephi 1:1) kinsa, gikan sa akong pagkabatan-on, mitabang kanako nga makabaton og pagtuo diha ni Jesukristo ug pagpamatuod sa gipahiuli nga ebanghelyo. Sa laing bahin, sa eskwelahan, daghan sa akong mga propesor ang mipadayag og pagduha-duha ug gani kalagot sa bisan unsang relihiyon. Kadaghan ko nakadungog sa mga pagtulun-an ni Korihor niadtong nagdaut sa akong pagtuo.

“Tan-awa, sila mga binuang nga mga tradisyon sa inyong mga amahan. Giunsa ninyo pagkasayud sa ilang pagkatinuod?

“… Tan-awa, kamo dili masayud sa mga butang nga kamo dili makakita” (Alma 30:14–15).

Sa dihang 17 anyos ko, mitambong ko og mga klase sa philosophy sa high school. Usa ka adlaw ang magtutudlo miingon, “Sigurado ko walay tawo dinhi nga nagtuo nga aduna gyuy Adan!” Dayon gitan-aw niya pag-ayo ang klase sama sa usa ka tigpangusisa, andam nga moatake ni bisan kinsang motuo niini. Nahadlok ko! Apan, ang akong tinguha nga magmatinud-anon sa akong pagtuo mas lig-on. Mitan-aw ko sa palibut aron makita nga niadtong 40 ka mga estudyante ako lang usa ang miisa sa kamot. Ang magtutudlo, nakalitan, miusab sa hilisgutan.

May panahon sa kinabuhi sa tanang mga miyembro sa Simbahan nga mosagubang sa pagsulay sa kasensiro ug kalig-on sa ilang pagtuo. Ang pagkamaisugon niining mga pagsulay sa pagtuo makatabang kanato nga magmalig-on sa kalibutan nga nagkalibug. Kini nga kalibug makita sa daghang mga mensahe nga nagpalibut kanato. Sa pagsugod sa Internet, sama pananglit, ang dili mapugngan nga pagdagsang sa nagkasumpaki nga mga opinyon ug impormasyon moabut sa atong kinabuhi. Kini nga mga panagsumpaki mahimong makapalibug.

Unsaon nato pag-ila ang tinuod ug sayop? Unsaon nato nga dili mahisama niadtong “natago gikan sa kamatuoran tungod kay sila wala masayud asa kini pangitaa”? (D&P 123:12).

Anaa ra kini kanato kon kita magpabiling lig-on sa atong pagpamatuod. Kon ako maghunahuna sa nangagi, nakaamgo ko nga ang kalampusan sa akong personal nga panaw nag-agad sa pipila ka simpleng mga baruganan nga nakapabilin nako sa dalan. Kini nga mga baruganan nagtugot kanako nga molambo sa espirituhanong paagi bisan pa sa “mga gabon sa kangitngit” (1 Nephi 12:17) ug mga lit-ag nga nagpalibut kanako.

Tinguhaa Kanunay ang Kamatuoran

Niadtong miangkon nga “kamo dili masayud” (Alma 30:15), ang Ginoo mitubag, “Pangayo, ug kamo pagahatagan; pangita, ug kamo makakaplag; pagtuktok ug kamo pagaablihan” (Mateo 7:7). Kini talagsaon nga saad.

Ang mga disipulo ni Kristo gigutom ug giuhaw kanunay sa espirituhanong kahibalo. Kining personal nga praktis makita diha sa pagtuon, pagpamalandong, ug pag-ampo matag adlaw. Kini nagtugot kanato nga mosunod sa ehemplo ni Joseph Smith, kinsa “miabut sa paghukom nga [siya] kinahanglan nga magpabilin sa kangitngit ug sa kalibug, o … mangutana sa Dios” (Joseph Smith—Kasaysayan 1:13).

Ang pagtuon sa pulong sa Dios makaprotekta kanato sa impluwensya sa sayop nga mga doktrina. Ang Ginoo miingon, “Kay ngadto kaniya nga modawat Ako mohatag og dugang pa; ug gikan kanila nga moingon, Kami adunay igo na, gikan kanila pagabawion gani bisan kana nga anaa kanila” (2 Nephi 28:30).

Dawata ang Wala Matubag nga mga Pangutana

Sa atong pagsiksik sa kamatuoran, kita matintal nga gustong masabtan ang tanan diha-diha dayon. Apan, ang salabutan sa Dios dili matugkad nga “dili mahimo nga ang tawo makakaplag sa tanan niya nga mga paagi” (Jacob 4:8). Kinahanglan atong dawaton nga sa pagkakaron dili matubag ang tanan natong mga pangutana. Sama ni Nephi, kita matinud-anong moila nga ang Dios “nahigugma sa iyang mga anak; bisan pa niana, [kita] wala masayud sa kahulugan sa tanan nga mga butang” (1 Nephi 11:17).

Ang Ginoo, bisan pa man, naghatag nato og kahibalo nga kinahanglanon sa atong kaluwasan ug kahimayaan. Siya nagsaad, “Bisan unsa ang inyong pangayoon sa Amahan diha sa akong ngalan kini ihatag nganha kaninyo, nga mao ang angay alang kaninyo” (D&P 88:64). Kita makadawat niining mga tubag sa malambuong paagi, “pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto” (2 Nephi 28:30), nag-agad sa atong panginahanglan ug kapasidad sa pagsabut.

Anaa kanato ang pag-ila sa mga pangutana nga mahinungdanon gayud sa atong mahangturong paglambo ug niadtong resulta lamang sa kakuryuso sa hunahuna, panginahanglan og pruweba, o tinguha sa pagtagbaw sa kaugalingon.

Tinguhaa ang Pagpamatuod sa Espiritu

Matag usa kanato makasinati og mga higayon sa personal nga pagduha-duha. Kini nga mga pagduha-duha dili gayud mahupay pinaagi sa pagsiksik og pagpasabut. Sama pananglit, pipila sa scientific o archaeological nga mga pagkaplag makalig-on sa atong pagpamatuod sa kasulatan, apan ang espirituhanong kahibalo dili mamatud-an sa pangatarungan o pisikal nga ebidensya.

Ang kahibalo sa kamatuoran nakabasi sa pagpamatuod sa Espiritu. Sama sa giingon ni Apostol Pablo, “Walay bisan usa nga makasabut sa mga hunahuna sa Dios gawas [pinaagi] sa Espiritu sa Dios” (1 Mga Taga-Corinto 2:11).

Kita may kasiguroan nga “ang Espiritu mamulong sa kamatuoran ug dili mamakak” (Jacob 4:13). Ang Espiritu adunay mas dakong epekto kanato kaysa atong lawasnon nga mga balatian. Ngadto ni Apostol Pedro, kinsa mideklarar sa iyang pagtuo, si Jesus mitubag, “Dalaygon ikaw, Simon Bar-jona: kay wala kini ipadayag kanimog tawo, kondili gipadayag kini kanimo sa akong Amahan nga anaa sa langit” (Mateo 16:17). Hinoon, pila ka buok ang kadungan ni Kristo nga wala moila kaniya bisan sila mismo nakakita Niya!

Tinguhaa ang mga Pulong sa mga Propeta ug Apostoles

Bag-ohay lang nagka-istoryahanay mi sa usa ka representante sa laing simbahan. Nagtinguha nga masayran kon kita Kristiyano ba nga simbahan, siya misugyot sa pag-organisar og debati sa mga eksperto sa doktrina sa duha ka relihiyon.

Ang kalig-on ug kamatuoran sa doktrina ni Kristo, hinoon, wala mag-agad sa debate sa mga eksperto apan anaa sa sagradong mga pagpamatuod sa Iyang pinili nga mga disipulo. Si Propeta Joseph Smith mideklarar, “Ang sukaranan nga mga baruganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit.”¹

Sa daghang mga siglo sa Apostasiya, ang kalibutan wala magkulang sa mga eksperto, apan nawala ang mga saksi ni Kristo. Isip resulta, ang rason sa tawo mipuli sa kalig-on sa balaang pagpadayag.

Kon kita magkaproblema, ang una natong buhaton mao ang pagsiksik sa kasulatan ug sa mga pulong sa buhi nga mga propeta. Ang ilang mga sinulat mga kahayag nga dili molingla kanato: “Busa, kami nangita sa mga propeta, ug kami adunay daghan nga mga pagpadayag ug sa espiritu sa pagpanagna; ug ingon nga aduna sa tanan niini nga mga saksi kami nakaangkon og usa ka paglaum, ug ang among hugot nga pagtuo nahimo nga dili matarug” (Jacob 4:6).

Amumaha ang Inyong Pagtuo

Dili kita makadawat og “saksi hangtud human sa pagsulay sa [atong] pagtuo” (Ether 12:6). Ang hugot nga pagtuo adunay gahum sa pagpadayag sa kahibalo sa mahangturong kamatuoran. Sa paggamit niini kutob sa mahimo, ang kahibalo mahimong hingpit ug perpektong kasiguradoan. Kabahin sa igsoon ni Jared, si Moroni misulat nga “tungod sa kasayuran niini nga tawo siya dili mapugngan gikan sa pagtan-aw sulod sa tabil; … ug siya wala na mag-angkon og hugot nga pagtuo, kay siya nasayud, sa walay pagduha-duha” (Ether 3:19).

Sa paglig-on sa atong mga pagpamatuod ug pagprotektar gikan sa sayop, kinahanglan kanunay natong amumahan ug lig-unon ang atong pagtuo. Sa pagsugod niini, kinahanglan kitang magbaton og putli nga kasingkasing ug magmapainubsanon. Si Jacob mipasidaan sa katawhan ni Nephi kabahin sa garbo “kon sila makinaadmon … nagtuo nga sila maalamon, ug … dili mopatalinghug ngadto sa tambag sa Dios, kay sila misalikway niini, nagdahum nga sila nasayud sa ilang mga kaugalingon” (2 Nephi 9:28).

Sunod, kinahanglan atong buhaton. Si Apostol Santiago mitudlo nga ang “pagtuo [diay] naglihok duyog … sa binuhatan, ug nga ang iyang pagtuo nahingpit pinaagi sa iyang binuhatan” (Santiago 2:22). Kita dili maglaum nga makadawat og personal nga pagpadayag gawas kon molihok sama sa mga disipulo ni Kristo. Ang pagtuman sa atong mga pakigsaad ngadto sa Dios makapahimo nato sa pagdawat sa pagpakig-uban sa Espiritu Santo, kinsa molamdag sa atong salabutan ug mopalambo sa atong espiritu.

Mopamatuod ko sa katinuod niining mga baruganan. Nasayud ko pinaagi sa kasinatian nga kon ato kining buhaton, kita siguradong maprotektahan sa libug nga kalibutan. Kini adunay talagsaong saad: “Ug tungod sa inyong kakugi ug sa inyong hugot nga pagtuo ug sa inyong pailub uban ang pulong sa pag-alima niini, nga kini mogamot diha kaninyo, tan-awa, dili madugay kamo mopu-pu sa bunga niini, diin bililhon kaayo, … ug kamo mokaon sa bunga niini gani hangtud kamo mabusog, nga kamo dili na gutumon, ni kamo uhawon” (Alma 32:42).