Alang sa Kalig-on sa mga Kabatan-onan: Usa ka Angkla nga alang sa Karon
Ang Unang Kapangulohan misulat nga ang mga sumbanan nga naa sa Alang sa Kalig-on sa mga Kabatan-onan “makatabang kaninyo sa importante nga mga pagpili nga inyong gihimo karon ug himoon pa sa umaabut.”1 Uban sa pagpagawas sa bag-o nga edisyon sa pamphlet, ang mga magasin sa Simbahan nakagahin og gamayng panahon uban sa kinatibuk-ang presidente sa Young Women nga si Elaine S. Dalton ug sa kinatibuk-ang presidente sa Young Men nga si David L. Beck nga naghisgot mahitungod sa gibag-o nga pamphlet.
Nganong kinahanglan ang bag-ong edisyon sa Alang sa Kalig-on sa Kabatan-onan karon?
Brother Beck: Ang mga sumbanan sa Ginoo wala mausab, apan ang pagpang-atake sa kaaway batok niana nga mga sumbanan nagkadaghan ug nagkakusog. Ang Kalig-on alang sa mga Kabatan-onan gi-update sa pagtabang sa kabatan-onan nga makaharong niini nga mga pagpang-atake.
Sister Dalton: Ang mga propeta padayon sa tin-aw kaayo nga pagpamulong ngadto sa kabatan-onan, ug gusto namong maanaa dayon ang bag-o nilang mga gipamulong. Ang kabatan-onan kinahanglan nga masiguro nga nagsunod sa propeta, mao nga ang bag-ong mga pagtulun-an giusa dinhi niini nga pamphlet.
Brother Beck: Sigon sa gipahinumdom kanato ni Presidente Thomas S. Monson, ang kabatan-onan karon nagtubo sa panahon diin ang gintang tali sa mga sumbanan sa Ginoo ug sa kalibutan nagkadako.2 Nagkakusog ang mga tintasyon, ug ang sayop nga kinaiya gidawat na sa kadaghanan. Ang dinasig nga tambag dinhi sa bag-ong pamphlet usa ka timailhan sa gugma sa Langitnong Amahan alang sa mga kabatan-onan. Gusto Niya nga ang matag batan-on makatagamtam sa mga panalangin sa pagsunod sa ebanghelyo ug mihatag kanila og mga sumbanan nga makatabang kanila. May importante Siya nga buluhaton alang kanila karon. Ang mga sumbanan nga naa sa Alang sa Kalig-on sa mga Kabatan-onan makatabang kanilang makasarang sa paghimo sa Iyang buluhaton.
Unsa man ang gi-update niini nga edisyon?
Sister Dalton: “Trabaho ug Pagpaningkamot sa Kaugalingon” ang nadugang. Daghang kabatan-onan ang migahin og daghang panahon sa bag-ong mga teknolohiya—pagpakighigala pinaagi sa internet, pag-browse sa Internet, video games—nga wala gayud sila makat-on unsaon sa pagtrabaho. Usa kana ka problema tungod kay kon ang usa ka batan-on magmisyon, usahay dili siya andam sa kalisud nianang pisikal ug espiritwal nga paghago. Nahiuyon kaayo kini sa laing bag-o nga seksyon: “Pisikal ug Emosyonal nga Kahimsog.” Gikinahanglan ninyo ang pisikal nga kahimsog ug pag-atiman sa inyong lawas, apan gikinahanglan usab ninyo ang paghunahuna sa inyong emosyonal nga kalagsik.
Brother Beck: Gidugangan usab og emphasis ang pagsunod sa Espiritu ug pagpakabuhi nga takus nga mosulod sa templo.
Unsaon sa kabatan-onan nga ang Kalig-on sa mga Kabatan-onan mahimong bahin sa ilang kinabuhi?
Sister Dalton: Gusto ko nga tan-awon nila ang mga panalangin nga gihisgutan diha sa pamphlet ug hunahunaon kon sa unsang paagi kini nga mga panalangin mogiya kanila sa ilang mga tumong. Nagtuo gayud ako nga giandam niini nga henerasyon ang kalibutan alang sa Ikaduhang Pag-anhi sa Manluluwas. Akong awhagon ang mga kabatan-onan sa paghinumdom nga magtinguha silang mobarug uban ang kamasaligon sa Iyang presensya kon Siya mobalik na.
Brother Beck: Ang mga booklet nga Pagtuman sa Akong Katungdanan ngadto sa Dios ug Personal nga Kauswaghan sa Young Women nagtanyag usab og daghang maayo nga mga ideya. Sama pananglit, diha sa seksyon sa “Pagpuyo nga Takus” sa Katungdanan ngadto sa Dios, ang batan-ong mga lalaki gidapit sa pagtuon sa mga sumbanan nga naa sa Alang sa Kalig-on sa mga Kabatan-onan, mohimo og plano aron sa pagsunod niini, ug dayon mopakigbahin sa ilang mga kasinatian ngadto sa uban. Sa paghimo niini, naglig-on sila dili lang sa kaugalingon nilang mga pagpamatuod, apan naglig-on usab sila sa uban.
Sister Dalton: Laing makaikag nga buluhaton mao ang paghuman sa Alang sa Kalig-on sa mga Kabatan-onan ug linginan ang tanang paghisgut sa Espiritu. Ang pagsunod niini nga mga sumbanan anaa kanila sa kanunay nga pakig-uban sa Espiritu Santo. Ug sa panahon nga ang mga kabatan-onan maghimo og lisud nga mga desisyon sa ilang kinabuhi, gikinahanglan nila kana nga pakig-uban.
Brother Beck: Nakita sab nako ang pamphlet isip mahinungdanong kapanguhaan sa pagpakigbahin sa ebanghelyo; magamit nato kini sa pagtabang sa atong mga higala nga makasabut nganong nagpakabuhi kita nga sama niini. Magamit usab kini sa mga kabatan-onan sa pag-andam og mga leksyon sa family home evening, sa mga pakigpulong sa miting sa sakrament, o mga leksyon sa mga klase sa Simbahan—o bisan gani sa pagpangita og mga tubag sa mga pangutana mahitungod sa mga sumbanan sa Ginoo. Samtang magbuhat ang mga kabatan-onan niini, ang mga doktrina ug mga baruganan nga naa sa Alang sa Kalig-on sa mga Kabatan-onan motuhop gayud sa ilang mga kasingkasing ug mamahimong bahin sa ilang pagkatawo.
Unsay inyong isulti niadtong nagtuo nga lisud ang paghupot niini nga mga sumbanan sa kalibutan karon?
Sister Dalton: Moingon ko nga, “Husto ka; lisud kini.” Apan pahinumduman ko sila nga mas lisud kon kamo dili maghupot sa mga sumbanan. Ang mga sala nagpalisud sa inyong kinabuhi ug maghatod kaninyo ngadto sa mga butang nga dili ninyo gusto. Moingon ko ang sa pagsunod niini nga mga sumbanan nga naa sa Alang sa Kalig-on sa mga Kabatan-onan mao ang yawe sa kalipay, ug ang tanan gustong magmalipayon.
Brother Beck: Walay ikatanyag ang kalibutan nga ikakumpara sa makahupay nga impluwensya sa Espiritu Santo, sa katagbawan nga mahibalo nga ang Langitnong Amahan nahimuot kaninyo, o sa gahum sa mga pakigsaad sa templo. Mao kini ang mga panalangin nga gisaad niadtong mosunod sa mga sumbanan sa Ginoo.
Sister Dalton: Daghan kaayo sa mga batan-ong babaye moingon, “nakahimo ko og ngil-ad nga butang, busa dili na ko makaadto sa simbahan.” Dayon magsugod sila og kahulog ngadto sa ngil-ad pa nga kinaiya. Apan moingon ko, “Kamo mahimo nga maghinulsol. Kamo mahimo nga mag-usab, ug karon ang panahon. Karon na ang adlaw. Mao kini ang inyong panahon.”
Unsa ang inyong ikatambag sa mga kabatan-onan kinsa wala kaayoy suporta diha sa panimalay sa pagsunod niini nga mga sumbanan?
Brother Beck: Mituo ko nga ang Ginoo mibutang sa matag usa kanato sa mga dapit diin makahimo kita sa pinakamaayo uban sa espirituhanong mga gasa nga gihatag Niya kanato. Kon ang inyong pamilya dili sama kaninyo og pasalig sa pagsunod sa mga sumbanan sa Ginoo, ayaw pag-undang. Padayon lang sa pagpakabuhi sa pamaagi nga inyong nahibaloan nga angay, tungod kay wala gayud kamo mahibalo kinsa sa inyong pamilya ang naniid kaninyo ug hilom nga nakaangkon og kalig-on gikan sa inyong ehemplo.
Sister Dalton: Usab, hinumdumi kanunay kon si kinsa kamo. Giandam kamo nga maanhi sa yuta karon tungod kay duna kamoy lig-ong pagpamatuod sa Manluluwas. Gipamatud-an ninyo kana didto sa kalibutan sa wala pa sa yuta. Sama sa gisulti ni Brother Beck, ang inyong pagsunod sa mga sumbanan tingali sa katapusan makapanalangin sa inyong pamilya. Ayaw pag-uyon-uyon. Ayaw pagpadala. Samtang sundon nato kini nga mga sumbanan, mahimo kita nga kahayag. Makapasanag kita sa kahayag sa Manluluwas.
Unsa nga mga panalangin ang moabut sa mga kabatan-onan kon sundon nila ang mga sumbanan?
Brother Beck: Misaad ang Ginoo og daghang talagsaong panalangin niadtong magmatinuoron sa mga sumbanan nga Iyang gipahiluna. Ang uban moabut dayon: ang pakig-uban sa Espiritu Santo, kalinaw sa tanlag, ug magtubo nga pagtuo ug kamasaligon. Sa matag higayon nga mosunod kita sa sugo, ang atong katakus sa pagsunod motubo.
Sister Dalton: Ang kalibutan nag-ingon, “Sulayi ang tanan. Tungod kay batan-on pa kamo karon, maka-eksperimento kamo.” Ang mahitabo kon sundon ninyo kana nga mensahe susama sa usa ka embodo nga dako sa sinugdanan apan magkapig-ot sa ilawom. Mapugngan ang inyong kabubut-on tungod niana nga mga desisyon. Ang pag-eksperimento mosangput sa pagkaadik. Ang panahon sa kahinam mahimong mosangput sa pagmabdos nga dili pa minyo o kausaban sa inyong plano sa kinabuhi. Apan kon magsubay kamo sa usa ka higpit nga dalan—balihon ang usa ka embodo—ug mosunod sa mga sumbanan sa Ginoo, ang tibuok kalibutan moabli og dako samtang magsunod kamo sa mga sugo. Imbis magapos sa inyong mga sayop, duna kamoy kagawasan nga magpakabuhi sa matang sa kinabuhi nga maghimo kaninyong malipayon.
Brother Beck: Ang kalibutan nagkinahanglan og batan-ong mga tawo kinsa makasabut sa bili niini nga mga panalangin ug unsaon nga mahimong angayan niini. Daghan sa inyong mga higala ug mga kaedad ang nangita og mga alternatibo sa mga paagi sa kalibutan, kinsa nagtinguha og tinuod nga mga baruganan nga katukuran sa ilang kinabuhi. Sila nagkinahanglan lamang sa inyong ehemplo ug pagpamatuod.
Gusto ba kamong mopakigbahin og dugang pa sa mga kabatan-onan?
Sister Dalton: Ang mensahe nga akong ihatag sa mga kabatan-onan mao nga ang paghinulsol dili ngil-ad nga butang, usa kini ka panalangin. Ang Manluluwas mihatag kanato og katakus sa paghinulsol. Ayaw paghulat. Mahimo kitang mag-usab, ug kana makatabang nato sa pagsunod sa mga sumbanan. Ang usa ka mahiyason nga batan-ong lalaki o batan-ong babaye nga gigiyahan sa Espiritu makausab sa kalibutan. Mahimo nga kamo kana.
Brother Beck: Gihigugma namo kamo, ug nagmaya kami sa inyong pagkamaayo. Makahinam ug makadasig alang kanamo nga makasaksi sa inyong kamatinud-anon. Kon bation ninyong nag-inusara, hinumdumi nga naay liboan nga mga kabatan-onan sama ninyo sa tibuok kalibutan kinsa mapasaligon nga mohupot sa mga sumbanan sa Ginoo. Hinumdumi usab nga ang Espiritu Santo mahimo nga kanunay ninyong kauban. Pagpuyo nga takus sa iyang presensya, sunda ang Iyang mga pag-aghat, ug tuguti Siyang mohupay kaninyo kon gikinahanglan ninyo kini. Naghigugma ug misalig kaninyo ang Langitnong Amahan. Daghang mahinungdanong butang ang giandam Niya alang kaninyo.
Sa wala, ibabaw: Paghulagway sa litrato pinaagi ni Robert Casey; sa tuo: Imahe ni Kristo, ni Heinrich Hofmann, sa maayong kabubut-on sa C. Harrison Conroy Co.
Litrato sa mga agianan © Plainpicture/Hasengold